Mateo 6
6
Pitapis mana wilapaypa waktsakunata yanapanantsipaq Jesús yachatsishqan
1<<Paqta runakuna rikashunalaykipaq alikunata rurapäkunkiman.#Mat. 23.5. Tsayno ruraptikiqa jana patsacho kaykaq Taytayki manami ima premiutapis qoshunkipaqtsu.
2<<Waktsakunata yanaparqa orgullösu#6.2 Wakin runakunaqa laqla nipäkun. runakunanöqa ama sumätsinkitsu. Paykunaqa cornëtata tukaqnöraqmi sinagögakunacho y cällikunachöpis yanapashqanta wilakärin. Rasunpami kayno nï: Paykunapaqa runakuna alabashqalannami premiun kanqa. 3Pitapis yanapashpaykiqa ama wilakärinkitsu. 4Mana wilakuylapa yanapaptikiqa Taytaykimi [lapanpa nawpancho] premiuta qoshunkipaq.
Tayta Diosta manakunantsipaq Jesús yachatsishqan
Lucas 11.2-4
5<<Tayta Diosta manakur ama orgullösu runakunanöqa manakärinkitsu.#Luc. 18.10-14. Paykunaqa runakuna rikanalanpaqmi sinagögakunacho y cälli esquïnakunacho ichiykur Tayta Diosta manakärin. Rasunpami kayno nï: Paykunapaqa runakuna alabashqalanmi premiun kanqa. 6Tayta Diosta manakurqa wayikiman yaykuykur punkuykita wichqakurkur manakärinki. Tsaycho kikilayki manakushqaykita rikarmi Taytaykiqa [lapanpa nawpancho] premiuta qopäkushunkipaq.
7<<Mana Israel runakunaqa tsay palabralawanmi yaparir yaparir manakärin. Tsayno manakärin Tayta Dios mayananpaq kashqanta yarparmi. Qamkunaqa ama tsayno manakärinkitsu. 8Manaraq manakuptikipis Taytaykiqa ima pishïshushqaykitapis musyaykannami. 9Qamkunaqa Tayta Diosta kayno manakärinki:
<< <Jana patsacho kaykaq Papä, qampa jutiki respitashqa kaykulätsun.
10Kay patsacho mandaq kanaykipaq aywaykalämuy.
Jana patsacho cäsukushushqaykino kay patsachöpis cäsukuykuläshunki.
11Waran waran mikupäkunäpaq mikuyta kamaripaykalämay.#Prov. 30.8-9.
12Chikimaqnïkunata perdonashqäno noqakunatapis perdonaykalämay.
13Jutsa rurayman ama kacharpalämaytsu.
Tsaypa trukanqa mana alikunapita tsapaykalämay.
[Qampa makikichömi imaykapis kaykan.
Lapanpaq munayniyuqmi kaykanki.
Imayyaqpis alabashqa kaykulay. Amén.]> >>
14<<Runa mayikita perdonaptikiqa qamkunatapis jana patsacho kaykaq Taytayki perdonashunkimi. 15Runa mayikita mana perdonaptikimi itsanqa qamkunatapis mana perdonashunkipaqtsu.#Mar. 11.25-26.
Ayünupita Jesús yachatsishqan
16<<Ayunashpayki ama orgullösu runakunano kankitsu. Paykunaqa runakuna rikanalanpaqmi almatakashqa puripäkun. Qamkunata rasunpami kayno nï: Paykunapaqa runakuna alabashqalanmi premiun kanqa. 17Qamkuna ayunashpaykiqa shumaq paqakärinki y naqtsakärinki. 18Tsayno ruraptiki runakuna manami musyanqatsu ayunarkaykashqaykita. Runakuna mana rikashuptikipis lapanta rikaq Taytaykimi rikaykäshunki. Paymi [lapanpa nawpancho] premiuta qopäkushunkipaq.
Gloriaman riquëzata churakunantsipaq Jesús yachatsishqan
Lucas 12.33-34
19<<Kay patsacho riquëzata ama shuntapäkuytsu. Kay patsacho riquëzataqa puyumi ushan, runami apakun y ismurmi ushakan.#Stg. 5.2-3. 20Tsaypa trukanqa gloriaman riquëzata churakäriy.#6.20 Gloriaman riquëzata churakuntsi imantsikunatapis rantikuykur tsay qellaywan waktsakunata yanaparmi. Tsaypita tantiyanaykipaq liyinki Luc. 12.33-34. Gloriachöqa manami puyupis ushanqatsu, runapis apakunqatsu ni ismunqatsu. 21Maychömi riquëzayki kaykan tsaylamanmi shonquykipis yarparaykanqa.
Nawintsi atskino kashqan
Lucas 11.34-36
22<<Nawikikunaqa shonquykipaq atskinömi kaykan. Tsaymi nawiki ali kaptinqa shonquykipis atskicho kaykan. 23Nawiki mana ali kaptinmi itsanqa tsakaycho kaykanki. Shonquykicho atski mana kaptinqa pasaypa tsakäpakushqami karkaykanki.#6.22-23 Tsayno parlarqa Jesucristo kaynömi nirqan: Tayta Dios japalanta sirvirqa atskichönömi ali kawapäkun. Tsayno mana sirvirmi itsanqa tsakäpakushqano kawapäkun.
Rïcu kanalantsipaq mana yarpachakunantsipaq Jesús yachatsishqan
Lucas 16.13
24<<Manami pipis ishkay patronta sirvintsu. Ishkay patronta sirvirqa jukninta chikin y juknintana kuyan. Jukninta cäsukun y juknintaqa manami cäsukuntsu. Tsaynölami rïcu kanalaykipaq yarpachakurqa Tayta Diosta sirviyta mana kamäpakunkitsu.
Tayta Diosman yärakunantsipaq Jesús yachatsishqan
Lucas 12.22-31
25<<Tsayno kaykaptinqa ama yarpachakäriytsu kayno nir: <¿Imanöraq kawashaq? ¿Imataraq mikushaq? ¿Imataraq upushaq? ¿Imataraq jatikushaq?> Manami mikuylapaq ni röpalapaq yarpachakunantsipaqtsu kaykantsi. 26Pishqukuna imano kawashqantapis shumaq tantiyakäriy. Paykunaqa manami murukuntsu ni cosechantsu ni pirwakuntsu. Tsayno kaykaptinpis jana patsacho kaykaq Taytaykimi mikuyta kamaripan. Tayta Diospaqqa pishqukunapitapis masmi välipäkunki.
27<<Mayjina yarpachakurpis ¿piraq juk kuchus maslatapis winarkunman? 28Tsayno kaykaptinqa ¿imanirtaq yarpachakunki ali röpayuq kanaykipaq? Waytakuna imano winashqantapis tantiyakäriy. Waytakunaqa manami arukuntsu ni putskakuntsu. 29Noqa kaynömi nï: Waytakuna kuyaylapaq kashqannöqa manami rey Salomónpa röpankunapis karqantsu.#1Rey. 10.4-7; 2Crón. 9.3-6. 30Janan shonqula yärakuq runakuna, wara warantin rupatsishqa kananpaq kaykaptinpis qewakunata kuyaylapaqta winaykätsirqa ¿manatsuraq qamkunatapis munashqaykita Tayta Dios kamaripäshunki?
31<<Tsayno kaykaptinqa ama lakikäriytsu: <¿Imataraq mikushaq? ¿Imataraq upushaq? ¿Imataraq jatikushaq?> nishpayki. 32Tsaynöqa lakikärin Tayta Diosman mana yärakuq runakunalami. Jana patsacho kaykaq Taytayki imata munashqaykitapis musyaykanmi. 33Imaykapitapis mas puntataqa Tayta Dios mandaykashqancho kawapäkunaykipaq y pay munashqanno kawapäkunaykipaq yarpachakäriy. Tsayno kawapäkuptikiqa imata munashqaykitapis kamaripäshunkimi. 34Cada junaq imalapis yarpachakunaykipaq kaykaptinqa wara junaqpaq ama yarpachakäriytsu.#Sal. 55.22; 1Ped. 5.7.
Seçili Olanlar:
Mateo 6: qvmB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2003, Wycliffe Bible Translators, Inc. All rights reserved.