Lʉʉka 9

ɄYesu isuungʼha avasungʼhua vaake kɨjigho na vavɨlɨ

(Mataayi 10:5-15; Malɨka 6:7-13)

1ɄYesu akavakemeela avavʉlanɨsɨvua vaake kɨjigho na vavɨlɨ. Akavapeela ingʉfu nʉ vʉtavʉlɨlua ʉvwa kʉdaga amapepo ghooni, nʉ vwa kʉsosia inhamu. 2Pe akavasuungʼha kupʉlɨsia imhola isa Vʉtwa vwa Ngʉlʉve na kusosia avatamu. 3Akavavʉʉla akati, “Mʉ lʉghendo lwinu, namʉngagadaghe kɨmonga: lʉʉve lʉkwegho, nambe ɨnyambe, nambe ʉnkate, nambe indalama, nambe ʉmwenda ʉghwa kwandʉla. 4Ɨnyumba jɨno kyavikʉvʉpɨla, mukalaghe mumuo kuhanga pano muvʉʉka mʉ lɨkaaja ɨlio. 5Neke mʉ lɨkaaja lɨno avaanhu navikʉvʉpɨla, pano muhʉma mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu,#9:5 Mʉkungʼunaghe ʉlʉngʼhʉnde lʉno lʉlɨ mʉ maghʉlʉ ghiinu: Kwe kʉvonia kuuti ʉNgʉlʉve avakanile avaanhu ava lɨkaaja lɨla, ʉlwakʉva vavakanile avasungʼhua vaake. kuuva kɨvalɨlo ɨkya nkole ʉghwa kʉkaana kukwʉpɨla ɨMhola ɨNofu.” 6Pepano avasungʼhua vala, vakalʉta mʉ makaaja vipʉlɨsia ɨMhola ɨNofu, na kusosia avatamu mwoni muno vakalʉtagha.

ɄHelode ihangajɨka vwɨmɨla ʉYesu

(Mataayi 14:1-12; Malɨka 6:14-29)

7Imbombo sooni sino ʉYesu akava ivomba, ʉntwa ʉHelode akava ipʉlɨka imhola saake. Isio sikampelela kuuva ni nganighani, ʉlwakʉva avaanhu vamonga vakatisagha, ʉYohani ʉMwofughi asyʉkile kuhʉma kʉ vafue. 8Avange vakatisagha, ʉmʼbɨli ʉEliya isile kange. Avange vakava viiti, ʉmo mʉ vavɨli avakʉʉlʉ, asyʉkile. 9Neke ʉHelode akati, “ɄYohani nɨlyanʼdumwile ʉmutu! Lɨno, ghwe veeni jʉno ivomba isi sino nipʉlɨka?” Pe ʉHelode, akava ilonda kyongo pitangʼhana nʉ mwene.

ɄYesu ilɨsia avaanhu imbilima ihaano

(Mataayi 14:13-21; Malɨka 6:30-44; Yohani 6:1-14)

10Avasungʼhua vala vakagomoka kwa Yesu, vakampangɨla sooni sino vavombile. Pe akavatoola vakalʉta mʉ lɨkaaja lɨno lɨkatambʉlwagha Betisaida, kuuti vaave veene pa vʉsyefu. 11Neke avaanhu vinga ye vakagwile kʉno alʉtile, vakava vilʉta kwa mwene. ɄYesu akavʉpɨlɨla vʉnofu, akatengʉla pikʉvavʉlanɨsia imhola isa Vʉtwa vwa Ngʉlʉve. Kange, avanya nhamu akava ɨkʉvasosia.

12Ye vwilile, avavʉlanɨsɨvua vaake kɨjigho na vavɨlɨ vakalʉta kwa mwene, vakati, “Ʉvatavʉle avaanhu valʉtaghe mʉ fikaaja na kʉ nyumba sino sili piipi, neke valonde ɨkyakʉlia nʉ vʉghono, ʉlwakʉva apa pe lʉnyika pasila kɨmonga ɨkya kʉvatanga.” 13ɄYesu akavavʉʉla akati, “Mʉvapeele ʉmue ɨkyakʉlia!” Aveene vakati, “Ʉsue tʉlɨ vasila kɨmonga, looli gha makate ghahaano ni samaki ivɨlɨ. Pamo tʉlʉte tʉghʉle ifyakʉlia, pe fikwɨle avaanhu ava vooni!” 14Avaanhu vano pwevalyale pala, avakɨnhaata veene valyale imbilima ihaano.

ɄYesu akavavʉʉla avavʉlanɨsɨvua vaake akati, “Mʉvavʉʉle avaanhu vikale vaave mʉ fipʉgha ifya vaanhu fijigho fihaano fihaano ndɨɨkɨ.” 15Pe vakavomba ndavʉle avavʉlile, avaanhu vooni vakikala. 16Pepano ʉYesu akatoola amakate ghala ghahaano ni samaki ivɨlɨ, akalola kʉkyanya, akahongesia kwa Ngʉlʉve. Akamenyʉla amakate ghala, akava ɨkʉvapeela avavʉlanɨsɨvua vaake kuuti vavaghavɨle avaanhu. 17Avaanhu vooni vakalia, vakikuta. Avavʉlanɨsɨvua vakakongʼhania ifisighasi, fikamema indɨɨlo kɨjigho ni vɨlɨ.

ɄPeteli ijova kuuti ʉYesu ghwe Kɨlɨsite

(Mataayi 16:13-19; Malɨka 8:27-29)

18Ɨkɨghono kɨmonga, ʉYesu na vavʉlanɨsɨvua vaake vakava palɨkɨmo pamonga pa vʉsyefu. ɄYesu akava ikufuunya kwa Ngʉlʉve. Pambele akavaposia avavʉlanɨsɨvua vaake akati, “Avaanhu viiti, ʉne neene veeni?” 19Vakamwamʉla vakati, “Vamonga viiti, veeve Yohani ʉMwofughi, avange viiti veeve Eliya. Avange viiti veeve ʉmo mʉ vavɨli avakʉʉlʉ jʉno asyʉkile.”

20ɄYesu akavaposia kange, “Neke ʉmue mwiti, neene veeni?” ɄPeteli akamwamʉla akati, “Ʉve veeve Kɨlɨsite, jʉno ʉNgʉlʉve alyatiile ilikʉnsuungʼha!” 21ɄYesu akavavʉʉla kuuti, navangamʼbʉlaghe muunhu ɨmhola ɨjio.

ɄYesu ijova ɨmhola ɨja kʉfua na kusyʉka kwa mwene

(Mataayi 16:20-28; Malɨka 8:30–9:1)

22ɄYesu akavavʉʉla kange akati, “Lʉnoghiile ʉne ne Mwana ghwa Muunhu kuuva ni mhumuko nyinga na kukanua na vagojo na vavaha va vatekesi na vavʉlanɨsi va ndaghɨlo,#9:22 Vagojo na vavaha va vatekesi na vavʉlanɨsi va ndaghɨlo: Ava ve valongosi va Vayahudi mʉ mbombo sooni. Ɨmba ɨlɨsio Kɨpʉgha kya valongosi kʉ Vʉghanʉle vwa Masio aMahesia. na kubudua. Neke ɨkɨghono ɨkya vʉtatu nisyʉka.”

23Pambele, ʉYesu akavavʉʉla vooni akati, “Ʉmuunhu jʉno ilonda kʉkʉmbɨngɨlɨla, avʉleke ʉvughane vwake, itavʉle ambɨngɨlɨlaghe jaatu, nambe kʉʉve kwe kʉfua. 24Ʉlwakʉva ʉmuunhu jʉno ilonda kupoka ʉvwʉmi vwake, ʉjuo ikwambʉsia, looli ʉmuunhu jʉno ikwambʉsia ʉvwʉmi vwake vwɨmɨla ʉne, ʉjuo ghwe ɨkʉvʉpoka. 25Ʉmuunhu ndepoonu ivʉmbʉlɨla kɨki kuuva nʉ vʉmofu vwoni ʉvwa ɨɨsi, neke ambʉsie ʉvwʉmi vwake? 26Ʉmuunhu ghweni angangʼhaane ʉne ni mbʉlanɨsio sango, na jʉʉne ne Mwana ghwa Muunhu, nɨlaava nikwisa mʉ vʉvaha vwango, nʉ vwa Nhaata palɨkɨmo na vanyamhola avɨmɨke, nɨlankaana ʉmuunhu ʉjuo. 27Kyangʼhaani nɨkʉvavʉʉla, vamonga nkate mʉlyʉmue mwe vano mʉlɨ apa, navalafua kuhanga vavwaghe taasi ʉVʉtwa vwa Ngʉlʉve.”

ɄYesu ikwandʉka

(Mataayi 17:1-8; Malɨka 9:2-8)

28Ye fikilile ifighono lekelakwoni, kuhʉma ijova amasio aghuo, ʉYesu akavatoola ʉPeteli, ʉYohani, nʉ Yakovo, akatogha navo kʉ kɨdunda kukufuunya. 29Ye ikufuunya, akandʉka kʉ maaso, nagha menda ghaake ghakava mavalafu, ghivalatɨka fiijo. 30-31Ʉnsiki ghʉghuo, vakasetʉka avaanhu vavɨlɨ vivalatɨka mʉ vʉvaha vwa Ngʉlʉve. Avaanhu avuo alyale ghwe Moose nʉ Eliya, vakava vijova nʉ Yesu, vʉle kyaikwɨlanɨsia ʉlwa kʉfua kʉ Yelusalemu.

32Ʉnsiki ʉghuo ʉPeteli na vanine valyaghoneliile. Neke ye visisimuka, vakavona ʉYesu ivalatɨka. Kange, vakavaagha avakɨnhaata vavɨlɨ vɨmile palɨkɨmo nʉ mwene. 33Neke avaanhu vala vavɨlɨ ye vilekana nʉ Yesu, ʉPeteli akamʼbʉʉla ʉYesu akati, “Ghwe Ntwa, lʉnono ʉsue tukalaghe bahaapa. Lɨno, tʉjenge ifyeve fitatu: kɨmo kɨɨve kyako, kɨmonga kya Moose, ɨkɨngɨ kɨɨve kya Eliya.” ɄPeteli naakakɨtangʼhinie kɨno ajovile.

34ɄPeteli ye ijova amasio aghuo, lɨkiisa ɨlɨfunde lɨkavakupikila. Apuo vakoghopa kyongo. 35Pe lɨkapʉlɨkɨka ɨlɨsio kuhʉma mʉ lɨfunde lɨkati, “Ʉjʉ ghwe Mwanango jʉno nɨnsalwile, mʉmpʉlɨkɨsyaghe ʉmwene!” 36Ɨlɨsio ye lɨpʉlɨkiike, ʉYesu akavoneka alɨ mwene. Avavʉlanɨsɨvua vaake navalyampangiile muunhu mʉ fighono ifio, sino vasivwene.

ɄYesu ɨkʉnsosia ʉnsoleka ʉnya lɨpepo

(Mataayi 17:14-18; Malɨka 9:14-27)

37Ɨkɨghono ɨkya vʉvɨlɨ, ʉYesu na vavʉlanɨsɨvua vala vatatu ye vikile kuhʉma kʉ kɨdunda, vakatangʼhana nɨ lɨpʉgha lya vaanhu. 38Kuhʉma mʉ lɨpʉgha lɨla, ʉmuunhu jʉmonga akakemeela fiijo akati, “Ghwe Mʼbʉlanɨsi, nisʉʉma ʉnsosie ʉmwanango, ʉlwakʉva nɨlɨ naghwo jʉjʉʉjʉ. 39Kekinga ɨlɨpepo pano lɨkʉmpelʉlania, ye ikolagha fiijo. Kange, lɨkʉnsukania na kʉkʉmʉghwɨsia paasi iiva hwene nya kɨvafi, kʉmo lihʉma ɨlɨtotofulo mʉ mʉlomo. Ɨlɨpepo ɨlɨ nalɨkʉmʉlekesia ngʼhaningʼhaani, lifikʉntwangɨsyagha. 40Navasʉʉma avavʉlanɨsɨvua vaako kuuti valɨhʉmie, vakunua.” 41ɄYesu akati, “Ʉmue, mwe kɨsina ɨkɨsila lwɨtɨko, ɨkɨnya nyiiho imbiivi! Nikalile numue ʉnsiki ghwoni ʉghʉ, mʉkyale kʉkʉnhangʼhania? Mʉleete ʉmwanaako apa.”

42Ʉnsoleka jʉla ye ilʉta, ɨlɨpepo ɨlɨlamafu lɨla lɨkamʉghwɨsia paasi, lɨkansukania. Neke ʉYesu akalɨdalɨkɨla, akansosia ʉnsoleka jʉla, akanʼgomosia kwa viise. 43Avaanhu vooni ye vasaghile ingʉfu imbaha isa Ngʉlʉve ndavʉle silivuo, vakadegha kyongo.

ɄYesu ijova kange ɨmhola ɨja kʉfua kwa mwene

(Mataayi 17:22-23; Malɨka 9:30-32)

Avaanhu vala ye vifidegha sooni sino avombile ʉYesu, akavavʉʉla avavʉlanɨsɨvua vaake akati, 44“Mʉpʉlɨkɨsyaghe vʉnofu sino nitapikʉvavʉʉla! Ʉne ne Mwana ghwa Muunhu nitapivɨkua mʉ mavoko gha vaanhu.” 45Avavʉlanɨsɨvua vaake navakalʉtangʼhania lʉno ijova, ʉlwakʉva lʉkafisilue kʉ veene valeke kʉkʉlʉtangʼhania, vakoghopa kʉkʉmposia.

Ʉvʉvaha ʉvwa kyangʼhaani

(Mataayi 18:1-5; Malɨka 9:33-37)

46Avavʉlanɨsɨvua va Yesu vakatengʉla kukanɨngʼhana kuuti, ghwe veeni jʉno iliiva mʼbaha mʉ veene. 47ɄYesu akakagʉla amasaaghe ghaave. Pepano akantoola ʉmwana ʉnʼdebe, akamʼbɨɨka piipi nʉ mwene, 48pe akavavʉʉla akati, “Jʉno ɨkʉmwʉpɨla ʉmuunhu ʉnʼdebe ndavʉle ʉmwana ʉjʉ mʉ vughane vwango, ɨkʉnyʉpɨla ʉne. Kange, jʉno ɨkʉnyʉpɨla ʉne, iiva amwʉpiile jʉno asungʼhile. Ʉlwakʉva jʉno nʼdebe mʉlyʉmue mweni, ʉjuo ghwe mʼbaha.”

Jʉno namʉlʉgʉ ghwitu, nʼjiitu

(Malɨka 9:38-40)

49ɄYohani akamʼbʉʉla ʉYesu akati, “Ghwe Ntwa, twamwagha ʉmuunhu jʉmonga idaga amapepo mʉ lɨtavua lyako, twankaana, ʉlwakʉva naghwa kɨpʉgha kiitu.” 50ɄYesu akamwamʉla akati, “Namʉngankanaghe, ʉlwakʉva ʉmuunhu ghweni jʉno namʉlʉgʉ ghwinu, alɨ lʉbale lwinu.”

AVasamalia vamonga vikaana kʉkʉmwʉpɨla ʉYesu

51Ifighono ifya Yesu kutogha kʉkyanya ye fili piipi, akalamʉla kulʉta kʉ Yelusalemu, akavʉʉka ilʉta. 52Ye alɨ mʉ sɨla, akasuungʼha avaanhu valongole mʉ lɨkaaja ɨlya Vasamalia#9:52 Vasamalia: Ɨmba kʉ Vʉghanʉle vwa Masio aMahesia. kuuti vannosekesie pamonga. 53Neke avaanhu va kʉla vakakaana kʉkʉmwʉpɨla, ʉlwakʉva alyalʉngiime kulʉta kʉ Yelusalemu. 54Avavʉlanɨsɨvua vaake, ʉYakovo nʉ Yohani ye valʉvwene ʉluo, vakati, “Ghwe Mʉtwa, ghulonda tʉsʉʉme ʉmwoto kuhʉma kʉkyanya ghwise ghʉvanyaanye, ndavʉle ʉEliya vʉle alyavombile?”#9:54 Ndavʉle ʉEliya vʉle alyavombile: Amasio agha namweghale mʉ fitabu fimonga ifikʉʉlʉ. 55Neke ʉYesu akavasyetʉkɨla, akavadalɨkɨla. Akati, “Namutangʼhinie amoojo ghiinu ndavʉle ghanoghiile kuuva vwɨmɨla avajiinu.#9:55 Namutangʼhinie amoojo ghiinu ndavʉle ghanoghiile kuuva vwɨmɨla avajiinu: Amasio agha namweghale mʉ fitabu fimonga ifikʉʉlʉ. 56Ʉlwakʉva ʉne ne Mwana ghwa Muunhu nanɨlisile kutipula, looli nɨlisile kʉkʉvapoka avaanhu.” Vakavʉʉka vilʉta kʉ kɨkaaja ɨkɨngɨ.

Kukutavʉla kʉkʉmʼbɨngɨlɨla ʉYesu

(Mataayi 8:19-22)

57ɄYesu na vavʉlanɨsɨvua vaake ye valɨ mʉ sɨla, ʉmuunhu jʉmonga akamʼbʉʉla ʉYesu akati, “Nɨkʉkʉvɨngɨlɨlagha kwoni kʉno ghulʉta!” 58ɄYesu akati, “Ingʼheve sili ni mhanga, injuni sili ni fivwasu, neke ne Mwana ghwa Muunhu, nɨlɨ nsila nambe apa kʉghona.”

59ɄYesu akamʼbʉʉla ʉmuunhu ʉjʉnge akati, “Ʉmbɨngɨlɨlaghe!” Ʉmuunhu jʉla akati, “Ghwe Mʉtwa, ʉnhavʉle nɨlʉte taasi nɨnsyɨle ʉnhaata ghwango.” 60ɄYesu akamwamʉla akati, “Valeke avafue vavasyɨlaghe avafue vaave. Looli ʉve, ʉlʉtaghe kupʉlɨsia ʉVʉtwa vwa Ngʉlʉve.”

61Ghwope ʉjʉnge akamʼbʉʉla ʉYesu akati, “Ghwe Mʉtwa, nɨkʉkʉvɨngɨlɨlagha. Lɨno, ʉnhavʉle taasi nɨlʉte nɨhwesie kʉ kaaja.” 62ɄYesu akamʼbʉʉla akati, “Ʉmuunhu nave atengwile kulɨma ni ngʼombe, neke asyetʉkaghe kʉnsana, ʉjuo naanoghiile kuuva mʼbombi mʉ Vʉtwa vwa Ngʉlʉve.”

Seçili Olanlar:

Lʉʉka 9: wbi

Vurgu

Paylaş

Kopyala