Piligu 5
5
Adam zuliya
(1 Yɛlikura 1.1-4)
1 #
Pil 1.27-28; 5.2
Mat 19.4; Maak 10.6 Adam zuliya yuya n-sab’ kpe ŋɔ. Naawuni ni daa nam ninsala, o daa nam’ o ŋ-ŋmahindila omaŋa. 2O daa nam ba la doo mini paɣa. Ka niŋ alibarika niŋ bɛ ni ka boli ba ninsalinima saha shɛl’ o ni daa nam ba maa. 3Adam ni daa ti paai yuun’ kɔbiga ni pihita saha shɛli ka o daa dɔɣi bidibiga ŋun ŋman’ o m-bol’ o yuli Sɛt. 4Adam ni daa dɔɣi Sɛt maa nyaaŋa, o daa niŋla yuun’ kɔbisinii. O daa lan dɔɣi bidibisi mini bipuɣinsi pahi. 5Adam daa niŋla yuun’ kɔbisiwɛi ni pihita, ka naanyi yi dunia yili.
6Sɛt ni daa ti paai yuun’ kɔbiga ni anu saha shɛli ka o daa dɔɣi Ɛnɔsh. 7Sɛt ni daa dɔɣi Ɛnɔsh maa nyaaŋa, o daa niŋla yuun’ kɔbisinii ni ayopɔin. O daa lan dɔɣi bidibisi mini bipuɣinsi pahi. 8Sɛt daa niŋla yuun’ kɔbisiwɛi ni pinaayi, ka naanyi yi dunia yili.
9Ɛnɔsh ni daa ti paai yuun’ pihiwɛi saha shɛli ka o daa dɔɣi Kɛnan. 10Ɛnɔsh ni daa dɔɣi Kɛnan maa nyaaŋa, o daa niŋla yuun’ kɔbisinii ni pinaanu. O daa lan dɔɣi bidibisi mini bipuɣinsi pahi. 11Ɛnɔsh daa niŋla yuun’ kɔbisiwɛi ni anu, ka naanyi yi dunia yili.
12Kɛnan ni daa ti paai yuun’ pisopɔin saha shɛli ka o daa dɔɣi Mahalalɛl. 13Kɛnan ni daa dɔɣi Mahalalɛl maa nyaaŋa, o daa niŋla yuun’ kɔbisinii ni pihinahi. O daa lan dɔɣi bidibisi mini bipuɣinsi pahi. 14Kɛnan daa niŋla yuun’ kɔbisiwɛi ni pia ka naanyi yi dunia yili.
15Mahalalɛl ni daa ti paai yuun’ pihiyɔbunaanu saha shɛli ka o daa dɔɣi Jarɛd. 16Mahalalɛl ni daa dɔɣi Jarɛd maa nyaaŋa, o daa niŋla yuun’ kɔbisinii ni pihita. O daa lan dɔɣi bidibisi mini bipuɣinsi pahi. 17Mahalalɛl daa niŋla yuun’ kɔbisinii ni pihiwɛinaanu, ka naanyi yi dunia yili.
18Jarɛd ni daa ti paai yuun’ kɔbiga ni pihiyɔbunaayi saha shɛli ka o daa dɔɣi Inok. 19Jarɛd ni daa dɔɣi Inok maa nyaaŋa, o daa niŋla yuun’ kɔbisinii. O daa lan dɔɣi bidibisi mini bipuɣinsi pahi. 20Jarɛd daa niŋla yuun’ kɔbisiwɛi ni pihiyɔbunaayi, ka naanyi yi dunia yili.
21Inok ni daa ti paai yuun’ pihiyɔbunaanu saha shɛli ka o daa dɔɣi Mɛtusɛla. 22Inok ni daa dɔɣi Mɛtusɛla maa nyaaŋa, o daa jɛmdi Naawuni viɛnyɛliŋga hal ti paai yuun’ kɔbisita. O daa lan dɔɣi bidibisi mini bipuɣinsi pahi. 23Inok daa niŋla yuun’ kɔbisita ni pihiyɔbunaanu. 24#Hib 11.5; Jud 14 Inok daa jɛmdi Naawuni viɛnyɛliŋga, ka so daa ti bi lan nya o, dama Naawuni n-daa kpuɣ’ o.
25Mɛtusɛla ni daa paai yuun’ kɔbiga ni pihiniinaayopɔin saha shɛli ka o daa dɔɣi Lamɛk. 26Mɛtusɛla ni daa dɔɣi Lamɛk maa nyaaŋa, o daa niŋla yuun’ kɔbisiyopɔin ni pihiniinaayi. O daa lan dɔɣi bidibisi mini bipuɣinsi pahi. 27Mɛtusɛla daa niŋla yuun’ kɔbisiwɛi ni pisopɔinyinika, ka naanyi yi dunia yili.
28Lamɛk ni daa ti paai yuun’ kɔbiga ni pihiniinaayi saha shɛli ka o daa dɔɣi bidibiga 29m-bol’ o yuli Nuhu#5.29 NUHU: Hiburuli ni Nuhu gbinni nyɛla “Vuhim” bee “Faako”. ka yɛli, “Bia ŋɔ ni sɔŋ ti ti tuun’ kpɛma tumbu ni, Yawɛ ni yɛli noli niŋ tiŋgban’ shɛli ŋɔ ni.” 30Lamɛk ni daa dɔɣi Nuhu maa nyaaŋa, o daa niŋla yuun’ kɔbisinu ni pihiwɛinaanu, ka lan dɔɣi bidibisi mini bipuɣinsi pahi. 31Lamɛk daa niŋla yuun’ kɔbisiyopɔin ni pisopɔinnaayopɔin ka naanyi yi dunia yili.
32Nuhu gba ni daa ti paai yuun’ kɔbisinu saha shɛli ka o daa dɔɣi Shɛm mini Ham ni Jafɛt.
Seçili Olanlar:
Piligu 5: DBwDB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Dagbani Bible with Deuterocanonical Books © Bible Society of Ghana, 2011.