aMatiyu 7
7
Sang tu to̱ akak amok baꞌ
(aLuk 6.37-38, 41-42)
1“Sang tu to̱ yin akak amok baꞌ, fan a ba ka to̱ yin'e. 2Kamok amok kuri amok afe yin tá to̱ yin ánerawe'me, kuri ayong ne a tà ma ka to̱ yin'e gip. Kuri kures afe yin ti maas yin ánerawe'me, kuri kuyong ne a tà ma ka maas ko yin'e gip.
3“Akye̱ sak wan ye̱re̱k ikuko̱ i ta se rinyisi afudang wan ne i won agbirik kaye̱e̱r rinyisi rifuan e̱? 4Ane̱ ne wan ta fe̱ be afudang wan ye, ‘Won mi ta ka tun ikuko̱ rinyisi, nong wan gip wan ta be agbirik rinyisi wan e̱?’ 5Wan akardak aner, tun agbirik a ta se kaye̱e̱r rinyisi wan nizham nong ta se̱ tà di ikuko̱ i ta se rinyisi afudang wan'e.
6“Sang tu no̱o̱k yin agabu ike̱ng iya i ta se zhe̱l baꞌ, sang tu barak yin álade ata yin áfe itso̱m baꞌ. Ke yin nye yin anong, á tà shesh ne i kirik i ta bu i tà ka marang yin.
Tse̱r yin, rip yin, rus yin kanukutu
(aLuk 11.9-13)
7“Yiir irip yin'e, a tà no̱o̱k yin; yiir itse̱r yin'e, ta se̱ yin; yiir itsor yin kanukutu'me a tà ka karak yin'e. 8Kamok koangan afe a tá rip a tù ku no̱o̱k, koangan afe a tá tse̱r a ta se̱, koangan afe a tá tsor a tu ku karak'e.
9“Ka aner akak kuse kaye̱e̱r yin átek inoon, afe ke igon wu tu ku rip abiredi, ne wu ku no̱o̱k kuta e̱? 10Ka, ke igon'e tu ku rip izos ne wu ku no̱o̱k iwhen e̱? 11Ke yin, i ta nye yin amaan'e, i ren i nyesek yin inoon yin ike̱re̱ itek, shita Ada afe ta se kaye̱e̱r kaza ta won dar a no̱o̱k aya a tu ku rip ike̱re̱ itek a? 12Kamok anong, koakye afe yin ta shim yin ánerawe tà ka nye yin'e, yin gip, ku nye yin ba'me. Kamok iyong ne inye kunik Itsi aMusa ne kubo̱so̱p áner kuzarap.
Kanukutu ka tase whe̱
(aLuk 13.24)
13“No̱ yin nanukutu kaya kata se whe̱, kamok kanukutu kaya kata be ni iwei se saa. Iren'e ro̱ kutseng baꞌ, áfe á ta no̱o̱s se dide̱ng. 14Amma kanukutu kafe kutser, kase hiir. Iren wu ro̱ kutseng. Áfe á ta kuus gop baꞌ.
A ren ritin kakon be agba wu
(aLuk 6.43-44)
15“Nye yin tatan be áner kuzarap áfe abo̱o̱s. Á be̱s nufe yin be kuse itsamang, amma katsak'e, á se kyo̱ndi ámaan ágabu katse. 16Yin tù ku ren yin ba be kuri itomong ba. Yin kun di yin ánerawe tan bo̱ kutes anap ritin ikiritsan a? Ka kutes atafo ritin aduruduk e̱? 17Anong ne ise, koakye ritin kakon katek tes kutes kutek, ne amaan kakon tes kutes kumaan'e. 18Kakon katek tà tes ámaan agba baꞌ, anong ne ámaan kakon tà tes agba atek baꞌ. 19Koakye kakon kaya sang ka ta tes agba atek baꞌ, a tà te̱me̱ng nong a ta barak nuro̱ng. 20Kamok anong, yin tà ren yin áner kuzarap áfe abo̱o̱s na be itomong ba.
Mi n kun ka ren yin baꞌ
(aLuk 13.25-27)
21“Sang koangan afe a tin yis ye, ‘Agwo̱m Ágwo̱m’ ne a tà no̱ kaye̱e̱r kaza baꞌ, ma ke aya a tá nye ike̱ng iya Ada mi aya a ta se kaye̱e̱r kaza ta shim. 22Katuk kayong ánerawe whe̱re̱ tà fe̱ be mi ye, ‘Agwo̱m Ágwo̱m, yir nye yir awazi kaye̱e̱r riyerek wan aꞌa? Yir turung yir amaan nabik kaye̱e̱r riyerek wan aꞌa? Yir nye yin itomong azhing dide̱ng kaye̱e̱r riyerek wan aꞌa?’ 23Ne mi ma fe̱ be ba ye, ‘Mi kun ka ren yin baꞌ. Dorok yin nasho̱o̱n mi. Kam yin be mi yin áfe amaan kunye.’
Áner afa afe rino̱k
(aLuk 6.47-49)
24“Kamok anong, koangan afe a ta fok rife̱ mi na, a ti nye itomong, a ta se kyo̱ndi aner rino̱k aya a ta be ritseng, aya a tá no̱k kasa wu natoon agudong. 25Nizen iya ne iza tá kpa, isho̱ng shishing ne kuwun be̱ be agap, gip be anong kasa'me kpa baꞌ, kamok a tá no̱k kasa'me natoon agudong. 26Koangan afe a fok rife̱ mi na, a ti nye itomong baꞌ, a se kyo̱ndi aner rino̱k aya a tá no̱k kasa wu natoon rize̱k. 27Izen iya ne iza tá kpa, isho̱ng shishing ne kuwun be̱ be agap, ku ta fa fe̱e̱p kasa'me ne ka wor kayirik, kayirik amaan kuyirik.”
28Nizen aYeso tá gang kufe̱ anong, iyong rigwo̱m ánerawe ame te zhing be kubo̱so̱p wu, 29kamok aYeso tú ku bo̱so̱p ba'me kyo̱ndi aner a ta be kukyem, sang kyo̱ndi áner kubo̱so̱p itsi ba baꞌ.
Seçili Olanlar:
aMatiyu 7: izrNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Wycliffe Bible Translators, Inc
