Sawmus 10
10
Kiyavwiye, aysawhka kuri pis pisenwa akak mbayavye gidatnikis?
1Kiyavwiye, mmahki pis piyawakad giwkis pihiyegavu? Mmahki pis ayemwe giwkis ku aysaw igkis abet kiyimwiki?
2Neras mbayavye igkis ikaw givitminkis madikte hiyeg. Igkis arewha gitkis hiyeg ku pariye yumanene gawaygikis gitivutkis. Uya keh igkis tuguhe arikut gidahankiswa giteynikis!
3Igkis mbayavye keh giwantikis akak ku pariye gimawkankis igkis kehkere. Ku pariye hiyeg kowtyakuvye ig ka aritnama giw Kiyavwiye Uhokri. Ig hawata awna iwit ku pariye adahannenwa mahivwihne Kiyavwiye Uhokri.
4Ku pariye hiyeg mbeyevye gihiyekemni ig ka hiyekere ku Kiyavwiye Uhokri ay. Git igwa kumaduka givit ay. Git Kiyavwiye Uhokri yuma ay.
5Hiyaksa akak madikte ini mbayka ku pariye ig keh, heneme git ig ka kakehniyema. Ig giwevankama ku Kiyavwiye Uhokri ka katiwnisatinek gitaraksan git. Ig ikawvari datte giwkis givetunyavu.
6Ig ivegmina gihiyekemni, ig awna: “Nah ka biyuksatinek nudatni. Nah ka hiyaptinek mbeyne.”
7Gibiy kivun akak wasaymka akak ibiytahaki, hawata akak puwimahka. Giwn inenwa amin arewhakinenwa, amin mbaykanenwa.
8Ig kadasa hiyeg kibeynevwi kennesa arimkat paytwempu adahan giwmeptenkis.
9Ig kadasa hiyeg ke kawokwinebe amun gayemwekri. Ig wahap hiyeg ku pariye yumanene gimaptentenkis adahan ig giwmeptenkis. Nikwe ig kamax giwin ariku giteyni, ig tivikevgi givinwat.
10Igme giwin dunihbetepka, ig tikisbetepka warikwit. Ig hahwa awaku ner givetunya ka gidatnisima.
11Ayteke ner awayg mbeyevye gihiyekemni awna: “Uhokri ka aritnema ariw inin. Ig manan, ig ka hiyap ariknawnama.”
12Kiyavwiye Uhokri, kannikawnaba. Hiyapkis git ner ku pariye mbeyevye gihiyekemni akak piwak detye. Ka ba miyeh neras ku pariye ay giwaku. Igkis yumanene gimaptentenkis giw!
13Mmahki ner awayg mbeyevye gihiyekemni ig ka kiyatha Kiyavwiye Uhokri? Mmahki ig ivegmina gihiyekemni ku Kiyavwiye Uhokri ka diyuhkisnek gihiyegavu gimigkis?
14Heneme pismeti, Kiyavwiye, pis hiyap pihiyegavu gihiyvankis mbeyne. Pis hiyap gikadnikis. Nikwe pis ahegbet adahan amnihpigkis avanenekwa akak piwak detye. Igkis mabimnavye kamaxwa pivitit, mmanawa avanenekwa pis parak abet gihawkankis.
15Kiyavwiye, aysawhka kuri pis pisenwa akak mbayavye gidatnikis? Hiyapkis gitkis avatra gihiyekemnikis amebyemni. Ka ba isaksin mpiya henentima.
16Kiyavwiye, pis ikivarat adahan avanenekwa. Hiyeg ku pariye kane ihpekere piwn igkis tukuhavepkanek ariw piwaxig.
17Igkisme neras ku pariye tuwatasewnevwi pitivut pis timapnek giviryepkawnikis. Pis ikinek gawaygikis.
18Pis timapnek gamnihswankis neras ku pariye hiyepnevwi mbeyne, neras ku pariye migenavye. Pis paraknek abet gihawkankis adahan gimaptentenkis kahadbe neras hiyeg amadgayavu inin ka takunima avisasigkis akiw.
Seçili Olanlar:
Sawmus 10: pluPB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2018, Wycliffe Bible Translators, Inc. All rights reserved.