Matie 12

Zhezü mán ɛnyànmán-bì

(Nyɛ́n nyan Markɛ̀n 2:23-28; mán Lükɛ̀n 6:1-5 wrú lɔ mɛ̀n)

1Ɛnvra jan vacì, Zhezü kɛ vɔ́n ci dùdú kɛ̀tɛ̀ hɔ̀n mɛ̀n ɛnyànmán-bì lɔ. N'ɛsɛ̀nkɛn-bɔ̀ ɔmùanwù kɛ ẅɛ̀n; yɔ bukru yɔ vɔyan dùdú lɔ kɩ yɔ rá n'ɛẅì lɔ. 2Ɛnvra léyi Ɔwɔ-nyànmàn-sùva-wá-bɔ̀ kán eci ndɔ lɔ nɔn, yɔ dɔ́ Zhezü le: “Ɛ̀ nyan v'ɛsɛ̀nkɛn-bɔ̀ kɛ hán eci léyi bɔ̀ ɛnyànmàn ke sɩ́ tán ɛnyànmán-bì vra lɔ nɔn.” 3Zhezü mrɛ́n yɔ ɔmùan le: “Nyɛ́n sɩ̀ krɛ̀ owrú léyi ye merɛ́n yɛ dɔ́ Davidɛ̀n ankà ɛnbì tɔ̀n léyi nɛ́n mán n'ɛsɛ̀nkɛn-bɔ̀ mɛhi ɔmùanwù kɛ ẅɛn yɔ nɛ́n? 4Nɛ̀n bru Ɔwɔ-wɔn lɔ mɛ̀n kɩ nɛ́n mán n'anwrɔn hɔ̀n mɛhi yɔ rá abùtùkumɛ́n hɔ̀n léyi ye ce Ɔwɔ nɔn; ɛnyànmàn kè sɩ̀ tán yɔ ɛkɔrɛ̀levri yɔ rá abùtùkumɛ́n ndɔ lɔ: bɔ́ ɛnyànmàn lɔ kɛ tán ɛcice-bɔ̀ zri kɩ ɛkɔrɛ̀levri kɛ̀ rá. 5Kàle nyɛ́n sɩ̀ krɛ̀ Mohizì nyànmàn lɔ mɛ̀n le, ɛnyànmán-bì lɔ, ɛcice-bɔ̀ hɔ̀n léyi ɔkɔ̀hɔ̀n-hán kɛ́n Ɔwɔ-cice-wɔn lɔ mɛ̀n nɔn, ke sɩ̀ ẅɛn ɛnyànmán-bì nyànmàn lɔ kɛ hɛ́n, kɩ ndɔ lɔ ke sɩ̀ di yɔ ɛgbàn mɛ̀n hàn? 6Tɛ́n, mɛ dɔ́ nyɛ̀n, ɛnu lɔ ndù vrán Ɔwɔ-cice-wɔn lɔ! 7Ke dú kɛ nyɛ́n nyri annànwɔrɛ mɛ̀n, Owrú Prɔnprɔn ankà-dɔ̀ ndɔ lɔ n'ɛmɛ̀n le: ‘Me ji ɛcüɛ̀n, tɛ́n kè sɩ̀ dù annɔ̀n cice’, kɩ ke sɩ̀ zrɔ tán le nyɛ́n wri anwrɔn hɔ̀n léyi kè sɩ̀ hàn eci zriɛmɛ́n nɔn. 8Ɔmuhi ɔwrɔnẅì Ẅì dú ɛnyànmán-bì nɛ́n Zi nɔn.”

Ɔwrɔn léyi ɛkɔrɛ̀ wù nɔn

(Nyɛ́n nyan Markɛ̀n 3:1-6; mán Lükɛ̀n 6:6-11 wrú lɔ mɛ̀n)

9Zhezü cɔhɔ́ ɛyri léyi nɛ́n dù nɔn, kɩ hɔ́n y'Ɔwɔ-sɛ́n-wɔn hɔ̀n lɔ ɔtɔ̀n mɛ̀n. 10Ɔwrɔn tɔ̀n dú nanvrɛn lɔ ɛkɔrɛ̀ nwù. Ɔwɔ-nyànmàn-sùva-wá-bɔ̀ ke ji ke di Zhezü ankà mɛ̀n; hɩ le kruhú de yɔ yrɛ nɛ̀n le: “Bɔ́ ɛnyànmàn lɔ kɛ tán ɛkɔrɛ̀levri yɛ kɔrɛ ɔwrɔn ɛnyànmán-bì lɔa?” 11Zhezü mrɛ́n yɔ ɔmùan le: “Ke dú kɛ ny'ɛmɛ̀n lɔ ɔwrɔn tɔ̀n ẅɛn kɔ̀kɔ̀sɛ̀ zri, kɩ kɔ̀kɔ̀sɛ̀ ndɔ lɔ ke bru ɛnnànmàn vrɛ́n tɔ̀n mɛ̀n ɛnyànmán-bì lɔ, nɛ́n sɩ̀ hɔ̀n nɛ́n mrɛ́n kɔ̀kɔ̀sɛ̀ lɔ ɛnnànmàn mɛ̀n nɛ̀n sɔhɔ́ nanvrɛn lɔa? 12Kɩ ɔwrɔnẅì zrɔ vrán kɔ̀kɔ̀sɛ̀! Ke dú ɔmu lɔ hô, bɔ́ ɛnyànmàn lɔ kɛ wá tán yɛ hán ɔwrɔn anvrɛn ɛnyànmán-bì lɔ.” 13Zɛtɛn Zhezü kɛ dɔ́ ɔwrɔn léyi ɛkɔrɛ̀ nwù nɔn le: “Sɩ̀ v'ɛkɔrɛ̀ lɔ ezì.” Nɛ̀n sɩ́ ɛkɔrɛ̀ ezì kɩ ɛkɔrɛ̀ lɔ wore. 14Ɔwɔ-nyànmàn-sùva-wá-bɔ̀ srɔ ɛntrɛ kɩ hɔ́n borɛkru, ô ke ji ɔmu le yɔ lɛ hán ô yɔ wri Zhezü nɔn.

Eci-bɩtan-wrɔn léyi Ɔwɔ mrɛ́n bɩ nɔn

15Ɛnvra léyi Zhezü yá le ye ji nɛ̀n ewri-yri nɔn, nɛ́n cɔhɔ́ ɛyri ndɔ lɔ kɩ anwrɔn bobrebe dú nɛ̀n ɛmɛẅi. Nɛ kɔrɛ ɛnlɔẅiɛ-bɔ̀ lɔ fɛn, 16tɛ́n nɛ wá tán yɔ ɛshishiemɛ̀n le ye bɩ́ dɔ́ ɔwrɔn léyi dú nɛ̀n nɔn yi ankà. 17Ɔmu lɔ de ndù nɔn, ô Ɔwɔ-mùanwú-ankà-dɔ́-wrɔn Ezàhi ankà léyi dɔ̀ nɔn kɛ̀ sá nmù:

18“Ɔwɔ dɔ̀ le: nyàn m'eci-bɩtan-wrɔn léyi mɛ̀n mrɛ́n mɛ́n bɩ nɔn,

m'ɛcüɛn-wrɔn léyi mɛ́n pɔ̀püɛ̀ lɔ fɛn dú ɛwú nɔn.

Mɛ lɛ hán m'Ɛnhɛ́n kè dú nɛ̀n ɛwú

kɩ nɛ lɛ dɔ́ ɛnhi wú anmàn hɔ̀n m'ɛnyrɔnnan ankà.

19Nɛ́n mán ɔwrɔn zriɛmɛ́n mɛhi yɔ sɩ̀ wrɔ́n ecüì kɩ nɛ́n sɩ̀ di

bobo, ye sɩ̀ yá nɛ̀n ɔmùan nɛ̀n dɔ́ anwrɔn ankà *andrɛnmɔɛn mɛ̀n.

20Nɛ́n sɩ̀ vɔ́n ɛfi-sè léyi gɔ́ kùrɛ̀n nɔn

kɩ nɛ́n sɩ̀ zɛ́n kɛniɛn léyi n'ɛyri-kàn kè sɩ̀ ẅɛ̀n ecüì nɔn.

Nɛ lɛ hán ɔmu lɔ hàn kɩ ɛnyrɔnnan kɛ lɛ kɔ̀nkà;

21kɩ ɛnhibù wú anmàn hɔ̀n lɔ fɛn ke le bɩ́ y'esɛ́ kɛ̀ hɛ́n nɛ̀n ɛwúɛ.”

Ankà gbàngbàn léyi yɛ dɔ́ ku nɛ̀n ɛwú nɔn, hɩ wú lɔ Zhezü mrɛ́n ɔmùan

(Nyɛ́n nyan Markɛ̀n 3:22-30; mán Lükɛ̀n 11:14-20 wrú lɔ mɛ̀n)

22Zɛtɛn ye bɩ́ ɔwrɔn tɔ̀n léyi anvɛ̀ bɔyɛ hɩ ke sɩ́ dɔ́ ankà mán, yɛ vá sɩ́ Zhezü, ɔmuhi ɛnhɛ́n gbàngbàn tɔ̀n dú nɛ̀n edòmɛ̀n nɔn. Zhezü kɔrɛ ɔwrɔn ndɔ lɔ, hán tán kɩ nɛ̀n bukru nɛ dɔ́ ankà kɩ nɛ kán ɛyri. 23Fɛcüè hɔ̀n lɔ fɛn dú anvɛmɛ̀n-frɛ́n-mɛ̀n kɩ yɔ dɔ̀ le: “Ne le dú Davidɛ̀n ẅì hɛ̀?” 24Tɛ́n ɛnvra léyi Ɔwɔ-nyànmàn-sùva-wá-bɔ̀ yá yɔ ɔmùan nɔn, yɔ dɔ̀ le: “Ɔwrɔn ndɔ lɔ kɛ wrɔ́ anhɛ́n gbàngbàn ɔmuhi ‘Bɛlzebülɛ̀n’ léyi dú y'ɔwrɔn cüìcüì nɔn kɛ tán nɛ̀n ɛkɔrɛ̀srɔn!” 25Tɛ́n Zhezü nyri y'ankà-tro kɩ kɛ dɔ́ yɔ zɛtɛn le: “Ɛnhi wú nɛ̀ncüì anmàn totɔtɔ̀n léyi y'anmàn-bɔ̀, kɛ kɔ́n y'edomɛ̀n anhà nɔn, ɔtrɔmɛ̀n lɔ, yɔ jrɛ́ y'edomɛ̀n. Anmàn totɔtɔ̀n mán ɛmɛ̀n totɔtɔ̀n, léyi ecüìwrɔn ke dú yɔ ɛmɛ̀n nɔn, ɔmùan-krɔn ke sɩ̀ dú yɔ, yɔ yɛ́ rɔ́. 26Ke dú kɛ Anwa-wrɔn cüìcüì kɛ wrɔ́ eci léyi dú Anwa-wrɔn cüìcüì tɛn nɔn, nɛ̀n dú n'edomɛ̀n annan-kran mɛ̀n; anhɔntan de n'ɛnnɛ̀ncüì-duyri ke le vru ke dù rɔ́ nɛ́n? 27Nyɛ dɔ̀ le mɛ wrɔ́ anhɛ́n gbàngbàn ɔmuhi Bɛlzebülɛ̀n kɛ tán mɛ̀n ɛkɔrɛ̀srɔn; zɛtɛn, antɔnwrɔn de kɛ tán anwrɔn hɔ̀n léyi nyɛ kɛ́n ɛsɛ̀n nɔn, ɛkɔrɛ̀srɔn kɛ wrɔ́ anhɛ́n gbàngbàn hɔ̀n lɔ nɛ́n? Anwrɔn hɔ̀n léyi nyɛ kɛ́n ɛsɛ̀n nɔn yɔ dùku yɔ nyri ɔmu le ny'ankà ke sɩ̀ zrɔa! 28Annànwɔrɛ mɛ̀n lɔ, Ɔwɔ Hɛ́n mɛ̀n de mɛ wrɔ́ anhɛ́n gbàngbàn hɔ̀n lɔ nɔn, hɩ mɛ̀n kɛ dɔ̀ le, Anhobɩ́-Nɛ̀ncüì-dúyri gɔ́ vá dú bɔ̀ ɛmɛ̀n.

29Ɔwrɔn zriɛmɛ́n ke sɩ́ bru ecüì-wrɔn ɛbemɛ̀n ô kè bɩ́ n'ɛci hɔ̀n lɔ, ke dú kɛ nɛ̀n sɩ̀ kɔra ecüì-wrɔn ndɔ lɔ. Tɛ́n, ɛnvra léyi nɛ̀n kɔra yi trɔ nɔn, ne le bɩ́ ɛci hɔ̀n lɔ fɛn léyi dú ecüì-wrɔn lɔ wɔn lɔ mɛ̀n. 30Ɔwrɔn léyi nɛ́n mɛhi bɔ́ sɩ̀ dùɛ nɔn, nɛ̀n dú m'egbri-wrɔn; kɩ ɔwrɔn léyi ke sɩ́ wá mɛ̀n ɛkɔrɛ̀ bɔ́ borɛkru nɔn, ke bonyì. 31Hɩ le kruhú de mɛ dɔ́ nyɛ̀n le: anwrɔnẅì kɛ lɛ cɔ́ ɛgbàn-bɩ-ce, ɛwɔra hɔ́n léyi yɔ dɔ́ ku Ɔwɔ ɛwú nɔn hɩ wú, tɛ́n ɔwrɔn léyi kɛ wora Ɛnhɛ́n Prɔnprɔn nɔn, nɛ́n sɩ̀ cɔ́ ɛgbàn-bɩ-ce. 32Ɔwrɔn léyi kɛ dɔ́ ankà gbàngbàn tɔ̀n ku ɔwrɔnẅì Ẅì wú nɔn, nɛ lɛ cɔ́ ɛgbàn-bɩ-ce, tɛ́n ɔwrɔn léyi kɛ dɔ́ ankà gbàngbàn ku Ɛnhɛ́n Prɔnprɔn ɛwú nɔn, nɛ́n sɩ̀ cɔ́ ɛgbàn-bɩ-ce ɛnvra ndɔ lɔ mɛ̀n mán ɛnvra léyi dú ezì kɛ và nɔn mɛ̀n.”

Ɛtɛ̀ mán n'ɛẅì

(Nyɛ́n nyan Lükɛ̀n 6:43-45 wrú lɔ mɛ̀n)

33“Ke dú kɛ nye ji nyɛ́n cɔ́ antɛ̀-ẅì ankrànkràn hô, ke ji le nyɛ́n ẅɛn ɛtɛ̀ ankrànkràn; ke dú kɛ nyɛ ẅɛn ɛtɛ̀ gbàngbàn hô, nyɛ lɛ cɔ́ antɛ̀-ẅì gbàngbàn. Ɔmuhi ye nyri ɛtɛ̀, n'ɛẅì léyi ne shì nɔn kruhú. 34Ɛnlɛbrì mɛ̀n bɔ̀! Anhɔntan de nyɛ lɛ hán nyɛ́n dɔ́ ankà ankrànkràn tɛ́n nyɛ́n dú anwrɔn gbàngbàn hɔ̀n nɛ́n? Ɔmuhi ɔmùan kɛ dɔ́ ankà hɔ̀n léyi nhyì dú ɛnbɔrɛ mɛ̀n nɔn. 35Ɔwrɔn ankrànkràn kɛ cɔ́ ɛci ankrànkràn n'ɛnnɛ̀ncüì-di-ci ankrànkràn lɔ mɛ̀n; ɔwrɔn gbàngbàn kɛ cɔ́ ɛci gbàngbàn n'ɛnnɛ̀ncüì-di-ci gbàngbàn hɔ̀n lɔ mɛ̀n. 36Mɛ dɔ́ nyɛ̀n le: ɛmrɛ̀nci bì lɔ, anwrɔn ke le di ɔwɔɛ̀n ankà gbàngbàn hɔ̀n léyi yɔ dɔ̀ nɔn hɩ wú. 37Ɔmuhi v'ankà-dɔ̀ lɔ wú de yɛ lɛ ci mɛ́n ɛmrɛ̀n nɔn, ô yɛ dɛ́ ɛnyràn mán nwù yɛ tán mɛ́n nɔn.”

Ɔwɔ-nyànmàn-sùva-wá-bɔ̀ ke ji anvɛmɛ̀n-frɛ́n-ci tɔ̀n kɛ̀ kàn

(Nyɛ́n nyan Markɛ̀n 8:11-12; mán Lükɛ̀n 11:29-32 wrú lɔ mɛ̀n)

38Zɛtɛn ɛnyànmàn-gbànvri-ankà-yé-bɔ̀ mán Ɔwɔ-nyànmàn-sùva-wá-bɔ̀ jan kɛ dɔ́ Zhezü le: “Ankà-yé-wrɔn, bɔ́ ji ɛ̀ hán anvɛmɛ̀n-frɛ́n-ci tɔ̀n ɛ̀ tán bɔ̀, bɔ̀ kàn.” 39Zhezü mrɛ́n yɔ ɔmùan le: “Ɛnvra ndɔ lɔ mɛ̀n bɔ̀ léyi dú anwrɔn gbàngbàn mán anmùan-anhyrɛ̀-di-bɔ̀ Ɔwɔ tɛ̀sɛ̀n nɔn, ke ji anvɛmɛ̀n-frɛ́n-ci tɔ̀n kɛ̀ kàn, tɛ́n anvɛmɛ̀n-frɛ́n-ci zriɛmɛ́n ke sɩ̀ hán tán yɔ, ke dú kɛ kè sɩ̀ dù Ɔwɔ-mùanwú-ankà-dɔ́-wrɔn Zhonasɛ̀n anvɛmɛ̀n-frɛ́n-ci lɔ kɩ. 40Ɔmuhi, ɔmu zri léyi Zhonasɛ̀n di ɛbi anhɔ̀n, ɛnnyran mán ɛcɛ̀n, ɛcàn vri lɔ mɛ̀ntɛ̀ mɛ̀n nɔn, ɔmu zri lɔ de ɔwrɔnẅì Ẅì ke le di ɛbi anhɔ̀n, ɛnnyran mán ɛcɛ̀n ɛnhibɩ́ nɔn. 41Ɛmrɛ̀nci bì lɔ, Ninivɛ̀n anmàn-bɔ̀ ke le tú nyɔn ɛnvra ndɔ lɔ mɛ̀n bɔ̀ zìwú kɩ kɛ lɛ dɔ́ ankà kú yɔ ɛwú, ɔmuhi Ninivɛ̀n anmàn-bɔ̀ crɔn yɔ eci-hán-ci ɛnvra léyi yɔ yá Zhonasɛ̀n Wɔ ankà-dɔ̀ lɔ nɔn. Kɩ ɛnu lɔ ɔwrɔn dù vrán Zhonasɛ̀n! 42Ɛmrɛ̀nci bì lɔ, ecüe mɛẅi nɛ̀ncüì-hi ke le tú nyɔn ɛnvra ndɔ lɔ mɛ̀n bɔ̀ zìwú kɩ kɛ lɛ dɔ́ ankà kú yɔ ɛwú, ɔmuhi nɛ̀n dú esù she hi-wú anmàn nɛ̀n vá Salomɔn ankà-nyri-ankà nukù-die-yri nɔn. Kɩ ɛnu lɔ ɔwrɔn dù vrán Salomɔn!”

Ɛnhɛ́n gbàngbàn mɛẅi vru-và

(Nyɛ́n nyan Lükɛ̀n 11:24-26)

43“Ɛnvra léyi ɛnhɛ́n gbàngbàn tɔ̀n ke dú ɔwrɔn tɔ̀n mɛ̀n kɛ srɔ ɛntrɛ nɔn, ne dú ɛhɔ́n mɛ̀n mán ɛvá mɛ̀n, ɛyri tramɛ̀n, ne ji ɛyri ô nɛ̀n wrɔncüe. Ɔmuhi nɛ́n sɩ́ cɔ́ ɛyri nɔn, 44nɛ dɔ́ n'edomɛ̀n le: ‘Mɛ lɛ vru ɛmɛẅi mɛ̀n hɔ́n m'ɔwɔn léyi mɛ́n teze nɔn mɛ̀n.’ Ne vru ɛmɛẅi kɩ nɛ cɔ́ ɔwɔn lɔ dɛ́ oworo, yɛ taka nɛ̀n ɛmɛ̀n, yɛ bɔsɔ nɛ̀n anvrɛnvrɛn. 45Zɛtɛn nɛ hɔ̀n ne bɩ́ anhɛ́n gbàngbàn hɔ̀n ɔbɔɛ̀n léyi krɛ́ ɛgbàn vrán nɛ̀n nɔn; yɔ vru ɛmɛẅi yɔ và kɩ yɔ yɛ́ ɔwɔn lɔ mɛ̀n. Ɔtrɔmɛ̀n lɔ, ɔwrɔn ndɔ lɔ wúvà kɛ sán krɛ́ ɛgbàn vrán ɛnkrubɔmɛ̀n lɔ. Kɩ ɔmu lɔ de ke le dú tán anwrɔn gbàngbàn hɔ̀n léyi dú ɛnvra ndɔ lɔ mɛ̀n bɔ̀ nɔn.”

Zhezü nɛ́n muan mán nɛ́n muan-ẅì hɔ̀n

(Nyɛ́n nyan Markɛ̀n 3:31-35; mán Lükɛ̀n 8:19-21 wrú lɔ mɛ̀n)

46Zhezü vru kɛ dɔ́ fɛcüè ankà, ɛnvra léyi nɛ́n muan mán nɛ́n muan-ẅì hɔ̀n nvà nɔn. Yɔ nyɔn ɛntrɛ kɩ yɔ ji yɔ dɔ́ nɛ̀n ankà. 47Ɔwrɔn tɔ̀n kɛ dɔ́ Zhezü le: “E die nukùɛ, ɔmuan mán ɔmuan-ẅì hɔ̀n nyɔn ɛntrɛ, kɩ yɔ ji yɔ dɔ́ mɛ́n ankà.” 48Zhezü mrɛ́n ɔwrɔn ndɔ lɔ ɔmùan le: “Antɔnwrɔn de dú nmàn mán nmàn-ẅì hɔ̀n nɛ́n?” 49Zɛtɛn nɛ̀n kɛ́n n'ɛsɛ̀nkɛn-bɔ̀ ɛkɔrɛ̀ kɩ nɛ dɔ̀ le: “Nyɛ kàn: nmàn mán nmàn-ẅì hɔ̀n dú ɛnu lɔ. 50Ɔmuhi ɔwrɔn léyi kɛ hán eci léyi Dade léyi dú anhobɩ́ ke ji nɔn, dú nmàn cɔnwrɔn-ẅì, nmàn nyɔnwrɔn-ẅì mán nmàn.”

Seçili Olanlar:

Matie 12: ƐAA03

Vurgu

Paylaş

Kopyala