Génesis 7
7
Yus Yumin Jitumtikiamu
1Turamtai Yus Noén chicharak: —Mash aints ainau yamai matsatina nunia amek wi wakeramurka metek umikume. Tura asakmin yamaikia ami jeemin matsatina nujai juun kanunam engkemataram. 2Tura asam mash kuntin yutai ainauka aishmangkrisha siete tura nuwasha siete irumram chumpiata. Antsu yuchatai ainauka aishmang nuwajai apatkam nuke engkeawarta. 3Tura nanamtin ainausha aishmangkrisha siete tura nuwarisha siete irumram engkeawarta. 4Kame, siete kinta nangkamaramtai, yumin jitumtikratatjai. Nunia cuarenta kinta tsawaisha tura kashisha yumin jitumtikratatjai. Tura asamtai wi najankamu ainau nungkanam matsatina nuka mash kajingkiartatui, —Yus timiayi. 5Tura Yus timiaun Noéka miatrusang umikmiayi.
6Nujang nungkan amurmia nuni Noé seiscientos musach pujumiayi. 7Nunia yumi jitur nujangkruatin asamtai, Noéka ni uchiri ainaujai tura nuwarijai tura najati ainaujai uwemrami tusar, juun kanunam engkemawarmiayi.
8-9Tura mash nungkanam wekain yutai ainau tura yuchatai ainausha, nanamtin ainausha, tura netsepejai wekain ainausha, aishmangkri nuwarijai apatkar Yus timia nunisarang juun kanunam engkemrarmiayi. 10Tura mash engkemawaramtai, siete kinta nangkamaru aing, Yus yumin jitumtikramiayi. 11Noé seiscientos musach pujai, nu musachti kichik nantu nunia diecisiete kinta nangkamaru aing, Yus nayaimpinmaya yumin tuna tumaun akupkamiayi. Tura nungka nitkarinia entsa tsapuiniarti tusa akupkamiayi. 12Tura asa cuarenta kinta tsawaisha tura kashisha chiwiatsuk Yus yumin chij jitumtikramiayi. 13Yumi jiturtin nangkamamtai, Noéka ni nuwarijai, tura uchiri Sem, Cam, nunia Jafetjai, tura ni najati tres ainaujai juun kanunam engkemawarmiayi. 14-15Tura nijai tsaniasar pachim ainausha, tura tangku ainausha, tura netsepejai japinas wekain ainausha, tura nanamtin ainausha mash jimiarchik jimiarchik engkemawarmiayi. 16Kame, Yus timia nunisarang aishmangri nuwarijai jimiarchik jimiarchik engkemawaramtai, Apu Yus juun kanu waitirin epenmiayi.
17Turamtai cuarenta kinta yumi nangkantsuk jituramtai, nujang nujangkrak juun kanu kukar tepaun wampumamtikmiayi. 18Nujang nangkantsuk nujangkruamtai, juun kanuka entsa japen nanaasmiayi. 19Maj, timiá nujangkrau asa, nujang mura ainaun mash amurmiayi. 20Tura mash amur tuke siete metros nangkakimiayi.
21Turunamtai aints ainauka mash kajingkiarmiayi. Tura nanamtin ainau, tura tangku ainau, tura pachim ainau, tura netsepejai japinas wekain ainausha nunisarang mash kajingkiarmiayi. 22Kame, mash nungkanam matsamin ainauka kajingkiarmiayi. 23Tura wainiat Noéjai juun kanunam engkemawaru ainauka uwemrarmiayi. 24Tura ciento cincuenta kinta nujang nungkan amur kuyutsuk pujusmiayi. #Mat 24.37-39; Luc 17.26-27; Heb 11.7; 1 Pe 3.20; 2 Pe 2.5
Seçili Olanlar:
Génesis 7: acu
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2019, Wycliffe Bible Translators, Inc. All rights reserved.