Matiyu 7
7
Ka̱ta̱ i yaꞋanka uma afada ba
(Luk. 6:37-38, 41-42)
1Yesu u lyaꞋi kelime n kuyotsongusu le kpamu ɗa u danai, “Ka̱ta̱ i yaꞋanka uma afada ba, ta lo Ka̱shile ka yaꞋanka ɗa̱ afada. 2Uteku u na dem vi yaꞋankai uma a̱ ubuta̱ wa afada, ta feu a kuyaꞋanka wu nannai.
3“Yi ɗa̱i i zuwai ɗa vi a kindana ili i kenu i na yi picici a̱ ka̱shi ko vutovu, amma ve ene kogboli ka na ki a̱ ka̱shi ka̱ nu ba? 4Nini ɗai va ku dana tovu, ‘YaꞋan n takpa kakiku ka na ki a̱ ka̱shi ka̱ nu’? La̱nuku biꞋi ka̱ci ka̱ nu! Avu ɗa lo biꞋi n kogboli a̱ ka̱shi ka̱ nu. 5Avu vuza kapalaka̱shi! Takpa biꞋi kogboli ka na ki a̱ ka̱shi ka̱ nu cau. Ayin a nan lo a ɗa ve kene mayin, ka̱ta̱ vi yeve kutakpa kakiku ka na ki a̱ ka̱shi ko tovu.
6“Ka̱ta̱ i neke nsheꞋe ili i na yi i Ka̱shile ba. Adama a na a lyaꞋa baci i ta̱ o kubono a̱ shilika̱ n a̱ɗa̱. Ka̱ta̱ i taɗukuku ngurusunu nwaru mi ikebe† ba. Adama a na i ta̱ e kukpete n ɗa ka̱ta̱ a̱ puɗa̱la̱ n ene e le a̱ la̱nga̱sa̱.”
Folonoi, la̱nsa̱i, ka̱ta̱ kpamu i ka̱la̱sa̱ utsutsu
(Luk. 11:9-13)
7Ɗa Yesu u danai kpamu, “LyaꞋa kelime n kufolono, vi ta̱ ta na a̱ kuciya̱ ili i na vu folonoi. LyaꞋa kelime n kula̱nsa̱, vi ta̱ a̱ kuciya̱ i na vi a̱ kula̱nsa̱. LyaꞋa kelime n kuka̱la̱sa̱ utsutsu, Ka̱shile ki ta̱ a kuzuwa a̱ ɓa̱yuwa̱ka̱ wu u ɗa. 8Adama a na aza a na baci o tsu folono, i ta̱ a̱ kuciya̱ ili i na o folonoi. Aza a na baci a̱ tsu la̱nsa̱, i ta̱ a̱ kuciya̱ ili i na i a̱ kula̱nsa̱. Aza a na baci a̱ tsu ka̱la̱sa̱ utsutsu, Ka̱shile ki ta̱ a̱ kuɓa̱yuwa̱ka̱ le u ɗa.
9“Yayi a̱ ka̱tsuma̱ ka̱ ɗa̱ u kuneke maku ma̱ ni katali, maku ma me ece yi baci tsuwaꞋa? 10Ko ve kuneke ta̱ maku ma kagbaji, we ece wu baci kadan? 11Ko a na yi aza a gbani-gbani, i tsu neke ta̱ muku n ɗa̱ kuneꞋe ku singai. A̱yi Esheku a̱ ɗa̱ a na i gaɗi, a laꞋa ta̱ biꞋi, wi ta̱ ufoɓushi ka̱u adama a na u neke aza a na o folonoi ni kuneꞋe ku singai! 12YaꞋanka uma ili i na vi cigai a yaꞋanka wu. Na va ɗaɗa ili i na kuyotsongusu ku Musa n ku Eneki ku danai.”
Utsutsu wu uɓori
(Luk. 13:24)
13Yesu u danai, “Uwai o tsugono tsu Ka̱shile n utsutsu wu uɓori. Uye u na u tonoi a kubana a kpaꞋa ka akina n utsutsu u ni feu wi ta̱ n wanshi. Nwalu kpamu a kubana ɗe babu atakaci. Uma n a̱bunda̱i ɗa ta na i a nwalu a uye u nan lo. 14Amma utsutsu u na u tonoi a kubana a̱ ubuta̱ u wuma u babu uteku n uye u ni feu wi ta̱ ɓori, wi ta̱ kpamu n atakaci a nwalu. Uma ukeci koci ɗa a̱ kuciya̱ uye u nan lo.”
Maɗanga n umaci u ni
(Luk. 6:43-44)
15Yesu u lyaꞋi kelime ɗa u danai, “Ka̱ta̱ i yaꞋan cicoꞋo n eneki a aꞋuwa, a̱ tsu ta̱wa̱ ɗa̱ ta̱ an nkyon vi baci e kene le, amma punu a asuvu e le i ta̱ ana nkunzukunzu. 16Yi ta̱ e kuyeve le a̱ ubuta̱ wu ulinga u le, uteku u na e ci yeve maɗanga a̱ ubuta̱ wu umaci u ni. Va kutaꞋa ma̱biri a maɗanga ma awana ba, ko ma̱ɗimbi† ma kumatsa o kokovu ba. 17Maɗanga ma singai ma tsu matsa ta̱ umaci u singai, maɗanga ma gbani-gbani kpamu ma tsu matsa ta̱ umaci u gbani-gbani. 18Maɗanga ma singai ma kumatsa umaci u gbani-gbani ba, maɗanga ma gbani-gbani kpamu ma kumatsa umaci u singai ba. 19Uma a tsu kapa ta̱ maɗanga ma na de dem ma iwain kumatsa umaci u singai, ka̱ta̱ a varuku maꞋa a akina. 20Ta kpamu nannai, yi ta̱ e kuyeve uteku u na uma a nan lo i a̱ ubuta̱ wu ulinga u na i a kuyaꞋan.”
N yeve ɗa̱ ba
(Luk. 13:25-27)
21Yesu u danai, “Yaba dem vu na wi e kuɗeke mu Vuzavaguɗu ɗa wi a kuꞋuwa o tsugono tsu gaɗi ba. Aza a na koci i a kuꞋuwa o tsugono tsa, ele ɗa aza a na i a kuyaꞋan ili i na Esheku a̱ va̱ a na i gaɗi a cigai. 22A kanna ka afada uma n a̱bunda̱i i ta̱ a kudana, ‘Vuzavaguɗu, ci yaꞋan ta̱ kadanshi ka̱ Ka̱shile n kula ku nu. N kula ku nu kpamu tsu uta̱ka̱i n wunla̱i u gbani-gbani, ɗa kpamu ci yaꞋin ili i mereve n a̱bunda̱i.’ 23Amma n kudana le ta̱, ‘N yeve ɗa̱ ba. Ɗenga̱i mu lo, a̱ɗa̱ aza a na i a kuyaꞋan kawuya!’ ”
AmaꞋi a kpaꞋa e re
(Luk. 6:47-49)
24Amma u lyaꞋi kelime, “Adama a nannai, vuza na baci de dem u panai kadanshi ka̱ va̱ ka nam pa ɗa u tonoi kaꞋa, wi ta̱ an vuma vu ugboji vu na wi a kumaꞋa kpaꞋa ku ni ɗa u ga̱va̱i biꞋi, ɗa u yevei u varai kumaꞋa ka a kakpanlai. 25Ana Ka̱shile ko yoꞋi n wunla̱i ɗa nɗolu dem n lyaꞋi u varuku kpaꞋa ka ba, adama a na u maꞋa ta̱ ku ɗa mayin a kakpanlai.
26“Amma vuza na baci de dem u panai kadanshi ka̱ va̱ ka nam pa, ɗa u kpa̱ɗa̱i kutono kaꞋa, wi ta̱ an kalau ka vuma ka na ka maꞋi kpaꞋa ku ni a kayala. 27Ɗa Ka̱shile ko yoꞋi mini ka̱u, ɗa nɗolu dem n lyaꞋi, ɗa wunla̱i wu utsura u gba̱ɗa̱sa̱i kpaꞋa ka. Ali ɗa ku ɗa ku yikpa̱i kala-kala.”
Utsura u Yesu
(Mar. 1:22; Luk. 4:32)
28Ana Yesu u kotsoi kudansa ili i nam pa, ɗa ka̱bunda̱i ka uma ka ka yaꞋin mereve n tsu na u yaꞋin kuyotsongusu. 29A̱yi wi uteku tsu nlum n Wila̱ ba, amma u yaꞋan ta̱ kuyotsongusu ku ni an vuza na wi nu utsura.
Seçili Olanlar:
Matiyu 7: asgNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2012 Wycliffe Bible Translators, Inc. All rights reserved
