Matiyu 3
3
Yahaya vu Kusumbu ka Akucina u lapulai uye
(Mar. 1:1-8; Luk. 3:1-18; Yah. 1:19-28)
1Ana a̱ya̱ o yoku a yawai, ɗa Yahaya† vu Kusumbu ka Akucina u gita̱i kudansa kadanshi ka̱ Ka̱shile e mere mu une ma Yahuda. 2U danai, “Shika̱i unushi† u ɗa̱ ka̱ta̱ i bono u Ka̱shile, adama a na tsugono tsu Ka̱shile ci yawa ta̱ ɗevu.” 3Keneki Ishaya† u yaꞋan ta̱ kadanshi ka Yahaya ana u danai:
“Ka̱la̱ka̱tsu e meɗevile e mere mu une,
‘Lapulai uye adama a Vuzagbayin.
Bonokoi u ɗa mejege.’ ”#Ish. 40:3.
4Yahaya u uka ta̱ ntogu n na a caꞋi n cileme tsu karakuma. Wi ta̱ n kaɗambura ku ukpan a̱ kukyuꞋun ku ni. IlikulyaꞋa i ni kpamu i ɗaɗa akyuꞋun n ishigi a kakamba. 5Uma n a̱bunda̱i a̱ uta̱i a Urishelima n Yahuda n ukambu u Kuɗolu ku Urdu, ɗa a banai kupanaka Yahaya. 6Ana uma a a̱ shika̱i unushi u le, ɗa u yaꞋankai le kusumbu ka akucina† o Kuɗolu ku Urdu.
7Afarishi† n A̱sa̱dukiya n a̱bunda̱i a banai a̱ ubuta̱ u na Yahaya wi a kuyaꞋanka uma kusumbu ka akucina adama a na u yaꞋanka le. Ana Yahaya we enei le, ɗa u danai, “A̱ɗa̱ muku ma agbaturu n nam pa! Yayi u danai ɗa̱ i were wupa u Ka̱shile u na wi lo a̱ kuta̱wa̱ babu megeshe? 8YaꞋin ili i na i kuyotsongu a na i shika̱i unushi u ɗa̱. 9Ka̱ta̱ i sheshe a na yi a̱ kuwere wupa u Ka̱shile adama a na yi a kudana Ibrahim ɗa esheku a̱ ɗa̱ ba. N dana ɗa̱, Ka̱shile ki ta̱ a kufuɗa kuɗika atali a nam pa, ka̱ta̱ u bonoko Ibrahim muku! 10Ko gogo na, kogovu ki ta̱ ɗe utemgbi ɗa a gbatyangi kaꞋa punu a aralu a nɗanga a. Maɗanga ma na de dem ma iwain kumatsa umaci u ma̱riki, i ta̱ a kugbatya maꞋa ka̱ta̱ a varuku maꞋa a akina.
11“N yaꞋanka ɗa̱ ta̱ kusumbu ka akucina m mini adama a na i shika̱i unushi† u ɗa̱, amma vuza na wi lo a̱ kuta̱wa̱ ka̱ca̱pa̱ ka̱ va̱ wi ta̱ a kuyaꞋanka ɗa̱ kusumbu ka akucina n Ayinviki a̱ Ka̱shile n akina. A̱yi u laꞋa mu ta̱ ka̱u, mpa kpamu n yawa biꞋi n foɗo ko ataka a̱ ni ba. 12Wi ta̱ a̱ kuta̱wa̱ n kasasu ke kuyelikpu ka̱ ni ufoɓushi adama a na u yelikpe ili ya mayin. Wi ta̱ e kupece ili i singai kau n i gbani-gbani. Ka̱ta̱ u zuwa ili i singai ya o mopon ma̱ ni, amma wi ta̱ o kusongu kopo ka n akina a na a kufuɗa kukima̱ ba.”
Yahaya u yaꞋankai Yesu kusumbu ka akucina
(Mar. 1:9-11; Luk. 3:21-22)
13A ayin a nan lo Yesu u ɗenga̱i Ga̱lili, ɗa u banai o Kuɗolu ku Urdu adama a na Yahaya u yaꞋanka yi kusumbu ka akucina. 14Amma ɗa u cigai kuꞋiwan, u danai, “Avu ɗa vuza na vi yotsoi vi yaꞋanka mu kusumbu ka akucina. Yi ɗa̱i i zuwai ɗa vu ta̱wa̱i a̱ va̱?”
15Yesu wu ushuki, “Gogo na nahannai ta Ka̱shile ka cigai ka yaꞋan nannai, adama a na u yotso ta̱ ci yaꞋan ili i na Ka̱shile ka cigai ci yaꞋan.” Ɗa Yahaya wu ushuki.
16Ɗa u yaꞋankai ni kusumbu ka akucina. GogoꞋo va lo ana wu uta̱i a̱ mini ma, ɗa gaɗi u ɓa̱yuwa̱i, ɗa we enei Ayinviki a̱ Ka̱shile a̱ cipa̱i wa̱ ni tsu moɗoi. 17Ɗa ka̱la̱ka̱tsu ku uta̱i gaɗi ka danai, “Na va Maku ma̱ va̱ maꞋa ma na n cigai, mi ta̱ kpamu a kupana uyoꞋo n a̱yi.”
Seçili Olanlar:
Matiyu 3: asgNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2012 Wycliffe Bible Translators, Inc. All rights reserved
