Jenesis-Agafa 4
4
Kenine Abelikizni naneke
1Adamu'a Ivi ene mse'geno amu'ene huno ne'mofavre Keni ksenteno, Anumzamo naza hige'na ne'mofavre erifore hue, hu'ne. 2Anante Ivi'a negna Abel ksente'ne, ana nemo'a ra huno sipisipi afute kva higeno, Keni'a mopafi eri'za erino hoza anteno kva hu'ne. 3Mago'agna hunte'nere egeno Keni'a, Ra Anumzamofo ofa hunteku hoza'afinti ne'za erino e'ne. 4Ana higeno Abel sipisipi'afinti agusa hunte'nea afutamimpinti mago'a agonesa afu aheno eme kre sramna vuntegeno, Ra Anumzamo negeno Abel antahi so'e hunte'ne. 5Hianagi Keni'ma ofa hunte'neaza keteno Ra Anumzamo'a antahi haviza higeno Kenina asi vazigeno avugosa rugririne. 6Ana higeno Ra Anumzamo negeno Keninku amanage hu'ne, nahigenka krimpagna nehunka kavugosareti arune gririne? 7Hianagi kagra'ma knare'za hnanke'na, Nagra muse hugantegahue. Hanki kagrama havizama hnankeno'a, kumimo'a kazeri kagaterega hianagi kagra hankavetinka mani'nenka kumira azeri agatero.
8Keni'a nagana'amofo Abelinku hofa trampi vanu'e huno agi higene vuna'e, ana hofa trampi umanineke Keni'a nagna'amofo Abelina ahe fri'ne. 9Henka'a Anumzamo Keni antahigene, negagna Abeli'a inantega manine? Nagra onke'noe, nagra nagnanimofo kva hunte ne' maninofi? 10Hianagi Ra Anumzamo amanage hu'ne, kagra na'a hu'nane? Nagnakamofo koramo'a mopafi tagi ramineno nagritega krafa hunenamie. 11Ana hanku Nagra ama mopane kagri'enena sifna nehoe. Nagna kamofoma kzampinti ahe'nana koramo'a mopafi tagiramigeno mopamo ne'ne. 12Hagi mopafima hozama ante'snana hozamo'a hikzake hugahie. Ana nehina nonka'a omnena mopafi kanke kanke hugahane. 13Keni'a amanage huno Ra Anumza'mofonku kenona hu'ne, nagri'ma hunantana kemo'a tusi'a kna navesie! 14Kma antahio! Kagra ama mopafinti nagrira meni nazeri natranankina, kagri kavurera ohanitigahue. Nagrira noni'a omne'neankina ama mopafi kanke kanke neha'nena aza'o nagesuno'a nahe frigahie. 15Higeno Ra Anumzamo'a kenona'a asmi'ne, kagri'ma kahesimo'a ana nona'a 7ni'a (7) zupa kna'zana agetereno erigahie. Vahe'mo'ma ohesnigu Kenina mago avame'za agofetu antente'ne. 16Ana higeno Ra Anumzamofo avatetira Keni'a atreno Ideni hozamofo zge hanati kaziga vuno, Nodi mopare umani'ne. #Nodi ke agafa'a, Hibru kefina kanke kankere hu'ne
Kenimpinti vahe fore hu'naza naneke
17Keni'a nenaro'ene masegeno amu'ene huno ne'mofavre ksenteno, agi'a Enoku'e huno ante'ne. Anteteno rankuma erifore huno kiteno ana kumamofo agi'a Enoku'e huno mofavre'a agire asamre'ne. 18Enoku mofavre agi'a Iradi'e, Iradi'a Mehuzaeli nafa'aza hu'ne. Hagi Mehuzaeli'a Metusael nafa'aza higeno, Metusaeli'a Lemeki nafa'aza hu'ne. 19Lemeki'a a' tare hu'ne, Pusa a'mofo agi'a Ada'e, mago a'mofo agi'a Zila'e. 20Ada'a ne'mofavre ksenteno agi'a Jabali'e huno ante'ne, fugagi no ki'za nemse'za afu kva nehaza vahe'mokizmi zamageho'e. 21Hagi ngana'amofo agi'a Jubali'e. Jubali'a ese agafa huno nofite zvena (harp) nehaza naga'mokizmi nezmageho'e. 22Hanki Zila'a Tubalkein ksente'ne, agra aenima, kopama tevefi krezafino amasagino eri'za tunkno tro nehia nere. Tubalkeini nesaro agi'a Nama'e.
23Mago zupa Lemeki'a nenaro kiznigura amanage huno znasmi'ne,
Adagane Zilagta'a kma antahi'o, mago nehza ne'mo kuzafa nahege'na, agrira ete ahe fri'noe.
24Mago ne'mo'ma, Kenima eme ahesuno'a, 7ni'a knazana eri agofetu huno erigahie. Hianagi tmage nagri'ma Lemeki'nama eme nahesnuno'a, 77ni'a knazana agofetu huno nona'a erigahie.
Abel frigeno nona'a mago mofavre Seti ksente'nea naneke
25Adamu'a nenaro'ene msegeno ne' mofavre ksenteno amanage hu'ne, Keni'ma, Abelima ahe'a nona'a Anumzamo'a namie, huno nehuno ana agafare agi'a Seti'e huno antemi'ne. 26Henka'a Setina ne'mofavre fore humigeno agi'a Enosi'e huno antemi'ne. Ana knafi vahemo'za erigafa hu'za Ra Anumzamofo agihanta nevaziza, Agrite mono hunte'naze.
Seçili Olanlar:
Jenesis-Agafa 4: kbq
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2014, Wycliffe Bible Translators, Inc. All rights reserved.