Matyu 5
5
Yesuse amgolim ut Gode wengo omkeima monsebe.
(Luk 6:20-23)
1Yesuse nakaia unangai dobsileb bebibi yatem deibenea utnea amgolim ut toumbia e okok aleyemin nakai utemiba 2aleyemonsebe. E inanea aleye bianea baabenea
3Nakaia unangai Gode baabaniba Ni titilo blimobo, kobo ni bainobo galin osa bobol tem funin osa daabenale ge ohabibi seinine! Gode daaye bianea kla kima biebe.
4Nakaia unangai bobol ilum omfubebuei seinine! Gode bobol tem ayamo omyamabebe.
5Nakaia unangai bobol fiab blibi seinine! I sinanomo Gode baanea Inamin namino omyamabibo genebuo omomabiobe.
6Nakaia unangai funaniba Gode baanea Ibo inamin namino inaine gene mole nibo nanomo gabib nakaia unangai seinine! Gode daabenea inamin namin olo kla nanomabiobe.
7Nakaia unangai naka mak unang maki dohalilaniba daayebibi seinine! Gode isa dohalilanea daabenamabebe.
8Nakaia unangai hengmino deiboniba Gode bobol tem funino wafu blibi seinine! Sinanomo i Gode keim atemomabiobe.
9Nakaia unangai bobol fiab bianiba naka mak unang maki baabeniba Nibo awao mo genalaobe ge baanimibi seinine! Gode baabenea Ibo ne melelobo ge baabenamabebe.
10Eka nakaia unangai kukub ayamo Gode namine gabeo wafu bliba naka mak unang maki enin kino omkaye biam eka weng misiam oye biam blibi seinine! Gode i kla kima biebe.
11Naka mak unang maki ibo misiam doka bianiba enin kino omkaye biam bianiba dim oye biam nabib yo niminbabe, ibo ne bainobo galin naka kesota nayebiobe. I inayemibo ibo seinine! 12Inayemib mole ibo bobol ayam fumbianiba seinine! Ina binib biamo sinanomo Gode abilim uto inamin namin ayamo homon doyamabebe. Sinanggwano i Gode weng omkeimalin naka isa inaye bianiba enino omkaye bianiba yebiam binibbiobo ge baabesebe.
Yal osa ayal osa o saa wengobe.
(Mak 9:50; Luk 14:34-35)
13Yesuse imin baabenea Ibo makob yalo ulabobe. Nakai yalo kulani tubusiba klaanino deibonoa gatanabo inaniba ibsa moniba dabalim naka isuo nimibo isa inaniba kukubo dot misiamo deibonomabiobe. Yale game blimanemeo fatnabanibta imin gam ayam anamabene? E klaniba imin ayam anamino blimobe. Yal ele amitie misiam anea e okoko ye blimanamabe kesoa i obbiaiba nakaia unangai e dime tama tama unemomabiobe.
14Ibo makob nakai ayalo ulabobe. Nakai ayale oboniba einimibo i deibo alebenamabebe. Ib kukubo makob ayale ulab kesoa ibo nakaia unangai Gode deibo alebenomabiobe. Bib sum mako amgolime tekebmine golim ut genaib biamo ayoko mo biamabobabe. Ibo o ulabobe. Ib kukubo ayokba kesoa nakaia unangai yatemebiobe. 15Nakai ayale mo ei ofanibta bakete obonibta obbubanimibbabe. I keim ofaiba bomat genea nakaia unangai alukum am tam blibi eibenamabebe. 16Ibsa inaniba inamin namin ayamo namibo makob ayal einin kebliba nakaia unangai yatemniba ib Aye abilim ut bie e niniino dobtouleb nomabiobo ge baabesebe.
Gode hekmel wengo weng otabe.
17Yesuse imin baabenea Ibo mo funanibta E tenea Mosese hekmel weng osa Gode weng omkeimalin nakai weng osa omtlabenang geneta tlebo genimibe! Yeye, ne tenia hekmel weng osa Gode weng omkeimalin nakai weng osa baanoa Inamin namino tam tlamabobo genobu olo inania klanang genita tlibe. 18Ne bain baabenamabibe, dabal esa abil esa sma biamo hekmel weng osa sma biamabobe. Otane hekmel wengo baanoa Inamin namino tam tlamabobo genobu olo Gode alukum inanamabebe. 19Inanamabo kesoa naka make hekmel weng gwabo omtlane mole e naka mak isa alebenea isa inaniba naka ele Gode kimanin bibo e niniino men anamabebe. Ina otane nakae hekmel wengo kla wafunea naka mak unang maki alebenea isa inaniba wafu nimibo naka ele Gode kimanin bibo e niniino sum anamabebe. 20Weng olosa kla wentine! Hekmel weng tekein kemin naka isa Felisi isa baaniba Ni kukubo molotobo gabib otane i Gode wengo klao mo wafu blibbabe. I inabib otane ibo i kukubo gaisenibta Gode wengo kla wafueine! Ibo mo inaim blim keib mole ibo Gode kimanin bibo mo unomabibbabo ge baabesebe.
Atliyemin kukubo makob naka yemin kukubobe.
(Luk 12:57-59)
21Yesuse imin baabenea Ibo tekein kebiobe, i Mosese hekmel wengo kibianiba baaniba O mitmakamo inaminobo, ibo nakai mo yenaiba kaanimibe! Naka make nakai yenanea kaaib mole e debeb moniba kot kebaine geibbio otane 22memalo ne ibo baabenamabibe, nakae waneta alo tliaubanoa e neke dobsuanane mole e makob naka ele ananea kaanamabe kesoa i debeb moniba kot kebaine! Eka nakae waneta e neke weng misiam ohabe mole i debeb moniba komokwali dimo kot kebaine! Eka nakae waneta e neke baabanea Kobo dot klamikinobo ge baabane mole e ase einamabebe. 23Inamin kesoa ibo Inamin namino dleb tenoba funoba Gode heitdabanomo geniba taniba Gode am sumo tem tam unaniba funaniba Sino ne neke kukub misiam nabaia e Yebbabo genebiobo ge funaib mole 24inamin namino Gode heitdabanomo geniba dleb tam biaibo heitdahamin biino kikib ye dlaniba deibo moniba naka ele tem naniba wengo klaiba blimansota tenibta dlo funiba Gode heitdabanibta lotu kebaine!
25Naka make kobo kot kebkenang genabea moniba Kot kenomo geniba bebib biamo hebmamsab wengo klanibta bobol temo makobaine! Ibo mo inaim blim kenib mole e kemeb monea kot kimanine kemansea eka esak kemonea awa genalin nakae kemalea kemeb monea klabut am tam danamabebe. 26Kobo klabut am tamo biebo kot kimanin nakae baabkenea Monio inamin kina walone ge baabkene biamo alukumo mo walim blim keneb mole amitie klabut anamabeobe. Ne wengo bain baabeiobo ge baabesebe.
Taman kukubo weng sangobe.
27Yesuse imin baabenea Ibo tekein kebiobe, i Mosese hekmel wengo kibianiba baaniba O mitmakamo inaminobo, unang tamano mo henganimibe geibbu otane 28memalo ne ibo baabenamabibe, nakae waneta unango watenea e bobolo wabanoa funanea Ne unang olo omeb denitabo ge funane mole kukub olo makob e tamano henganamabebe. 29Inamin kesoa keb kine inamin namino watemneba bobolo wabkenoa henganeb mole ulo obbianale! Keb kine elekiem deiba bianeba moneba afen smike doboneba amit neb mole kukub olo ayamobe. Ina otane kobo deibaneba asu teme bianeba aseinin bib uneb mole kukub olo misiamobe. 30Eka keb kweile kweitale kemab manea hengmino henganeb mole walo ombianale! Keb kweilone elekiem deiba bianeba afen smike doboneba amit neb mole kukub olo ayamobe. Ina otane kobo deibaneba asu tubu nabiam bineba aseinin bib uneb mole kukub olo misiamobo ge baabesebe.
Alelwali fotebenamin kukubo wengobe.
(Matyu 19:9; Mak 10:11-12; Luk 16:18)
31Yesuse imin baabenea Eka weng mako ibo tekein kebiobe, i baaniba Nakae e alelo fotebenangge mole e futano dolanea baanea Unang olo ne alel otane ne fotebeiobo ge baa dolanea e alelo omweneta fotebeneko geibbu otane 32memalo ne ibo baabenamabibe, naka make e alelo tamano mo hengaim blim bua fotebesea monoa imake afet dobo mole imake emaye naneta o taman unang omfanamabebe. Eka naka mak esak unango sino o imake fotebenebua e ome mole esa tamano henganamabebo ge baabesebe.
Gode niniino taisanamin wengobe.
33Yesuse imin baabenea Ibo tekein kebiobe, i Mosese hekmel wengo kibianiba baaniba O mitmakamo inaminobo, ibo baaniba Sume tekein kebebo, ni inamin namino bain ye nanomabbiobo ge baaib mole bain inaine geibbu 34otane memalo ne ibo baabenamabibe, ibo weng afeto obib biamo Gode niniino mo taisanibta baanibta Bain ye Gode tekein kebebo genimibe! Abile niniin osa mo taisanibta baanimibe! Niminbabe, abile Gode biinobe. 35Dabale niniin osa mo taisanibta baanimibe! Niminbabe, dabale Gode biin gwabo skilo ola biebe. Eka Yelusalem bibo niniin osa mo taisonibta baanimibe! Niminbabe, Yelusalem bibo Komok Sume bibobe. 36Eka ibo ib gabamono niniin osa mo taisonibta baanimibe! Niminbabe, ib gabamano elekiem ke tobo tofata mililobe namaobe genomabibbabe. 37Inamin kesoa ibo baaniba Ae genimibo bain inamine! Eka ibo Yeye genimibo bain yota inamine! Inamin namin weng afeto obianiba Gode niniino taisanamin ole naka misiame data tlebobo ge baabesebe.
Kukub misiamo yang kenamin wengobe.
(Luk 6:29-30)
38Yesuse imin baabenea Ibo tekein kebiobe, i Mosese hekmel wengo kibianiba baaniba O mitmakamo inaminobo, naka make keb kine bekelubkene mole naka mak ibsak e kine bekelubaine! Eka naka make kananea keb sitono haubkene mole naka mak ibsak e sitono haubaine geibbu otane 39memalo ne ibo baabenamabibe, ibo naka make kukub misiamo omkayebe biamo mo yang kenimibe! Naka make keb keneng wat blelabkene mole deskinaneba keneng milim osak blelabkeneko! 40Eka kobo naka make inamin namino nabanebbua e kobo kot kebkenang genabea kot kimanin nakae baabkenea Keb youm eta gamubanebta koto walone genea kobo inaneba gamubanang geb mole tib elesa makob asu ye gemelubanale! 41Eka kiab make menganea baabkenea Ne monio kobo walonamino blim otane kobo ne afobeingo skeimbabo meb olotabo oleb mo daatnenebte gene mole kobo monio bobolo mo funanemebe! Oluba moneba deibo inamin sin ye daatnenale gene biamo gaiso moneba skeim ye daabanale! 42Eka naka make baanea Kobo inamin namino donene gene mole dlalale! Eka naka make Inamin namino donebbiota nesak yang kenano gene mole kobo mo Yeye genemebe! Dlaleba dleb uneko ge baabesebe.
Nibo nib makaai gobenomo!
(Luk 6:27-28,32-36)
43Yesuse imin baabenea Ibo tekein kebiobe, i Mosese hekmel wengo kibianiba baaniba O mitmakamo inaminobo, ib nekwali kla gobeniba eka ib makaai mo gobenimibe geibbu otane 44memalo ne baabenamabibe, ibo ib makaai kla gobe nabianiba eka naka maki ibo enin sumo omkayebib biamoei Gode nganabaiba daabeneko! 45Ibo inamib mole ib Aye abilim ut bie ulab anomabiobe. E afoko omya nakaia unangai ayam isa misiam isa tubube biobe. Eka sok osa omane tenoa alukum nakaia unangai ayam isa misiam isa isu tlebo kesoa ib makaa isa nekwal isa alukum gobeine! 46Ibo nakai ibo gobe blibi ilita ibsa gobeib mole olo besabe. Inamin kukubo Gode mo seinyemabebabe. Takis moni bokalin naka isa inaniba i nakai gobe blibi ilita gobe binabiobe. I ina binabib otane ibole nakai alukum kla gobeine! 47Eka ibo ib nekwali ilita Klayam blibo? ge oyebib osa besabe. Ib kukub olo nabibo naka maki kukubo mo gaisenomabibbabe. Bainobo galin nakaba isa ina binabiobe. Ibo nakai alukum Klayam blibo? ge oyemine! 48Ibo kukub moloto wafuniba makob ib Aye abilim ut bie nabinabe inamine ge baabesebe.
Seçili Olanlar:
Matyu 5: mpt
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 1986, Wycliffe Bible Translators, Inc. All rights reserved.
