If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

अखमीरी रोटी चा तेंहवार जको फसह किहवावे, गोढु हुता, ते प्रधान याजक ते शास्त्री ये बाते ची खोज मां हुते कि ओनु किवें मारती नाखु, पर वे लौका कनु ङरते।


तब शैतान यहूदा मां समाला, जको इस्करियोती किहवाता ते ब़ारहा चैला मां गिणला जता। ओणे जती कर प्रधान याजका ते मन्दरा ची रखवाली करने आले सरदारा लारे बातचीत करली कि ओनु किवें करती वांचे हाथ पकड़वाओ। वे खौश हुले, ते ओनु रुपये ङेणे चा वचन ङिला। ओणे मनती गेहले, ते मौका सोधु लाग़ला कि जिसे बेले भीड़ ना हो तां वांचे हाथ पकड़वाती ङियो।


तब अखमीरी रोटी चे तेंहवारा चा ङिओ आला, जाये मां फसह चे मैमणे बलि करने जरुरी हुते। ईशु ने पतरस ते यूहन्‍ना नु ईं केहती कर भेज़ले, “जती कर अम्चे खाणे चे वास्ते फसह तियार करा।”
वाणे ओकनु पूछले, “तु किठे चाहवी कि अम्ही ऐनू तियार करु?”
ईशु ने वानु केहले, “ङेखा, शहरा मां घिरते ही हेक बन्दे पाणीया चा घड़ा चले हुले तम्हानु मिली, ते ओ जिसे घरा मां जाये तम्ही ओचे भांसु हुती पड़जा, ते ओ घरा चे मालिका नु केहजा, ‘गुरु किहे पलता कि मेहमान खाने किठे छै जिठे मैं आपणे चैला लारे फसह चा भोज़ खई?’ ओ तम्हानु हेक सजला सजाला बङा चौब़ारा ङिखाणती ङी, उठी तियारी करा।”
वाणे जती कर जिंवे ओणे वानु केहले हुते, उसड़े ही ङेखले ते फसह चा भोज़ तियार करला।


जिसे बेले घड़ी आती पुज़ली, तां ईशु प्रेरितां चे लारे खाणे खऊं ब़ेहला। ते ईशु ने वानु केहले, “मनु बङी लालसा हुती कि ङोख भोग़णे कनु पेहले हा फसह चा भोज़ तम्चे लारे खाये। कांकि मैं तम्हानु किहे कि जब तक ओ नरीकारा चे राज़ मां पूरा ना हुती जई तब तक मैं ऐनू कङी वी नी खई।”
बल्ति ईशु ने मुंगर चती कर धन्यवाद ङिला ते केहले, “ऐनू गिहा ते आपस मां बांटती गिहा। कांकि मैं तम्हानु किहे पला कि जब तक नरीकारा चा राज़ ना आवी तब तक मैं अंगूरा चा रस हमा कनु कङी नी पिही।”
बल्ति ईशु ने रोटी चली, ते धन्यवाद करती भांली, ते ईं केहते हुले वानु ङिली, “हा माई देह छै जको तम्चे वास्ते ङिली जाये, माई याद मां यूंही करले करा।”
यूं करती खाणे चे बाद मुंगर वी चला ते केहले, “हा मुंगर माये ओ लुहींया मां जको तम्चे वास्ते बाहले जाये नवीं वाचा छै। पर ङेखा, माये पकड़ावणे आले चा हाथ माये लारे मेजा उपर छै। कांकि मैं इन्साना चा पूत जिसड़े माये वास्ते ठहराले गेले, जाये ही पला, पर ओ इन्साना उपर हाय जाये जरिये ओ पकड़वाला जई!”
बल्ति वे आपस मां पूछताछ करु लाग़ले, “अम्चे महु कूण छै, जको ईं काम करी।”

वांचे मां हा बहस वी हुली कि वांचे महु बङे कूण समझले जाये। ईशु ने वानु केहले, “नेरीया जातिया चे राजे वांचे उपर प्रभुता करी, ते जको वांचे उपर अधिकार राखी, वे ऐहसानमन्द किहवावी। पर तम्ही इसड़े ना हुजा, बल्कि जको तम्चे मां बङा छै, ओ छोटे आलीकर ते जको प्रधान छै, ओ सेवक आलीकर बणो। कांकि बङे कूण छै, ओ जको खाणे खाये ब़ेहला, जा ओ जको सेवा करे? का ओ कोनी जको खाणे खाये ब़ेहला? पर मैं तम्चे बीच मां सेवक चे समान छै।
“तां तम्ही वे छिवा, जको माई परीक्षा मां लगातार माये लारे रेहले, ते जिंवे माये ब़ा ने माये वास्ते हेक राज़ ठहराला, यूंही मैं वी तम्हानु राज़ ङिये पला, कि तम्ही माये राज़ मां माये मेजा उपर खावा पीया, बल्कि सिंहासना उपर ब़ेसती कर इस्राएल चे ब़ारहा गोत्रा चा न्यां करा।


“शमौन, हे शमौन! ङेख, शैताना ने तनु मांगती गेले कि कणकी आलीकर छंडको। पर मैं दुधे वास्ते बिनती करली कि दुधा विश्‍वास जता ना रिहो, ते जिसे बेले तु फिरी, तां आपणा भावां नु विश्‍वास मां मजबूत करियो।”
पतरस ने ओनु केहले, “हे प्रभु, मैं दुधे लारे बन्दीग्रह मां जाणे, बल्कि मरणे चे वास्ते वी तियार छै।”
ईशु ने केहले, “हे पतरस, मैं तनु किहे पला कि आज़ कूकड़ा बांग नी ङिही, जब तक तु तीन वारी माया इन्कार नी करती गिहे कि तु मनु ना जाणी।”

ते ईशु ने वानु केहले, “जिसे बेले मैं तम्हानु ब़टुवा, ते झोली, ते बिना जुत्तीया चे तम्हानु भेज़ले, तां का तम्हानु कुई चीजी ची कमी हुली?”
वाणे केहले, “कुई चीजी ची कोनी।”
ईशु ने वानु केहले, “पर हमा जाये कनु ब़टुवा हो, ओ ओनु चती गिहो, ते यूंही झोली वी, ते जाये कनु तलवार ना हो ओ आपणी ओढ़णी बेचती कर हेक मोल गेहती गिहो। कांकि मैं तम्हानु किहे पला कि ईं जको धर्मशास्त्र मां लिखले पले, ‘ओ अपराधीया चे लारे गिणला गेला,’ ओचे माये मां पुरे हुवणे जरुरी छै, कांकि माये बारे मां लिखलीया बाता पुरीया हुवणे उपर छी।”
वाणे केहले, “हे प्रभु, ङेख, इठे ङोन तलवारा छी।”
ओणे वानु केहले, “ब़ोहत छी।”


बल्ति ईशु ब़ाहरु निकलती कर आपणी रीति चे अनुसार जैतून पहाड़ा उपर गेला, ते चैले ओचे भांसु टुरती पले। वे जग़हा पुज़ती कर ओणे वानु केहले, “प्राथना करा कि तम्ही परीक्षा मां ना पड़ा।”
ते ईशु आप वाकनु अलग़ हेक भेक्‍क भुकावणे ची दूरी उपर गेला, ते गोङे टेकती कर प्राथना करु लाग़ला, “हे ब़ा, अगर तु चाहवी तां ऐ मुंगरा नु माये कनु हटाती गे, तां वी माई ना बल्कि दुधी ही इच्छा पुरी हो।” तब स्वर्ग़ा कनु हेक दूत ओठे ङिसला जको ओनु ताकत ङिता। ते ओ होर ज्यादा संकट मां बैचेन हुती कर ते देल लाती प्राथना करु लाग़ला, ते ओचा पसीना मना लुहींया चा बङीया-बङीया फेंगा आलीकर भोंये उपर ढी पलतीया।
तब ईशु प्राथना कनु खड़ा हुला, ते आपणे चैला चे गोढु आतीकर वानु उदासी चे मारले नूहले आले ङेखले। ते वानु केहले, “कां नूहले पले? ऊठा, प्राथना करा कि तम्ही परीक्षा मां ना पड़ा।”


ईशु ईं किहे ही पलता कि हेक भीड़ आली, जको वां ब़ारहा चैला महु हेक जाये नां यहूदा हुते वांचे आग़ु-आग़ु आवे पलता। ओ ईशु चे गोढु आला कि ओनु मिठ्ठी ङियो। ईशु ने ओनु केहले, “हे यहूदा, का तु मिठ्ठी ङिती कर मैं इन्सान चे पूता नु पकड़वावे?”
ओचे साथीया ने जिसे बेले ङेखले कि का हुवणे आले छै, ते केहले, “हे प्रभु, का अम्ही तलवार चलाऊं?” ते वांचे महु हेके ने महायाजक चे दासा उपर तलवार चलाती कर ओचा सज़्ज़ा कान उङारती नाखला।
ऐचे उपर ईशु ने केहले, “हमा ब़स करा।” ते ओचे कान छूती कर ओनु ठीक करती ङिले।
तब ईशु ने प्रधान याजका ते मन्दरा चे पाहरेदारा चे सरदार ते बङका नु, जको ओचे उपर चढ़ाई करती आलते, केहले, “का तम्ही मनु ङाकु जाणती कर तलवारा ते ङांगा चती कर निकड़ले छिवा? जब मैं मन्दरा मां हर ङिओ तम्चे लारे हुता, तां तम्ही मनु हाथ कोनी लाला, पर हा तम्ची घड़ी छै, ते अन्धकार चा अधिकार छै।”


बल्ति वे ईशु नु पकड़ती कर गेहती टुरले, ते महायाजक चे घरे गेहती आले, पतरस दूर ही दूर ओचे भांसु-भांसु आवे पलता। ते जिसे बेले वे बेहड़े मां जाखते ब़ालती कर बच्‍चड़ ब़ेहले, तां पतरस वी वांचे बीच मां आधे मां ब़ेसती रेहला। तब हेक दासी पतरस नु जाखते चे सोज़ले मां ब़ेहले ङेखती कर, ते ओची तरफ तकती कर किहुं लाग़ली, “हा वी तां ओचे लारे हुता।”
पर पतरस ईं केहती कर इन्कार करला, “हे नारी, मैं ओनु ना जाणी।”
थोड़ी देर बाद कुई नेरे ने ओनु ङेखती कर केहले, “तु वी तां वांचे महु छी।”
पतरस ने केहले, “हे भले मानस, मैं कोनी।”
कुई घण्टे भर चे बाद हेक नेरे इन्साना ने बङी मजबूती लारे केहले, “सच्‍चमां हा वी तां ओचे लारे हुता, कांकि हा गलीली छै।”
पतरस ने केहले, “हे भले मानस, मैं ना जाणी कि तु का किही पला!” ओ ईं किहे ही पलता कि तुरन्त कूकड़े ने बांग ङिली। तब प्रभु ने घूमती कर पतरस ची तरफ ङेखले, ते पतरस नु प्रभु ची वा बात याद आली जको ओणे केहली हुती, “आज़ कूकड़े चे बांग ङेणे कनु पेहले, तु तीन वारी माया इन्कार करे।” ते ओ ब़ाहर जती कर तकड़ा रोला।


जको इन्साने ईशु नु पकड़ली भिलती, वे ओनु मखोला मां उङारती कर कोटु लाग़ले। ते ओचीया आंखीया ढकती कर ओकनु पूछले, “भविष्यवाणी कर ते बावड़ तनु केहणे मारले?” ते वाणे ब़ोहत सारीया नेरीया वी निन्दा चा बाता ओचे विरोध मां केहलीया।


जिसे बेले ङिओ उभरला तां लौका चे बङके ते प्रधान याजक ते शास्त्री भेले हुले, ते ईशु नु आपणी महासभा मां आणती कर पूछले, “अगर तु मसीह छी, तां अम्हानु केहती ङे!”
ओणे वानु केहले, “अगर मैं तम्हानु किहे, तां विश्‍वास नी करा। ते अगर पूछे, तां उत्तर नी ङिया। पर हमा कनु मैं इन्साना चा पूत सर्वशक्‍तिमान नरीकारा चे सज़्ज़े पासु ब़ेहला रिही।”
ऐचे उपर सारा ने केहले, “तां का तु नरीकारा चा पूत छी?”
ओणे वानु केहले, “तम्ही आप ही किहा पले, कांकि मैं छै।”
तब वाणे केहले, “हमा अम्हानु ग़वाही ची का जरुरत छै? कांकि अम्ही आप ही ओचे मुँहा कनु सुणती गेले।”

Dinleyin लूका 22