If you would like a copy of this version please contact info@davaraudiobibles.org

Nahali New Testament, CC-BY-SA-4.0, The Love Fellowship. Nahali New Testament, CC-BY-SA-4.0, Davar Partners International, The Love Fellowship, 2023.

Nahali New Testament

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

पेलूच वचन एतो, एने वचन बोगवाना हेरी एतो, एने वचन बोगवान एतो. तोच सुरुवाती बोगवान हेरी एतो. आखा काही तान द्वारे उत्पन्न एय गीयो, एने जो काही उत्पन्न एय गीयो तो तान मायरीन काल्ली भी वस्तु तान वाचीन उत्पन्न एनी नाहं. तामाय जीवन एता एने तोच जीवन माणहान प्रकाश एतो. उजालो आंधाराम चोमोकणे, एने आंधाराम ताह ग्रहण केरील नाहं.
एक माणुह बोगवान फायरीनआवीन एनो ज्यान नाव यूहन्ना एता. तो गवाही आपणेह आवा कि तो उजालान गवाही आपील, कारण आखा तान द्वारे विश्वासामाय आवे. तो स्वता: तर उजालो नाह एतो, पुण ता उजालान गवाही आपणेह आवा हि.
खेरो उजालान प्रत्येक माणहाह प्रकाशित करने, जगाम आवण्यो एतो. तो जगाम एतो, एने जग तान द्वारे उत्पन्न एय गीयो, एने जगान ताह ओलखिल नाहं. तो आपणो गिर आवा एने ताह तान घेरावाला आहने किरील नाहं. पुण तान केरता ताह ग्रहण किरील, तान ताह बोगवानान संततीला अधिकार आपील हि, अर्थाम ताह जे तान नावापुर विश्वास केरणू. ते नाहं रक्ताने, नाहं शरीरान ईच्छा नाहं माणहान ईच्छा पुण बोगवाना फायरीन उत्पन्न एय गीयो हि.
एने वचन देहधारी एय गीयो; एने कृपा एने खेरो पणाने परिपूर्ण एय आमरा माय रेणू, एने आमु तान इही महिमा देखील, जोहलो कि आबाकने एकुलती एक ची महिमा. यूहन्नान तान विषय माय गवाही आपील एने आयडीन केयेल, “हा तोच हि, ज्यान मी वर्णन किरील कि जो मारो ओवतो आवूह हि तो मारो उपेरीन वोदाळीन एने तो मारो पेक्षा पेल्लो एतो.” काहाकाय तान परिपूर्ती आमु आखाज प्राप्त केरील हि कृपा पोर कृपा. ज्यानकेरता का व्यवस्था मुसान द्वारे आपील एतो हि, पुण कृपा एने खेरोपणा यीशु मसीहान द्वारे पोचील. बोगवानान कूण केधीच नाहं देखील, एकूलता एक सोरो जो आबाकने आहने हि ज्याच ताह प्रगट किरील.


यूहन्नान गवाही हि, कि तेवी यहूदयान यरूशलेम मायरीन याजकांन एने लेवी ताह हे फुसण्या केरता मुकलेल, “तू कूण हि?” तर तान हे होमजाडीन लीईल एने नाकार किरील नाहं, पुण होमजाडीन होमलीन लीईल, “मी मसीह नाहं.” तेवी तान ताह फुसील, “तर ओवतो कूण हि? काय तू एलिया हि?” तान केयेलमी नाहं हि. “तर काय तू भविष्यवक्ता हि?” तान उत्तर आपील, “नाहं.” तेवी तान ताह फुसील, “ओवतो तू कूण हि! काहाकाय आमु आमरो मोकेलनाराह उत्तर आपज्यू, तू आपणो विषय माय काय किथे.” यूहन्ना केयेल, “जीही यशाया भविष्यवक्ता केयेल हि, मी जेंगलामाय आयेडणारान शब्द हि कि तुमूह प्रभु चा सिडिक हेल्लीच केरू” ते फरीसीम फायरीन मुकलेल गीया एता. तो ताह हा प्रश्न फुसेल, “केध्दीह तू मसीह नाहं, एने नाहं एलिया एने नाहं तो भविष्यवक्ता हि, तर ओवतो बाप्तिस्मा का आपथु?” यूहन्ना ताह उत्तर आपील, “मी ते पाण्यानकेरीन बाप्तिस्मा आपथु, पुण तुमरे माय एक माणुह उबरील हि ज्याह तुमूह नाह ओलखते तो मार पासाणरीन आवी, तान खाहडान बोंद सोडणेन मी लायकीन नाहं सोतो.” ज्यू वातू यार्देन नदी ने दिन तीउगी बैथानी माय एईल, जांबी यूहन्ना बाप्तिस्मा आपतालु.

दिहीरा एक दिह तान यीशुह आपणे उगे आवतालू देखीन कियील, “देखू” हा बोगवानान कोकर हि जे जगान पाप विसीन लेणे. हा तोच हि कि ज्यान विषयाम मी कियील एता, “एक माणुह मारो पासाण आविह हि तो मारो पेक्षा श्रेष्ठ हि, काहाकाय तो मारे पेलूच चा एतो. एने मी ते ताह ओल्खील नाह इतू, पुण ज्यानकेरता मी पाण्यानकेरीन बाप्तिस्मा आपतेन आवूह, का तो इस्राएलान उपेर प्रगट एय जाय.” एने यूहन्ना जी गवाही आपील: मी आत्माह कबुतरान गेत आकाश मायरीन उतरतालो देखायेल हि, एने तो तान उपेर आवीन थोब गीयो. मी ते ताह ओलेखतालो नाहं, पुण जो माहु पाण्याकेरिन बाप्तिस्मा आपणेन केरता मुकलेल, तोच माहु कियील, ज्यापूर तू आत्मा उतरतालोन एने थोबतालो देखहि; तो पवित्र आत्मा केरीन बाप्तीसमा आपण्यू हि. एने मी देखील एने गवाही आपील कि हा बोगवानान सोरो हि.

दिहीरा एक दिह ओवतो यूहन्ना एने तान चेला मायरीन दुय जन उबरीयेल रेईल एता. एने तान यीशु उगे जात ज्या देखीन, कियील, देखू हा बोगवानान कोकर हि. तेवी ते दुयू चेला तान ज्यो होमली यीशुन पासाण आवा. यीशु ने वोलीन ताह पासाण आवातल्या देखील एने ताह कियील तुमूह कुणीन होदमाय जातेह हि “तान ताह केयेल, हे गुरु तू का रेणे?” तान ताह केयेल, “चाला तर देख लेहु.” तेवी ते जाइन तान रेणेन ठिकाण देखील, एने ता दिहामाय तान हेरी रेणा एने दहा तासा जवळपास एता. ता दिह माय जे यूहन्नान वात फोयालनी यीशु च्या पासाण आवा एता, एक शिमोन पतरस चा बाहाक आंद्रियास एतो. तान देखील आपणो हेरी बाहाक शिमोनाह मिलिन ताह केयेल, “आमूह मसीह म्हणजे यीशु मसीह, जुडना.” तो ताह यीशु उगे लेईन आवा यीशु ताह दृष्टी लागाडील केयेल, “तू यूहन्नान सोरो शिमोन हि: तू कैफा म्हणजे पतरस केयेल जाह.”

दिहीरा एक दिह यीशु ने गलीलामाय जाणे ठेराव्यू, तो फिलीप्पुस ला मिलील एने कियेल, “मारो पासाण आव.” फिलीप्पुस, आंद्रियास एने पतरसा च्या नगरात बेथसदा चा रेणार एतो. फिलीप्पुस नथनेलला मिलील एने ताह कियील, “ज्यान वर्णन मुसान व्यवस्था माय एने भविष्यवक्त्यांनी किरील हि, तो आमूह जुडना हि; तो योसेफान सोरो, यीशु नासरी हि.” नथनेल नी ताह कियील, “काय काही हाजी वस्तु पुण नासरेथ उपेर निकलने शकली?” फिलीप्पुस ताह कियील, “जाइन पाहून ले.” यीशु ने नथनेलला तान आहने आवातल्या पाहून तान विषय माय बोल्णु, “देखू, हा खेरी खेरीच इस्राएली हि: तामाय कपट नाहं.” नथनेलान ताह कियील, “तू माहु किहीकाय ओळखणे?” यीशु ताह उत्तर आपील, “तान पेलोस कि फिलीप्पुस माहु हादहु, ताहेरया तू अंजीरान झाडा बुंदे उबरीयील ला एतो, तेवी मी तुवाह देखाय एता” नथनेल ते ताह कियील, “हे गुरु, तू बोगवानान सोरो हि; तू इस्राएलान महाराज हि.” यीशु ताह कियील, “मी जो काय तुवाह कियील का मी तुवाह अंजीरान झाडा बुंदे देखील, काय तू ज्यानकेरता विश्वास करने? तू ज्या पेक्षा तू मोठा मोठा कामे देखहि.” ओवतो माहु कियील, “मी तुहा खेरो खेरो किथे कि तुमूह स्वर्गाला उघड एतो, एने बोगवानान सोरान स्वर्गदूतांन माणहान सोरान उपेर उतरतालान एने उपेर जातेन देख हो.”

Dinleyin यूहन्ना 1