If you would like a copy of this version please contact info@davaraudiobibles.org

Nahali New Testament, CC-BY-SA-4.0, The Love Fellowship. Nahali New Testament, CC-BY-SA-4.0, Davar Partners International, The Love Fellowship, 2023.

Nahali New Testament

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

हे थियपिलास, मी पेल्लो पुस्तक ती आखा वातून विषायी लिखील, जी यीशु सुरुवातीरीन केरतालु एतो एने हिकाडतालु, ता दिहावोर जेवीवोर तो ता चेला या तान निवाडील एता पवित्र आत्मान आज्ञा आपील एने उपेर विसील गीयो. तान दुख उठाणेन ओवतो जादा प्रमाणांनी स्वताह ताह देखाडणे, कि मी जीवतालू हि एने चाळीस दिह ताहवोर तो ताह दिसत रेणू एने बोगवानान राज्यान वात केरीन रेणू. ताह आज्ञा आपील, “यरूशलेमेन सोडहुं मा, पुण आबाकने तो प्रतिज्ञा पुरो ला वाट जोव रीवू, ज्यान वात तुमूह माफायरीन होमेल्नी हि. काहाकाय यूहन्ना पाण्या केरीन बाप्तिस्मा आपील हि पुण थोडाच दिहा बादमाय तुमूह पवित्र आत्मान बाप्तिस्मा जुडी.”

केरीन तास एखालुज आवीन ताह फुसील, “हे प्रभु, काय तू ज्याच टायीमापोर इस्राएलान राज्य फिराव दीही काय?” तो ताह कियील, “ता वेलान केव्ही कालाह सोमेजणे, ज्याह आबुक आपणाच अधिकाराम मेलील हि तुमरीफाय नाहं. पुण ताहेरया पवित्र आत्मा तुमरे पोर आवूह तेवी तुमूह सामर्थ्य जुळी; एने यरूशलेम एने आखा यहूदिया अने शमरोन माय एने पृथ्वीन तोकापूरिनूर मारा गवाही एय.” ज्यो केयीन तो तान डोलान देखता देखता तो उपेर विसाय गीयो, एने वादला ताह तान डोला ओगांणरीन लीकाड लेदा. ताह जातेन ताहेरया ते आकाशाकडे देखीह एता तर देखू दुय माणहे दोवल्या कपडे पेरनीह ताहेऱ्यो आवीन उबरीयेल रेणा. एने ताह कियील, हे गलीली एदम्यान, काहा उबरीयेल रेयीन स्वर्ग उखेर दिखिह हि? हा यीशु जो तुमरो जागे रीन स्वर्गाम विसील गीयो हि, ज्या प्रमाणे तुमूह ताह स्वर्गाम जातेन तुमु देखील हि तान प्रमाणे तो पोशा आवूह.

जेवी ते जैतुनान बोयडापोररीन जे यरूशलेम उगेरीन शब्बाथ दिहान लांबेवूर हि, यरूशलेमाम पोशा आवा. एने ता ताहारी पोचील, तेवी ता खोलीम गीया जाहारी पतरस यूहन्ना, याकूब, एने आंद्रिया, फिलीप थोमा बर्थलमय मत्ती एने अल्फिन सोरो याकूब शिमोन जीलोट याकूबान सोरो यहूदा हे रेथे एता. हे आखा कोलाक बायकू एने यीशुन आहाक मरियम एने तान बायाकहे-यो एकचीत एईन प्रार्थना केरीन रेणा. तान दिहामाय पतरस बायाकामाय जे एक होव वीस माणुह ईतोउबरीन रेयीन, केहू लागिल. “हे बायहो, गिरीज हि कि पवित्र शास्त्राचे ते वचन पुरो एने जुवी जे पवित्र आत्मा माय दाविदान मुया मायरीन यहूदान विषयी, जो यीशुह देरणेन मुख्य एतो, पेल्लारीन कियील एता. काहाकाय तो आमरा माय गाळील गीयो एने आवो सेवकाई माय भेलाईल एनो. तान पापान कोमायकेरिन एक खेत वेचातो लीईल एने जोमनि पोर मूय केरीन पोडील एने तान पेट फाटीन गीया एने तान आखा आतड्या बाहेर निकलीन आवा. आवो वातून यरूशलेम रेणारे आखा होमजाडीन गीया, न्याओर कि ता खेतान नाव तान भाषाम हकलदमा म्हणजे रक्ताचे खेत पोडीन गीया. स्तोत्र सहिता माय लिखील हि, ज्यान घेर उजडीन जाणेन जुवी, एने तामाय कुनुस रेणेन मां, एने तान पद कूण दिहरो लीन लेणेन जुवी. तामुळे जोलाक दिह प्रभु यीशु आमरेहेयो आविह जात रेणू म्हणजे यूहन्नान बाप्तिस्मा पासून तान आमुपुररीन विसीन लेणेवोर जे माणुह आमरेहेयो रेणा, हाजो हि कि तामायरीन एक जन आमरेहेयो तान जीवतालू उठणेन गवाही एईन जाणे.” तेवी तास दुय जाणाह उबरीयेल किरील एक योसेफ जो बर्सबा कियील यूस्तुस जाथू एने मत्तीयाह ज्याह दुईजानाह ओगाण किरील, एने हि प्रार्थना केरील, “हे प्रभु तू तर सोबान मोन मालूम हि हे प्रगट केर, कि आवो दुयजाणामारीन तू काल्लोह भी निवाडील हि. तो आवो सेवेन एने प्रेरिताचे पद लेवे जा यहूदा सोडीन आपणो जागीपोर निकलीन गीयो. तेवी तास तान बारामाय चिठी टाकील, एने चिठी मत्तीयाह ज्यापूर निकलील. केरीन तो अकरा प्रेरित हे-यो गेणानु गीयो.”

Dinleyin प्रेरितान कामे 1