Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á zíʼ ŋkó á ntē akɛnūʼ, ńzéŋ ntó ntshi mbīŋ nzem mé tésɔŋ wɔp. Ńdɛ ŋgē ekó éwú, mɛ́ lɔk mmɔʼ ŋkeluʼ, é nɔŋ ánɛ akō, éshʉʼ njʉ́ɔ á yí. Yɛɛ́so á jʉ́ɔ ntií zīi wɔ piʼ‑ŋkeluʼ mɛ́t, é lɔk efɛ́ nnɛ̄t ŋgyá á mbū yí épúp, ńdé á mbū ŋkeluʼ mɛ́t ŋ́gɛ: «Esoó ga, kak ete, mefa mú é gɔ́ ndekne lekne. » Emɔ̄ʼ wɔ kɛ́ʼte‑mbé Ndém é júʼ, ńzī á lesāŋ á ntɔ̄ŋ pɔ́p ŋ́gɛ: «Ŋiŋ wuɔ a á si nzɔ̄tɛ á Ndém. » Yɛɛ́so á zhɛ́ ajū mīi, pɔ́ é ntē pɔ́p esáŋa, ńdé á mbū pɔ́p ŋ́gɛ: «Pɛ é gaá ŋgwɛ̄ ejɔ̄ ntií ekwaŋte tepɔŋ, á ntē pɛ ɛ̄? Meŋ á gɛ, mefa ŋiŋ wuɔ é gɔ́ ndekne lekne, á tsya á wɛ́ páʼa, ńzhɛ́ ŋ́gɛ, meŋ gɔ le kūʼ á gá á letswi á mbū yí ŋ́gɛ, a elū á esī nzīŋɛ lɛ̄? Táʼ, meŋ á kɔŋ ŋ́gɛ, pɛ ezhɛ́ á légɛ, Méŋ‑Ŋiŋnɔŋ wuɔ, a pɔŋteé á yí á lelekne mefa ŋiŋ, á ndo esī atsetsáʼ ega. » Ńdé épúp, ńdɛ ntswī á mbū ŋkeluʼ ŋ́gɛ: «Lu á esī, ńtswíʼ á akō jú, éswáŋ nnɛ̄t mé mba ju. » Ŋiŋ wɔ̄ á lɛ ndū á esī, éswáŋ nnɛ̄t mé mba zi. Epuɔ menɔŋ é jʉ́ɔ anu ajʉɔ mɛ́t, ńcɔ̄ʼ tɛʼ, ḿbiŋ ŋgūʼte á Ndém, páʼ a á yá ejʉɔ ntií mete á mbū ŋiŋnɔŋ.


Yɛɛ́so á fhó á ajʉʼ mɛ́t ŋgʉ̄ɔ, ŋ́gē etsia, ńjʉ́ɔ mmɔʼ ŋiŋ á náŋ á ajʉʼ afaʼ yí, á ajʉʼ zīi mɛ́ maʼa ncup alāʼ éwú, lezēŋ tsí é gɔ́ lɛ Matío. Á lé á mbū yí ŋ́gɛ: «Shʉʼɛ̄, ŋ́gɔ́ á nzem meŋ. » Á lɛ ndū á esī, ńtsé á nzem Yɛɛ́so. Matío á ghʉ ntɔ́ŋ á Yɛɛ́so á mba yí. Pɔ́ ghʉ nnáŋ á esī, ŋ́gɔ̄ á mpfɛ́t azō, mbɔ Matío a á nzéŋ ntɔ́ŋ wɔ tswí‑ncup Lóma tɛ nzáne, mbɔɔ emɔ̄ʼ epuɔ pīi, mɛ́ gɛ ntónɛ á wɔ́p, ŋ́gɛ epuɔ tepɔŋ. Pɔ́ a Yɛɛ́so mbɔɔ nnɔ yí, é pú nnáŋte á esī mbútɛ etsō mpfɛ́tɛ. Epuɔ Falísia é jʉ́ɔ épúp, ńdé á mbū nnɔ Yɛɛ́so ŋ́gɛ: «Melaʼ akɔ̄, mɔʼɔ́ wɛ a á ega, pɔ́ a wɔ tswí‑ncup Lóma mbɔɔ emɔ̄ʼ epuɔ tepɔŋ, é pútɛ etsō mpfɛ́tɛ ɛ́?» Yɛɛ́so á júʼ anu zīi pɔ́ é zɛ́ttɛ, ńdé á mbū pɔ́p ŋ́gɛ: «Ŋiŋ a gɔ le gɔ́ nte‑nté, ńtsɔ́ʼ akhu mbɛt‑megɔ ɔ́, megaŋ agɔ mé tsɔɔ́ʼ akhu zí. Pɛ ekímte páʼ mɛ́ leé á ntē aŋwaʼne Ndém ŋ́gɛ: “Meŋ á si ŋkɔ̄ŋɔ ŋ́gɛ, epuɔ menɔŋ e ewɛ̄ atsāmezeŋɛ, ńtɔ́k á leyā azō, ńdɔk ŋgūʼte á gá.”» Yɛɛ́so á zéŋ ndé ŋ́gɛ: «Á épúp melaʼ mīi, meŋ kɛɛ́ te eshʉ̄ʼɛ á ŋgɔŋ, á efaāʼ epuɔ pīi, pɔ́ méŋwɛ̄t é si ndʉ́ɛ́ ŋ́gɛ, pɔ́ gɛ te efāa ā. Meŋ kɛɛ́ eshʉʼɛ, á efaāʼ megaŋ mefa. »


Nnɔ Jáaŋ nnoʼ‑epuɔ á ntshi é ghʉ eshʉ̄ʼ mé lezēŋ Yɛɛ́so, ńzɛ́tte á yí ŋ́gɛ: «Pek, mbɔɔ epuɔ Falísia é si ŋkɔ̄ŋɔ nnáŋa nzi melaʼ Ndém. Nnɔ wú é piŋ nnɔ̄ŋ te ŋghʉ̄ɛ épúp ɔ́ melaʼ akɔ̄?» Yɛɛ́so á pwɛt á mbū pɔ́p ŋ́gɛ: «Pɛ é kwaŋ ŋ́gɛ, ŋiŋ a gɔ etɔ́ŋ lekāk alaá‑ŋgyā tsí, ŋ́kó nzɛ́t á nnɔ mege nnáŋ, pɔ́ zi á lemek e? Táʼ, afʉʼ a ké eshʉʼ ekuʼe, mɛ́ efhó á nnɔ pɔ́p, éfók á tɛnzwí ŋge, ńdɔk ŋgʉ̄ɔ. Ajɔ̄ afʉʼ, pɔ́ ecʉ́ʼ ndúŋ, ŋ́kɔŋ nnáŋ nzi melaʼ Ndém.
«Ŋiŋ a gɔ le lɔ̄k ajūɔ nzhó eswhī, ḿvhō á nzwiŋ nzhó ɔ́. A ghʉɛ épúp, mbɔ ajūɔ nzhó eswhī, á taŋ, ésia á nzwiŋ nzhó, lephʉ̄ e piŋ mbú ntswiʼne efáŋ. Ŋiŋ a gɔ le néŋ meluʼ meswhī á ntē nzwiŋ ntūʼ zīi, mɛ́ le lɔ̄k ŋgup ncūŋte ɛ́. A ghʉɛ épúp, mbɔ meluʼ meswhī é fuʼe, éghʉ nzwiŋ ntūʼ e evɛ́t, meluʼ e egʉ̄ɔ á esī, a epiŋ mbí ntūʼ. Á pɔŋ ŋ́gɛ mɛ́ enéŋ meluʼ meswhī, áa ntē ntūʼ eswhī. Púp, meluʼ pɔ́ ntūʼ e epú ntswɛ́t. »


Yɛɛ́so á zɛ́t eshúŋnɛ á mbū pɔ́p shúŋne, mmɔʼ ŋkém epuɔ Yúda á lɛ eshʉ̄ʼ, ńtshóte nnɛ̄t mé lezēŋ tsí, ńtswíʼte á mvhɔ yí, ńdé mé yí ŋ́gɛ: «Méŋ agáʼ méŋ ga eyi menzwí a á mba, ńdɛ nzɛ́t ŋkwhʉ́ɛ. Ké eshʉ̄ʼ ndɛ nzápa apū ánɛ yí, a egɔ́ éwú. » Yɛɛ́so á júʼ épúp, ńdū á esī, pɔ́ a nnɔ yí é lɛ nzhɛ̄ne á yí.
Pɔ́ nɔŋ ŋgʉ̄ɔ, mmɔʼ menzwí, mbɔ mɛ́sɔ̄ a á náŋ ánɛ yí ŋguʼ ntsɔp pīa mé legēm, á fhó mé nzem, ńnā apū zí, ḿpfēŋ lepap nzhó Yɛɛ́so. Mbɔ a á ndáʼ nnéŋ á ntē yí á légɛ, yí lɛ mpfēŋ áa nzhó zi ndaʼ, mbɔ yí e te. Ḿpfēŋ épúp, Yɛɛ́so á pekne nnɛ̄t, ńcʉ̄ á yí, ńdé á mbū yí ŋ́gɛ: «Maá, kak ete, agɔ jú á mi páʼā, melaʼ mīi o ó fɛ́ nnɛ̄t ju ŋgyá á mbū meŋ. » Menzwí wɔ̄ á lɛ mbú ntē efʉʼ mɛ́t, efʉʼ mɛ́t.
Yɛɛ́so á gʉɔ tɛ ŋkó á mba ŋkém wɔ̄, ńjʉ́ɔ mbɔ wɔ púʼ‑etsō ndɔk ndā lewhʉ̄, é ndáʼ eshʉʼ tɛ ntshíte. Alāʼ á nɔŋ nzāpa nnɛ̄t, Yɛɛ́so á lé ŋ́gɛ: «Pɛ efhó á ŋgyā ntóte. Mɔ́ a ka kwhʉ́ ɛ́, a á si ndí lií. » Epuɔ é júʼ épúp, ńcʉ́ʼɛ nzwī á yí zwi. Alāʼ zīi á ŋgɔ́ á ŋgyā, á tó tɛ mmī, Yɛɛ́so á kó á ŋgyā, ńtá apū mɔ́ ŋkímne, mɔ́ á lɛ nzīɛ. Mɛ́ pú ndɔ̄k anu jʉɔ mɛ́t, ésāŋ aziɛ́ akap alāʼ.

Yɛɛ́so á ghʉ efhó á ajʉʼ mɛ́t, ńnɔŋ ŋgʉ̄ɔ, emɔ̄ʼ wɔ efʉʉ́‑menēk mémpīa é nɔŋ nzhɛ̄nɛ á yí, ńnɔŋ ŋgāʼtɛ mé ŋghi teté ŋ́gɛ: «Yɛɛ́so méŋ Efɔ Ndavít, lɛ ntsá mezeŋɛ mék. » Yɛɛ́so á gʉɔ tɛ nzíʼ ŋkó á ŋgyā, wɔ efʉʉ́‑menēk pwɔ̄ é kó azɔ́p, ńtshóte nnɛ̄t mé lezēŋ tsí. Á lé á mbū pɔ́p ŋ́gɛ: «Pɛ é kwaŋ ŋ́gɛ, meŋ gɔ eghʉ̄ʉ, pɛ jʉ́ɔ ejʉʼ lɛ́?» Pɔ́ pwɛt ŋ́gɛ: «Ŋŋ me Ndi, o kuūʼ á leghʉ épúp. » Á lɛ ŋgē epfeŋ menēk mɔ́p, ńnɔŋ ndʉ́ɛ́ ŋ́gɛ: «Ndém a elɛ ŋghʉ̄, akʉ̄ɛ zīi pɛ é néŋ á ntē pɛ ŋ́gɛ, á gɔ egɔ́ épúp, a egɔ́ épúp. » Menēk mɔ́p é lɛ njʉ́ɔ ejʉʼ. Yɛɛ́so á chʉ́ nnɛ̄t ŋkāk á wɔ́p á mbɔŋɔ́ ŋ́gɛ, pɔ́ epá á wɔ́p á leghʉ tɛ ŋiŋ á zhɛ́. Pɔ́ lɛ mbīŋ ŋgē etó, ńzī á lelɔk ajū mīi, Yɛɛ́so a á ghʉ ánɛ pɔ́p, ésāŋ aziɛ́ akap alāʼ.


Wɔ efʉʉ́‑menēk pwɔ̄ é lɛ ŋgē etó, mɛ́ lɛ ndɔ̄k mmɔʼ ŋiŋ eshʉ̄ʼ njʉ́ɔ á Yɛɛ́so, mbɔ esī e lē ŋgɔ á yí, ńtsɛ́t nchu yí. Yɛɛ́so á juŋ esī mɛ́t, tɛ mbúʼ‑nchu wɔ̄ á zi á leshūŋne. Alāʼ á jʉ́ɔ épúp, á pú ŋkʉ̄ʼne á wɔ́p tɛʼ, pɔ́ lé ŋ́gɛ: «Mɛ́ laá ŋgɔ́ aleʼé, ńjʉ́ɔ ntií anu páʼa á ntē Islaɛl ɛ́. » Epuɔ Falísia é piŋ ŋgɔ́ si ndʉ́ɛ́ azɔ́p ŋghʉ̄ áa lɛ: «Efɔ mesī mé yáa á yí mete, tɛ́ á lɔkɔ njūŋɔ mesī ánɛ epuɔ. »


Yɛɛ́so á nɔŋ ntɔ́ktɛ ánɛ metésɔŋ ntsem, mbɔɔ á ntē mekap alāʼ, ńzíʼnɛ epuɔ anu Ndém, á ntē meŋgyā aswiŋte pɔ́p, ńzéŋ nnɔŋ ntswīi ŋke mbɔŋ, ésáʼa eshúŋɔ páʼ Lefɔ Ndém é épúp. Ńnɔŋ ŋghʉ̄ɛ, ŋiŋ yīi a á ŋgwɛ̄ eziɛ́ ntií agɔ lɛ́, mbɔɔ ŋiŋ yīi, a á ŋgwɛ̄ eziɛ́ ntií alɔʼ lɛ́, á tʉɛ. Ńjʉ́ɔ páʼ alāʼ á kɔ́ʼ nzá épúp, mezeŋɛ mɔ́p é kú á yí, melaʼ mīi pɔ́ le naŋté á esī, ńnɔŋ mbúu ŋkáa mbwɛ́tɛ, páʼ memvhō mīi, é té á mpfɛnne wɛ̄ɛ lā. Á jʉ́ɔ épúp, ńdé á mbū nnɔ yí ŋ́gɛ: «Etsō é atswɛt tɛ nzáne tsīi, é kuʼ á lefaʼ. Wɔ faʼa é piŋ ŋkʉɔ́k. Púp, pɛ elɛ mbúʼ mbū, éswíŋte á ŋgaŋ ŋkāʼ, a etó megaŋ afaʼ, pɔ́ egʉɔ efāʼ etsō tsí mɛ́t. »

Dinleyin Matío 9