Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወአመ ሣልስት ዕለት ከብካብ ኮነ በቃና ዘገሊላ ወሀለወት ህየ እሙ ለእግዚእ ኢየሱስ። ወጸውዕዎ ለእግዚእ ኢየሱስ ወለአርዳኢሁ ውስተ ከብካብ። ወሶበ ኀልቀ ወይኖሙ ትቤሎ እሙ ለእግዚእ ኢየሱስ ወይንኬ አልቦሙ። ወይቤላ እግዚእ ኢየሱስ ምንት ብየ ምስሌኪ ኦ ብእሲቶ ዓዲ ኢበጽሐ ጊዜየ። ወትቤሎሙ እሙ ለእለ ይትለአኩ ኵሎ ዘይቤለክሙ ግበሩ። ወሀለዋ ህየ መሣብክት ስድስቱ እለ እብን በዘያጥሕሩ ቦቶን አይሁድ ንቡራት ህየ ወያገምራ በበ ክልኤቱ ወበበ ሠለስቱ መስፈርት ዘቀሡት። ወይቤሎሙ እግዚእ ኢየሱስ ምልእዎንኬ ለእላ መሣብክት ማየ ወመልእዎን እስከ አፉሂን ወእስከ ላዕሎን። ወይቤሎሙ ቅድሑኬ ይእዜ ወሰዱ ወሀብዎ ለሊቀ ምርፋቅ ወወሰዱ ወወሀብዎ። ወጥዒሞ አንከረ ሊቀ ምርፋቅ ውእተ ማየ ዘኮነ ወይነ ወኢያእመረ እምኀበ አምጽእዎ ወገዛእትሰ እለ ቀድሕዎ የአምሩ ውእተ ማየ ዘኮነ ወይነ። ወጸውዖ ሊቀ ምርፋቅ ለመርዓዊ ወይቤሎ ኵሉ ሰብእ ዘይሤኒ ወይነ ያቀድም አስትዮ ወእምድኅረ ሰክሩ ያሰቲ ዘይቴሐት ወአንተሰ ዘይሤኒ ወይነ ዐቀብከ ወአስተደኀርከ እስከ ይእዜ። ወዝንቱ ቀዳሜ ተአምር ዘገብረ እግዚእ ኢየሱስ በቃና ዘገሊላ ወአርአየ ስብሐቲሁ ወአምኑ ቦቱ አርዳኢሁ።

ወእምድኅረ ዝንቱ ወረዱ ቅፍርናሆም ውእቱ ወእሙ ወአኀዊሁ ወአርዳኢሁ ወነበሩ ህየ ኅዳጠ መዋዕለ ወአኮ ብዙኀ። ወቀርበ በዓለ ፋሲካሆሙ ለአይሁድ ወዐርገ እግዚእ ኢየሱስ ኢየሩሳሌም።

ወረከበ በምኵራብ እለ ይሠይጡ ወይሣየጡ አልሕምተ ወአባግዐ ወአርጋበ ወመወልጣነ እንዘ ይነብሩ። ወገብረ መቅሠፍተ ጥብጣቤ ዘሐብል ወሰደደ ኵሎ እምኵራብ አባግዐኒ ወአልሕምተኒ ወዘረወ ወርቆሙ ለመወልጣን ወገፍትዐ ማእዳቲሆሙ ወመናብርቲሆሙ ለእለ ይሠይጡ ርግበ ገንጰለ። ወይቤሎሙ ለእለ ይሠይጡ አርጋበ አሰስሉ ወአውፅኡ ዘንተ እምዝየ ወኢትረስዩ ቤተ አቡየ ቤተ ምሥያጥ። ወተዘከሩ አርዳኢሁ ከመ ጽሑፍ ውእቱ ዘይብል «ቅንአተ ቤትከ በልዐኒ።» ወአውሥእዎ አይሁድ ወይቤልዎ ምንተ ትእምርተ ታርኢ ዘዘንተ ትገብር። ወአውሥአ እግዚእ ኢየሱስ ወይቤሎሙ ንሥትዎ ለዝንቱ ቤተ መቅደስ ወበሠሉስ ዕለት አነሥኦ። ወይቤልዎ አይሁድ በአርብዓ ወስድስቱ ዓመት ተሐንጸ ዝንቱ ቤተ መቅደስ ወአንተሰ በሠሉስ መዋዕል ታነሥኦ። ወውእቱሰ በእንተ ቤተ ሥጋሁ ይቤሎሙ፤ ወአመ ተንሥአ እምነ ምዉታን ተዘከሩ አርዳኢሁ ከመ በእንተዝ ይቤሎሙ ወአምኑ በቃለ መጻሕፍት ወበቃለ እግዚእ ኢየሱስ ዘይቤሎሙ። ወእንዘ ሀሎ እግዚእ ኢየሱስ ኢየሩሳሌም በበዓለ ፋሲካ ብዙኃን አምኑ በስሙ ሶበ ርእዩ ተኣምረ ዘገብረ። ወውእቱሰ እግዚእ ኢየሱስ ኢየአምኖሙ እስመ የአምሮ ለኵሉ ለለ አሐዱ። ወኢይፈቅድ ይንግርዎ ግዕዞ ለሰብእ እስመ ለሊሁ የአምሮ ለሰብእ።

Dinleyin ወንጌል ዘዮሐንስ 2