Kaba for CAR - ACATBA; 2020  Drama (NT)

Goe tə̂ a, Jeju aw nja dɔ nangə Galile tə̂ bbay. N̂-ndiki ta kaw Jude ang, mba njê-kɔnje dɔ Jiipije aw sangəje ddəw ta tɔlɛ̂. Kusu lə Jiipije kə̂ to kusu Kəy-kam nayn ngɔsi ngaa. Ngakɔn Jeju paje arɛ̂je nan: «Ɔtu lo tə̂ nəənn bbo aw nangə Jude tə̂, arə njê-njaje goi tə̂ kara ooje kulaje kə̂ aw dda tɔ. Dəw kə̂ ndiki karə dəwje gəreje a dda nɛ̂n lo-kiyɛ̂ tə̂ ang. Aw ə-dda nɛ̂nje kə̂ bo nya. Yeenn a, ə-tɔju rɔi arə dəwje kə̂ dɔ nangə tə̂ gərije.» Mba ngakɔn Jeju kara ooje məde tə̂ saa ang. A Jeju ilade tə̂ nan: «Kar ləm asə ang bbay. A sese, kar tɔyn njaa maji arəse to maji dɔrɔ. Dəwje kə̂ dɔ nangə tə̂ a kasə ta mbətəse ang. A əman, dəwje mbətəmje, mba m-pa marəde m-pa nan kula-ddade maji ang. Sese awje kusu tə̂ le. A əman, mâ kaw ang, mba kar ləm asə ang bbay.»
Jeju pa tar arəde baann a, təl nayn Galile. Ngakɔɛ̂nje awje kusu tə̂ le, a ne kara naw lo-kiyɛ̂ tə̂, narə dəw ooe ang.

Njê-kɔn dɔ Jiipije aw sangəje Jeju ndɔ kusu tə̂ le. N̂-dujuje tar nan: «Nee dda wa?»
Horo dəwje tə̂ kə̂ banya le, dəwje aw paje tar laa hɔy hɔy. Marɛ̂je paje nan: «N̂-to dəw kə̂ maji.» A marɛ̂je paje nan: «Ngəm, naw nərə dəwje.» A dəw kâra tay pa tar laa kə taar ang, mba n̂-bbəəlje Jiipije.
N̂-ddaje kusu le tee dannâ a, Jeju aw kəy-polo Lubba tə̂ ngaâ unn kutu tɔju nɛ̂n. Nɛ̂n-tɔju laa le dum dɔ njê-kɔnje dɔ Jiipije ngaâ paje nan: «Dəw nəənn ndo makəturu ang, a n̂-gərə nɛ̂nje nəənn nya be tokə baânn wa?» Jeju ilade tə̂ nan: «Nɛ̂n-tɔju ləm in rɔ dəw tə̂ kə̂ ulam bbo in rɔm tə̂ njaa ang. Dəw kə̂ ndiki ta dda nɛ̂n kə̂ mə Lubba ndiki a, a gərə se nɛ̂n-tɔju ləm in rɔ Lubba tə̂ wase tarje kə̂ məm tə̂ njaa maw pa wa. Dəw kə̂ aw pa tar kə̂ məɛ̂ tə̂ njaa, to dəw kə̂ aw sangə piti laa njaa. A dəw kə̂ aw sangə piti lə dəw kə̂ ulɛ̂, aw pa tar kə̂ tɔkɔrɔ, ngaâ nɛ̂n-dda kə̂ gatə gatə ang ɔrɛ̂ ang. Mɔyijə â arəse Ndu ang wa? A dəw kâra horose tə̂ aw bbəəl Ndu ang. Yeenn a, mba ddi bba aw sangəje ddəw ta tɔləm wa?» Dəwje le paje arəje Jeju nan: «Ndil kə̂ maji ang to məi tə̂. Nân bba aw sangə ddəw ta tɔli wa?» Jeju ilade tə̂ nan: «Nɛ̂n kâra baa njaa m-dda, a dum dɔse tɔyn. Mɔyijə unn ndu karə ujaje ganja ngannse kə̂ dingaw. A kajeje â unn kutu kuja ganja bbo Mɔyijə ang. Mba yeenn bba, ndɔ-kuwa-rɔ kara, aw ujaje dəw ganja. Bbo ndɔ-kuwa-rɔ tə̂ kara aw ujaje dəw ganja mba Ndu lə Mɔyijə kə̂ aw bbəəlje, a mba ddi bba arəje wungu ɔnse dɔm tə̂ mba dəw kə̂ majɛ̂ ndɔ-kuwa-rɔ tə̂ wa? Maji karə ə-gangəje sariya kə̂ gatə gatə bbo ə-gangəje sariya mba nɛ̂nje kə̂ aw ooje kə kəmse baa ang.»

Marə njê-bbeje kə̂ Jerujalɛm paje nan: «Dingaw nəənn â daw sangɛ̂ ta tɔlɛ̂ le ang wa? Ooje, naw pa tar kəm dəwje tə̂ tɔyn, a dəw kâra pa marə tar ang. Njê-kɔnje dɔje gərəje to n̂-to Mesi le njaa wa? Ndɔ kə̂ Mesi ddee a, dəw kâra a gərə lo kə̂ nin tə̂ bba n̂-ddee ang. A dingaw nəənn, n-gərə lo kə̂ nin tə̂ bba n̂-ddee.»
Yeenn ngaâ Jeju aw tɔju nɛ̂n kəy-polo Lubba tə̂, a pa kə taar nan: «Ə-gərəmje njaa wa? Ə-gərəje lo kə̂ min tə̂ njaa wa? Əman njaa m-ddee kə dɔm baa ang. Ne kə̂ nulam le, n̂-to tɔkɔrɔ. Ne, ə-gəreje ang. Əman, m-gəre mba min rɔɛ̂ tə̂ bba m-ddee ngaâ ne â nulam.»
Yeenn ngaâ dəwje le sangəje ddəw ta kuwa Jeju le, a dəw kâra asə ta kuwɛ̂ ang, mba kar laa asə ang bbay. A horo dəwje tə̂ kə̂ banya le, dəwje nya ooje məde tə̂ saa. N̂-paje nan: «Ndɔ kə̂ Mesi le ddee a, nâ dda nɛ̂n-mɔrije uta lə dingaw nəənn wa?»

Parijinyɛje ooje nɛ̂nje tɔyn kə̂ dəwje kə̂ banya aw paje dɔ Jeju tə̂ aw nyuruje nɛ̂n. Yeenn bba, mbayje lə njê-poloje Lubba kə Parijinyɛje le ulaje njê-ngəmje kəy-polo Lubba karə daw duwɛ̂je. Jeju pa nan: «M-nayn kə se mba gɔju kar baa ngaa. Goe tə̂ a, mâ təl kə rɔ dəw tə̂ kə̂ ulam le. Â sangəmje, a â kingamje ang, mba lo kə̂ mâ kaw tə̂ le, â kasəje ta kaw tə̂ ang.» Yeenn ngaâ Jiipije dujuje naan nan: «Nâ kaw dda bba ja kasə ta kingɛ̂ ang wa? Nâ kaw rɔ Jiipije tə̂ kə̂ sanrɛje naan horo Gɛrɛkəje tə̂, ta tɔju nɛ̂n Gɛrɛkəje wa? N̂-pa narəje nan: ‹A sangəmje, a â kingamje ang, mba asəje ta kaw lo tə̂ kə̂ maw maw tə̂ ang. Nâ ta pa nan ddi â nəənn wa?› »

Ddutu ndɔ kusu tə̂ kə̂ to ndɔ kə̂ ngəng nya njaa, Jeju ar taar ngaâ pa nan: «Bbo kunda ɔn marə dəw a, maji karə n̂-ddee rɔm tə̂, nay maann. Makəturu lə Lubba pa nan: Dəw kə̂ unn məɛ̂ arəm a, baje kə̂ aw arəje təbbə a kinje rɔɛ̂ tə̂ kula.»
Jeju pa tar nəənn ɔju dɔ Ndil kə̂ dəwje kə̂ ooje məde tə̂ saa a kingaje le. Kar tə̂ənn, Ndil-mə-nda ddee ang bbay, mba Jeju nayn inga piti lə Lubba ang bbay.

Dəwje kə̂ banya le ooje tar lə Jeju le ngaâ marɛ̂je paje nan: «Dəw nəənn to Nje-kila mbər tar lə Lubba le njaa.» Marɛ̂je paje nan: «Ne â n̂-to Mesi le.» A marɛ̂je paje nan: «Galile â Mesi le a kin tə̂ ddee wa?» Mba Makəturu lə Lubba pa nan: Mesi a kin gəl Dabbiti tə̂, nâ kin Betelehɛm ngonn bbe tə̂ kə̂ duju Dabbiti kə tə̂.
Yeenn bba, dəwje tinje naan ɔju dɔɛ̂. Marɛ̂je horode tə̂ ndikije ta kuwɛ̂, a dəw kâra uwɛ̂ ang.
Njê-ngəmje kəy-polo Lubba le təlje ddeeje rɔ mbayje tə̂ lə njê-poloje Lubba kə Parijinyɛje tə̂ le a, n̂-dujujede nan: «Mba ddi bba ə-ddeeje kə Jeju le ang wa?» Njê-ngəmje kəy-polo Lubba le ilajede tə̂ nan: «Ndɔ kâra dəw pa tar tokə dingaw nəənn ang.» Yeenn ngaâ Parijinyɛje le paje arəjede nan: «Sese kara nərəse tɔ wa? Marə nje-kɔn dɔje wase marə Parijinyɛ kə̂ unn məɛ̂ arə dingaw nəənn to wa? Bbayɛ̂ njaa to dəwje kə̂ banya kə̂ gərəje Ndu lə Mɔyijə ang. N̂-toje to dəwje kə̂ ndu-ndɔɔl to dɔde tə̂ mban.»
Nikodɛm kə̂ to marə Parijinyɛ kə̂ aw rɔ Jeju tə̂ kete le pa arəde nan: «Koo tar kə̂ ta dəw tə̂ ang ddəm gərə nɛ̂n kə̂ n̂-dda ang ddəm a gangə sariya dɔɛ̂ tə̂, Ndu arəje ddəw karə n-dda baann ang» A kəseje ilɛ̂je tə̂ nan: «Ə-to dəw kə̂ Galile tɔ wa? Ə-sangə mə Makəturu tə̂ lə Lubba kə majɛ̂ oo a, â gərə. Marə nje-kila mbər tar lə Lubba in Galile tə̂ ddee ndɔ kâra ang.» Goe tə̂ a, dəw kâra kâra təl aw kə̂y laa.

Dinleyin Jan 7