If you have would like a copy of this version please contact info@davarpartners.org

Text: Bilaspuri New Testament, CC-BY-SA-4.0, The Love Fellowship. Audio: Bilaspuri New Testament Audio Bible, CC-BY-SA-4.0, Davar Partners International, Hosanna/Faith Comes by Hearing), 2021

Bilaspuri New Testament

This work is licensed under Creative Commons Attribution-ShareAlike 4.0 License.

यीशुये ताहली जे लोकां री ये बड्डी भीड़ देक्खी, तां सै पहाड़िया परा जो थोड़ा जेआ ऊपर गया; कने ताहली जे तिन्हौं सखाणे खातर बैट्ठया तां तिसरे चेले तिसले आये। कने यीशुये तिन्हांजो ये उपदेश देणा शुरु कित्या:


“परमेशर तिन्हां लोकां जो आशीष देआं,
सै जे जाणाँ ये भई तिन्हौं परमेशरा री जरूरत इ, काँह्भई सै तिन्हां पर राज कराँ।
परमेशर तिन्हां लोकां जो आशीष देआं, सै जे दुख मनायें,
काँह्भई परमेशर तिन्हांजो तसल्ली देआं।
परमेशर तिन्हां लोकां जो आशीष देआं,
सै जे नम्र ये, काँह्भई परमेशरा अपणे वायदे रे मुतावक इसा धरतिया पर तिन्हांजो सारियां आशीषां देणियां।
परमेशर तिन्हां लोकां जो आशीष देआं, सै जे सच्चाईया ने तियां जीणे री इच्छा रक्खां ये,
तियां जे कोई भुक्खा रे वगत खाणे पीणे री इच्छा रक्खां, काँह्भई तिन्हौं परमेशर सच्चाईया ने जीणे रे लायक बणां।
परमेशर तिन्हां लोकां जो आशीष देआं, सै जे दयालु ये,
काँह्भई परमेशरा तिन्हां पर दया करनी।
परमेशर तिन्हां लोकां जो आशीष देआं, तिन्हारे जे मन साफ ये,
काँह्भई तिन्हां परमेशरा रा दर्शण पाणा।
परमेशर तिन्हां लोकां जो आशीष देआं, सै जे शान्तिया रे काम्म कराँ ये,
काँह्भई सै परमेशरा रे बच्चे हुणे।
परमेशर तिन्हां लोकां जो आशीष देआं,
सै जे परमेशरा रिया इच्छा रे मुतावक जीणे रिया बजह ने मुशीवत झेल्लां ये, काँह्भई परमेशर तिन्हां पर राज कराँ।”
“परमेशर तुहांजो आशीष देआं, काँह्भई ताहली जे माहणु तुहांजो मेरा चेला हुणे रिया वजह ने तुहांरी निंध्या करो, कने सताओ, कने झूट्ठ बोल्ली-बोल्लीने तुहांरे बरोधा च हरेक किस्मा री बुरी गल्ल बोल्ले। तां खुश कने मगन हुयां, काँह्भई तुहांरे खातर परमेशरे स्वर्गा च सै जे ईनाम रक्खीरा सै बौहत बड्डा। इस खातर भई लोकें तिन्हां भविष्यवक्तयां जो सै जे बौहत साल पैहले थे इयां इ सताईरा था।”


“तुहें इस संसारा रे लोकां खातर लूणा साई ये; पर जे लूणा रा स्वाद बिगड़ी जाओ, तां फेरी इसजो किस तरिके ने इस्तेमाल लायक बणाया जाई सक्कां? फेरी सै किसी कम्मां रा निआं, सिर्फ इसरे भई बाहर सट्टया जाओ कने लोकां रे पैराँ हेठ दल़या जाओ। तुहें इस संसारा रे लोकां खातर लोई साई ये। इक येढ़ा नगर सै जे ऊच्चे पहाड़ा पर बसीरा सै छिपाईने नीं छिपि सकदा। लोक दिऊआ बाल़ीने किसी टोकरे हेठ नीं पर ऊच्चिया ठारी रखां ये, ताकि तिसते घरा रे सारयां लोकां जो लोय हुईजो। तियां इ तुहांरी जिन्दगी उजाले साई माहणुआं रे सामणे चमको भई सै तुहांरे खरयां कम्मां जो देखीने तुहांरे पिता री बडयाई करो, सै जे स्वर्गा चा।”

“ये मता सोचदे, भई हऊँ मूसा रिया व्यवस्था जो या भविष्यवक्तयां रे लिखिरे जो खत्म करने आईरा, हऊँ इन्हौं खत्म करने नीं, पर इन्हांजो पूरा करने आईरा। काँह्भई हऊँ तुहांजो सच्च बोलां, भई तदुआं तक जे अकाश कने धरती टल़ी नीं जाओ, तदुआं तक व्यवस्था ते इक मात्रा या बिन्दु बी बिणा पूरा हुये नीं टल़णा। इस खातर सै जे कोई छोट्टयां ते छोट्टयां हुक्मां चते किसी इक्की जो तोड़ो, कने लोकां जो बी तेढ़ा इ करना सखाओ, सै स्वर्गा रे राज्जा च सबनीं ते छोट्टा हूणा; पर सै जे कोई तिन्हां हुक्मां रा पालन करगा कने तिन्हौ सखांगा, सै माहणु स्वर्गा रे राज्जा च महान समझया जाणा। काँह्भई हऊँ तुहांजो बोलां, भई तुहें शास्त्रियां कने फरीसियां रे धर्मा रे आचरणा ते बधीने व्यवहार करो, तां तुहांरा स्वर्गा रे राज्जा च दाखल हूणा सान आ।”

“तुहें सुणी चुक्कीरे भई तुहांरे पूर्वजां ने बोल्या गया था भई ‘किसी री हत्या नीं करनी’ कने ‘सै जे कोई हत्या करगा तिस कचैहरिया च सजा रे लायक हूणा।’ पर हऊँ तुहांजो बोलां, भई सै माहणु जे अपणे भाईये पर गुस्सा कराँ, तिसरा परमेशरा न्याय करना, कने सै जे कोई अपणे भाईये जो निकम्मा समझीने तिसरी बेज्जति करगा तिस्सो बड्डिया सभा च परमेशरा बौहत भयानक सजा देणी; कने जे कोई अपणे भाईये जो ‘अरे मूर्ख!’ करीने बोल्लो सै नरका रिया अग्गी च सजा रा हकदार हूणा। इस खातर जे तू मन्दरा रिया बेदिया पर अपणी भेंट चढ़ाईराँ, कने तित्थी तिज्जो याद आओ, भई तेरे भाईये रे मना च तेरे खातर कोई बरोध आ, तां तू तिसा भेंटा जो बेदी रे सामणे छड्डी औ, कने पैहले जाईने अपणे भाईये ने सुलह कर फेरी आईने तू अपणिया भेंटा जो चढ़ा। ताहलियां तक जे तू अपणे दुश्मणा सौगी रस्ते चा, तिसने इकदम मेल-मलाप करी लै किति येढ़ा नीं ओ भई सै तिज्जो जज्जा ले सौंपी दो, कने जज तिज्जो सपाईये ले सौंपी दो, कने फेरी सपाई तिज्जो जेल्ला च पाई दो। हऊँ तेरने सच्च बोलां भई तदुआं तक जे तू तिस सब किजि रा भुगतान नीं करी दो, सै जे तूह पर बाकया रैईरा, तदुआं तक तू जेलखान्ने ते कदीं नीं निकल़णा।”

“तुहें सुणी चुक्कीरे भई परमेशरा रा ये हुक्म आ, ‘व्यभिचार नीं करना।’ पर हऊँ तुहांजो बोलां, भई जे कोई माह्णु किसी जनाना जो बासना रिया बुरी नजरा ने देक्खां, तां परमेशरा रिया नजरा च सै तिसाने पाप करी चुक्कया। पाप करने रिया हरेक वजह जो दूर करा! इसजो पूरे तरिके ने अस्वीकार करा। काणा हुईने तेरा स्वर्गा जो जाणा बौहत अच्छा, बजाये इसरे भई तेरियां दो आक्खीं हुन्दे हुये तिज्जो नरका रिया तिसा अग्गी च पाया जाओ सै जे कदीं मनी बुझणी। तियां इ तियां जे भई तुहें इक हात्थ बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो हात्थ हो कने तुहें नरका च जाओ, तां सै बुरा।”


“बोल्या गया, ‘ताहली जे कोई अपणिया घराऔल़िया जो तलाक देआं, तां तिस्सो लिखित रुपा च तलाक देणा चाहिन्दा।’ पर हऊँ तुहांजो बोल्लां भई सै जे कोई अपणिया घराऔल़िया जो व्यभिचारा ते इलावा होर किसी वजह ते तलाक देओ, तां सै तिसाते व्याभिचार करवां; कने सै जे कोई तिसा छड्डी रिया ने ब्याह करो, सै व्याभिचार कराँ।”

“तुहें ये बी सुणीरा भई अहांरे पूर्वजां जो गलाया गया था, ‘तू झूट्ठी सगन्द नीं खायां, पर परमेशरा ने कित्तिरे बायदे जो पूरा कर।’ पर हऊँ तेरने ये बोलां, भई कदीं सगन्द नीं खायां; नां त स्वर्गा री, काँह्भई सै परमेशरा रा संघासण आ; न धरतिया री, काँह्भई सै तिसरे पैर रखणे री जगह इ; न यरूशलेम री, काँह्भई सै महांराजे रा नगर आ। कने अपणे सिरा री बी सगन्द नीं खायां, काँह्भई तू इक्की बाल़ा जो बी न सफेद, न काला करी सकदा। पर तुहांरी गल्ल हाँ री हाँ, या नां री नां ओ; काँह्भई जो किछ इसते जादा हुआं सै शैतान यनि बुराईया ने हुआं।”


“तुहें सुणी चुक्कीरे भई व्यवस्था च ये लिखिरा, ‘अक्खी रे बदले आक्ख कने दन्दा रे बदले दान्द।’ पर हऊँ तुहांजो बोलां भई किसी बुरे माहणुये रे कम्मां रा बदला देखां लेन्दा; पर जे कोई तेरिया सज्जिया खाखा पर चपैड़ मारीने तेरी बेज्जति करो, तां तिस खौ दुज्जी खाख बी फेरी दे। जे कोई तूह पर कचैहरिया च मकद्दमा चलाईने तेरा कुर्ता बी त्वारना चाये, तां तिस्सो तू चोल़ा तक देई दे। जे कोई तिज्जो इक मील चलने जो मजबूर करो, तां तिस सौगी तू दो मील चली जा। सै जे तेरते कोई चीज मंगां, तिस्सो देई दे; कने सै जे उधार लेणे खातर विनती कराँ, तिसजो मना नीं कर।”


“तुहें सुणी चुक्कीरे भई व्यवस्था च ये लिखिरा, ‘तू अपणे पड़ेसिये ने प्यार, कने दुश्मणा ने नफरत कर।’ पर हऊँ तुहांजो ये बोलां, भई अपणे दुश्मणां ने प्यार रखा कने अपणे सताणे औल़यां रे खातर प्राथना करा। ताकि तिसते तुहां स्वर्गा च रैहणे औल़े अपणे पिता रे बच्चे बणना; काँह्भई सै भलयां कने बुरयां दुईं लोकां पर सूरजा री लोय बराबर कराँ, कने धर्मी कने पापी सबनीं लोकां पर सै बराबर बरखा कराँ। काँह्भई जे तुहें अपणे प्यार रखणे औल़यां नेई प्यार रखां ये, तां तुहांजो परमेशरा कजो ईनाम देणा? क्या टैक्स लेणे औल़े बी येढ़ा इ नीं करदे?”
“कने जे तुहें सिर्फ अपणे भाईयां जोई नमस्कार करो, तां कुण जेआ महान काम्म कराँ ये? क्या अन्यजातियां रे लोक बी येढ़ा इ नीं करदे? तुहौं तिन्हां लोकां ने प्रेम करने री जरूरत इ सै जे तुहांजो प्यार नीं करदे, इस इ तरिके ने तुहां सिद्ध हूणा तियां जे स्वर्गा च रैहणे औल़ा तुहांरा पिता परमेशर सिद्ध आ।”

Dinleyin मत्ती 5