Text: © United Bible Societies 1986 Audio: ℗ 2007 Hosanna

Bura - 2007 Edition (Drama - NT)

KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.

Vir laga, sakatə Yesu akwa thlipa aka mji akwa kuta bəbal ar mbwar vəngkər səli, ka ngkər labar na msəra msəra, antə pristayeri na ol'ola ka maləmayeri ar thlipə tsawur Musa, kəga mji na ol'ola, ku si adzə ni. Antə da pəla alari, “Pəla ala yeru, ka duna na madi antə ga akwa hara suayeri ngəni ri? Tsuwa wan na gə izniyir hara su ngəni ri?”
Antə Yesu shinau ala ɗa ka pəla, “I ma I ata yu giri su laga. Pəla giri ali, Yahwana wutə dunar hara baptizma ni akəla Hyel, nənga akəla mdə ri? Ni giri amsa.”
Antə da kamtadzi ka ɗar wul su ata kər akwa daɓwa ɗa, akwa pəla, “Ma mburu pəla, ‘Thlata akəla Hyel’, tsa ata pəla, ‘To, kamnyar mi tə giri aɗi hamta jiri alari wa ri?’ Tsuwa ma mburu pəla, ‘Thlata akəla mji,’ shanga mji ngəni ata ndzəndzəhtə mburu ka pela, kamnyar da ku hamta jiri abbər Yahwana ni naɓi.” Antə da pəla, “Yeru aɗi səndə vəi tə thlata akwa wa.”
Antə Yesu pəla ala ɗa, “I ma, I aɗi ata pəla ala giri vəi tə I wutə dunar hara suayeri ngəni akwa wa.”


Antə Yesu ləkəma ka ngkər karapu ngəni abbər, “Mdə laga aɗi na ncimta nfur anap akwa fakərni, ka hamta ni akwa haya aka mjir tsuhu laga, ka təra mwari akwa tsəɗi damwa, ka fəi anda. Sakatə anap ni ku hara, antə tsa thlentə mafarni laga adzə mjir haya fakə ni, abbər ka tsa dlu bwadukwa yar nfu na akwa fakə ni. Amma mjir haya fakə ni ku dlaɓu ni, ka kədləmta ni ka tsiyari shwalang. Antə tsa ku jaktə thlentə mafa damwa. Amma wala tsa ma da ku dlaɓu ni, ka taratə ni, ka kəli səliyirni, ka kədləmta ni ka tsiyari shwalang. Antə tsa jaktə thlentə mafa na makərkurari, amma da ku dəkəi ni, ka psəɓəla ni aɓəla. Antə mthlakər fakə ni pəla, ‘Man tə kəi hara ri? I ata thlentə ɓzərna natə I hir ni ni, I ka hamta jiri abbər da ata wutə səliyirni!’ Amma sakatə mjir haya fakə ni ku wutə ni, antə da pəla aka nvwa ɗa, ‘Yauwa! Nggədza mdə na ata sə fa kifər fakə ni ja! Ndzi ka mburu tsi ni, ka kifərni ni ndzi ala mburu!’ Antə da ndzəhəɓəla ni ka zhar fakə ni, ka tsi ni.
“Kaha, man tə ka mthlakər fakə ni hara ala ɗa ri? Tsa ata si ka tsa tsəgəi mjir haya fakə ni, ka tsa hamta hayar fakə ni aka mji damwa.”
Sakatə mji nggatə su ngəni, antə da pəla, “Ka Hyel ngkamta jili su apani!”
Amma Yesu wul ɗa ka pəla, “Man karapur vəi ngəni tə mdə rəbutə nə ri?
“ ‘Pela natə mjir hən mbwa ku nggəlari,
an sə ndzi pelar həna na ɓɗakta shang.’ ”
“Kəlara mdə na ata təri ata kəra pela ngəni, tsa ata ɓəgəlwadzi, amma ma kəlara mdə natə pela ni an ata təri ata kərari, tsa ata hadləmta ni ka tsa ndzi bərbər.”


Antə maləmayeri ar thlipə tsawur Musa ka pristayeri na ol'ola ləkwa bara lakur ngkəi ni təkəma, kamnyar da ku nggaɓəla abbər tsa hara karapu ngəni ata kəra ɗa. Amma da akwa thlivər mji. Da ku bara lakur ngkəi ni, ka ntəmta mjir wulɓəla ashira su, na ata namtə kərɗa apa da mji na pwa, ka thlentə ɗa. Da kəta abbər da ata mzhi ngkəi vəi shar Yesu akwa gariyirni, ka da hamta ni aka kuthlikur akwa tsiya Gwamna. Antə mji tə mdə thlentə ɗa ni si ka pəla aka Yesu, “Maləm, yeru ku sənda abbər ga ana pəla jirkur, ka thlipə su na kalkal. Tsuwa ga aɗi ana nca zumzumkur aka mji wa, amma ga ana thlipə lakur Hyel ka jirkur aka mda. Akwa wulər nga, kalkal ka yeru ntə tsəma aka Kaisar, nənga aɗi kalkal wa ri?”
Amma Yesu ku nggaɓəla ɗəɗukurər ɗa ni, antə tsa pəla ala ɗa, “Ncantə giri ali kwabar ntə tsəma ni. Dludzər kəma wa, ka thləma wa an ata ri?”
Antə da pəla, “Ar Kaisar.” Antə tsa pəla, “Hamta giri aka Kaisar su na ar Kaisar, ka aka Hyel su na ar Hyel.”
Apani da aɗi mzhi ngkəi ni akwa su tə tsa pəla anda akwa nca mji ni wa. Da ku ndatədzi ata kəra laku tə tsa akwa hamta ala ɗa amsa ni, antə da ku ndzi ɗiɗi.


Antə mjir Saddukiya laga si adzə Yesu. Da andər pəla abbər thlata akwa mtəmta aɗi wa ni. Antə da yu ni abbər, “Maləm, Musa ku rəbuta ala yeru abbər ma mdə tə ɓzərma'ni ku mti kazhar mwalankiɗa kula ɓzər, tar ka ɓzərma'ni ni kətə mwalankiɗa natə tsa mtə kazhar ni, ka da wutə maɗankyar aka ɓzərma'ni na mtə ni. To, mji shili laga aɗi murfa mji ka ɓzərma. Antə mdə na ntangkəma ni ku kəl mwala ka mtə kula ɓzər. Antə mdə na suɗkur ku sə kəl mwala ni, ka na makərkur ku sə kəl mwala ni tsuwa. Apani shanga ɗa murfə ni ku kəl mwala ni, ka mtə kula ya ka mwala ni. Aghəla nda antə mwala ni ku mtə tsuwa. Akwa sakar thlata akwa mtəmtə ni tsa ata ndzi mwalar wa akwa nca ɗa nə ri, təng tə shanga ɗa na murfə ni ku kəl ni ni?”
Antə Yesu pəla ala ɗa, “Akwa zaman ngəni ni mji shili ana kəl mwala, ka hamta mwanki tsuwa aka sal. Amma mji shili wala mwanki natə ɓɗakkurər ɗa ku mzhi ka da thlata akwa mtəmta, ka ndzi akwa zaman ndaga, da aɗi ata kəl mwala wa, wala hamta mwala aka sal wa. Kamnyar da amzhi mtə kəra wa, kamnyar akwa saka ndaga da ata ndzi kalkal ka mjirthlentərhyel. Da ata ndzi maɗa' Hyel, kamnyar da ku thlata akwa mtəmta. Tsuwa ata kəra thlata akwa mtəmtə ni, wala Musa ku ncanta abbər mji na ku mti ata sə thlata. Kamnyar tsa ku gari ata kəra Mthlaku abbər, ‘Tsa an Hyelər Ibrahim, ka Hyelər Ishaku, ka Hyelər Yakub.’ Tsa aɗi Hyelər mji mtəmtə wa, amma Hyelər mji na ka mpika. Kamnyar aka Hyel shanga mji ka mpika.”
Antə mji laga akwa nca maləmayeri ar thlipə tsawur Musa shinau ka pəla, “Maləm, ga ku pəla kalkal!” Aghəla nda mda aɗi na jaktə nggitə yu su aka Yesu kəra wa.


Antə Yesu pəla, “Apa madi tə da ana pəla abbər Kristi ɓzər Dauda nə ri? Kamnyar Dauda surni ku pəla akwa Kakaɗər Zabura abbər,

“ ‘Mthlaku ku pəla aka Mthlakərna,
ndzəndzi abwar tsi mazəmi,
tar ma I ku namtə dawayeri ar nga,
ka da ndzi kulahər putə səla ga.’ ”

“Ma Dauda ku kəga ni abbər Mthlaku, apa madi tə tsa ata jaktə ndzi ɓzər Dauda tsu ri?”


Sakatə shanga mji akwa psi thləm aka Yesu, antə tsa pəla aka mjirthlipərni, “Ka giri hara hangkal ka maləmayeri ar thlipə tsawur Musa ni. Kamnyar da hir ha ləptayeri na ol'ola. Tsuwa da hir ka mji thlawar ɗa akwa kasukayeri, ka bara ka mdə na ɗa vəi ndzəndzi na ka daraja akwa mbwar vəngkər səli, ka vəi ndzəndziyir mji ol'ola akwa vəi səm susəma na ol'ola. Da ana zambaɓəla kari mwanki tə shilər ɗa ku mtə kazhari, ka ndəkərtə adduwayeri na saɓəl saɓəl kamnyar ncanta abbər da mjir Hyel. Jili mji apani mda ata ɗi ɗa ka bwani na mwavər ta shang!”

Dinleyin Luka 20