Mazatec Ixcatlán - 2013 SBM (NT+Gen,Exd) Non Drama

Traducción Bíblica: Mazateco de San Pedro Ixcatlán, 2013© Sociedad Bíblica de México, A.C.,2013www.sbm.org.mx Grabación: Mazateco de San Pedro Ixcatlán ℗ Hosanna, 2021

Kó nga kamábe Kjisoo̱, nga já fariseoo̱ tsintꞌié nga bi̱ kiꞌmií: Nga Kjisoo̱ kjín ngase kamá xota̱ xi kijítji̱ngii̱ kui, ko̱jo nga kjín ngase kamá xota̱ xi atíndá kuí, ta̱bo̱a̱jiín Juaa̱, ndatsi nga ja̱koxi̱ xota̱ tsi̱ꞌe̱ Kjisoo̱ boá xi atíndá xota̱. Kjisoo̱ jatjoni nangi Jundea̱, sꞌe̱ kijí nginí nangi Ngalilea̱.
Kó chjiéngá ki̱a̱ nangi Samaria̱ jaꞌa nga kijí. Kó jachó ngo na̱xi̱ńdá xí chji̱a̱ni nangi Samaria̱ xi ꞌmí Sikaa̱r, tiña nínga tikón tꞌanangi xi katsjaá Jako̱b ndií xi ꞌmí Kosiee̱. Kó ki̱a̱ kisꞌijña ngo ndáńchꞌi̱ xi tsi̱ꞌe̱ Jako̱b. Kósꞌe̱ Kjisoo̱ achichí je jenda kjo̱a̱a̱ ndi̱ya̱à, sꞌe̱ xió kisꞌijñatꞌa ndáńchꞌií, jera̱ mején má ndisꞌué kuí chi̱bo̱a̱a̱. Sꞌe̱ jachókꞌaxié ndáfoa ndáńchꞌií ngo xota̱chjo̱on xí chji̱a̱ni nangi Samaria̱, kó Kjisoo̱, bi̱ katsoó:
–Chií ndáfoa te̱ꞌéní.
Tji̱e̱nga xota̱ tsi̱ꞌe̱ Kjisoo̱ kijíkꞌatsie nichinie nínga tikón na̱xi̱ńdaá.
Na̱ xi chji̱a̱ni nangi Samariaa̱, bi̱ katsoó:
–Kótsꞌèn nga ji xi xota̱ jundío̱ ji, chji̱e̱ꞌèe̱ ndáfoa ngo na̱ xi chji̱a̱ni nangi Samaria̱.
Ngatꞌa̱ ndajín tsaꞌa xkjín xota̱ xi chji̱a̱ni nangi Jundea̱, ko̱jo xi chji̱a̱ni nangi Samaria̱. Sꞌe̱ Kjisoo̱, bi̱ katsó:
–Tsi yera ji kjo̱a̱ndaa̱ Néná, ko̱jo tsi yera ji ꞌyání xi bi̱ tjítsoó: “Chií ndáfoa te̱ꞌéní”, jira̱ xi chji̱e̱ꞌèe̱, kó kuí xí tsja̱á ndáfoa xi tsjaá kjo̱a̱mindyion xotaa̱.
Kósꞌe̱ bi̱ katsó kui xota̱chjo̱on:
–Ndi̱a̱, ta̱nga nde ni xi ko̱ꞌna̱xiéje̱ ji ndáfoaa̱ jmíjiín, kó achichí na̱nga̱ ndáńchꞌií kó, ñá tikoón ndáfoa xi tsja̱aná kjo̱a̱mindyion. A xchá ngase ji ta̱bo̱a̱jiín xota̱ tji̱e̱ xchájne̱ Jako̱b, xi katsjájne̱ kui ndáńchꞌií, nínga katsꞌe ndáfoa kui, ko̱jo ndií, ko̱jo cho̱ xi kamáxchaá.
Sꞌe̱ Kjisoo̱, bi̱ katsó:
–Ngayeje xota̱ xi kꞌuí kuí ndáfoa xi̱ꞌbi̱, kamáxíndá nginií, ta̱nga xi kꞌuí kui ndáfoa xi tsjàa̱, nginijánjín ka̱ma xíndaá, ngatꞌa̱ kui ndáfoa xi tsjàa̱, kuí boá xi ngo ndáńchꞌi̱ xi kjo̱tjoo̱ ndáfoa xi tsjaá kjo̱a̱mindyion ngatsjéni̱xtjii̱n xotaa̱.
Sꞌe̱ bi̱ katsó kui xota̱chjo̱on:
–Ndi̱a̱, ja̱ te̱ꞌéní kui ndáfoaa̱, tsi̱ꞌe̱ nga ngiti̱ ka̱maxíndájínna, kó ngiti̱ kjoéꞌe̱kꞌaxiéjín an ndáfoa kꞌi̱e̱e̱.
Sꞌe̱ Kjisoo̱, bi̱ katsó:
–Tꞌen ndokjoée̱ xi̱ꞌii̱n, sꞌe̱ ndibé ji kꞌi̱e̱e̱.
Kó bi̱ katsó kui xota̱chjo̱on:
–Jmí xi̱ꞌinjínna.
Sꞌe̱ Kjisoo̱, bi̱ katsó:
–Ndakjiꞌi ni xi kase nga jmíjiín xi̱ꞌin, ngatꞌa̱ ún xi̱ꞌin je kisꞌiee̱, kó xi tikoón ngotꞌe̱ xi̱ꞌíi̱njín bo̱a̱, ja̱koxi̱ boá ni xi kase ji.
Sꞌe̱ bi̱ katsó kui xota̱chjo̱on:
–Ndi̱a̱, bee̱ko̱n an nga xota̱ chji̱ni̱e̱ꞌe̱én Nénárá ji. Xota̱ tji̱e̱ xchájne̱, kꞌi̱e̱ kui tji̱ngi̱i̱ katsꞌéndikón Néná, ta̱nga jún bi̱ ꞌmíjnú: Chjiéngá na̱xi̱ńdáꞌniú Jerusale̱n si̱ꞌantsjàa̱ Néná.
Sꞌe̱ Kjisoo̱, bi̱ katsó:
–Xota̱chjo̱on, sꞌijin ngatamaa̱ nga je ma kjachó chi̱bo̱a̱ nga je ngiti̱ jmíjín xi chjiéngá kji̱ndi̱bá kui tji̱ngi̱i̱, ko̱jo tsi chjiéngá ko̱e̱je̱ na̱xi̱ńdáꞌniú Jerusale̱n, tsi̱ꞌe̱ nga sa̱ꞌíndikón Na̱ꞌmii̱.
Jún yàjínjnú ni xi ndyi̱niꞌándikónjnú, ta̱nga ji̱n yàjne̱ ꞌyání xi ndyi̱niꞌántsjájne̱, ngatꞌa̱ kjo̱a̱ꞌnaxiéꞌaá ngi̱jii̱n xota̱ jundíoo̱ kjo̱tjojinni, ta̱nga sꞌe̱ ndibá ngo chi̱bo̱a̱, kó ngotꞌe̱ boá, kjiꞌanga xota̱ xi ja̱koxi̱ nga tsꞌéndíkoón, sa̱ꞌíndikón Néná xí Na̱ꞌmii̱, nga a̱siénni̱xtjin ko̱jo nga ja̱koxi̱, ngatꞌa̱ Na̱ꞌmii̱ kui xota̱ xi ndyi̱tsꞌèndíkoón tsꞌénmongase nga si̱ꞌandikón. A̱siénni̱xtjin boá Néná, kó xi sa̱ꞌíndikón, chjiéngá a̱siénni̱xtjin ko̱jo nga ja̱koxi̱ nga sa̱ꞌíndikón.
Sꞌe̱ bi̱ katsó kui xota̱chjo̱on:
–Jè be an nga sꞌe̱ ndibá Mesiyaa̱, kui xi Kristo̱ ꞌmií, kó kjiꞌanga kjo̱e̱ꞌe, kuí xí ka̱tso̱yàjne̱ ngayeje nii̱.
Sꞌe̱ Kjisoo̱, bi̱ katsó:
–Án boá, kui xi tsꞌénchji̱a̱joo ji.
Kó kjiꞌá má jachó xota̱ tsi̱ꞌe̱ Kjisoo̱, kó kijíndikoón nga Kjisoo̱ ngo xota̱chjo̱on tsꞌénchji̱a̱jo, ta̱nga nde ngojín xi bi̱ katsoó: Mí xí tibosíyé ji. Ko̱jo tsi, mí xí tindokjo̱e̱je kui xota̱chjo̱on. Sꞌe̱ kui xota̱chjo̱on íjñámasien nisa ndáfoaa̱, sꞌe̱ kijí na̱xi̱ńdáꞌniuú, kó bi̱ katsoó ngayeje xotaa̱:
–Ja̱bíjnúꞌun, kó ndibá tsitsíjenjnúu̱ ngo xota̱ xi katsóyàna ngayeje ni xi je katsꞌen an. A kuijín xí Kristoo̱ tsobo̱a̱.
Kó xotaa̱ jataxie na̱xi̱ńdáꞌniuú, sꞌe̱ kijí nínga tikón Kjisoo̱. Tji̱e̱nga kjima kui nii̱, xota̱ tsi̱ꞌe̱ índasee̱n Kjisoo̱, nga bi̱ katsoó:
–Mostro̱, chi̱ni chií nichinie.
Kósꞌe̱ Kjisoo̱, bi̱ katsó:
–An tikónna ngo nichinie xi yàjínjnú.
Kó xota̱ tsi̱ꞌe̱ Kjisoo̱ ja̱kꞌi̱e̱ ja̱ngaján, bi̱ katsoó xkjín:
–Axa̱ jè tjín xí je jeꞌejoo̱ nichinie.
Ta̱nga Kjisoo̱, bi̱ katsó:
–Ni chiniena, kuí boá nga chjiéngá sa̱ꞌinkjatjosón an ni xi mejeén xi katsangiyana, kó nga ka̱mando̱jo ni xi mejeén sa̱ꞌín kuí. A bi̱jín ꞌmíjnú jún: “Ngi nijón sá chaja nga kjo̱chó ni̱xtjin nga ka̱ma ko̱ꞌna̱je̱n ni xi kamáxchaá”. Ta̱nga kꞌi̱e̱ xiyàjnúꞌun ngotꞌe̱: Chjáxꞌájnú ndyikonjnú, kó tsitsíjenjnúu̱ kui tꞌanangii̱, ngatꞌa̱ jè jachó ni̱xtjii̱n nga ka̱ma ko̱ꞌna̱je̱n ni xi kamáxchaá. Kó nda̱ xi kꞌo̱je̱n kui ni xi kamáxchaá, sa̱ko̱ó chjií, kó kjo̱a̱ꞌáꞌyá ni xi kamáxchá kui xi tsjá kjo̱a̱mindyion ngatsjéni̱xtjii̱n, tsi̱ꞌe̱ nga tsja ka̱maa̱ nda̱ xi ítji̱e̱, ko̱jo nda̱ xi jaꞌáꞌyá ni xi kamáxchaá. Ngatꞌa̱ ja̱koxi̱ boá ni xi tsó kui eén: “Ngo xò xí ꞌbítji̱e̱, kó kje̱ꞌe xò xí ꞌboje̱n ni xi kamáxchaá.” Kó an tsꞌéntsangiyajnúꞌun tsi̱ꞌe̱ nga ko̱ꞌna̱je̱njnú ni xi júnjín ikꞌítji̱e̱jnú, kje̱ꞌe xí katsꞌénxángí kui nii̱, kó jún ko̱ꞌna̱je̱njnú too̱ kui xaá.
Kó achichí má xota̱ xi chji̱a̱ni nangi Samaria̱ xi síndo kui na̱xi̱ńdáꞌniuú xi kisꞌijii̱n Kjisoo̱, kjo̱a̱a̱ nga bi̱ katsó kui xota̱chjo̱on: “Katsóyà ngayeje ni xi je katsꞌen an.” Kó nga jachókoón Kjisoo̱ já xí chji̱a̱ni nangi Samaria̱, índasee̱n tsi̱ꞌe̱ nga ki̱a̱ kisꞌijñajo̱ kui jaá, kó Kjisoo̱, jó ni̱xtjin kamaá ki̱a̱a̱. Kó achichí má xota̱ xi kisꞌijii̱n Kjisoo̱, kjo̱a̱a̱ én xí tsíchji̱a̱, kó bi̱ kiꞌmií kui xota̱chjo̱on:
–Jmí tsi ta̱ kjo̱a̱a̱ ni xi kasejne̱ nga sꞌijinjne̱, sꞌijinjne̱ kjo̱a̱a̱ nga ji̱n má xi kandaꞌyájne̱ ni xi katsó, kó nga je yàjne̱ nga ja̱koxi̱ boá nga kui xi Kristoo̱, xi kꞌo̱xiéꞌá xotaa̱ kui nga̱sondiee̱.

Jaskan ngije jaꞌa jó ni̱xtjin, Kjisoo̱ kijí xtji̱e̱e̱n nangi Ngalilea̱. Ngatꞌa̱ ti̱kuíní Kjisoo̱ xi katsóyà nga ngo nda̱ chji̱ni̱e̱ꞌe̱én Néná yandikónjín ti̱ ki̱a̱a̱ nangii̱. Nga jachó nangi Ngalilea̱, tsja kamaá xota̱ xi chji̱a̱ni ki̱a̱a̱ nga jachó, ngatꞌa̱ ja̱bo̱a̱ je kamábe ngayeje ni xi katsꞌén na̱xi̱ńdáꞌniú Jerusale̱n nga kamá sꞌueé, ngatꞌa̱ ti̱ kijí kui jaá kui sꞌueé nga.
Sꞌe̱ kijí nginí Kjisoo̱ na̱xi̱ńdá Kanaa̱, ngi̱ndie xi chji̱a̱ni nangi Ngalilea̱, nínga ndáfoaa̱ bino̱ katsꞌén. Kó ki̱a̱ kisꞌijña ngo nda̱ xi tsꞌénxátꞌaa̱ nda̱ ree̱, kó kui nda̱a̱ oo̱n ndií xi tikón na̱xi̱ńdá Kapernau̱n. Kui nda̱a̱ nga tsintꞌié nga Kjisoo̱ jatjoni nangi Jundea̱, sꞌe̱ jachó nangi Ngalilea̱, kijíkoón, kó ꞌniú tsíꞌaá Kjisoo̱, tsi̱ꞌe̱ nga kji̱ndi̱bá tsꞌendáyà ndií, ngatꞌa̱ je mején ma kꞌien. Kósꞌe̱ Kjisoo̱, bi̱ katsó:
–Nde sꞌi̱jinjínjnú jún tsi xcha̱jínjnú ngo chi̱bo̱a̱ ko̱jo tsi ngo kjo̱a̱ndikón.
Ta̱nga kui nda̱ xi tsꞌénxájo̱ nda ree̱, bi̱ katsó:
–Ndi̱a̱, ndibé chií ji ndiꞌana, ngindiee̱ nga ko̱yà ndína.
Kó Kjisoo̱, bi̱ katsoó:
–Tꞌen ndiꞌàa̱, tikón ndíi̱.
Sꞌe̱ kui nda̱a̱ kisꞌijii̱n ni xi katsó Kjisoo̱, sꞌe̱ kijí. Tji̱e̱nga tsꞌénfí ndiꞌaa̱, kastíkjá já mosoo̱, kó katsóyaà nga tikón ndií.
Sꞌe̱ kui nda̱a̱ asíyaá kui jaá mosoo̱ mí chi̱bo̱a̱ nga kamándaya ndií, sꞌe̱ bi̱ katsoó kui jaá:
–Mara̱ chi̱bo̱a̱ ngo nga kamángixón nga katjoꞌóxiín ṉtꞌe̱e̱.
Sꞌe̱ na̱ꞌmii̱ kui ndií kamákjiín nga kuí má chi̱bo̱a̱ nga bi̱ katsoó Kjisoo̱: “Tikón ndíi̱.” Kó kuíni nga kui ko̱jo xota̱ xi síndo ndiꞌaa̱ kisꞌijii̱n Kjisoo̱.
Kuí xi̱ꞌbi̱ xi ma joó kjo̱a̱ndikón xí katsꞌén Kjisoo̱ nga jatjo nangi Jundea̱, kó jaꞌa xtji̱e̱e̱n nangi Ngalilea̱.

Dinleyin Juaa̱ 4