Mga Awit 51:1-7

Ako'y kaawaan, O mahal kong Diyos,
sang-ayon sa iyong kagandahang-loob;
mga kasalanan ko'y iyong pawiin,
ayon din sa iyong pag-ibig sa akin!
Linisin mo sana ang aking karumhan,
at patawarin mo'ng aking kasalanan!

Mga pagkakasala ko'y kinikilala,
di ko malilimutan, laging alaala.
Sa iyo lang ako nagkasalang tunay,
at ang ginawa ko'y di mo kinalugdan;
kaya may katuwiran ka na ako'y hatulan,
marapat na ako'y iyong parusahan.
Ako'y masama na buhat nang isilang,
makasalanan na nang ako'y iluwal.

Nais mo sa aki'y isang pusong tapat;
puspusin mo ako ng dunong mong wagas.
Ako ay linisin, sala ko'y hugasan
at ako'y puputi nang lubus-lubusan.