San Mateo 6

Ruluii Jesús xho gudeedni gojn

1Räjpzani:

―Na'c gusäbdiidx guntu dzunsa'c nez loj rebejṉ te fiitisreni xhi rujntu. Palga gusäbdiidxtu di xtadtu ni yu' xhaguibaa guniidx xhi xca'tu. 2Che gudeedlu gojn, na'c güilu diidx xhi badeedlu. Na'c gunlu si'c rujn rebejṉ nani rusguee neṉ reguidoo, näjza lad nezyuj. Rujnsireni si'c te ruhuii rebejṉ xhi rujnreni te rliä'p rebejṉ xpala'nreni. Narä rniä acua'reni gaan xtenreni. 3Luj che gudeedlu gojn xtenlu, na'c gacbee nicla tej xamiigwlu xhi badeedlu, 4te gac gojn xtenlu xhiga'tz. Dxejcti xtadlu ni cahuii nani bejnlu xhiga'tz, sacnäjni luj nez loj rebejṉ.

Ruluii Jesucrist xho cueedx, guiniabni lo Dios

(Lc. 11:2‑4)

5Räjpzani:

―Cheni rbejdx, rniabtu lo Dios, na'c guntu si'c rujn rebeṉguidoo ni rusguee. Rchaglajzreni rniabreni lo Dios rsiuliireni neṉ reyu' cadro rieḻ xtidx Dios, näjza guiraa resquiin, näjza nez ronejz te ruhuii rebejṉ xho rujnreni. Rniliä́pac, acua'reni gaan xtenreni. 6N̲aj luj cheni cueedx, guiniablu lo Dios, biu' neṉ xyu'lu. Basäuu ro' yu'ga, dxejcti xhiga'tz gunii loj xtadlu ni yu' xhaguibaa. Dxejcti xtadlu ni cahuii xhi rujnlu xhiga'tz, sacnäjni luj nez loj rebejṉ.

7’Cheni caniitu lo Dios, na'c guinisactu balti huält rediidx nani aguniitu. Si'c rujn rebejṉ nani di gumbee Dios. Naareni sa'csi sanuutis rniireni xhidajl diidx balti huält, siejn diajg Dios. 8Na'c guntu sigajc ni rujnreni, sa'csi anajn xtadtu xhini'c rquiintu che guiniabtuni lojni. 9Ni'cni scree coḻguinii lo Dios:

Xtadnu ni yu' xhaguibaa dxan najc lajlu.

10Sujiääd xcäḻrnibeelu;

bejn si'cni rlajzlu lo guedxliujre sigajc rujnlu xhaguibaa.

11Nadxej baniidx xcu'nnu sa' ni rdaunu guira dxej.

12Basiäjḻ lajzlu redojḻ xtennu si'c riäjḻ lajznu redojḻ xten rebejṉ ni rujn dojḻ loonu.

13Na'c gusaanlu jiaabnu xhigabguijdx,

basḻaa nuure lo dojḻ,

sa'csi xten guejblu najc yäḻrnibee, yäḻnadip näjza yäḻrdimbicha' par tejpas.

Sugacni si'c.

14Palga la'tu gusiäjḻ lajztu redojḻ ni rujn rebejṉ lojtu, xtadtu ni yu' xhaguibaa susiäjḻza lajzni rextojḻtu. 15Palga ditu gusiäjḻ lajztu redojḻ ni rujn rebejṉ lojtu, sigajcza xtadnu ni yu' xhaguibaa di lajzni jiäjḻza rextojḻtu.

Ruluii Jesús xho gucua'n bejṉ

16Räjpzani:

―Che rucua'ntu na'c guntu si'c rujn rebejṉ nani rusguee; rumbaa lojreni te fii rebejṉ cagucua'nreni. Rniliä acua'reni rexgaanreni. 17Niluxh la'tu, che rucua'ntu, coḻcuṉ yejctu, coḻquiib lojtu 18te na'c gacbee rebejṉ cagucua'ntu, xtadtistu suhuii cagucuanxhiga'tztu. Xtadtu ni cahuii xhi cayunxhiga'tztu suniidxni xhi xca'tu nez loj rebejṉ.

Yäḻnasa'c ni yu' xhaguibaa

(Lc. 12:33‑34)

19Räjpzani:

―Na'c gapdajntu yäḻnasa'c lo guedxliujre cadro rajw reman o rbibtiejn xhixtentu, niluxh richu' gubaan rolijz bejṉ te rbajnreni. 20Hueenru ga'ptu xcäḻnasa'ctu xhaguibaa cadro di reman gauu, diza rexhixtentu cuibtiejn, diza regubaan jiu' te cuanreni. 21Sa'csi cadro yu' xcäḻnasa'ctu, ro'cza naga' lastootu.

Bianij xten tiejxhtu

(Lc. 11:34‑36)

22Räjpzani:

―Bianij xten tiejxhni najc balojni, ni'cni palga rhuisa'c balojtu, guideb tiejxhtu yu' lo bianij. 23Niluxh palga rebalojtu di fisa'c, guideb tiejxhtu yu' lo nacäjy, ni'cni palga bajl nani yu' tiejxhtu dini gusanij, ¡linacäiboo najc guidebtu!

24’Nicla te bejṉ di gacdi gun dzuun loj tio'p lam̲ tejsi junt, sa'csi sibälazni tejni laga sanälajzni steeni. Digacdi guntu xtzuun Dios palga caguiiltistu xcäḻnasa'ctu lo guedxliujre.

25’Ni'cni rniä lojtu, na'c chutu yärsia' por xcäḻnabajṉtu, xhicha gautu, xhicha yätu, niclaza naatu xhicha lajd gajcwtu. Yäḻnabajṉ sajcru lo yäḻrajw, luxh sajcru tiejxhtu lo xhajbtu. 26Coḻhuii remane' ni rtajt xhaguibaa. Direni cue'c binij, dizareni guilia' gäjl, dizareni cuchee xhi gaureni neṉ yu', luxh xtadtu ni yu' xhaguibaa rudeedni xhi rajwreni. ¿Laa xhet sajcdirutu loj remane'ga, ä? 27¿Chu tej la'tu sa'csi ru'tu yärsia' sajc tiobrutu ste bo'c jiaaru?

28’¿Xhicuent runduxhtu xhigab xcuent xhajbtu? ¡Coḻhuii reguii ni tre' nesiät! ¿Xho roobreni? ¿Xho rialreni? Direni gun dzuun, dizareni guzaa xhajbreni. 29Narä rniä lojtu, nicla ṟeii Salomón guideb najcwni rexhabsa'c xtenni di nisiuchee si'c rsiuchee tej reguiiga. 30Palga Dios rujn rajc recuaan ni yu' nesiät ni rial nadxej luxh guixee ahuejcreni, ¿xhixh dini gunduxhru par la'tu, bejṉ nani guxii rililajz? 31Ni'cni na'c chutu yärsia' guntu xhigab: “¿Xhicha guidaunu, xhicha guiduṉnu, xhicha gacwnu?” 32Sa'csi rebejṉ nani di gumbee Dios xhigabtisga rujnreni, caguiilreni guiraa recosga. Niluxh xtadtu ni yu' xhaguibaa anajnni xhini'c rquiintu. 33Coḻquilxgaa yäḻrnibee xten Dios näjza yäḻnabaṉsa'c si'cni rlajz Dios dxejc sica'tu guiraa ni rquiintu. 34Ni'cni na'c gunduxhtu xhigab xho tedtu dxej guixee. Combast tedtu trabajw nani riääd dxej con dxej.

Kasalukuyang Napili:

San Mateo 6: zaw

Haylayt

Ibahagi

Kopyahin