Vakatekivu 12
12
Sa Kacivi Eparama na Kalou
1A sa kaya vei Eparama o Jiova, “Biuta na nomu vanua, biuti ira na wekamu, kei na vale nei tamamu, ka lako ki na vanua au na vakatakila vei iko.#Ym 10.5; Caka 7.2-3; Ipe 11.8 2Au na vakalewevuqataka na nomu kawa, ka na yaco me na matanitu levu. Au na vakalougatataki iko, ka vakarogoya na yacamu, o yaco kina mo vu ni veivakalougatataki.
3Au na vakalougatataki ira era sa vakalougatataki iko,#Kala 3.8
ka'u na cudruvi ira era sa cudruvi iko;
Na veimatanitu kece sara e vuravura
era na vakalougatataki ena vukumu.”#12.3 Na veimatanitu… ena vukumu; se Na veimatanitu kece era na kerea vei au me'u vakalougatataki ira me vaka ni'u sa vakalougatataki iko.
4Ni sa yabaki 75 o Eparama, a sa biuti Karana me lako yani, me vaka na vosa i Jiova ki vua; a sa lako vata kei koya o Loti. 5A sa kauti Serai na watina, kei Loti na luve i tacina, kei na nona i yau kecega, kei ira na nona tamata sa rawata mai Karana; e ratou sa qai lako yani ki na vanua o Kenani.
Ia ni ratou sa yaco yani i Kenani, 6a sa gole sobu o Eparama ka yaco ki na i cabocabonisoro ena koro o Sikemi, o ya na vunikau tabu mai More. (Era a se vakaitikotiko kina na kai Kenani ena vanua o ya ena gauna o ya.) 7A sa rairai tale vei Eparama o Jiova, ka kaya vua, “Sai koya oqo na vanua ka'u na solia vua na nomu kawa.” A sa mani tara kina e kea o Eparama e dua na i cabocabonisoro vei Jiova, o koya sa rairai vua.#Caka 7.5; Kala 3.16 8Ni oti o ya, a sa lako o Eparama ki na ceva ni vanua, o ya ki na veiulunivanua ena tokalau kei Peceli, ka birika na nona valelaca ena tadrua kei Peceli mai na mua-i-ra vata kei Ai mai na tokalau. A sa tara talega e kea e dua na i cabocabonisoro, ka sokalou vei Jiova.
9A sa tosoya na nona i lakolako o Eparama, ka gole yani vaka ki na ceva i Kenani.
O Eparama kei Serai e Ijipita
10Ia sa yaco na dausiga e Kenani ka sa rui ca vakalevu sara; a sa vakavuna oqo me lako sobu o Eparama ki Ijipita, ka me la'ki tiko voli kina vakalailai. 11Ni sa voleka yani ki Ijipita, sa qai tukuna o Eparama vei Serai na watina, “Raica, au kila ni o sa rui yalewa rairai vinaka. 12Ni ra na raici iko na kai Ijipita, era na kaya ni o watiqu, ka ra na qai vakamatei au ka tauri iko. 13Mo tukuna vei ira ni o ganequ, era na qai vakabulai au ka caka vinaka vei au ena vukumu.”#Vteki 20.2; 26.7 14Ni sa yaco yani ki Ijipita o Eparama, era raica na kai Ijipita ni sa yalewa rairai vinaka dina o Serai. 15Eso na i vakailesilesi ni boselawa era a raici Serai, ka ra la'ki tukuna vua na tui na nona matavinaka; ka sa kau yani kina o koya ki na valenitui. 16Ena vuku i Serai, a sa caka vinaka sara na tui vei Eparama, ka sa solia vua eso na sipi, na me, na bulumakau, na asa, eso na nona tamata, kei na kameli.
17Ia ena vuku ni nona mai kauti Serai na tui me watina, a sa vakavuna kina o Jiova eso na mate ca me tauvi koya kei ira na nona tamata ena valenitui. 18Sa qai kacivi Eparama na tui ka tarogi koya, “A cava o sa cakava kina vei au na ka oqo? A cava o sega kina ni bau kaya ni watimu na yalewa oqo? 19A cava o kaya kina ni sa ganemu, ka vakatara me'u kauti koya kina me watiqu? Sa tu oqo na watimu; kauti koya yani ka lako tani eke!” 20A sa vakaroti ira na nona tamata na tui, ka ra sa kauti Eparama ka vakatalai koya tani yani mai Ijipita, o koya kei na watina, kei na nona i yau kece sara.
Kasalukuyang Napili:
Vakatekivu 12: FNVDC12
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Fijian New Version including Deuterocanonical Books © Bible Society of the South Pacific, 2012.