Mateo 18

IX. UTSIBOBËD BËDAMBUEC TABADTE CHIAID

(18.1-35)

¿Mitsicquid chuiquid tapambo mimbi icmepatsia? quequin chuimiaid

(Madc. 9.33-37; Duc. 9.46-48)

1Adshobimbi ubitedishun Esus naden chuipondac. ¿Tsutsimbo mibëtan chuiquid tapambo mimbi Nuquin Papan namiacnoshon icmepatsia? quesho 2tantiashumbien: Nëmbo cho, cac bacuë choacsho abi tabadacno nënantanquio tsaduntsëcshun Esusën naden chuipondash: 3Tantia. Mibitedi abimbo chuinu. Mimbi tantiacpadenuidi naic tabadbuedi nadquid bacuën amën chiacpadombuen nacbimbuen ubi tantiaquiota. Mimbi adoenquio icshoembi Nuquin Papan namiacno mibi puduedmenquio iquendac. 4Aden umbi chiacpadombuen nëid bacuën nacbimbuen nasho mibi Nuquin Papan: Bëdamboshë iquec, caindac. 5Ubi tantiaquid icquin nadquid bacuë nashunquin ubi iuedquin nashunacbimbuecquid nendac, quepondash Esus.

Tantiabentsëcquido icsambuen namete chiaid

(Madc. 9.42-48; Duc. 17.1-2)

6Adshumbic padpiden chiec: Nëid bacuën ubi tantiasho icsambuen namequin cuëshëdmesho issun cuënote iuëmbocquid tëdectanquin tëtanetanquin acte dapa ëquëducquioshë yacno nënepatecnëdan. 7Aden ubi tantiactsëcquido utsibon icsambuen namiac icsamboshë iquendac. Ai, adquid iquendac. Adec icsambuen namianquid icsho Nuquin Papan cuidquiendac.

8Aden Nuquin Papan cuidte chuisho tantiaquimbi icsambuen nainda. Mëdanten naic mibi icsaic. Mëteshun uannombo neshunac bedtiapimbo yacbimbuen mimbi icsambuen naid ënta. Taën capuec mibi icsaic. Tateshun uannombo neshunac caputiapimbo yacbimbuen mimbi icsambuen naid ënta. Ënenquio icsho Nuquin Papan mibi chian annëdënquequid nësecaindac. 9Adecbidi ëshën isec mibi icsaic. Ëshë chicshun uannombo neshunac istiapimbo yacbimbuen mimbi icsambuen naid ënta. Ënenquio icsho Nuquin Papan chian annëdënquiacno mibi nësecaindac, quequin Esusën chuipondash.

Utsi chiacbimbuen obeca bënnudaid chiaid

(Duc. 15.3-7)

10Adashic padpidec: Nadquid bacuëmpin ubi tantiactsëcsho issun: ¿Adtsëcquidëmpinquioda bëdambuen tantiapaid? cainda. Nuquin Papabëd icquidon aid bacuëbo dayun uaquid icquin Nuquin Papa yacno puduedshun mimbi mamënshumbued tantiaquin Nuquin Papa ënenquio icquin bëisquin chiendac. Adtsëcquidëmpi mamënshunenda. 11Umbitsen aido tantiembi. Bënnudaid istuidacbimbuen ubi tantienquio icquidobi ubi tantiaquid icmeshun ubi yacno tabadmendambi, quiash matsesondabi, quepondash Esus.#18.11 Nuquin Papan Chiaid abitedi nëid versiculo dada uambo iquec.

12Adashic padpidec: ¿Mitsi paden tantie? Min obeca 100ted icbuedi abentsëc bënnudacsho issun: Nibëntannu, quequin min obeca utsi 99ted nianquin nibënec ¿nidenquioda mibi icpatsia? 13Adec nidshun istuidash cumapenec cuishonquec: Cun iua nibëdantsenquiac, quiash. Aton iua utsi yacno bëash abi icboctedi icsho isash bëdambo iquebi, quendac. 14Adecbidi bacuëbon ubi tantiabensho isash Nuquin Papabëd cuishonquendabi bënnudaid istuidacbimbuec. Icsambuen naquido cuidacno bacuëbo nidmete Nuquin Papa bunenquio iquec, quepondash Esus.

Abi chieshënquidobëdi onquete chiaid

(Duc. 17.3)

15Adashic padpiden chiec Esus: ¿Ada ubi tantiaquid utsin mibi icsambuen chuishunosh? Ai, chieshmiantiadquio iccosh, queshun nadoac bëdambo ictsiash. Aidbëduidtsëqui bëdambuec onquequin chuiquin: Ubi icsambuen chuishunquin Nuquin Papan Chiaid mimbi niaccoc. Aden icsambuen nainquiocquin ënta, mimbi cac: Ai, adoembi, quiash mibëdi bëdambuec tabadtsiash mibëtan Esus tantiaquid. 16Mimbi: Icsambuen nainquio icquin ënta, caqui: Padi. Adequi icsaibi, quesho tantiashun ubi tantiaquid utsi daëd beduanshun aidbëtan chuitanta. Nuquin Papan Chiaid niacniacsho issun daëdshun chiaid abimbo iquec, quequin tantiaquin adota.#18.16 M.I.Ch. 19.15 tantiaquin nëid chuipanëdash Esusën. 17Mimbi buanaidontsen: Aden icsambuen nainda, caqui: Adequi icsaibi, quesho tantiatanec choshon mibëtan ubi tantiec iccuededquidon chuiquido chuituidta. Mimbitsen chuitanta, cac aidontsen chiaqui tantienquio icsho issun: Nuquin Papan Chiaid niac niacquid yec Esus tantiesa nec. Doma yacnocquidon chuiquid dapanquio chiacted piucquid bedquidbimbuec icsaquid nec, queshun ubi tantiaquido cuëdënacno chomenda.

18Aden nidaidënshun ubi tantiaquidon bëdambuen nate mibitedishun chiendac. Adembidi ubi tantiaquidon natemaidtsen mimbi chiendac, quepondash Esus. Aden mimbi chiacpaden Nuquin Papan chiendac.

19Padpiden chuinu. Tantia. Mimbi utsi chuiquin: Nuquin Papa chuinuna, cac: Ai, adonona, quesho tantiashun aidbëtan Abi chiannesho mimbi chiacpadombuen abuc icquid Cun Pan mibi nashunendac. 20Ubi tantiec daëd tabadnuc adecbidi 3ted tabadnuc aidon nënantanquio ubibi iquendabi, quepondash Esus.

Ënenquio icquin utsibo bëdambuen isuaid

21Adec: Icsa uanec chieshtomianquid iquendac, quesho tantiashumbien Petedon Esus chuipondash: ¿Icsa uanec chieshtomianquid tedentsimbi chieshënenquio icquin ambi icsambuen naid tantienquio yec bëshunquin bëdambuen isuape? ¿7tedembi bëdambuen issun bëdambuen isenquio icquin ënacta bëdambo icpatsiash? caquien 22Esusën: 7teden, quequin daëdpactsëcquio mimbi chuipec. 70 pod 7 caid 490teden ënenquio icquin bëdambuen istedniac bëdambo ictsiash, quepondash Esus.

Utsi chiacbimbuen iuan abipadquid iua utsi bëdambuen isuatiapimbo yaid chiaid

23Adashic abi onquec: Nuquin Papan namiacpadombuen matses bëdambuen iste mibitedi chuinu. Tantia. Chuiquid tapan iuabo dadpen icposh. Ma ambi bedaidtedi piucquid ubi meneuanu, quequin tantiaquin aton iuabo aton shubuno chochomeposh. 24Abia chomiaidën piucquid dadpenquioshë un michon udimbo bedondaidëmbi aton icbo meneuambo icposh. 25Adsho icbon: Mimbi bedactedi bec cho, caquien: Nibëdec, queposh iua. Adshobien icbon: Piucquid dadpen bednuen matses utsibo menequin mibi iuamenu. Adembidi min chidobëtabi min bacuëbo iuamequin piucquid dadpen bednu, caquien 26iua abi iuaquid ismec dannëshën sebudash: Padi, icbo. Utsibo ubi iuamenda. Chiata. Iuecshun aidtedi bedshun mibi menembi, caposh. 27Adoaquien icbon uënësquiocquin bëdambuen isquin: Ubi menenda. Mibi utsibo iuamenquio iquembique. Dacuëdenquio yec nidec nid, quequin icbon aton iua bëdambuen nidmeposh.

28Adoac nidquimbien aid iuan ambi: Ma ubi meneuanu, quequin piucquid daëdpactsëc meniondaid abipadquid iua utsi istuidposh. Istuidshumbic bedtanquin tëtëdinquin: Mimbi bedondactedi piucquid bec cho. Cuessunnechitomane, caquien 29aidtsen ambi piucquid bedshunondaid ismec dannëshën sebudec: Chiata. Ubi cuessunnenda. Iuecshun bedshun mibi menembi, caposh iua utsin. 30Adsho tantiashumbi icbon bëdambuen isbuedëmbi chieshënquin: Padi. Mibi cuidmembi, queshun quënën tsadunmeposh. Piucquid aidted abi menianenquio yacpadequi ma quënënuësh mëyadbudchitono, queshun tsadunmeposh.

31Aden chieshënquin quënën tsadunmiacsho issumbien iua utsibon: Chieshanquiec, queshun icbo chuituidposh. Mimbi bëdambuen isbuedëmbi min iua utsi quënën tsadunmiosh: Piucquid menianenquio iquec, queshun, quequin icbo chuituidposh. 32Aden chiac tantiashun icbon ambi cuidenquio icquin bëdambuen isbued chomeshun chushcaposh. Icsambo icquidquio mibi nec. Chiata. Mibi menembi, quesho: Padi. Ubi menenda, quequin mibi bëdambuen isombi. 33¿Umbi mibi bëdambuen isbocpadombuembidi mibi padquid utsi bëdambuen istiapimboda icco? Ma iuecshun bënu, queshun mimbi meniactedi bëabi icquid icsho bëdambuen isec mibitsen bëdambo ictsenac. 34Mibi yacpadec nëishshun mibi cuidembi, caposh icbon. Adshun quënën tsadunmeposh. Ambi bedactedi piucquid dadpenquio meniash ma puduempanu, queshun quënën tsadunmeposh. 35Aden matsesën nacpadombuembidi Nuquin Papan naindac. Utsibon chieshënaqui cuidnanec chieshënnansho issun Nuquin Papan mimbi icsambuen naid tantienquio yec bëshuntiapimbo iqueque. Chieshënnanenda. Mibi chieshënquidobi bëdambuen ista, quepondash Esus.

Kasalukuyang Napili:

Mateo 18: mcfNT

Haylayt

Ibahagi

Kopyahin