Mateo 16

Padiseobobëtan saduseobon: Ubitedi isme, quequin Esus chiaid

(Madc. 8.11-13; Duc. 12.54-56)

1Adnubien padiseobobëtan saduseobon: Esus icsambuen namenuna, quiash Esus yacno choshon naden chuipondash: Nuquin Papan Chomiaid nebi, quequin Aidën namiac nadatiambo icquin nabanquin ubi isme, cabededpondash.

2Adshobien Esusën: Nuquin matsesën chiaid tantiec mibitedi: Inchëshbudtsëc abu piumbo icsho isash: Tanunquio badiadec, quepec. 3Badiadnuc abu piumbo icbuedi inchëshpambo icsho isash: Ue dapa choec, quequid icquin nuquin matsesën chiaid tantiaquin chuiquid mibitedi nec. Aidën chiaid tantiaquid icquin bëdambuen tantiatiadquidi: Ubi isme, quequin Nuquin Papan nëbimbobi naid isquimbi mimbi tantienquio iquec. 4Nuquin Papan Chiaid niac niacquido yec mibitedi icsamboshë icquido nec. Adquido iquequi ubi tantiate bunenquio icquimbi: Nadatiambo icquin nabanquin ubi isme, mimbi ubi capec. Adsho nëbi mibitedi ismenquio iquembi. Iuecshumbimbi mibi ismendac. Nuquin Papan ambi oncamiaid Onas nampicpadombuen naquin ismendambi, quianec aido nianec Esus nidpondash.#16.4 Onas 3.3-5tantiaquin nëid chuipanëdash Esusën.

Padiseobon chiaid tantienda, quiaid

(Madc. 8.14-21)

5Adanec nidquin cano antabëdtoshon Esusën abëd icquidobëtan chian poteuapondash. Aden chian potiashien abëd icquido: Pan bëtiadquidi bëshunquiash chochitobi, quecuededpondash. 6Adshobien Esusën abëd icquido chuiquin: Padiseobobëd saduseobo pan bidiscametebimbuecquido neque. Tantechoquiota, capondash. 7Adoaquien abëd icquido tantienquio yec nadec chuinampondash: Nuqui pan bëambo icbued chiequi nepanui, quecuededpondash. 8Adsho ambibi tantiash Esus: Ubi bëdiactsëc tantiactsëcquido mibitedi nec. ¿Mimbi pan bëambocquid chiectabi nedi? 9¿Bëshunshun tantienquio yecta mibitedi nepe? Pan 5ted ictsëcquid umbi dada 5midted pemiaidon napi uaid bedbanshun tsitsan dadpen mimbi sandobued ¿tantienquioda yano? 10Adembidi pan 7ted ictsëcquidi umbi 4midted icquid pemiaidon pequin napi uaid bedbanshun tsitsanën mimbi sandobued ¿tantienquioda icuai? 11¿Umbi pan bëambocbued chiecpenquio nec, quequinda mibitedishun tantienquio icpe? Pan bidiscametebimbuecquid padiseobobëtan saduseobon chiaid neque. Aidon chuisho tantienda, quepondash Esus.

12Aden chuisho tantiash ubitedi nadpondabi: Panquio chienquio icquimbi nuquin matses caic: Padiseobon tantiamequin chuibanaidbëta saduseobon chuibanaid tantienda, quepecshenda niosh, quecuededpondabi.

Nuquin Papan Madombo mibi nec, quequin Petedon chiaid

(Madc. 8.27-30; Duc. 9.18-21)

13Adashic nidaid cuëshë utsi Sesadea Uedipo caid yacno Esus nidpondash. Adshumbic abëd icquido naden chuimepondash: Matsesën Tishaid icsho utsibon: ¿Tsutsi nec, ubi caosh? caquien abëd icquidon: 14Uan acten mentoandennedien nec, mibi caosh. Utsimbic: Edias Nuquin Papan oncamiampid nepanui, mibi caosh. Utsimbic: Edemias Nuquin Papan oncamiampid utsi nepanui, mibi caosh. Utsimbic: Nuquin Papan oncamiampid utsi nepanui, mibi caosh, capondash.#16.14 Nuquin Papan oncamiampid Edias nepampic. Aidën nabanaid istiadquio icquin Ch.D.1. 17.1—19.21 Ch.D.2. 2.1-12 isbanta. Isadaidbon Nuquin Papan Chomiaid: Ma chono, queshun Ediasba chomendac, quepanëdash. Mad. 4.5 tantiaquin aden chuipanëdash. 15Adsho tantiashumbien Esusën: Ma mibitedishun ¿tsutsi nec, ubi cao? caquien 16Simon Petedon: Quidistu Mesias caid Nuquin Papa uënëstiapimbocquidën Chomiaidquio yec Aidën Madombo mibi nec, caombi, capondash.

17Adsho tantiashun Esusën: Nuquin Papan bëdambuen tantiamiac aden mimbi bëdambuen chioc, Simon. Onasën mado Simon caid yec matses mibi nec. Adquid icquimbi matsesën tantiaid chienquio icquin abucshun Cun Pan tantiamiaidquio icquin mimbi abimbo chioc. 18Tantia. Umbitsen mibi chuinu. Cuënotebimbuecquid nec, quequin mibi Petedo cuënondambi. Cuënote dapa utsi ictiapimbo yacbimbuec chieshtoenquio icquid iquendac, queshun mibia ubi tantiaquidon chuiquid tapambo icmendambi. Adoac mimbi chuibanaido ubi tantiaquido iquendac. Aidotedi abi chieshënquidon cuessunemequin uesquin nibëdanmetiapimbo iquendac. 19Adquid icsho Nuquin Papan namiacno puduedte shëcuë chicte meniacbimbuen nidaidënshun ubi tantiaquidon nate mimbi chiendac. Adembidi aidon natemaidtsen mimbi chiendac, quepondash Esus Petedo chiec.

20Adashic abëd icquido chuiuaic: Quidistu Mesias caid Nuquin Papan Chomiaidquio Esus nec, quequin utsibo tantiamequin chienda, quepondash Esus.

Abi uënës uamete Esusën chiaid

(Madc. 8.31—9.1; Duc. 9.22-27)

21Adshumbic Esusën tauaquin abi uënës uamete abëd icquido naden chuipondash: Shubu dadpen icquid Edusaden yacno nidendabi. Amboshon nuquin matsesën ubi chieshënquiendac nëidtedshun. Nëidic nuquin matses tsësiobon. Nëidic nëish iua cuessunneshun pichicaquidon chuiquidon. Nëidic Moisesën chiampid tantiamequidon. Aidtedishun mëyanquioquin ubi uënës uamendac. Adoacsho chococac daëdec ushash uincuenendabi, quequin chuipondash. 22Adsho tantiashumbien Petedon Esus uannotantsëc buantanquin ambentsëqui naden chuipanëdash: Icsambuen mimbi chiec. Nuquin Papan mibi adometiapimbo ictsiashe. Aden icsambuen chienda, Icbo, capanëdash Petedon. 23Aden chiac bidiadquin Esusën: Mayan Icsa Satanasën oncamiac Petedo nec, queshun Petedo isquin naden chushcapondash: Cuenta, Satanas. Nuquin Papan tantiacpadpenquiocnoc Ambi Chiaid ubi niacmenu, quequin icsambuen chuiquid iquec. Mayan Icsa Satanasën tantiamiac matsesën tantiacpaden tantiaquid mibi nec, capondash Esusën Petedo chuiquin.

24Aden chiashic abëd icquido chuiuaic Esus: Ubi tantiaquid icquin mimbi tantiacpaden mitsanauidi nainquio icquin umbi chiacpadombuen nata. Aden nasho chieshëmënquidon: Cute napotiaidën dectanquin uënës uamechitono, caqui chieshtoenquio icquin abi ubi tantiatsiash. Adquid ubi tantiaquidquio nendac. 25Padnuen ambi tantiaiduidi naic tabadquid uënësash Nuquin Papa yacno matses puduedtiapimbo iquendac. Adquid icnuc ubi tantiaquin umbi chiacpadombuen nasho chieshënquin cuessunniacsho Nuquin Papan abi yacno puduedmendac. 26Abi bunaid dadpenquio bedbanec Ubi tantiesa yec uënësash Nuquin Papa yacno puduedtiapimbo iquendac. ¿Adquidta bëdambo icpadic? ¿Nuquin Papa piucquid menecta matses aid yacno puduedpatsiash? Padenquio. 27Matsesën Tishaid yec Nuquin Papa yacnouësh cun Pabëd icquidobëd bëchamauanquiec choshon Nuquin Papan abitedishun Icbo icmiaid icquin matses cuidte chiendambi. Nuquin Papa tantiec bëdambuec tabadquid icsho aidbëd tabadmequimbi Nuquin Papa tantienquio yec icsambuen naic tabadquido icsho natiamequin cuidendambi.#16.27 Cuëd. 62.11-12 tantiaquinc; B.T.Ch. 24.12 tantiaquinc Ede. 17.10tantiaquinc Ese. 18.30 tantiaquinc nëid chuipanëdash Esusën. Chotaquën onqueten trestedi iquec. Aid isbanta. Abentsëc matsesën onqueten iquec. 28Aden chiashic Esus: Abimbo chuinu. Tantiata. Nëmbo tabadquid ubi tantiaquid utsi utsiec uënësabi yec nidaidën abi tabadquin Matsesën Tishaid yec abitedishun Icbombo icmiacsho isendac, quepondash Esus.

Kasalukuyang Napili:

Mateo 16: mcfNT

Haylayt

Ibahagi

Kopyahin