Maatiyos 5
5
Aydaras koomalle
(Luukas 6:20-23)
1Yeesus mango xiyaw yubleyaako koomalle yewceh defeye gedda, kaa katattaynit alle yemeetin.
Baraka
2Ishi af faakeh lel taginah ten yaydaraso erherhishe:
3“Amnonobba hin mari#5:3 Amnonobba hin mari “Ufayeh baaxentit kin mari” yarhxiinimko tunturjumem kinni. , carshi nigsinna ten tiya kinamhi sabbatah baraka-lem kinon.
4Aydukumusnan geyoona kinoonimhi sabbatah xazzanoytam baraka-lem kinon.
5Baarho yawrashoona kinoonimhi sabbatah, sabre-lem baraka-lem kinon.
6Xayitoona kinoonimhi sabbatah, xaqqeh safrittah bakhartam baraka-lem kinon.
7Raxma geyoona kinoonimhi sabbatah raxma-lem baraka-lem kinon.
8Yalla yabloona kinoonimhi sabbatah cado afcaado lem baraka-lem kinon.
9Yallih cindhamah decsimoona kinoonimhi sabbatah salaam aba mari baraka-lem kinon.
10Carshi nigsinna tenah kinamhi sabbatah xaqqeh arhxuk haddaanima mari baraka-lem kinon.
11Yottah arhxuk sinah waatimeenih sin hadaneenimko, umaaniiko takkanna zirabah sinak yerhxiinimko, atin baraka-lem kitin. 12Sinko basoohit nobowa gantah amaa ginah hadaneenimhi sabbatah, carshelle sin casbi naba tiya kinnik xedenteenih ifrixa.
Mulxu kee ifo
(Markos 9:50; Luukas 14:34-35)
13Atin caalamti mulxu kitin, laakin mulxu ishi dhacam teyleemko, tee muluuxa aaginah gaxta? Tamficemih walaa inkim male, ciddittam kee xiyaw ibah adde taacitem bisa kinni. 14Atin caalamti ifo kitin. Koomakke tane daafo sucutto mirhicta. 15Xiyaw lel faanus iffoyshaanah citrot geridde mihayaanaaki, wuli defeenakke hayan, caredde tanem lel inkoh iffoysha. 16Amayim balih sin mece abittot yubliinih carshelle geytima sin Abbah nabne yaxawna ciloh, sin ifi xiyaw afalle iffowo.
Masiix Sercat yaskamalo yemeete
17Anu Sercat hido Nobowat farto aylawo emeete makkalina; aylawo maki emeetemki, askamalo kinni. 18Caran kee baarho talayendah, ummannim takmilendah, sercatko walaa cindhaa xarfi hido cindhaa dhimmiyo akko talawo makinam, rummah sinak arhxiyuk ane. 19Amaydo, ta amritko walaa cindhaahikke baddaahisheti, aki mari lel amaa ginah aboona yuyduruseti, carshi nigsinnadde ummanimko cindha tiyah decsiimo kinni. Isheh abeyaako amayim aboona aki mara yuyduruseti laakin carshi nigsinnadde nabatiyah decsiimo kinni. 20Sin xaqqi sercat dhiiceenit kee Faarisiinko ziyaade wayemko carshi nigsinnadde caduruh orobtoona makitiinim sinah warisha.
Kura
21Kalxit marak: ‘Magdafin, yigdifeti lel yamfarrado kinni’#Muuca 20:13; Gabbaacime Sercat 5:17 akko yerhxiinim toobbiinih tanin. 22Ishi sacallih kurrayinnanti yamfarrado alle tane, ishi sacalah waatiminnanti araballe yamaato alle tane, ‘Ko duudaw!’ arhxinnanti lel jahannabti giradde sawo alle tane. 23Amaydo, muttuxuwa mazbaxalle bahteh, ku sacal kok yissimingideh yanem lel amaa gedda xunsussemko, 24ishi muttuxuwa amaa mazbaxalle xabteh aduu. Tookomeh ishi sacallih wagarteh ishi muttuxuwa uxuu. 25Ishi qarimlih lel araxadde aniikoh wagar. Amayim lel, amaa ku qarim daaniyalle ku yasxayemko, amaa daaniya lel caskaralle, usun lel xabshedde ku hayaanamko kinni. 26Abayshimat santiim tafdiyendah lel caduruh tawco makitom, rummah kok arhxiyuk ane.
Sumsumo
27‘Maznayin’#Muuca 20:14; Gabbaacime Sercat 5:18 yarhxiinim lel toobbiinih tanin. 28Anu laakin, numadde duumeh kulux-yerhxeti ishi afcaadodde teelih mece geddaakoh yizniyeh yanem sinak arhxiyuk ane. 29Ku mizgi inti zambedde ku sayishshemko, teyyeeceh cid. Amayim lel umbuka ku nabsi jahannabadde cidditamko ku karimko inketta waytam tashshemhi sabbatah kinni. 30Ku mizgi gaba zambedde ku sayishshemko, igricaaki cid. Amayim lel umbuka ku nabsi jahannabadde cidditamko ku karimko inketta waytam tashshemhi sabbatah kinni.
Fittix
(Maatiyos 19:9; Markos 10:11-12; Luukas 16:18)
31‘Ishi numa aftixinnanti fittix warqat akah yaxaw’ #Gabbaacime Sercat 24:1yarhxiinim tane. 32Anu laakin, uma-xibar hi sabbatah akke wayemko, ishi numa aftixinnanti, zaaniya akko aba. Xabonta marcishitinnanti lel zina aba sinak arhxe.
Dhiiwa
33Amayim balih kalxit marakke, ‘Akah dhiiwittem Maddarah ab kibah zirabah’#Leewiiti Sheekhino 19:12 akko yerhxiinim toobbiinih tanin. 34Anu laakin, Yallih nugus-kurse kinamhi sabbatah carsheh, 35hido lel kaa ibih maacato kinamhi sabbatah baarhoh, hido lel naba Nugus hi daafo kinamhi sabbatah Yerusaalemih mirhiiwitina sinak arhxe. 36Inki dagarto caddoyishsho hido dattoyishsho mirhictamhi sabbatah ishi amoh gantah mirhiiwitin. 37Atu tarhxem, ‘Yoo, yoo’ hido ‘Maale, maale’ bisa yakko; tayimko fertem laakin uma tiyaako tamiite.
Xane
(Luukas 6:29-30)
38‘Inti intit idhdhah, iko lel ikot idhdhah’ yarhxiinim toobbiinih tanin. 39Anu laakin, umaanidde umaanih migarayna sinak arhxe. Laakin akkinnanti mizgi dhaban sinak dhabboonishemko, ootiya yakkeedo akah uxuwa. 40Qamish kok beyo ku yaksise tiyah, ishi natsala yakkeedo akah xab. 41Inki kiilometer kee abrha tadawo ku xaylisha tiyaalih adooxa kiilometer eelih aduu. 42Ku essera tiyah akah uxuu, kok yallakkaxo farha tiya lel mikalitin.
Sinni nacabtoolit ikxina
(Luukas 6:27-36)
43‘Ishi zoobatto ikxin, ishi nacabtoole lel incib’#Leewiiti Sheekhino 19:18 yarhxiinim toobbiinih tanin. 44Anu laakin, ‘Sinni nacabtoolit ikxinantaaki, tamaa sin hadana marah dhaaco akah aba’ sinak arhxe. 45Amayim lel carshelle yane sin Abbah cindham takkoona ciloh kinni. Amayim lel usuk ishi ayrotta umam kee mecemille ziffoysha, rob lel xaqqi-wannun kee xaqqi-wannun akkinnixe marah yaxaye. 46Sin kixin mara takxinin gedda jazah ayim litiini? Miiri yaskattit gantah makini amayim abaanam? 47Sinni saculuk bisa salaam-tarhxiinimko, aki maraako mangumuh ayim abak taniini? Aki-mari gantah makini amayim balih abaanam? 48Carshelle geytima sin Abba kaamil akah kinniika balih atin lel kaamil takkoona sinalle tane.”
Kasalukuyang Napili:
Maatiyos 5: SCC
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©2024 Wycliffe Ethiopia
