मत्ति 13
13
चरि टुप्खुबामि खानवा
(मरकुस ४:१-१२,२५; लुका ८:४-१०; १०:२३-२४)
1मो याकनोॽ येसु खिमबाङ खे़ॽनुङ माहोङ्मामि के़क्पेॽ पेना। 2मोबेॽ बेॽलोनोॽ याॽमि सुम्बॽआसे़ॽ येसु नाउबेॽ पेना, मोबा मोबेॽ सुम्बॽआ याॽमिजि चाहिँ माहोङ्मामि के़क्पेॽनोॽ येःबामि। 3येसुडे़ॽ माहा याॽमिजि खानवाबाङ बेॽलो खा इःबेॽटुजि, “इक्को याॽमि चरि टुप्सिॽ खडा। 4मोसे़ॽ चरि टुप्माबेॽ आढा चरि रामबेॽ सिॽटा, मोबा माहा चरि सोङाजिडे़ॽ कुःप्चोबेसुजि। 5आढा चरि रुङ्गोॽवाखाबेॽ सिॽटा। मोबेॽ बेॽलो गहिरो आक्खामा माॽआडे़से़ॽ, माहा रिङ के़ॽमागो चान्डोनोॽ कडा। 6तर नम निमासोरोॽ माहा रिङ वारामघडा, सामडे़ॽ बेॽलो आक्खामा मे़न्चुप्पॽआसे़ॽ हेघडा। 7मोडोक्नोॽ हाइखा चरि चाहिँ चिजिङ्घाबेॽ सिॽटा माहासो रिङ्गो कडा तर चिजिङ्मि डाङ नाःप्पुक्नुङ माहा टोप्सिघडा। 8तर आढा चरि चाहिँ मोलनुङ गहिरो आक्खामा टुढामबेॽ सिॽपॽआसे़ॽ रिङ के़ःॽनुङ मुक्मुक लिसा, मोबा सये गुना, साठि गुना, तिस गुना उब्जनि लिसा। 9ने़ए़क काप्खुबा चोबे़ॽ खेप्सुजिरो!”
10चोङ्साजि लेन्नुङ येसु लुसुजि, “इन्ढोङ हे़ने़ॽ याॽमिजि इःॽमाबेॽ खानवाबाङ इःन्डुजे ?” 11येसुडे़ॽ खोजि लुसुजि, “खाक्सानुमे, निवाहाङ्मि राज्यमि होङ्सिॽयुहा खा लेहेमे निवा हे़निङे़ॽ चुप्मिटानुमे। तर खोजि चाहिँ माहा खा लेहेमे निवा मे़म्पिडिॽ। 12इन्ढोङ्होङ असानुङ टुहा, मोसे़ॽ हाइखासो चुप्मिन्डुहा, मोबा छना बेॽलो लिहा। तर असानुङ माॽआये खोमि ए़डे़ॽवासो खोबाङ नाप्खे़हा। 13मोडोगे़ॽ का खोजिनुङ खानवाबेॽ यामुङे। इन्ढोङ्होङ माहाजिडे़ॽ खाङ्मागो खाङ्इन्डुजे तर खाङ्डोक्टुजिने, खेम्मागो खेम्इन्डुजे तर लेसुजिने। 14खोजिनुङ यसैया अगमबक्ताडे़ॽ लुबॽआ खा पुरा लिजाटाहा,
हे़निङे़ॽ खेम्मागो खेम्इन्डानुमे, तर लेनोॽ लेसानुम्ने,
खाङ्मागो खाङ्इन्डानुमे, तर इन्डोक्पेॽसो खाङ्डोक्टानुम्ने।
15 ‘इन्ढोङ्होङ इघा याॽमिजिमि निवानोॽ वारामघे़टे़।
खोजिमि ने़ए़कडे़ॽ खेम्हेसुजिने।
खोजि मिकसुरुम्बा ले़ःॽए़टुजे।
आक्टोॽ मे़ले़टाहोङ खोजिडे़ॽ खाङ्हेसुजे, खेप्सुजेनुङ लेहेसुजे,
मोबा माहाजिमि निवा काबेॽ टेआप्टुजे,
मोबा के़ॽ खोजि नुबोगुङ्जिङे।’
16 “तर हे़निङे़ॽ चाहिँ बेॽलो आसिस चुप्मिटानुमे, इन्ढोङ्होङ हे़निङ्मि मिगे़ॽ खाङ्डोक्इन्डानुमे, ने़ए़गे़ॽ खेम्हेन्डानुमे। 17चइबानोॽ हे़निङ लुनिम्ने़, हे़निङे़ॽ आयु खाङ्बॽआनुङ खेम्बॽआ इघा खा बेॽलो अगमबक्ताजिनुङ धरमि याॽमिजिडे़ॽ खाङ्मानुङ खेम्मा मिडुजे, तर माहाजिडे़ॽ मे़ङ्खाङ्डोक्टुजि, मे़म्खेम्डोक्टुजि।
चरि टुप्पॽआ खानवाडे़ॽ लुमायोक्पॽआ खा
(मरकुस ४:१३-२०; लुका ८:११-१५)
18 “हागो चरि टुप्पॽआ खानवाडे़ॽ लुमायोक्पॽआ खा खेप्सानुमे। 19रामबेॽ सिॽपॽआ चरि लुबॽआ चाहिँ, याॽमिजिडे़ॽ निवाहाङ्मि राज्यमि टुम्बेॽहा खा खेम्इन्डुजे, तर लेसुजिनि। मोबा सैतानडे़ॽ माहा खा निवाबाङ कुप्फे़न्डुए। 20मोबा रुङ्गोॽवाखाबेॽ सिॽपॽआ चरि लुबॽआ चाहिँ, याॽमिजिडे़ॽ निवाहाङ्मि बचन खेम्इन्डुजे साप्थाक्साङ बिस्वास ले़न्डुजे। 21तर मो चरिमि साम माॽआडिडोॽ माहा याॽजिमि निवाहोङ्बाङ बिस्वास काप्टुजिने। मोबा माहाजिडे़ॽ निवाहाङ्मि बचनबेॽ बिस्वास ले़ःॽपॽआसे़ॽ खेः आङ्मा सिॽमासोरोॽ बिस्वास लेप्पेन्डुजे। 22चिजिङ खाबेॽ सिॽपॽआ चरि चाहिँ याॽमिजिडे़ॽ निवाहाङ्मि बचनगो खेम्इडुजे, तर इगो मक्खाम्डेमबेॽहा बेॽलो खालहा सुरतानुङ याङ्सरावामि नम्नमडे़ॽ बचन टोप्सिघे़ये मोबा मो चरिबाङ इक्को चासो किङ्निहा। 23तर मोलिलो आक्खामाबेॽ सिॽपॽआ चरि लुबॽआ चाहिँ असे़ॽ निवाहाङ्मि बचन खेम्इन्डुए, मो बचनडे़ॽ लुबॽआ खा लेनुङ नुरोॽ निवाबेॽ युङ्इन्डुए, मोबा खोमि हिङ्मवा चाहिँ तिस गुना, साठि गुनानुङ सये गुना चा किङ्इये डाङ्डोॽ लिये।”
सामामि खानवा
24येसुडे़ॽ फेरि माहाजि हाइको इडोक्मा खानवा लुबेॽटुजि, “खाक्सानुमे, निवाहाङ्मि राज्य लुबॽआ खेति ले़ःॽखुबा याॽमिडोॽ ले़ये, मोसे़ॽ टाङ्बामि सोङ्राबेॽ नुबा चरि टुप्मिइन्डुए। 25तर मो याॽमि इम्डिघे़ॽमाबेॽ खोमि सतुर लेन्नुङ खोसे़ॽ नुबा चरि टुप्पॽआ ठाउँबेॽ सामामि चरि टुप्एम्बेॽटु। 26ए़क्साङ रिङ वाबोक्नुङ खाॽवा टिमाबेॽ सामासो खाङ्मुसा।
27 “मोबा रोपाबेॽ योम्बोक ले़ःॽखुबाजि लेन्नुङ रोपादाङ्बा लुसुजि, ‘मायोङ्बा हे़ने़ॽ रोपाबेॽ नुबा चरि टुप्पॽआ ने़ॽने, इघा सामा चाहिँ हाम्बाङ लेस्साहा ?’ 28मो रोपादाङ्बाडे़ॽ लुसुजि, ‘इघा सामा सतुरजिडे़ॽ टुप्एन्बेटामि’ सेउतेजिडे़ॽ लुसुजि, ‘इमा कानिङ खे़ॽनुङ अक्खा सामा साक्पेमेन्डे ?’
29 “तर रोपादाङ्बाडे़ॽ लुसुजि, ‘ने़ॽनि आयुनोॽ ए़ॽसागानुमे। आयुनोॽ साक्माबेॽ हे़निङे़ॽ सामानुङ चामसो साक्पेन्डानुमे। 30बालि हे़क्मा बेलाठोक अक्खा चामनुङ सामा सोरि वाबोक्मेॽमा, ए़क्साङ बालि हे़क्मा बेला लियेम्बाङ सेउतेजि लुनुङ्हाजि याक्लो सामा साक्नुङ मिबेॽ हिॽमामि लागि युक्सानुमे, चाम चाहिँ के़ए़ भकारिबेॽ युक्सानुमे’।”
पारसाइमि चरिनुङ खमिरमि खानवा
(मरकुस ४:३०-३४; लुका १३:१८-२१)
31येसुडे़ॽ फेरि हाइको इक्को खानवा इःबेॽटुजि, “थाङ्सिरिमि राज्य पारसाइमि चरिडोॽ ले़ये, इक्को याॽमिडे़ॽ सोङ्राबेॽ खे़ॽनुङ पारसाइ टुबु। 32मो चरि हाइखा चोप चरिबाङ एडेम्मा ले़ये, तर ए़क्साङ डाङ वाबोक्नुङ चोप्पाङ बेॽएम्मा लिये। मोबा सोङाजि लेन्नुङ मो डाङ्बेॽ हाप टिन्डुजे।”
33येसुडे़ॽ खोजि हाइको खानवा इःबेॽटुजि, “थाङ्सिरिमि राज्य चाहिँ चरेपा होम्बोक्मे खमिरडोक्मा ले़ये, इक्को मेॽनामिॽडे़ॽ ए़डेॽवा खमिर सुम पाथिडोक गहुमि खाॽमिबेॽ ठुनुङ नागु माहा होम्बोक्माठोक आरिबेॽ युक्सु।”
34येसुडे़ॽ इघा चोप खा याॽमिजि खानवाबाङ इःबेॽटुजि, खोसे़ॽ चोप खालहा सिक्छे खानवाबाङ्नोॽ इःडुजि। 35अगमबक्ताजिडे़ॽ लुबॽआ खा पुरा लिजासा,
“के़ॽ हे़निङ खानवाबाङ खा इःबेॽनिम्ने़
मक्खाम्डेम सिरिस्टि लिबॽआबाङ चुम्नुङ युङ्बॽआ खा इःनुङ्हा#भजनसङ्ग्रह ७८:२।”
सामामि खानवाडे़ॽ लुमायोक्पॽआ
(मरकुस ४:३०-३४; लुका १३:१८-२१)
36मोबा येसु मोबेॽ सुम्बॽआ याॽमिजि याःॽयानुङ खिमहोङ्सिॽयु पे़ए़ना। मोडोक्पेॽ खोमि चोङ्साजि लेन्नुङ लुसुजि, “सामामि खानवाडे़ॽ लुमायोक्पॽआ खा कानिङ इःबेॽमाना।” 37येसुडे़ॽ खोजि लुबेॽटुजि, “इगो खानवाबेॽ नुबा चरि टुप्खुबा चाहिँ याॽमिमि पसा ले़ये। 38रोपा चाहिँ इगो मक्खाम्डेम, नुबा चरि चाहिँ निवाहाङ्मि राज्यबेॽहा याॽमिजि, मोबा सामा चाहिँ सैतानमि पसाजि। 39चाम रोपाबेॽ सामा ठुघुबा चाहिँ सैतान ले़ये। बालि हे़क्मा बेला चाहिँ न्यायमि याक ले़ये, खेत्लाजि चाहिँ थाङ्सिरिदुतजि ले़म्मे।
40 “इडोॽ सामा चोप सुम्नुङ मिबेॽ हिॽटिडोॽ मक्खाम्डेममि न्यायमि याकसो इडोक्नोॽ लिये। 41याॽमिमि पसाडे़ॽ खोमि थाङ्सिरिदुतजि पाङ्इन्डुजे, मोबा पाप ले़ःॽमेॽखुबा चोप थोकनुङ दुस्ट योम्बोक ले़ःॽमे़ॽखुबाजि खोमि राज्यबाङ सुम्इन्डुजे, 42मोबा मिमि भट्टिबेॽ राप्एन्इन्डुजे। मोबेॽ माहाजि के़ङ इःक्साङ हाःप्मिम्मे। 43निवाहाङ्मि पोम्बेॽ धरमि ठहरबा लिबॽआजि चोप पाबामि राज्यबेॽ नमडोॽ उज्यालो पोॽइम्मे। ने़ए़क काप्खुबाजि चोबे़ॽ खेप्सुमिरो।
हुम्नुङ युङ्बॽआ याङ्सरावानुङ मोतिमि खानवा
44 “निवाहाङ्मि राज्य लुबॽआ चाहिँ इक्को रोपाबेॽ हुम्नुङ युङ्बॽआ याङ्सरावाडोॽ ले़ये। इगो इक्को याॽमिडे़ॽ चुप्नुङ युङ्इन्डुए, मोबा साप्थाक्साङ खिम खे़ॽनुङ खोमि टुहा चोप थोक इन्जानुङ मो याङ्सरावा हुम्बॽआ रोपा इङ्इन्डुए।
45 “फेरि थाङ्सिरिमि राज्यगो इक्को महँगो मोति इन्जाखुबा याॽमिडोॽ ले़ये। 46मो याॽमिडे़ॽ महँगो मोति चुप्नुङ खोमि चोप थोक इन्जान्डुए, मोबा मो महँगो मोति इङ्इन्डुए।
ङा राःप्ठाम याङ्घामामि खानवा
47 “थाङ्सिरिमि राज्य लुबॽआ इक्को टोम्लिॽवाबेॽ राप्पॽआ याङ्घामाडोॽ ले़ये। मोबेॽ खाल खालहा ङाजि सिॽइम्मे। 48याङ्घामा इॽठुप ङा लियेम्बाङ याङ्घामा राप्खुबाजिडे़ॽ पाखाबेॽ सेॽआप्नुङ नुबा ङाजि थुदुप्पेॽ ए़न्डुजे मङे़हा ङाजि पाखे़ॽयु राप्पेसुजि। 49इगो युगमि ए़क्साङ्ए याकपेॽ मोडोक्नोॽ लिये। थाङ्सिरिदुतजि लेन्नुङ निवाहाङ्मि पोम्बेॽ धरमि लिबॽआ याॽमिजिमि रुम्बाङ दुस्टजि फाॽइन्डुजे। 50मोबा माहाजि मिमि भट्टिबेॽ राप्मिन्डुजे। मोबेॽ माहा दुस्टजि के़ङ इःक्साङ हाःप्मिम्मे।”
51येसुडे़ॽ चोङ्साजि सिप्सुजि, “इमा हे़निङे़ॽ इघा खा लेसानुमे ?” माहाजिडे़ॽ लुसुजि, “लेसुङ्मा।” 52मोबा येसुडे़ॽ माहाजि लुसुजि, “मोडोगे़ॽ थाङ्सिरिमि राज्यमि सिक्छे चुप्पॽआ याॽमि लुबॽआ चाहिँ खिमबेॽए मुलि याॽमिडोॽ ले़ये। खोसे़ॽ खोमि खिमबेॽए ढुकुटिबाङ चोङ्नुङ पुरानो बेॽलो मुल्यनुङ्हा थोक पाखे़ॽयु रिॽआप्मिन्डुहा।”
नासरत सहरबेॽ येसु बिस्वास मे़ले़ःॽपॽआ
(मरकुस ६:१-६; लुका ४:१६-३०)
53इघा खानवा इःसेॽनुङ येसु मो ठाउँबाङ खे़प्पेसा। 54मोबेॽ येसुडे़ॽ यहुदिजि सुम्ढाम खिमबेॽ खे़ॽनुङ सिक्छे पिबोगुजि। खोमि सिक्छे खेम्खुबाजि खरि मिन्साङ कासामि “इडोक्मा निवानुङ खरिहा योम्बोक ले़ःॽठाम सक्ति इगोसे़ॽ हाम्बाङ चुप्टुहा ? 55इमा इगो सिकरमि योसेफनुङ मरियाममि पसा ने़ॽने ? इगोमि निसाजि याकुब, योसेफ, सिमोननुङ यहुदा ने़ॽनेन्डे ? 56इगोमि सम्समा निसाजिसो कानिङ्नुङ्नोॽ टुम्मे ने़ॽनेन्डे ? इगोसे़ॽ हाम्बाङ इघा चोप खा चुप्टुहा ?” 57मोबा माहा याॽमिजि खोनुङ सुरकडामि। तर येसुडे़ॽ माहाजि लुसुजि, “अगमबक्ताजि टाङ्बामि खिम्डेमबेॽहानुङ टाङ्बाङ्जिडे़ॽ मान ले़टुजिनि। तर हाइखा चोप ठाउँबेॽहा याॽमिजिडे़ॽ चाहिँ मान ले़न्डुजे।” 58मोबेॽहा याॽमिजिडे़ॽ खोबेॽ बिस्वास मे़ले़ःॽपॽआसे़ॽ येसुडे़ॽ बेॽलो खरिहा योम्बोक मे़ले़टु।
Kasalukuyang Napili:
मत्ति 13: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
