मत्ति 12
12
नाजामे याकमि परभु
(मरकुस २:२३-२८; ३:१-६; लुका ६:१-११)
1इक्याक नाजामे यिडे़ॽ येसु इक्को रोपा रुम्बेॽए राम लिमानुङ खे़ॽमे़ॽनिङ्सिडा। मोडोक्पेॽ खोमि चोङ्साजि सगे़ॽ सिबॽआसे़ॽ मो रोपाबेॽहा गहुमि खाॽवा युप्नुङ हुकपेॽ नुक्साङ चोसुजि। 2तर फरिसिजिडे़ॽ मो खाङ्डोक्नुङ येसु लुसुजि, “खाक्से, हे़ने़हा चोङ्साजि नाजामे याकपेॽ ले़ःॽमा फे़न्नि लुबॽआ योम्बोकनोॽ खेप्सुजिनि।”
3तर येसुडे़ॽ खोजि लुसुजि, “दाउदनुङ खोमि लङ्गामजि सगे़ॽ सिमाबेॽ खोसे़ॽ इमाङ ले़टुए ? हे़निङे़ॽ मे़नेडानुमे ? 4खोसे़ॽ निवाहाङ्मि मन्दिर होङ्सिॽयु चेॽटिबॽआ चरेपा रिआप्नुङ खोमि लङ्गामजिनुङ चोसुजि, मो चरेपा चाहिँ यहुदि धारमिक नियमडे़ॽ लुडिडोॽ याडाङ्बाबाङ हाइखा असे़ॽसो चामा मे़म्फेने ने़ॽने ?#१ समुएल २१:१-६ 5इमा यहुदि धारमिक नियम मे़नेडानुमे, याडाङ्बाजिडे़ॽ मन्दिरबेॽ छना बेॽलो नाजामे याकपेॽ योम्बोक ले़न्डुजे तरसो खोजि आप्टिक मे़ॽनिङ्हाजिनोॽ लिम्मे ? 6तर के़ॽ हे़निङ लुनिम्ने़, इगो मन्दिरबाङ्सो एप्पा इक्को इगोबेॽ टुये। 7‘जिवातमि भोग पिबॽआ ने़ॽनि, तर हे़निङे़ॽ नम्नावा ले़ःॽपॽआ नेन्जानुङे’#होसे ६:६ लुनुङ लेसानुमहोङ हे़निङे़ॽ आप्टिक मे़ॽनिङ्हा याॽमिजि आप्टिक मे़न्डिसानुम होला। 8इन्ढोङ्होङ याॽमिमि पसा नाजामे याकमिसो परभु ले़ये।”
9येसु मो ठाउँबाङ खे़ॽनुङ माहा यहुदिजि सुम्ढाम खिमबेॽ पे़ए़ना। 10मोबेॽ हुक हेघे़ॽपॽआ इक्को याॽमि टुसा। आढा फरिसिजिडे़ॽ येसु आप्टिक टिमामि लागि सिप्सुजि, “नाजामे याकपेॽ टुक्खुबा नुबोक्मा नुयेन्डे फे़न्निबा ?” 11येसुडे़ॽ माहाजि सिप्सुजि, “हे़निङ्मि इक्को सामु टुये, नाजामे यिडे़ॽ मो सामु खदोलोम्बाबेॽ हेॽयुघे़ॽहोङ इमा हे़निङे़ॽ मो चाङ्गे़ॽटानुम्ने ? 12मो सामुबाङ्सो याॽमि छना बेॽलो महागो ले़म्मे। मोडोगे़ॽ नाजामे याकपेॽहोङ्सो भलाइमि योम्बोक ले़ःॽमा नुबा लिये।” 13मोबा येसुडे़ॽ मो याॽमि लुसु, “हे़ने़ए़ हुक खिक्से” मोसे़ॽ हुक खिक्सु, खोमि हुक नुघे़ॽनुङ हाइकोडोक्नोॽ लिबेसा। 14तर माहा फरिसिजिडे़ॽ पाखे़ॽयु खे़ॽनुङ इगो येसु इन्डोक्टे सेॽनेमे लुनुङ खोमि बिरोधबेॽ मोत्ता इःबोगुजि।
निवाहाङ्डे़ॽ से़म्बॽआ सेवाक
(मरकुस ३:७-१२; लुका ६:१७-१९)
15मोडोक्मा खा येसुडे़ॽ लेडोक्नुङ खो मो ठाउँबाङ खे़प्पेसा। बेॽलो याॽमिजि खोबेॽ लेस्सामि माहा चोप टुक्खुबाजि खोसे़ॽ नुबोगुजि। 16तर येसुडे़ॽ “का असा ले़ङे, लुमे खा हे़निङे़ॽ असासो ए़लुमे” लुनुङ नुरोॽ लुओसुजि। 17इडोॽ यसैया अगमबक्ताडे़ॽ लुबॽआ इगो खा पुरा लिसा-
18“के़ॽ से़म्बॽआ, के़ॽ नम्नम ले़ःॽपॽआ सेवाक इगोनोॽ ले़ये।
इगोनुङ का साप्थाङ्इटिङे, इगोबेॽ काङ्मि होङ्निवा युङ्इनुङे
मोबा खोसे़ॽनोॽ चोप जातिहा याॽमिजि न्यायमि टुम्बेॽ परचार ले़न्डुजे।
19खो खिमासो योक्निबा, वोमासो वोनिबा, खो काबॽआ मरामराजि असे़ॽसो खेप्सुजिने।
20खोसे़ॽ न्यायमि याक मे़लेन्रो,
पोक्खे़ॽपॽआ इङ्भुसो एडुनिबा,
सिघे़ॽसिॽमा कुप्पिसो सेडुनिबा।
21खोबेॽनोॽ जाति जातिजिहा याॽमिजिडे़ॽ आसा ले़न्डुजे।#यसैया ४२:१-४ ”
फरिसिजिडे़ॽ येसु सङ्क ले़ःॽपॽआ
(मरकुस ३:२०-३०; लुका ११:१४-२३)
22मोबा याॽमिजिडे़ॽ मङे़ॽमा चाबे़ॽ ले़ःॽमे़ॽ मिक मे़ए़ॽखुबानुङ कुबा लिबॽआ इक्को याॽमि येसुबेॽ चिक्चे़डुजि। येसुडे़ॽ मो नुबोगु, मोडोगे़ॽ मो याॽमि यामुबुगानुङ खेम्हेखुबा लिसा। 23मोबा चोप याॽमिजिडे़ॽ खरि मिन्साङ लुसुजि, “इमा इगो दाउदमिन्नोॽ पसाडे ?” 24तर इगो खा खेम्नुङ फरिसिजिडे़ॽ लुसुजि “इगो याॽमिडे़ॽको मङे़ॽमा चापजिमि एप्पा बालजिबुलमि बोलडे़ॽरेॽ मङे़हा चापजि यिॽइन्डुजे।”
25तर येसुडे़ॽ माहा याॽमिजिमि निवामि खा लेडोक्नुङ लुसुजि, “इक्को राज्यबेॽहा याॽमिजि खोजि टाङ्बानोॽ खिमाचुमा ले़ःॽमिहोङ मो राज्य नासि लिये। मोडोक्नोॽ सहर अथबा खिमबेॽहा याॽमिजि खोजि टाङ्बा काक्मिहोङ खोजिनोॽ नासि लिघे़म्मे। 26मोबा सैतानमि सक्तिडे़ॽ सैताननोॽ यिगुहोङ, मोसे़ॽ टाङ्बामिनोॽ बिरोध ले़न्डुए, मोबा मोमि राज्य इन्डोक्टे एङ्इये ? 27मोडोक्नोॽ मङे़ॽमा चापमि एप्पा बालजिबुलमि सक्तिडे़ॽ के़ॽ मङे़हा चापजि यिॽइनुङ्होङ, हे़निङ्मि चोङ्साजिडे़ॽ चाहिँ असामि सक्तिडे़ॽ यिॽइन्डुजे ? मोडोगे़ॽ हे़निङमि चोङ्साजिडे़ॽ ले़ःॽपॽआ योम्बोगे़ॽनोॽ हे़निङे़ॽ माङे़ॽमा निवा खिन्डानिङ लुमे खामि आप्टिकनुङ्मा टोङ्इये। 28तर के़ॽ निवाहाङ्मि सक्तिडे़ॽ मङे़हा चापजि यिॽइनुङ्होङ निवाहाङ्मि राज्य हे़निङ्मि रुम्बेॽ लेम्बेटे़। 29मोबा छॽइये याॽमिमि खिमहोङ्सिॽयु पे़ए़न्नुङ याङ्सरावा नाप्खे़ॽमामि लागि याक्लो मो याॽमि हिःक्मा खे़ये ने़न्नेन्डे ? खो हिःक्नुङ ए़क्साङ्रेॽ मो खिमबेॽहा चोप थोक लाघे़ॽहेये।
30 “असा कानुङ सोरि राम्निबा, मो काङ्मि टेडिघरिक याॽमि ले़ये, असे़ॽ कानुङ सुप्सुनिबा, मोसे़ॽ के़ॽ सुम्बॽआसो टुप्पेबेये। 31मोडोगे़ॽ के़ॽ हे़निङ लुनिम्ने़, याॽमिजिडे़ॽ ले़ःॽपॽआ चोप पापनुङ निवाहाङ सिःक्चाबॽआ पाप आम्लाङ लिहा, तर पबित्रा होङ्निवा सिःक्चाबॽआ पाप चाहिँ आम्लाङ लिनिबा। 32याॽमिजिडे़ॽ याॽमिमि पसामि बिरोध ले़टुजिहोङ मोमि आम्लाङ लिहा, तर पबित्रा होङ्निवामि बिरोधबेॽ ले़टुजिहोङ इगो युगबेॽनुङ लेङ्इये युगबेॽसो आम्लाङ लिनिहा।
चा खाङ्नुङ्नोॽ मोमि डाङ लेहेये
(लुका ६:४३-४५)
33 “नुबा डाङ्बेॽ नुबा चा किङ्इहा। मङे़ॽमा डाङ्बेॽ मङे़हानोॽ चा किङ्इहा। इन्ढोङ्होङ चाबाङ्नोॽ मोमि डाङ लेहेये। 34होउ पुसे़ॽमि पसाजि, हे़निङ मङे़हा निवा खिघुबाजि, हे़निङे़ॽ इन्डोक्टे नुबा खा इःहेन्डानुमे ? इन्ढोङ्होङ निवाबेॽ इमाङ खा टुहा माहानोॽ याबुकबाङ लेङ्इहा। 35नुबा निवा खिघुबा याॽमिडे़ॽ नुबानोॽ खा याबुकबाङ यामुन्डुहा। तर मङे़हा निवा खिघुबा याॽमिडे़ॽ मङे़हानोॽ खा याबुकबाङ यामुन्डुहा। 36के़ॽ हे़निङ लुनिम्ने़, योम्बोक मे़ॽनिॽहा खा इःघुबाजि चोबे़ॽ न्यायमि याकपेॽ मोमि लेखा पिमा खे़ये। 37मोडोक्पेॽ हे़ने़ॽ यामुबॽआ खाडे़ॽनोॽ हे़न आप्टिकनुङ्मा अथबा आप्टिक मे़ॽनिङ्मा टोङ्इये।”
येसुनुङ खरिमा चिङ्गा योक्पॽआ
(मरकुस ८:११-१२; लुका ११:२९-३२)
38आढा फरिसिनुङ यहुदि धारमिक नियम इःॽखुबाजिडे़ॽ येसु लुसुजि, “गुरु, कानिङ इक्को खरिमा चिङ्गा खाङ्मुमा।” 39येसुडे़ॽ माहाजि लुसुजि, “दुस्टानुङ निवाहाङ्बेॽ भरोसा मे़ॽनिङ्हा पुस्ताडे़ॽ चिङ्गा योॽइन्डुजे। तर इगो पुस्ताबेॽहा याॽमिजिडे़ॽ योना अगमबक्तामि चिङ्गाबाङ हाइखा चिङ्गा खाङ्डोक्टुजिने। 40इन्ढोङ्होङ योना बेॽएम्मा ङामि रुङ्माबेॽ सुम याक, सुम सेन्डा पेना मोडोक्नोॽ याॽमिमि पसासो सुम याक, सुम सेन्डा मक्खाम्डेममि रुङ्माबेॽ पेङ्इये। 41न्यायमि याकपेॽ निनवे सहरबेॽहा याॽमिजिडे़ॽ इघा याॽमिजि आप्टिक टिन्डुजे, इन्ढोङ्होङ योनाडे़ॽ निवाहाङ्मि बचन परचार ले़ःॽमाबेॽ निनवे सहरबेॽहा याॽमिजि पापि योम्बोकबाङ टेसामि, तर खाक्सानुमे योनाबाङ्सो बेॽए आयु इगोबेॽ टुयेरोसो इघाजि पापबाङ टेमिनि। 42न्यायमि यिडे़ॽ लाङ्गेतमि सेबा देसबेॽए हाङ्माडे़ॽ इघा याॽमिजि आप्टिक टिन्डुजे। इन्ढोङ्होङ खो सोलोमानमि निवादाङ्बा खा खेम्सिॽ बेॽलो ओःबाङ ठे़ःॽनुङ सोलोमनबेॽ लेस्सा। तर खाक्सानुमे, आइ सोलोमानबाङ्सो बेॽए इगोबेॽ टुये।
मङे़ॽमा चाप फेरि टेजाये
(लुका ११:२४-२६)
43 “आढा याॽमिबाङ माङे़ॽमा चाप पे़आप्नुङ ए़क्साङ नाजामामि लागि ओबानो ठाउँ योॽइन्डुए, तर हाम्बेॽसो चुप्टुनिबा। 44मोसे़ॽ मिॽइन्डुए, ‘हागो याक्लो का पेम्बॽआ ठाउँबेॽनोॽ टेघे़ङे’। मोबेॽ लेम्माबेॽको मो ठाउँ वारिङ वारिङ सेनुङ चाक्बॽआनुङ होप्रे़ॽवा चुप्मिन्डुए। 45मोबा खोबाङ्सो चुरोॽ मङे़हा हाइखा एच्चि गोटा मङे़हा चापजि सोरि मो याॽमिबेॽ पे़ए़न्नुङ पेङ्इम्मे। मोबा मो याॽमिमि दसा याक्लोएम्बाङ्सो बेॽलो मङे़ॽमा लिये। इगो दुस्ट पुस्ताबेॽहा याॽमिजिमि दसासो मोडोक्नोॽ लिये।”
येसुमि मामानुङ निसाजि
(मरकुस ३:३१-३५; लुका ८:१९-२१)
46येसु याॽमिजिनुङ यामुमे़ॽनिङ्सिमाबेॽ, खोमि मामानुङ निसाजि पाखे़ॽयु लेस्सामि मोबा खोजि “येसुनुङ यामुमे खा टुहा” लुनुङ खो हुङ्मानुङ पाखे़ॽयुनोॽ पेनामि। 47मोबा इक्को याॽमिडे़ॽ येसु लुसु, “हे़ने़ए़ मामानुङ निसाजि पाखे़ॽयु लेङ्इटामे खोजि हे़न्नुङ यामुमा मिङ्इम्मे।” 48तर येसुडे़ॽ मो याॽमि लुसु, “के़हा मामानुङ निसाजि असाजिडे ?” 49मोबा खोम चोङ्साजिलाम हुगे़ॽ सुक्साङ लुसु, “के़हा मामानुङ निसाजि इघाजिनोॽ ले़म्मे। 50इन्ढोङ्होङ असा असाजिडे़ॽ थाङ्सिरिॽटुए पाबामि खा खेम्नुङ खोमि आग्या पालना ले़न्डुजे, माहाजिनोॽ काङ्मि मामा, निसानुङ नानाजि ले़म्मे।”
Kasalukuyang Napili:
मत्ति 12: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
