Markus 4
4
Byelə səɗe a nə nzə-ka daase
(Matta 13.1-23; Luka 8.4-15)
1Yesu a tiya kəndəshe a kwaka gərə Galili. Kaɓa təkə-təkətɨ ɓwaare a paya a hakan, taayə haa kangti kan, səngɨn ɗa nda pɨrə koombotə a nza vorsə. Mya dɨmdə koombotɨngɨn a vor haɓye, ɓwaare a kangə kwaka haɓye ta kɨl ləməgyee Yesu a dɨ boyo. 2Nda kənərən shee hananang ka byelə səɗe, nda sa atɨ, 3“Samdə kwakingəwnə! A nzə-hawti a nggur daase a muɗə ɓa dɨ ka daase. 4Ite sɨne dɨ kashe, a daasə a kəji nə tɨfe, ɓakarye mgban asɨ gwakə kat. 5A daasə a leyə a pukə nə girɨnge. Nda za tan-tan a kangə, shezə gəkɨlə kworyingrən aa ɗɨm njiya a kangə pepe, 6ite fəre a ɓɨrə, nda hinarən təna kpamə gə kworyingrən aa pɨrə njiya. 7A daasə a kəji waka hwole, ite daasəngɨn a za a kangə, hwoləngɨn a jiyə a zobtɨrən kat, tənaa wula a ɗa daase. 8A daasə mgban a fokə nə njiya pepeye, nda za a maɗə, a ɗa daase, a daasə bəwtə mwaakɨn, a mgban bəwtə tukoltaka, mɨni a mgban haru.”
9Yesu a sarən, “Ma ka kwaki kɨl le, a nda saa kwakingɨn pepe a kɨlə.”
10Ite Yesu a mɨna asɨ nza hiɗəsən ka lagbe dan bəw a mbiɗi-kpe ka imi 'ye nza takadən, təna ɗiyən lə naarə byelə səɗəngɨn. 11Nda sarən atɨ, “Hɨnggəwnə myaa ɓownə də asə a nə lə həmne da Həmɨnpwa. Mya mgbaarən bwang a hakəwnə. A haka mbiɗiti mi vɨratə, mya dɨ kənərən shee ka byelə səɗe. 12Gələ,
“ ‘Nagi təna sara diingrən
a dɨ niyə,
tənaa dɨ naa asə,
nagi təna wana kwakingrən
a dɨ kɨl le,
tənaa dɨ takaləngɨn,
naasə tən ɓa nda virwa a por-njiya,
Həmɨnpwa a nggurərəngə səhase darən!’#4.12 Naasə: Ishaya 6.9,10.”
13Yesu a sarən, “Hwunaa lee byelə səɗa na dɨ ɗəwnə, ɓə ya hwun ɓa ɗa hwuna ɓə lee mbiɗitɨ zərgi ləməgyea? 14Byelə səɗa na boyə nə yang: A nzə-hawti a ka daase, daasəngɨn nə le da Həmɨnpwa. 15I ɓwaare nə ɓətɨ tɨfaa daase a fokə nəngɨn, wule mingɨn nə daasə le da Həmɨnpwa a kəji nəngrən. Tən kana luu le da Həmɨnpwa, Shetan a dɨ shi tan-tan a nggurgə ləngɨn a təna luwo vor hubosərən. 16Imi mgban tənə ɓətɨ girɨnga daase a fokə nəngrən, tən kana kɨl le da Həmɨnpwa, təna dɨ luwo tan-tan ka hɨmne ka hanɨngtə. 17Shezə gələ kworyingrən aa pɨrə njiya tənaawa ɓongə tɨfe da Həmɨnpwa. Tən kana pɨrə vor tənətə gəkɨlə le da Həmɨnpwa, təna dɨ mɨnə ka beesərən a ɗaka Həmɨnpwa tan-tan. 18Imi mgban tənə ɓətɨ hwola daasa fokə waka hwole, sə mgban təna dɨ kɨl le da Həmɨnpwa. 19Wule mingɨn a dɨ pɨrə ɗyengle, ka vwakaha gə ɗɨm gɨnətɨ vɨratə, ka omshe som-som. Shingɨn kat a dɨ zob le da Həmɨnpwa a vor hubosərən, ləngɨn a yerə ɓaa. 20Imi nə ɓətɨ njiya fema daase a pukə nəngɨn. Tənə wule myee dɨ kɨl le da Həmɨnpwa, təna luwo a ɗa lyentə kan, təna ɗa nyemye, 'ye bəwtə mwaakɨn, 'ye bəwtə tukoltaka, 'ye mgban haru.”
Byelə səɗe a nə tikɨle
(Luka 8.16-18)
21Nda ɗiyərən, “Mya dɨ kɨsadə tikɨle a mbəə mya mɨna kupon ka kpaa maa, naasə mgban a pukə dingɨlta? A mya dɨ kangdən a haa mgbənge a pwa? 22Nagi ndo sə a haa ɓotə, səngɨn ɓa dɨma a haa bwange, sa mya ɓodən mgban, mya mgbaarən ɓwaare a leyə. 23Ma ka kwaki kɨl le maa nda saa kwakingɨn a kɨlə.”
24Nda mɨna sarən atɨ, “A nagi ndo ma a səɗə ka yedingɨn a nə ləməgyee nda dɨ kɨlə, gə wule sə-kənshe hwuna dɨ kənə ɓwaare shee kan, ka wule sə-kənshingɨn mgban mye ɓa kənəwnə baa a saaɗə. 25Ma ka se kan kat, mya mɨna ɗɨkən a də. Ma mgban taa asə kan, nagi nzɨ a ɓyelənga nda gə kan nə, mya ɓa kpawan a lugən.”
Byelə səɗe anə daasa za
26Nda mɨna sarən, “Həmne da Həmɨnpwa nə yang: Sɨnə ɓətɨgə ma ka daase a gaashe. 27Nda mɨnə hwoɗye a dɨ nza, nda shinə a maɗə, tukotə ka fəre, daasəngɨn a za a maɗə, ndaa lee ɗate daasəngɨn a ɗa nda za. 28Njiyangɨn ka nənəngɨn a ɗɨkdə daase nda za a maɗə a ɗa jibe a dɨmdə nyemye ka daase. 29Ite daasə shingɨn a naa, nda nggur rokume gə shingɨn kən mati.”
Byelə səɗe a nə daasə bagale
(Matta 13.31-34; Luka 13.18-19)
30Nda mɨna sa, “Ka mɨnə hin ɓa kana həmne da Həmɨnpwa? Ndo wule byelə səɗə hin ɓa boyə gə hina bɨldə həmne da Həmɨnpwa? 31Həmne da Həmɨnpwa nə ɓətɨ daasə bagalə, daasəngɨn nə kur-kur. 32Kat ka angɨn ndi kana za, nda dɨ maɗə a la, a gbyala a kala base, a pɨrgə mbiɗitɨ kadee a kaanda kat, ɓakarye a dɨ sɨ ɗa vənye a basengɨn a nza də.”
33Ka byelə səɗə som-som nda kənərən shee, a wule shee tən ɓa mbarən a leyə. 34Ndaa kənərən asə som na aa ka byelə səɗe. Ndi kana shi a nza ka lagbe dan, də nda dɨ boyərən naarə nagi ndo sə.
Yesu a gɨra hawo ɓoole
(Matta 8.23-27; Luka 8.22-25)
35A fərəngɨn, ka kaade, nda sa lagbe dan atɨ, “Mya nggɨrəmə itɨ ɓayati.” 36Təna dɨ pɨra a vor koombote Yesu a nza də, təna lyembərə a ɗaka ɓwaare a haa təna kangədə a nggɨrə itɨ ɓayati. I koombi mgban a koɗərən. 37Dɨmsərən a vor haɓye nəle, hawe a nza maɗa, ɗogoli hawe a maɗa ka haɓye, koombotə ta kana ɓa ɗimə. 38Yesu ndə gaarə a bee a mgba koombotə ɓə bə nəngɨn a səbəne dɨ shini. Lagbe dan a dɨ maddən gə shintə, təna san atɨ, “Nzə-kəndəshe, se aa pɨrda də maa hina ɗyemə a soɓwa?”
39Nda viɗiya a maɗə a nza, nda gɨra hawe, nda sa hawe atɨ, “Kangyi!” Nda sa ɗogoli hawe mgban atɨ, “Bi ɗəng!” Hawa dɨ tawa kat, a sara a kɨsə, haa talə shetətət.
40Yesu a ɗiyərən, “Ɓə mɨnə ɗa kala aɓə gəwna? Baa ɓəgəng taa mwadiyalə kəwnə ma?”
41Kala a gərən kɨr-kɨr, təna ɗiyəsə, “Ɓə ndawula ɓwaara anə? A hawe kat ka ɗogoli hawe a koddə kormingɨn!”
Kasalukuyang Napili:
Markus 4: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
