Markus 2
2
Yesu a gwadə ama ka ootɨ ndongtə
(Matta 9.1-8; Luka 5.17-26)
1Aa ɗɨm bətə ite Yesu a mɨna pɨrə Kafanawum ɓə, ɓwaare a kɨlə atɨ ɓə mɨna a hwoɗye. 2Ɓwaare hananang a peyə, vənye ka haa bwange a naa, taa haa də mbiɗi, də nda hiwarən ka le da Həmɨnpwa. 3Imi a shi tən ka i moryi fwat 'ye nggura ama ka ootɨ ndongtə a shikan a haka Yesu. 4Shezə gə fure da ɓwaare tənaa ɗɨm haa pɨrtə. Təna ɓə nggɨrə a wunhaa a nə vɨna Yesu a gə vorsən, a jengdə ma ka ootɨ ndongtɨngɨn a nə kpəkləkye dan a waka ɓwaare gbyel a humwa Yesu. 5Ite Yesu ɓe naa mwadiyale darən, nda sa ma ka ootɨ ndongtɨngɨn atɨ, “Nze, mye nggurugə səhase dəw.”
6Də imi dɨ vor ji-lee kəndə ɓashita Musa 'ye a hangɨn ɓe kɨl la Yesu a boyo, təna ɗyengle ta ɗiyəsə, 7“Wonə nda ma ka byelə waka, ka kɨɗa kwakɨ Həmɨnpwa? Gəkɨlə taa ama də ɓa ngguro ɓwaara gə səhase a pɨrgə Həmɨnpwa ɓəmbə.”
8A hangɨn Yesu kɨlə a sɨsən lee mbali ləməgyee təna dɨ boyə hubosərən, nda ɓə sarən, “Ɓə ya hwuna nza a dɨ ndələ ka ləməngɨn a hubosəwna? 9Ɓə ndoɗi pɨri, mya sa ma ka ootɨ ndongtə, ‘Mye nggurugə səhase dəw,’ naasə mgban mya san atɨ, ‘Maɗi nggur sɨbətɨ dəw woyi muɗi’? 10Gə hwuna leyə atɨ hɨn Nze da Ɓwaara nee ka gətɨ nggurgə səhase ganə a vor vɨratə.” Nda ɓə sa ma ka ootɨ ndongtɨngɨn atɨ, 11“Hɨnə dɨ səw, maɗi nggur sɨbətɨ dəw muɗə hwoɗye.”
12Nda maɗə tan-tan a kangə a nggur sɨbətɨ dan dɨsərən a woyo humwaasərən a dɨmə a muɗə. Tən kat təna ɗa ndəle, tən ta ndukodə Həmɨnpwa, tən ta sa atɨ, “Hinaa ndaga naa wule se ɓətɨgə anə.”
Yesu wa Levi
(Matta 9.9-13; Luka 5.27-32)
13Yesu a mɨna mɨnə kwaka gərə Galili. Ɓwaare a paya a hakan hananang, nda tiya kəntə kənərən shee. 14Beetɨ angɨn Yesu woyo dɨ pɨri, nda naa a nzə-luu taa shemti nze da Alfiyus a mya dɨ wa atɨ Levi#2.14 Kpeyə kwakɨ Levi tɨnə nə Matta. sɨne nza kwaamɨ lyentɨ dan. Nda san atɨ, “Kwaɗe.” Levi a maɗə a koɗən a gəə lagba dan.
15Beetɨ angɨn, Yesu a pɨrə hwoda Levi a nza ɓɨdɨmə a dɨ zɨmshe. Ji-luu taa shemtə ka i tataryi ɓwaare a shi a nza a ɓɨdɨmə mgban a dɨ zɨmshe ka Yesu ka lagbe dan, gəkɨlə wule mingɨn hananang koɗə Yesu. 16Ite Farise ka i ji-lee kəndə ɓashita Musa 'ye a vorsəngrən ɓe naa ləngɨn, təna nggwonə lagbe da Yesu shee a sa, “Gə mɨnə hwuna dɨ zɨmshe ka ji-luu taa shemtə ka i tataryi ɓwaare?”
17Yesu ɓe kɨl ləngɨn, nda luwa a sarən, “Myee dwat aa dɨ zə haka nzə-ɓwatə, ji-ootə nə ɓəmbə dɨ zə mgba nggume. Hɨn taa shi vɨratə gə na waga myee dɨ nggur nəngrən ɓətɨ tən ji-ɗa səfemə, na shi gə ji-ɗa səhase.”
Mya ɗiyə Yesu le a nə nggur gone
(Matta 9.14-17; Luka 5.33-39)
18A fərə lagbe da Yohana a dɨ gonə, sə mgban Farise a dɨ gonə. Imi asɨ ɗiyə Yesu le atɨ, “Ɓə ya lagbe da Yohana ka hɨnggə Farise a duwa gonə, mɨnə ɗa lagbe dəw aawa gona?”
19Yesu a luwa a sarən, “Ɓə ya omyee shi hwoɗi ləke ɓa mɨna gona? Tənaa dɨ gonə anda ngaja nee nza ɓwaa kaarən. 20Di fəra mya kɨr ngajangɨn, a fərəngɨn tən ɓa gona.
21“Taa ndəng ama ɓa nggur sɨ baasə hwele a mbaka a nə rukutə iire. Kwaamɨ baasə hwele ɓa nggəl rukutə iirəngɨn a sɨran nda tawo, sɨrtɨngɨn ɓa mɨna hasə. 22Sə mgban, myaa dɨ nggur mbul-mbulə vwa dɨ huba a pukə vor səgyee iira, mye kana ɗaasə, vwe ɓa huba a fala səgye, vwe a kəji. Mya dɨ puk vwe a vor səgi hwelye.”
Həmɨ fərə piyatə
(Matta 12.1-8; Luka 6.1-5)
23A mɨni a fərə piyatɨ da Yawude, Yesu a woyo ka lagbe dan a koɗə dɨ vor i gaashi, lagbe dan a sər gyelkətɨ zumwe a posə ta tuuli. 24Imi dɨ vor Farise a ɗiyə Yesu atɨ, “Niyi mɨnə ɗa lagbe dəw a dɨ ɗa sa ɓashita Musa a kərdən a nə fərə piyata?”
25Yesu a luwa a sarən, “Hwunaa ndaga bəlshe a nə sa Dawuda a ɗa ka myee nda gə kaarən kat a ite myatə a gərən? 26Ite Abiyata nə Kɨsahəmə kpane, Dawuda a pɨrə vor hwoda Həmɨnpwa a nggur buroditɨ ɗəmɗəmte mya ɗa gə le da kɨsehəmyee dɨ lyenə vor hwoɗingɨn ɓəmbə, nda zɨmə ɓwaa ka myee nda woyo kaarən.”#2.26 Yesu a bɨlə ɓwaare ləməgingɨn a nə sa ɗa a vor malɨmta 1 Samaila 21.1-6. 27Nda mɨna sarən atɨ, “Myaa ɗa ɓwaara gə fərə piyatə, mya ɗa fərə piyatə gə le da ɓwaara. 28Hɨn Nze da Ɓwaara, hɨnə həmɨ fərə piyatə.”
Kasalukuyang Napili:
Markus 2: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
