Matta 27
27
Yawuda galingdə nəngɨn
(Markus 15.1; Luka 23.1,2; Yohana 18.28-32)
1Ka haa kɨɗatə, kɨsehəmi kpan-kpanye kat ka mi kpan-kpanye da Yawude a paya kat a kɨləsə a nə ɓɨl Yesu. 2Təna ɓwerən, a zəkan a haka Bilatus, nggwamnatɨ Yawudiya. 3Ite Yawuda ndi ma vədə Yesu, a niyə mye bəngən ɓashitɨ we, le a hasən kɨr-kɨr, nda ɗa na hɨn leyitə. Nda mɨnə ka nggɨrngɨma bəwtə mwaakɨn a və kɨsehəmi kpan-kpanye kat ka mi kpanye. 4Nda sarən atɨ, “Hɨn ɗa səhase, gəkɨlə na vədə ma aa ndaga ɗa a səhasə dɨmə kan a we.”
Təna luwa a san atɨ, “Ɓə mɨnə sɨpɨrsenə da? A nee ɓə mbiɗi hɨnggu.”
5Də Yawuda a kəjidə taangɨn a vor Shafe. Nda dɨmə a dɨ galingdə nəngɨn.
6Kɨsehəmi kpan-kpanye a por taangɨn, təna sa atɨ, “Ɓashitə aa vədə humwatə mya pedə wule taanə ka mbiɗitɨ a Shafe, gələ taangɨn taa zaambə.” 7Təna shalale a kɨləsə atɨ, tən ɓa ɗər njiya da nzə-nwo dwe ka taangɨn nda gəə haa ɗək wogi omi. 8Səngɨn nə ɗa mya dɨ wa hangɨn atɨ, “Haa Zaambe,” baa supo. 9Də la mya boyo dɨ kwaamɨ kpale Jerimaya a naa atɨ, “Tən por taa nggɨrngɨme bəwtə mwaakɨn, taangɨn nə mi Israila a kɨləsə ɓa ɗərtən kan. 10Ka taangɨn təna ɗər njiya da nzə-nwo dwe ɓətɨya Həmɨmiye a gɨrari.”#27.10 Naasə: Zakariya 11.12-13; Jerimaya 19.1-13; 32.6-9.
Mye zə ka Yesu a humwa Bilatus
(Markus 15.2-5; Luka 23.3-5; Yohana 18.33-38)
11Yesu a kangə humwaa nggwamna, Bilatus. Nggwamna a ɗiyən, “Hyenə həme da Yawude ma?”
Yesu a luwa a san atɨ, “Hye boyo ka nənanga.”
12Ite kɨsehəmi kpan-kpanye ka mi kpanye da Yawude a ɗɨkən le, a kəntən ka shee som-som, Yesu aa wuna.
13Bilatus a ɗiyən, “Tee kɨl ləməgyee təna dɨ ɗəku ma?”
14Yesu aa wuna kwaamɨngɨn nagi hiɗə a nə ləməgyee mya ɗəkən. Nggwamna a ɗa ndəle kɨr-kɨr.
Mye ɗa Yesu ɓashitɨ we
(Markus 15.6-15; Luka 23.13-25; Yohana 18.39–19.16)
15Ndi nggwamna nee ka a kwalə, mye kana ɓa ɗa kwalə Lawuttə, nda dɨ para hiɗə dɨ vor myee a gbərəwe, a ma ɓwaare a dɨ mwo. 16A itɨngɨn, təne ka ama a vor gbərəwe mya wa atɨ Barabas. Ɓwaare leerən gə lyentɨ hattɨ dan. 17Gə-angɨn ite ɓwaare a paya kat, Bilatus a ɗiyərən le, “Wonə hwuna dɨ mwo atɨ na parəwnə awan, Barabas nə ma? Naasə mgban, Yesu a mya wa atɨ Ma Həmɨnpwa a Yaɓwarən na?” 18Gəkɨlə ndi Bilatus, ɓə leyə atɨ jiwnə gərən təna ɓə kɨsa Yesu a shikan a hakan.
19Ite Bilatus nee nza nə raamə ɓashitɨ dan, mesən a lyanashe atɨ, “Ɓe pɨrə le da ma pepeya nə, gəkɨlə ka tukongnə hɨn tənə kɨr-kɨr a vor jiritə gə le dan.”
20Kɨsehəmi kpan-kpanye kat ka mi kpanye da Yawude a boyə təkə-təkətɨ ɓwaare atɨ, a təna nyisə mya para Barabas, Yesu mgban mya ɓɨlə.
21Nggwamna a mɨna ɗiyərən le, “A vor mingɨn dɨ kpeyə, wonə hwuna dɨ mwo atɨ na parəwnə awan?”
Təna luwa a san atɨ, “Barabas nə.”
22Bilatus a ɗiyərən atɨ, “Ɓə ya hɨn ɓa ɗa ka Yesu a mya wa atɨ Ma Həmɨnpwa a Yaɓwarən?”
Təna san kat atɨ, “A mya gbaltən a nə kada ɓɨdɨmtə!”
23Nda ɗiyərən atɨ, “Gəkɨlə mɨna, ndawula səhasə nda ɗa?”
Təna gbyanga kwakingrən kat a pukdə gəəshe atɨ, “A mya gbaltən!”
24Ite Bilatus ɓe niyə ndaa diyə mba asə a ɗa, shezə ɓwaare maɗə dɨ paya, gəəshe maɗə kɨr-kɨr, nda kɨn haɓye a suɓwagə tyefingɨn a humwaasərən kat, nda sarən atɨ, “Tɨfa tamdə a vor kəjidə zaambə ma. A nee hɨnggəwnə nə.”
25Mingɨn kat a luwa a san atɨ, “Naa zaambəngɨn a gə nəngenə kat ka jingenə.”
26Də nda pararən awa Barabas. Nda ɗɨkdəha mya byeng Yesu, nda vədən gə mya gbaltən a nə kada ɓɨdɨmtə.
Ji-gyelmbutə a shar Yesu
(Markus 15.16-20; Yohana 19.2,3)
27Ji-gyelmbutə a kɨt Yesu a pɨrə kan a voti ta nggwamna, təna payadə mbiɗitɨ ji-pakawatɨ darən kat a takadən a peyə. 28Təna saɗan gə sɨɓwetə, a kan rukutə kpalamə ɓɨratə. 29Təna ɓə shea tak mbulo həmne ka hwole a kupon a nəngɨn. Təna ɗɨkən kada a tɨfə zɨməngən, təna shea gyerə humwasən ta wunakan ka sharha atɨ, “Naa həmne a gɨrə kwe həme da Yawude!” 30Təna təfən nawye, a lugən kadangɨn, tən ta shea lyebrən a nəngɨn ka kadangɨn anəsə-anəsə. 31Tən ɓe shartən mbəə kat, təna sɨɗan gə rukutə kpalama a sɨsən a kalan sɨɓwetɨ dan. Təna dɨmə kan gəkɨlə mya dɨ gbaltən a nə kada ɓɨdɨmtə.
Mye ɓɨdɨmdə Yesu
(Markus 15.21-32; Luka 23.26-43; Yohana 19.17-27)
32Ite təne dɨ dɨmi, təna peyə ka ama dɨ vɨrate mya wa atɨ Sireni, kwakɨ mangɨn nə Siman. Təna bɨlən mbamtə a ɗɨkdən nda nggur kada ɓɨdɨmta Yesu. 33Təna tɨla a haa mya wa atɨ Golgota, (naarəngɨn nə Haa Kpəəkəne.) 34Də a hangɨn təna və Yesu vwo gbaanga mya nggəmdən ka haɓi kwatye gə nda soɓwo. Yesu ɓe dwaka kɨlarən, nda kwo soptə. 35Ite təna gbaltən a nə kada ɓɨdɨmtə, təna pa-bara a nə sɨɓwetɨ dan a ɓyanasə. 36Təna shea nza ta nidən. 37A nə kada ɓɨdɨmta Yesu, mya dorshe a nə mgbaalə gbalsən atɨ, yesu nə anə, ndi həme da yawude. 38Mya gbal i ji-ɓodəkha kpe ɓwaa ka Yesu, ma hiɗə a tɨfə zɨməngən, ma hiɗə mgban a tɨfə lyekɗəngən. 39Myee dɨ pɨri dɨ tɨfəngɨn a haa mya gbal Yesu də, a nidən a rikiyə a tiya ɗaasən. 40Tən ta san atɨ, “Angɨn nee kəw. A hye ma ɓa fala Shafe a mɨna nwogən a vor bətə mwaakɨn. Zə mbədə nanga! Janga gə nə kada ɓɨdɨmtə anda hyenə Nze da Həmɨnpwa!”
41Sə mgban kɨsehəmi kpan-kpanye ka ji-lee kəndə ɓashita Musa kat ka mi kpan-kpanye da Yawude, təna shartən ta san atɨ, 42“Nda mbədə imi, shezə ndaa mba nəngɨn a mbədən. Sɨnə həme da mi Israila. Maa nda janga gə nə kada ɓɨdɨmtə ko, hin ɓa mwakan. 43Nda sa atɨ nda mwaka Həmɨnpwa. Ɓa Həmɨnpwa a shi a mbədən ɓəgəng yee, anda Həmɨnpwa nee dɨ mworən. A nda sa atɨ, ‘Hɨnə Nze da Həmɨnpwa.’ ” 44Sə tən ji-ɓodəkha mya gbaltɨrən ka Yesu mgban a ɗaasə kan.
Yesu mbɨrə
(Markus 15.33-41; Luka 23.44-49; Yohana 19.28-30)
45Ka fəre a nən, haa kat a gə kulit baa awatə mwaakɨn. 46Ite fəre a viriwgə nən ka mbwayi fəre mwaakɨntɨ fəre, Yesu a waha ka korme kaɓa kpan atɨ, “Eloi, Eloi, lama sabaktani?” Naarə ləngɨn nə atɨ, “Həmɨnpwa de, Həmɨnpwa de, mɨnə ɗa hye ɓə ɗake dɨsəri?”#27.46 Naasə: Dyemshe 22.1.
47Ite myee kangə hangɨn a kɨla ləngɨn, təna sa atɨ, “Sɨne dɨ wa Iliya.”
48Ama hiɗə dɨ vor myee kangə hangɨn a giɓa tan-tan a nggur shibaashe. Nda shipdə shibaashingɨn a vor haɓi gbaanye, nda ɗɨkənə kada, a ɗifə Yesu a pwa gə nda saɓwa. 49Mbiɗitɨ ɓwaare kangə hangɨn a sa atɨ, “Mbam ɗəng a mya niyə anda Iliya ɓa shi a mbədən.”
50Ite Yesu a mɨna maddə kormɨngɨn a waha kaɓa kpan, nda ɗwangadə pitə hiɗə a mbɨrə.
51Də ɗəng sɨpate a vor Shafe a sɨrə dɨ pwa baa njiya, a təkə kpe. Vɨratə a humuro, mogye a fələ a təkəsə. 52Taanye a wonə, myee da Həmɨnpwa hananang 'ye mbəri a maggə taane ka myentə. 53Mingɨn a damagə taane. Beetɨ ite Yesu a maggə taane ka myentə, təna pɨra a vor Urshelima vɨraa ɗəmɗəmtə, ɓwaare hananang a naarən.
54Ite gyana nyatə ka mbiɗitɨ myee kangə hangɨn dɨ gɨra Yesu ɓe naa humurtɨ njiya ka shee ɗa kat, kala gərən kɨr-kɨr, təna sa atɨ, “Diyalə manə Nze da Həmɨnpwa nə!”
55I mandi hananang nee kanyi dɨ niya dɨ haa ɓongətə. Tənə mandye kwaɗa Yesu dɨ gwadən dɨ vor njiya Galili. 56A vor mandingɨn, Maryamu dɨ Magdala nee də, ka Maryamu nuwogə Yakubu ka Yusufu, ɗɨkənə nuwogə je da Zabadi.
Mye ɗɨk wo Yesu
(Markus 15.42-47; Luka 23.50-56; Yohana 19.38-42)
57Ite kaade nee ɗa, a nzə-gɨnəti dɨ vor vɨraa Aramatiya, mya wa atɨ Yusufu, ndi mgban ɓə gəə lagba da Yesu nə, 58nda wudə haka Bilatus a nyisən wo Yesu. Bilatus a mwa, nda lyenshe atɨ a mya və Yusufu wo Yesu. 59Yusufu a nggur wongɨn a vutə ka foowo pepeye. 60Nda ɗɨkə taanə wele dan a mya ɗa gonggoro faratə. Nda mgbəngtəngdə faratɨ kpantə a gbə taane kaarə, nda muɗə. 61Maryamu dɨ Magdala ka Maryamute hiɗə nee nza gbyel ka taane.
Nggɨre dɨ gɨra taanə Yesu
62Haa ɓe kɨɗa, a fərə piyatɨ da Yawude, kɨsehəmi kpan-kpanye ka Farise a zə haka Bilatus. 63Təna san atɨ, “Magbake, hin ɗyanga ite nzə-byelə ɓaya nee ka myentə, nda sa atɨ, ‘Beetɨ bətə mwaakɨn, hɨn ɓa maggə we ka myentə.’ 64Gə-angɨn ɗɨkdə ɓwaare a təna kangə a gɨra taane baa mwaakɨnə bətə gələ ɓe lagbe dan a shi a hɨr wongɨn, təna shea boyə ɓwaare atɨ nda maggə we ka myentə. Wule jeronyingɨn ɓa shea hasə a pɨrgə i kwamətə.”
65Bilatus a luwa a sarən atɨ, “Wudəm ka nggɨre, hwuna gbargiyə taanəngɨn ɓətɨya hwuna leyə.” 66Də təna muɗə mgban a gbargiyə taanəngɨn a liɓən, gələ mye kana pan təna leyə. Təna kangdə nggɨre 'ye ɓa gɨra taane pepe.
Kasalukuyang Napili:
Matta 27: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
