ꤗꤢꤞꤢꤧ 1
1
ꤛꤢꤩ꤬ꤏꤛꤢꤨ ꤢ꤬ꤊꤜꤝꤤ꤭ꤢ꤬ꤜꤢꤧ꤭ ꤢ꤬ ꤒꤢꤩ꤬ꤚꤢ꤭ꤗꤢ
(ꤜꤢꤨꤊꤢ꤬ ꤃:꤂꤃-꤃꤈)
1ꤜꤤ꤬ꤣꤧ꤭ꤗꤢ꤬ ꤢ꤬ ꤚꤢ꤭ꤗꤢꤚꤢ꤭ꤒꤢꤩ꤭ ꤛꤢꤩ꤬ꤏꤛꤢꤨꤋꤚꤤ ꤢ꤬ꤊꤜꤝꤤ꤭ꤢ꤬ꤜꤢꤧ꤭ ꤘꤣ ꤢ꤬ ꤡ꤫ꤢꤩ꤬ꤡꤢꤦ꤭ꤒꤢ꤭ ꤘꤤ꤭ꤒ꤫ꤢꤦ꤬ ꤜꤢꤨ꤭ ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭꤯ ꤢ꤬ ꤗꤢ꤬ ꤢ꤬ꤊꤜꤝꤤ꤭ꤢ꤬ꤜꤢꤧ꤭ ꤡ꤫ꤢꤩ꤬ꤡꤢꤦ꤭ꤒꤢ꤭ ꤘꤣ ꤋꤝꤤꤘꤢ꤬ꤠꤤ꤬ ꤔꤢꤧ ꤖꤢꤩ꤭ꤢ꤬ꤙꤚꤢ꤬ꤟꤢ꤬꤯
2ꤋꤢꤨ꤭ꤢ꤬ꤙꤚꤢ꤬ꤟꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤎꤢꤧ, ꤋꤢꤨ꤭ꤢꤎꤢꤧ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤛꤢ꤬ꤊꤥ꤬, ꤋꤢꤨ꤭ꤛꤢ꤬ꤊꤥ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤛꤢꤨꤘꤢ꤬ ꤔꤢꤧ ꤢ꤬ꤕ꤫ꤥ꤬ꤢ꤬ꤗ꤫ꤢꤧ꤬ ꤒꤣꤧ꤬ꤟꤢꤩ꤬꤯ 3ꤋꤢꤨ꤭ꤛꤢꤨꤘꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤕꤢꤩ꤬ꤚꤢ꤬ꤞꤢ꤬ ꤔꤢꤧ ꤋꤢꤨ꤭ꤞꤢꤩꤚꤣ꤬, ꤛꤢꤩ꤬ꤞꤤ꤭ ꤞꤤꤔꤣꤧ꤭ ꤢ꤬ꤗ꤫ꤥ꤬ ꤗꤢ꤬ ꤢ꤬ꤗꤝꤤ꤭ ꤔꤢꤧ ꤗꤢꤪ꤬ꤒꤢ꤬ꤗꤢ꤬꤯ ꤋꤢꤨ꤭ꤕꤢꤩ꤬ꤚꤢ꤬ꤞꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤟꤢꤩ꤬ꤞꤢ꤬ꤚꤥ꤬, ꤋꤢꤨ꤭ꤟꤢꤩ꤬ꤞꤢ꤬ꤚꤥ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤚꤢ꤬ꤗꤢ꤬, 4ꤋꤢꤨ꤭ꤚꤢ꤬ꤗꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤗꤤꤔꤢ꤬ꤘꤢ꤬, ꤋꤢꤨ꤭ꤢ꤬ꤗꤤꤔꤢ꤬ꤘꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤔꤢ꤬ꤏꤛꤥ꤬, ꤋꤢꤨ꤭ꤔꤢ꤬ꤏꤛꤥ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤎꤢ꤬ꤜꤢ꤬ꤗꤥ꤬, 5ꤋꤢꤨ꤭ꤎꤢ꤬ꤜꤢ꤬ꤗꤥ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤙꤢꤪꤞꤢ ꤘꤣ ꤢ꤬ꤗ꤫ꤥ꤬ ꤗꤝꤤ꤭ ꤔꤢꤧ ꤗꤢꤪ꤬ꤚꤢ꤬ꤋꤢ, ꤋꤢꤨ꤭ꤙꤢꤪꤞꤢ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤪꤙꤢꤧ ꤘꤣ ꤢ꤬ꤗ꤫ꤥ꤬ ꤗꤝꤤ꤭ ꤔꤢꤧ ꤗꤢꤪ꤬ꤚꤢꤨꤞꤢ꤬, ꤋꤢꤨ꤭ꤢꤪꤙꤢꤧ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤡꤛꤢꤩꤏꤛꤢꤧ꤯ 6ꤋꤢꤨ꤭ꤡꤛꤢꤩꤏꤛꤢꤧ ꤗꤢ꤬ ꤗ꤫ꤢ꤬ꤟꤣꤧ ꤋꤝꤤꤘꤢ꤬ꤠꤤ꤬ ꤢ꤬ꤖꤢꤩ꤭ ꤔꤣꤧ꤬ ꤟꤣꤧ꤯ ꤋꤝꤤꤘꤢ꤬ꤠꤤ꤬ ꤔꤣꤧ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ꤟꤣꤧ ꤋꤢꤨ꤭ꤏꤢꤪ꤬ꤜꤢ꤬ꤗꤥ꤬ ꤚꤣꤧ꤬ ꤢ꤬ꤗ꤫ꤥ꤬ ꤗꤢ꤬ ꤗ꤫ꤢ꤬ꤟꤣꤧ ꤋꤢꤨ꤭ꤢꤨ꤬ꤚꤤꤛꤢ꤬ ꤢ꤬ꤗꤢꤩ꤭ ꤔꤣꤧ꤬ꤟꤣꤧ꤯#ꤋꤝꤤ ꤔꤣꤧ꤭ꤙꤢ꤬ ꤒꤣ꤬ꤙꤢ꤬ ꤂꤄:꤁꤄,꤁꤅, ꤚꤢ꤭ꤗꤢꤚꤢ꤭ꤒꤢꤩ꤭ ꤔꤣꤧ꤭ꤙꤢ꤬ ꤒꤣ꤬ꤙꤢ꤬ ꤃꤆:꤁꤀, ꤡꤛꤣ꤬ꤚꤢ꤬ꤗꤤꤛꤣ꤬ ꤂꤇:꤂꤀
7ꤋꤢꤨ꤭ꤏꤢꤪ꤬ꤜꤢ꤬ꤗꤥ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤚꤢꤩ꤬ꤟꤥꤙꤢꤪ꤬, ꤋꤢꤨ꤭ꤚꤢꤩ꤬ꤟꤥꤙꤢꤪ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤙꤤꤛꤢ꤬, ꤋꤢꤨ꤭ꤢ꤬ꤙꤤꤛꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤎꤢ꤬, 8ꤋꤢꤨ꤭ꤢ꤬ꤎꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤛꤢ꤬ꤟꤢꤪꤏꤛꤣ꤬ꤖꤢ, ꤋꤢꤨ꤭ꤛꤢ꤬ꤟꤢꤪꤏꤛꤣ꤬ꤖꤢ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤡꤛꤢꤪ꤬ꤚꤢ꤬, ꤋꤢꤨ꤭ꤡꤛꤢꤪ꤬ꤚꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤨ꤬ꤞꤤꤛꤢ꤬, 9ꤋꤢꤨ꤭ꤢꤨ꤬ꤞꤤꤛꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤡꤛꤥ꤭ꤞꤢ꤬, ꤋꤢꤨ꤭ꤡꤛꤥ꤭ꤞꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤋꤢ꤬, ꤋꤢꤨ꤭ꤢ꤬ꤋꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤟꤢꤩ꤬ꤞꤢ꤬ꤊꤤꤛꤢ꤬, 10ꤋꤢꤨ꤭ꤟꤢꤩ꤬ꤞꤢ꤬ꤊꤤꤛꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤗꤢ꤬ꤔꤢꤏꤛꤢꤩ꤬, ꤋꤢꤨ꤭ꤗꤢ꤬ꤔꤢꤏꤛꤢꤩ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤗꤥ꤬ꤔꤢ꤬, ꤋꤢꤨ꤭ꤢ꤬ꤗꤥ꤬ꤔꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤡꤛꤥ꤬ꤏꤛꤤꤛꤢ꤬, 11ꤋꤢꤨ꤭ꤡꤛꤥ꤬ꤏꤛꤤꤛꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤛꤢꤩ꤬ꤋꤢꤪꤔꤤ꤬ꤛꤢ꤬ ꤔꤢꤧ ꤢ꤬ꤕ꤫ꤥ꤬ꤗ꤫ꤢꤧ꤬ ꤒꤣ꤬ꤗꤢꤨ꤬꤯ ꤏꤣꤧꤋꤢꤩ꤭ ꤣꤧ꤭ꤔꤣꤧ꤬ ꤢ꤬ꤒꤥ꤭ ꤙꤣꤧ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤡꤝꤢꤓꤝꤢ꤭ ꤒꤢꤧ꤬ꤜꤢ꤭ꤟꤤ ꤡ꤫ꤢꤦ꤬ ꤘꤣ ꤙꤢ꤬ꤙꤢꤨ꤬ꤜꤥ꤬ꤊ꤫ꤢꤩ꤬ ꤒꤥ꤬ ꤢ꤬ꤙꤢꤩꤑꤢꤩ꤭ ꤒꤣꤧ꤬ꤊꤤ꤬ꤟꤢꤨ ꤢ꤬ꤋꤢꤩ꤭ꤔꤣꤧ꤬꤯
12ꤙꤣꤧ ꤢ꤬ ꤡꤝꤢ ꤥ꤬ꤟꤣꤧ ꤘꤣ ꤙꤢ꤬ꤙꤢꤨ꤬ꤜꤥ꤬ꤊ꤫ꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤋꤢꤨ꤭ꤛꤢꤩ꤬ꤋꤢꤪꤔꤤ꤬ꤛꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤏꤛꤢꤩ꤬ꤜꤢ꤬ꤒꤤ꤬ꤜꤢ, ꤋꤢꤨ꤭ꤏꤛꤢꤩ꤬ꤜꤢ꤬ꤒꤤ꤬ꤜꤢ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤞꤢꤩ꤬ꤚꤢꤨꤙꤢ꤬ꤙꤢꤩ꤬ꤜꤢ꤬꤯ 13ꤋꤢꤨ꤭ꤞꤢꤩ꤬ꤚꤢꤨꤙꤢ꤬ꤙꤢꤩ꤬ꤜꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤙꤤꤟꤢꤨ, ꤋꤢꤨ꤭ꤢ꤬ꤙꤤꤟꤢꤨ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤩꤜꤢ꤬ꤛꤢ꤬ꤊꤤ꤬, ꤋꤢꤨ꤭ꤢꤩꤜꤢ꤬ꤛꤢ꤬ꤊꤤ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤞꤢꤪ꤬, 14ꤋꤢꤨ꤭ꤢ꤬ꤞꤢꤪ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤞꤢ꤬ꤘꤥ, ꤋꤢꤨ꤭ꤞꤢ꤬ꤘꤥ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢ꤬ꤋꤤ꤬, ꤋꤢꤨ꤭ꤢ꤬ꤋꤤ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤩꤜꤤꤟꤢꤨ, 15ꤋꤢꤨ꤭ꤢꤩꤜꤤꤟꤢꤨ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤢꤩꤜꤤ꤬ꤛꤢ꤬ꤞꤢ꤬, ꤋꤢꤨ꤭ꤢꤩꤜꤤ꤬ꤛꤢ꤬ꤞꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤗꤢ꤬ꤞꤢ꤬ꤔꤢ꤬, ꤋꤢꤨ꤭ꤗꤢ꤬ꤞꤢ꤬ꤔꤢ꤬ ꤢ꤬ꤖꤢꤨꤒꤢ꤭ ꤘꤤ꤭ꤒ꤫ꤢꤦ꤬ ꤋꤢꤨ꤭ꤛꤢ꤬ꤊꤥ꤬, 16ꤋꤢꤨ꤭ꤛꤢ꤬ꤊꤥ꤬ ꤢ꤬ꤖꤢꤨꤥ꤬ ꤒꤢ꤭ꤘꤤ꤭ꤒ꤫ꤢꤦ꤬ ꤋꤢꤨ꤭ꤡꤛꤥꤎꤢꤧ ꤘꤣ ꤢ꤬ ꤗ꤫ꤢ꤬ ꤗ꤫ꤥ꤬ꤗꤢ꤬ꤚꤤ ꤢ꤬ꤠꤢꤩ꤬ ꤔꤣꤧ꤬ꤟꤣꤧ꤯ ꤗ꤫ꤥ꤬ꤗꤢ꤬ꤚꤤ ꤖꤢꤨꤥ꤬ꤚꤣꤧ ꤟꤣꤧ ꤛꤢꤩ꤬ꤏꤛꤢꤨ ꤘꤣ ꤢꤨ꤭ ꤢꤩ ꤢ꤬ ꤔꤢꤧ ꤋꤚꤤ ꤣꤧ꤭ꤔꤣꤧ꤬ꤟꤣꤧ꤯
17ꤗꤢꤩ꤬ꤟꤢꤨꤔꤣꤧ꤬ꤚꤣꤧ꤬ ꤡꤢꤓꤢꤧ꤬ ꤙꤣꤧ ꤖꤢꤩ꤭ꤢ꤬ꤙꤚꤢ꤬ꤟꤢ꤬ ꤢ꤬ꤓꤢꤦ꤭ꤋꤢꤩ꤭ ꤒ꤫ꤥ꤬ꤟꤢꤧ꤭ ꤘꤣ ꤋꤢꤨ꤭ꤘꤢ꤬ꤠꤤ꤬ ꤢ꤬ꤓꤢꤦ꤭ꤋꤢꤩ꤭ ꤔꤣꤧ꤬ꤗꤢ꤬ ꤢ꤬ ꤥ꤬ ꤏꤣꤧꤜꤝꤤ꤭ꤓꤢꤦ꤭꤯ ꤡꤢꤓꤢꤧ꤬ ꤙꤣꤧ ꤋꤢꤨ꤭ꤘꤢ꤬ꤠꤤ꤬ ꤢ꤬ꤓꤢꤦ꤭ꤋꤢꤩ꤭ ꤒ꤫ꤥ꤬ꤟꤢꤧ꤭ ꤘꤣ ꤢꤨ꤭ ꤕ꤫ꤢꤦ꤬ꤡꤝꤢꤊꤢꤧ꤭ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤘꤣ ꤙꤢ꤬ꤙꤢꤨ꤬ꤜꤥ꤬ꤊ꤫ꤢꤩ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤏꤣꤧꤜꤝꤤ꤭ꤓꤢꤦ꤭꤯ ꤡꤢꤓꤢꤧ꤬ ꤙꤣꤧ ꤢꤨ꤭ ꤕ꤫ꤢꤦ꤬ꤡꤝꤢꤊꤢꤧ꤭ ꤤ꤬ꤎꤢ꤬ꤚꤢꤩꤜꤢ꤬ꤖꤢꤨ ꤘꤣ ꤙꤢ꤬ꤙꤢꤨ꤬ꤜꤥ꤬ꤊ꤫ꤢꤩ꤬ ꤒ꤫ꤥ꤬ꤟꤢꤧ꤭ ꤘꤣ ꤋꤚꤤ ꤢ꤬ꤓꤢꤦ꤭ꤋꤢꤩ꤭ ꤔꤣꤧ꤬ꤗꤢ꤬ ꤢ꤬ ꤥ꤬ ꤏꤣꤧꤜꤝꤤ꤭ꤓꤢꤦ꤭꤯
ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤥ꤬ꤖꤢꤨꤡ꤫ꤢꤩ꤬ꤜꤢꤧ꤬ ꤢ꤬ꤚꤤ꤬ꤢ꤬ꤊꤢꤧ꤭
(ꤜꤢꤨꤊꤢ꤬ ꤂:꤁-꤇)
18ꤛꤢꤩ꤬ꤏꤛꤢꤨꤋꤚꤤ ꤔꤣꤧ꤬ ꤢ꤬ ꤟꤢꤧ꤭ꤜꤢꤧ꤬ ꤥ꤬ꤖꤢꤨꤡ꤫ꤢꤩ꤬ ꤟꤢꤨꤒꤢꤩ꤭ ꤟꤢꤩꤔꤣꤧ꤬ꤗꤢ꤬, ꤋꤢꤨ꤭ꤡꤛꤥꤎꤢꤧ ꤔꤣꤧ꤬ ꤢ꤬ ꤟꤢꤧ꤭ ꤘꤣꤧꤟꤣꤧ꤭ ꤘꤣꤧꤗꤢ ꤓꤥ꤭ꤟꤣꤧ ꤛꤢꤩ꤬ꤏꤛꤢꤨꤋꤚꤤ ꤢ꤬ꤗ꤫ꤥ꤬ ꤗꤢꤪ꤬ꤗꤢ꤬ꤚꤤ ꤘꤣ ꤢ꤬ ꤊ꤫ꤢꤦ꤬ ꤖꤛꤢ ꤜꤢꤨ꤭꤯ ꤗꤢ꤬ꤔꤢꤧꤚꤣꤧ꤬ ꤙꤣꤧ ꤢ꤬ ꤖꤛꤢ ꤒꤢꤧ꤬ꤜꤢ꤭ꤟꤤ ꤜꤢꤨ꤭ ꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤗ꤫ꤥ꤬ꤘꤢꤪ꤭ꤓꤢꤧ꤬ ꤜꤢꤨ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬꤯#ꤜꤢꤨꤊꤢ꤬ ꤁:꤂꤇ 19ꤋꤢꤨ꤭ꤡꤛꤥꤎꤢꤧ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ꤡꤢꤪꤢ꤬ꤒꤢꤩ꤬ ꤒꤣ꤬ꤖꤚꤢꤩ꤬ ꤓꤥ꤭ꤒꤥ꤬ ꤕꤢ꤭ꤗꤢ꤬ ꤢꤨ꤭ ꤞꤤꤑꤢꤩ꤭ ꤚꤣꤧ꤬ ꤗꤢꤪ꤬ꤗꤢ꤬ꤚꤤ ꤞꤤꤒꤣꤧ꤬ꤚꤢꤩ꤭ꤟꤢꤩ꤬ ꤢ꤬ ꤒꤣꤧ꤬ꤔꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤢ꤬ ꤊ꤫ꤢꤦ꤬ ꤘꤢꤧ꤬ꤊꤢꤧ꤭ꤟꤥ꤬ ꤘꤢꤧ꤬ꤊꤢꤧ꤭ꤞꤝꤢꤩ ꤜꤢꤨ꤭꤯
20ꤢ꤬ ꤒꤣꤧ꤬ꤔꤢꤩ꤬ ꤟꤢꤨꤔꤣꤧ꤬ ꤒꤣꤧ꤬ꤘꤢꤦꤚꤣꤧ꤬, ꤙꤣꤧ ꤢ꤬ ꤥ꤬ꤗꤣꤧ꤭ ꤢ꤬ꤋꤢꤩ꤭, ꤢ꤬ ꤥ꤬ꤗꤣꤧ꤭ꤗ꤫ꤢꤧ꤬ ꤗꤢꤧꤓ꤫ꤣꤧ꤬ ꤙꤢꤧ꤬ꤡꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤒꤣ꤬ꤖꤚꤢꤩ꤬ ꤟꤢꤧ꤭ꤥ꤬ꤜꤥ꤭ꤓꤢꤧ꤬ ꤕ꤫ꤢꤩ꤬ ꤜꤢꤨ꤭ ꤚꤣꤧ꤬ ꤢ꤬ ꤟꤢꤩ ꤜꤢꤨ꤭ ꤔꤢꤧ, “ꤖꤢꤩ꤭ꤘꤢ꤬ꤠꤤ꤬ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤋꤢꤨ꤭ꤡꤛꤥꤎꤢꤧ, ꤙꤢꤩ꤬ꤛꤢꤪ꤬ꤙꤢꤩ꤬ꤞꤤ꤬ ꤒ꤫ꤢꤧ꤬ ꤘꤣ ꤔꤢꤧ꤬ ꤊ꤫ꤢꤦ꤬ ꤖꤛꤢ ꤗꤢꤪ꤬ꤗꤢ꤬ꤚꤤ ꤣꤧ꤭ꤔꤣꤧ꤬ ꤒ꤫ꤢꤧ꤬ꤗꤢꤩ꤬, ꤗꤢ꤬ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬, ꤢ꤬ ꤗ꤫ꤥ꤬ꤘꤢꤪ꤭ ꤔꤣꤧ꤬ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤘꤣꤧꤗ꤫ꤥ꤬ꤘꤢꤪ꤭ꤓꤢꤧ꤬ ꤜꤢꤨ꤭ ꤖꤢꤧ꤯ 21ꤢ꤬ ꤊ꤫ꤢꤦ꤬ ꤖꤢꤨꤖꤚꤢꤩ꤬ꤋꤢꤨ꤭ ꤕꤢ꤭ ꤚꤣꤧ꤬ ꤔꤢꤧ꤬ ꤙꤢꤩ꤬ ꤢꤩ ꤢ꤬ꤗꤝꤤ꤭ ꤔꤢꤧ ꤛꤢꤩ꤬ꤏꤛꤢꤨ#1:21 ꤛꤢꤩ꤬ꤏꤛꤢꤨ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬ “ꤙꤢꤧ꤬ꤡꤢꤩ꤬ ꤘꤣ ꤢ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢꤨ꤭꤯” ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ ꤊ꤫ꤢꤦ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤢ꤬ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤘꤣ ꤢ꤬ ꤒꤢꤩ꤬ꤞꤢꤦꤒꤢꤩ꤬ꤥ꤬ꤚꤢ꤬ ꤢ꤬ꤊꤢꤨ꤭ ꤕꤢ꤭꤯”#ꤜꤢꤨꤊꤢ꤬ ꤁:꤃꤁
22ꤜꤢꤪ꤭ ꤒꤢꤩ꤬ꤣꤧ꤭ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤗꤢꤩ꤬ꤜꤣꤗꤢꤩ꤬ꤙꤢ꤭ꤓꤢꤧ꤬ ꤡꤢꤪꤗꤣꤧ꤬ꤚꤢꤧ꤬ ꤟꤢꤩꤥ꤬ꤔꤢꤩ꤬ ꤖꤚꤢꤩ꤬ꤖꤚꤥ꤬ ꤒꤣ꤬ꤖꤚꤢꤩ꤬ ꤟꤢꤩ ꤔꤢꤧ, 23“ꤖꤚꤢꤩ꤬ꤗꤢꤪ꤬ꤖꤢꤨꤞꤢꤩ꤬ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤗ꤫ꤥ꤬ꤘꤢꤪ꤭ꤓꤢꤧ꤬ ꤚꤣꤧ꤬ ꤢ꤬ ꤊ꤫ꤢꤦ꤬ ꤖꤢꤨꤥ꤬ꤚꤣꤧ ꤢ꤬ ꤖꤢꤨꤖꤚꤢꤩ꤬ꤋꤢꤨ꤭ ꤕꤢ꤭, ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤢꤩ ꤢ꤬ꤗꤝꤤ꤭ ꤔꤢꤧ ꤢꤩ꤬ꤗꤢꤧꤔꤢꤨ꤬ꤛꤣ꤬ ꤕꤢ꤭,”#ꤛꤢ꤬ꤏꤛꤢꤛꤢ꤬ ꤇:꤁꤄ ꤢꤩ꤬ꤗꤢꤧꤔꤢꤨ꤬ꤛꤣ꤬ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬, “ꤡꤢꤪꤗꤣꤧ꤬ꤚꤢꤧ꤬ ꤥ꤬ꤊꤣꤧ꤭ ꤔꤢꤧ ꤕꤢꤩ꤬꤯”
24ꤙꤣꤧ ꤖꤢꤩ꤭ꤡꤛꤥꤎꤢꤧ ꤞꤤꤔ꤫ꤢꤩ꤬ꤓꤢꤧ꤬ ꤢ꤬ꤋꤢꤩ꤭, ꤢ꤬ ꤗꤢꤩ꤬ꤟꤢꤨ ꤙꤢꤧ꤬ꤡꤢꤩ꤬ ꤢ꤬ ꤗꤢꤪꤋꤢꤨ꤬ꤒꤣꤧ꤬ꤔꤢꤩꤖꤢꤨ ꤗ꤫ꤢ꤬ꤊꤢꤧ꤭ ꤜꤢꤨ꤭ ꤔꤣꤧ꤬꤯ ꤢ꤬ ꤊꤢ꤬ꤏꤥ꤭ꤘꤢꤧ꤬ ꤔꤢꤧ ꤗ꤫ꤥ꤬ꤗꤢ꤬ꤚꤤ ꤚꤣꤧ꤬ ꤢ꤬ ꤢꤩꤊꤢ꤬ ꤜꤢꤨ꤭ ꤘꤣ ꤢ꤬ꤟꤤ꤬꤯ 25ꤗꤢ꤬ꤔꤢꤧꤚꤣꤧ꤬ ꤙꤣꤧ ꤗ꤫ꤥ꤬ꤗꤢ꤬ꤚꤤ ꤖꤢꤨꤥ꤬ꤚꤣꤧ ꤒꤢꤧ꤬ꤜꤢ꤭ꤟꤤ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤣꤧ꤭ꤒꤣ꤬ꤖꤚꤢꤩ꤬ ꤜꤢ꤭ꤟꤤ ꤒꤥ꤬ꤔꤣꤧ꤬, ꤢ꤬ ꤥ꤬ꤗꤣꤧ꤭ ꤒ꤫ꤣ꤬ꤜꤢ꤭ꤟꤤ ꤜꤢꤨ꤭ ꤒꤥ꤬꤯ ꤖꤢꤩ꤭ꤡꤛꤥꤎꤢꤧ ꤢꤩ ꤜꤢꤨ꤭ꤗꤝꤤ꤭ ꤔꤢꤧ ꤛꤢꤩ꤬ꤏꤛꤢꤨ꤯#ꤜꤢꤨꤊꤢ꤬ ꤂:꤂꤁
Kasalukuyang Napili:
ꤗꤢꤞꤢꤧ 1: eky-Kali-MM
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
