لوکا 1
1
ای چھاگڈیس ڈیچیسّی سکور۔
1چیسپے تھیُفِلُس، گومے لوبٹوگسگونّی لدُونلا حضرت عیسیٰ مسیح میتشیے نانّگا جُونگکھانگون می مانگپوے دومستے تشیر نانگجین ڈیچیسّی سونڈوس چوستے اینوگ۔ 2گومے لوبٹوگس گونّی میگ نے تھونگتے نگاجا شادکھانگون کھونگونی ڈِیستے اینوگ۔ 3گوزوگنے پارلا چی تشانگما گیالّا چوستے سارچود تانگستے نگیانگ جُونگکھانگون تشیر نانگجین، ما سیواچان تھیُفِلُس نیرانگی پھیا ڈِیچیس تھاگچادپین۔ 4نیرانّگا حضرت عیسیٰ سی سکورلا لابجا تھوبکھانگون ٹانگپو اینکھانبو تانتان چوچیسّی پھیا نگے ڈِیاد۔
حضرت یُوؔحنّا ٰ غوتا سالکھان سکیچیسّی لونگستان۔
5ہیرودِیس، یہُودیہ یولجونگسّی گیالپو اینتوس، حضرت زکریا اِمام گُونی سدے ابیاہ زیرکھانبوے تھوسمی اِمام جیگ اینپین۔ ابیاہ، اِمام چھینمو حضرت ہارُونؔ نی اولاد اینپین، یانگ حضرت زکریے ناما حضرت الیشبع حضرت ہارُونؔ نی گیودنے اینپین۔ 6حضرت زکریا تانگ حضرت الیشبع نیسکو خُدے سکوندونلا ٹانگپو میریگ اینپین چیازیرنا، کھونگونی مسیح خُدے حُکم تانگ شریعت تشانگما ثونگچیسلا سنانّگا گیالّا تانّگادپین۔ 7اِین نانگ کھونگونلا ٹھوگو میدپین چیازیرنا حضرت الیشبع ٹھوگو ماجور، یانگ کھونگون گاستے یودپین۔
8حضرت زکریا یودکھانّی اِمام گُونی کھاگپے بیت المقدِس سی نانّگا جابستوگ چوچیسّی ریس (باری) این زانے حضرت زکریے بیت المقدِس سی نانّگا خُدے سکوندونلا جابستوگ جُوادپین۔ 9اِمام گُونی لوگثول نانگجین گیان گیابستے خُدے بیت المقدِس سی نانّگا سپوس دوگچیسلا حضرت زکریے مینگ پو بینگ۔ 10کھوے سپوس تُوگین یود زانے میتشوگسپو پھیلوگا دُوگستے دُعا چوادپین۔
11تینے حضرت زکریے مسیح فرشتاجیگ سپوس دوگکھانّی قُربان تانگسای یاسپا چھوگسلا جانگستے جال۔ 12حضرت زکریے فرشتابو جالّاچیگ کھو ڈوگستے ثانٹے جیگس۔ 13اِین نانگ فرشتے کھوا مولس، ”حضرت زکریا، جیگس ماجیگس۔ خُدے کھیرانگی دُعا سانّا زادس۔ کھیرانگی ناما حضرت الیشبع بُوژا جیگ جورین یانگ کھیرانگی کھوے مینّگا حضرت یُوؔحنّا ٰ توگ۔ 14کھوے کھیورانّگا گامو تانگ سکیدپو کھیونگین یانگ کھو سکییچیسپوے می مانگپوے گامو چوین، 15چیازیرنا مسیح خُدے سکوندونلا کھو ما کھاگچان گیورین۔ کھوے چھانگ یا جان راروشیسگون تھونگ ماگوس۔ سکییس سانگ سنگونلا کھو امے چانگکھوگّا یود زان یانگ ہلژخمہ رُوح بوے گانگین۔ 16کھوے بنی اِسرائیل پا مانگپو مسیح کھونگونی خُدایکا لوگستے کھیونگین۔ 17پیغمبر حضرت اِلیاس تسوگسّی سیمسنید تانگ وانگ نیامپو کھو مسیح سنگونلا سونگتے، ابا تانگ ٹھوگو گُونی نانّگا تھونڈیل یونگچوگاین، یانگ کھا مینیانکھانگون خُدے سچودلامّی نانّگا ڈولکھانگونّی شیسرابسگونلا نیانچوگستے مسیح سکیودچیسّی توسّی پھیا میگون ڈالڈیگ چوین۔“
18تینے حضرت زکریے فرشتا زیرس، ”نیرانگی مولکھانگون تانتان چونگچیسپو نگے کازوگی ایمان ؟ چیازیرنا نگا گاس یانگ نگے نامے لوانگ چھینمو اینوگ۔“
19فرشتے مولس، ”نگا جبرائیل، خُدے سکوندونلا لانگستے دُوگکھان یانگ کھیورانّگا ای گاموےناتسُول زانگپوبو شادّالا کالا زادتے این۔ 20اِین نانگ کھیرانگی نگے زیرکھانگون اید ماشیسپا، کھیرانگی بُوژا سکییسکیے تشوگپا کھیرانگ ہانڈانگ گیورتے سپیرا تانگ مینیان، چیازیرنا نگے زیرکھانگون لدامّا زادکھانّی توسّیکا ڈانڈا ڈوبین۔“
21تینّا زانے پھیلوگا ثونگستے یودکھانگونّی حضرت زکریا بیت المقدِس سی نانّگا چیپھیا مانگپو گورّانوگ سام۔ 22حضرت زکریا پھیلوگا بینّگاچیگ سپیرا تانگ مانیان۔ کھوا بیت المقدِس سی نانّگا ژالزیگس تھونگکھانبو کھونگونلا ہاگو، چیازیرنا سپیرا تانگ مانیانپا کھوے لاگپا نیامپو ستاگس چوس۔
23اِمام گُونی جابستوگ جُوچیسّی توس تشارّاچیگ، کھو کھانگپا لوگستے سونگ۔ 24توسبانشیگی ستینگنے کھوے ناما حضرت الیشبع پھانچیسما گیور، یانگ کھو لزاوا ثنا تشوگپا سوانگ ماتھوگّا کھانگپا دُوگس۔ 25حضرت الیشبع سی زیرس، ”نگے کانے ٹھوگو میجورچیسّی ٹھیلبابو میگونّی لدُونلا میدکھان زادتے مسیح خُدے نگیکا تسامشیگی شزدے زادتے اینوگ۔“
حضرت عیسیٰ مسیح لتامشیسّی لونگستان۔
26حضرت الیشبع سکییچیس ماگیورتے لزاوا ٹُوگپے نانّگا خُدے فرشتا جبرائیل، گلِیلی یولجونگسّی ڈونگکھیر ناصرة لا، 27حضرت مریم زیرکھانّی ژانگما ناچھونگجیگ یودسا کالا زادس۔ کھو گیالپو حضرت داؤد ّی اولاد حضرت یُوسفؔ زیرکھانبوا ناما ٹیستے اینپین۔ 28فرشتا حضرت مریم یودسا سکیودتے مولس، ”جولے، برکت چانّی بومو، مسیح خُدے کھیرانگ نیامپو یود۔“
29حضرت مریم می فرشتے مولکھانگون تشورّاچیگ، کھوے سیمس تھیژومس سونگتے ای مولکھانگونّی تون چی این ہے سام۔ 30اِین نانگ فرشتے مولس، ”حضرت مریم، جیگس ماجیگس، خُدے کھیورانّگا شزدے زادتے اینوگ۔ 31پھانچیسما گیورتے کھیورانّگا بوژیک لتامسین یانگ کھیرانگی کھونگی ژانلا حضرت عیسیٰ سی توگ۔ 32کھونگ نیما ٹاگپو جُوگستے کھونّگا کھیود چان خُدےبوژا جوین۔ مسیح خُدے کھونّگا، کھونگرانگی اتا اپو گیالپو حضرت داؤد ّی ژوگسٹھیس سالین۔ 33کھونگی حضرت یعقُوبؔ ی میرگیودّیکا توسگیون وانگثولّا زادِین۔ کھونگی گیالثیدّی تھاما مانے مییونگ۔“
34حضرت مریم می فرشتا زیرس، ”نگا بُوژا نیامپو ڈیل ماچھاکھانّی ناچھونگجیگ اینپا تیبو کازوگی ڈوب تھوبین؟“ 35فرشتے لانسالس، ”ہلژخمہ رُوح کھیرانگی کا بابستے کھیود چان خُدے کھیود ّی ٹیبکیاگ تسوگسلا کھیرانگ کابّا زادِین۔ تینّابویپھیا کھیورانّگا لتامسکھانّی ہلژخمہ ٹھوگوبوا خُدےبوژا جوین۔ 36گاستے یودکھان کھیرانگی نین حضرت الیشبع ٹھوگو جورچیس یود۔ کھوا ٹھوگو جورمانیانکھان زیرنانگ کھو پھانچیسما گیورتے لزاوا ڈوگپوے نانّگا این۔ 37چیازیرنا خُدا زاد مینیانچیس چانگ میدکیاگ۔“
38تینے حضرت مریم می زیرس، ”نگا مسیح خُدے جابستوگما این۔ نیرانگی مولکھان نانگجین ڈوبشیگ۔“ تینے کھو بورتے تیکانے فرشتا سکیودس۔
حضرت مریم تانگ حضرت الیشبع تھوگس۔
39تینّا ستینگنے حضرت مریم می ڈالڈیگ چوستے، یہُودیہ ری یولّی نانّگا ڈونگکھیرجیگّا گیوگسپا سونگ، 40تیرو حضرت زکریا تانگ حضرت الیشبع سی کھانگپا لیبتے کھوے حضرت الیشبع ”سلام“ زیرس۔ 41حضرت الیشبع حضرت مریم می سلام زیرّا تشورّاچیگ، کھوے چانگکھوگّا یودکھانّی ٹھوگوبو چھومس یانگ حضرت الیشبع ہلژخمہ رُوح بوے گانگ۔
42حضرت الیشبع سی حضرت مریم شیدنانگ زیرس، ”بوموگونّی نانگنے خُدے نیرانّگا برکت سالّا زادس۔ نیرانّگا جورچیسچانّی ثاسپوانگ برکت چان این۔ 43نگا یودسا نگے مسیح اما سکیودتے نگا تسامشیگی سیوا سالّا زادتے اینوگ۔ 44نیرانگی سلام مولّا تشورّاچیگ نگے چانگکھوگّا یودکھانّی ٹھوگوبو تھادتے چھومس۔ 45نیرانگ برکت چان اینوگ چیازیرنا مسیح مولکھانبو ڈانڈا ڈوبچوگّا زادچیسپوا نیرانگی ایمان چوس۔“
حضرت مریم می ستودلو۔
46یانگ حضرت مریم می زیرس،
”نگے سیمسّی تھیلنے مسیح خُدا ستودپا پھولّاد،
47یانگ کھوم چُوک کھن خُدائی کا نگا تھدے یود پین۔
48کھونگی کھونگرانگی نیامشونگ جابستوگپا شزدے ستانتے سنانّگا زادس۔
تانیپھارلا میرابس تشانگمے نگا برکت چان زیرین۔
49چیازیرنا نگے پھیا کھیود چان خُدے چھاگلاس گانگسچان زادس۔
کھونگی تشان ہلژخمہ این۔
50کھونّگا سیوا تانگ جیگسّی نانّگا ڈولکھانگون نیامپو،
کھونگی سنینگرجے میرابسنے میرابس لوسین۔
51کھونگی کھونگرانگی ستوبسچانّی چھاگ کیانّگا زادتے
پھوسوچانگون نیان چوگّا زادس۔
52کھونگی وانگثولپاگون ٹھیسّی کانے پھابّا زادس،
اِین نانگ نیامسچھونگّون ستاگّا زادس۔
53کھونگی ستوگسکھانگون تشیم چوگّا زادس،
اِین نانگ چھوگپوگون ستونگپا لوگستے سالس۔
54کھونگی سنینگرجے زادچیسپو رجیدّا مازادّا
کھونگرانگی یوگپو بنی اِسرائیل پاگونلا روگس زادس۔
55چیازیرنا کھونگی حضرت اِبراہیم تانگ کھوے اولاد،
نگاتانگی اتا اپو گونلا تے تھامیدپے وعدہ بو زادس۔“
56حضرت مریم حضرت الیشبع نیامپو لزاوا سوم زامشیگ دُوگستے ستینگنے کھورانگی کھانگپا ناصرة لا لوگستے سونگ۔
حضرت یُوؔحنّا ٰ غوتا سالکھان لتامس۔
57حضرت الیشبع ٹھوگو جورچیسّی توس لیبّاچیگ کھوا بُوژا جیگ جور۔ 58نینڈونگ تانگ کھییمتشیسپا گُونی حضرت الیشبع مسیح سنینگرجے چھینمو زادکھانبو تشورتے، کھونگونی کھو نیامپو گامو چوس۔
59جاگ گیادپے جاگّا کھونگون ٹھوگوبوا لقپہ ہلژخمہ چوچیسلا دزومتے، ابے مینگ تسوگسلا ٹھوگوانگ حضرت زکریا مینگ تاگچیس چوس۔ 60اِین نانگ کھوے امے زیرس، ”مان کھوے مینّگا حضرت یُوؔحنّا ٰ تقگّوس۔“
61کھونگونی کھوا زیرس، ”کھیوجے گیودّی نانگنے ای مینگبو سوانگ مید۔“ 62تینے کھوے ابا لاگپا نیامپو ستاگس چوین کھوے مینگ چی تاگنین راگ زیرتے کھوا ٹیس۔ 63حضرت زکریے ستاگس چوین لاگشینگجیگ تونگ زیرس یانگ کھوے تیکا، ”کھوے مینّگا حضرت یُوؔحنّا ٰ توگ“ ڈیسپا کھونگ تشانگما ہالاس۔ 64تینے کھوے کھا تانگ لچے تینّامالّا بیستے کھوا یانگسکیار سپیرا تانگنانگ یانگ کھوے خُدا ستودپا پھولس۔
65تیگون تشورتے کھییمتشیسپاگون خُدے جیگسّی گانگ، یانگ یہُودیہ ری یول گانگپوے نانّگا تے جُونگکھانگون ّی ناتشولبو پھیل۔ 66تے ناتشول تشورکھان تشانگمے مسیح کھویکا چھاگ بورتے برکت سالکھانبو ہاگوتے کھورانگ چیگ تانگ چیگّا ٹیس، ”لدانتے ای ٹھوگوبو چیجیگ گیورین ہے؟“
حضرت زکریے لونگستان۔
67تینے ابا حضرت زکریا ہلژخمہ رُوح بوے گنگستے لونگستان شادس،
68”بنی اِسرائیلی مسیح خُدا ستودپا پھول
چیاجونا کھونگ سکیودتے کھونگرانگی میگون تھار چوگّا زادس۔
69-70سنگونمے پیغمبر ہلژخمہ گون گیُودتے
خُدے مولکھان نانگجین، نگاتانگی پھیا
کھونگی جابستوگپا گیالپو حضرت داؤد ّی اولاد نے
کھیودچان کھوم چُوک کھن جیگ کالا زادس،
71تا ڈاو تانگ ناپھراد چوکھان تشانگمانے نگاتانگون کھوم چُوگین۔
72خُدے نگاتانگی اتا اپو گونلا ہلژخمہ وعدہ زادکھانبو
ایدتو بورّا زادتے کھونگّونّیکا سنینگرجے زادس۔
73کھونگی نگاتانگی اتا اپو حضرت اِبراہیم نیامپو
نا کھورّا زادتے تے وعدہ بو زادس۔
74-75نگاتانگون نگاتانگونّی ڈاو لاگنے تھارچوگ زادس
تا نگاتانگونّی میتشے گانگپو جیگسنانگ میدپا
ہلژخمہ تانگ ٹانگپوے نانّگا خُدا جابستوگ ژو نیا نین۔
76نگے بُوژا، کھیورانّگا کھیود چان خُدے پیغمبر زیرین
کھیرانگ مسیح سانگ سنگونلا سونگتے،
کھونگ سکیودچیسلا ڈالڈیگ چوین۔
77میگونّی دِیگپاگونلا مُعافی زادچیسپو گیُودتے
کھیرانگی مسیح میگونلا تھارپا تھوبچیسّی لامبو ستانین۔
78خُدے چامسپا گانگسکھانّی سنینگرجے گیُودتے
کھونگی مسیحا نامکھا نگاموے اوت لدانگشانبو
نگاتانگونّیکا شار چوگّا زادِین۔
79رُوحانی مونڈیگ تانگ شیچیسّی جیگسنانگی
نانّگا یودکھانگونلا اوت شار چوگّا زادتے
نگاتانگی کانگپاگون جیدے لامیکا کھیونگا زادِین۔“
80تینے حضرت یُوؔحنّا ٰ لدانتے رُوح بوے نانّگا شیدچان سونگ۔ بنی اِسرائیل پاگونلا چھوسشادچیس گوزوگ چوچو تشوگپا کھونگ ریستونگی نانّگا ژوگس۔
Kasalukuyang Napili:
لوکا 1: LBJNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
