ดอ โฆว 14
14
ลอง อาบราม จอย อาโลด
1อึณ บอ มึห คูนดีคัม อารามเพน อี อึบ มืง ชีนา บอ คูนดีคัม อารีโอว อี อึบ มืง เอลาซา บอ คูนดีคัม อาคีราโลม อี อึบ มืง เอลัม บอ คูนดีคัม อาทีดา อี อึบ มืง โฆวยีม. 2เฆ คูนดีคัม พวน กาดัง ตี, เฆ วี กาโพรม ดี กาโฆห ดี คูนดีคัม ปอ พัน กาดัง. พัน กาดัง ตี มูห คูนดีคัม อาเบนลา อี อึบ มืง โซวโดม, คูนดีคัม อาบีราด อี อึบ มืง โฆวโมว, คูนดีคัม อาซีนาด อี อึบ มืง ดามา, คูนดีคัม อาเซเมบ อี อึบ มืง เฌโบวยีม บอ คูนดีคัม อี อึบ มืง เบนลา. มืง ตี บอ จืร มืง โฌวอาน 3คูนดีคัม ตี แฮะ ตัห กาฌูะ โดง จืร งอด. ดอ ตี นี โดง ตี แฮะ วี แบน อึม ดึง ซัยะ ซ็อง. 4อาดา ฆึร ดี อา ซีนัม คูนดีคัม ตี แฮะ แตห คูนดีคัม อาคีราโลม ตึอน อึบ เฆ. บอ ฌัม ซีนัม ฆึร ดี ฮาโอย, เฆ วี กาบัห ดี อัน, แกวะ แตห อัน วี อึบ เฆ.
5บอ ฌัม ซีนัม ฆึร ดี อึณพวน, คูนดีคัม อาคีราโลม ตึอน บอ เฆ คูนดีคัม อี กอย รึม โดบ อัน, เฆ วี ฮาว กาโฆห แป คูนดีคัม แบน กาดัง แบน กาดัง. บอ ดูอี อาโมยว ราพาด แคง มืง อาเทโรดกานาอีม, บอ เฆ ดูอี อาโมยว ซูซีด แคง มืง ฮาม, บอ เฆ ดูอี อาโมยว เอมีด อี กอย แคง งอด ดี มืง ซาเวดกีรียาซีม, 6บอ เฆ ดูอี โฮวรีด อี กอย แดง นอน เซอี, อี กอ ฌัม มืง เอนพาราน อี กอย แคง แปร กาฮ็อห, เฆ แฮะ แป โตต คูนดีคัม เฆ ตี. 7คูนดีคัม อี กอย รึม โดบ อาคีราโลม ตึอน, เฆ แฮะ ฮอต แป คูนดีคัม เฆ ตี, บอ อัน บอ เฆ ดูอี อี โดบ อัน, เฆ วี ฮาว ฌัม กาตัด มืง เอนมีพาด. ดอ ตี นี อึณ จืร มืง ซาเดด เฆ วี แป เฆ ดูอี อามาเลก ดอน โปละ บอ เฆ ดูอี อาโมวรีด อี กอย แคง มืง ฮาเซโซนทามา.
8ดอ อัน ตี เฆ คูนดีคัม อี อึบ มืง โซวโดม, มืง โฆวโมว, มืง ดามา, มืง เฌโบวยีม บอ มืง เบนลา, เฆ พัน กาดัง ตี วี ฮาว ฌัม แคง โดง จืร ซีดีม อี มูห อึม ดึง ซัยะ ซ็อง. 9เฆ วี กาโฆห ดี คูนดีคัม อาคีราโลม อี อึบ มืง เอลัม, บอ ดี เฆ คูนดีคัม อี โดบ อัน บอ โอย กาดัง อี มูห คูนดีคัม อาทีดา อี อึบ มืง โฆวยีม, คูนดีคัม อารามเพน อี อึบ มืง ชีนา บอ คูนดีคัม อารีโอว อี อึบ มืง เอลาซา. เฆ พัน กาดัง ตึอน, เฆ วี ลาย กาโฆห ดี พวน กาดัง ตี. 10โดง จืร ซีดีม ตึอน ยี มึห กาเดา กาณัน กาปีด. อึณ มึห กืน บอ ลึก. ดอ ลาย กาโฆห เฆ, คูนดีคัม อี อึบ มืง โซวโดม บอ มืง โฆวโมว, ฆาย โลว เตา. ดอ อัน ตี ดา ซึก มัง อี วี โจห แคง กาเดา กาณัน กาปีด ตึอน. เฆ อี เฮา วี เตา ฮาว กอ ฌัม โดง มึห นอน. 11เฆ อี แฮะ แป ตึอน ยี ดึห โตต โกรวกราม เฆ อี กอย มืง โซวโดม ฆาย มืง โฆวโมว. บอ ปี ดี โฮม เฆ, เฆ ดึห โตต, วี เวณ มืง เฆ. 12ดอ เวณ เฆ, เฆ วี เหมต อาโลด อี มูห หลาน อาบราม ตึอน. เฆ ดึห อัน บอ แคะ มึห อัน โกรวกราม โตต ดอน โมยว, ฮาว เวณ แคง มืง เฆ. โคว, อาโลด แฮะ กอย แคง มืง โซวโดม ตี.
13ปัน ตี อึณ มึห ดา อู วี, อัน แฮะ เลห เตา แคง พึง อาโลด ตึอน, เตา ฮาว โดง กอย อาบราม อี มูห อาโมยว แฮแบร. ดอ อัน ตี อาบราม ตึอน แฮะ กอย ดี เฮ เทเรบ, โดง จืร มัมเร. โดง ตี ยี มูห โดง กอย บอ ดูอี อาโมยว อาโมวรีด อี มูห อีกัด อาเอโคน ฆาย อาเนรา. เฆ ดูอี ตี แฮะ แบน ฆึก อาบราม ตึอน. 14อาบราม บอ นับ ลอง เฆ แฮะ เหมต วอแว อัน, อัน วี แดะ อีมาย แคง พึง อัน ดอน วี. แฮะ ฮอต, อัน บอ มึห ดา ซึก โอย มาย็อห ดี ฆึร ดี ดา วี. อัน วี แดะ เฆ บอกาเฆลียด, คูงครัห โดบ เฆ อี แฮะ เหมต อาโลด ตึอน, แตห เฆ กอ ฌัม โคบ มืง ดาน. 15โดง กอย เฆ ตี, อาบราม ตึอน วี กาย็อห ดา ซึก อัน, แตห เฆ กอย แบน พึง แบน พึง. แฮะ ฮอต, แคง หมึร เฆ วี กาโฆห ดี เฆ อี เหมต อาโลด ตึอน บอ แป เฆ. แฮะ ฮอต, อัน วี คูงครัห เฆ, เฆ บอ เตา ฮาว กอ ฌัม กาตัด มืง โฮวบา อี กอย นา กัว มืง ดามาคู. 16ปาย ตี อัน แฮะ วี ปึอน โตต โกรวกราม อาโลด, บอ อาโลด อี มูห วอแว อัน บอ แคะ ปี มึห อัน, บอ อีบึณ อัน บอ เฆ อี โดบ อัน, เฆ แฮะ วี ลอด ตัะ อี เฮา.
17วาย แฮะ แป อาบราม เฆ คูนดีคัม อาคีราโลม ตึอน บอ เฆ คูนดีคัม อี โดบ อัน, ดอ เวณ อัน โดง กอย อัน, คูนดีคัม แคง มืง โซวโดม วี เลห รวห อัน แคง โดง อี จืร งอด ชาเวน. อึณ บอ มูห งอด โดง กอย คูนดีคัม.
18อึณ ยี มูห คูนดีคัม แคง มืง ซาเลม, อัน จืร อาเมเคเดก. อัน บอ มูห ดา อี หลู ดี เฌาพรา อี อึบ โตต ดอน โมยว. อาเมเคเดก ตี, อัน บอ เลห ตึย คามูน บอ อึม มางูน, ดัว ดี อาบราม. 19อัน มืร ม็องการา แตห ดี อาบราม. อัน ต็อห, “เฌาพรา อี อึบ โตต ดอน โมยว, อี มูห อัน เฌา อี พาน เบลห บอ ฆางหราว บอ กาดาย, อัน ดี ม็องการา แตห ดี แม อาบราม. 20โอว บอ อืบ เฌาพรา อี อึบ โตต ดอน โมยว. อัน แฮะ แตห แม แป รันซู แม.”
แคะ ปี ปึอน อาบราม ดี รันซู อัน, อัน วี ดัว ฆึร บูน อู บูน ดี อาเมเคเดก ตึอน.
21คูนดีคัม อี อึบ มืง โซวโดม ตึอน, อัน ยี ต็อห ดี อาบราม, “หมาณ, แตห แม วี ดัว วีว มี เฆ ดูอี โอว แปะ แฮะ เหมต ฮาว รันซู. อี มูห โกรวกราม แตห แม ดึห ดี แม.”
22อาบราม วี เวียะ โฆรห คูนดีคัม อี อึบ มืง โซวโดม ตึอน ต็อห, “โอว ดัว กาดีก ซัดฌา, แตห บอ เฌาพรา โทม อี อึบ โตต ดอน โมยว. 23แคะ เซณ อู ณ็อง, โอว มืร ตู ดึห. บอ วัน คูดีณ อาดา อู ณ็อง โอว ตู ดึห. โกรว แม ปี ดึห รันซู เฆ ตึอน, โอว ตู ดึห มาเซ. แกวะ แตห แม ปึอน ดี กาลาง, แม แฮะ โบง แตห โอว ครัม. 24โอว ตู ดึห มาเซ. โอว ยี หมาณ, แตห แม ดัว แคะ แฮะ ฮอต โฮม เฆ ดา ซึก โอว. บอ แคะ กาอาบ ปึอน เฆ อี โดบ โอว, แตห แม ดัว. อาเนรา, อาเอโคน บอ อามัมเร, แตห เฆ ดึห อาดา เฆ.”
Kasalukuyang Napili:
ดอ โฆว 14: pce
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2021, Wycliffe Bible Translator, Inc. All rights reserved.