ኻወርየታኒዙ ሰቭ 3
3
ፈወነ 3
ቢጥሮስ ለውሻሽ እጅር ቓዘጘ
1ላው ግርየ ቢጥሮስስመ ይዃንስስ ፀለውት ሰቲዝ መቅደሲዝጐ ፊርጛ ዊን፤ ሰትድም ፃይጨ ሰት ኣቕ ዊኑ። 2ኣይንድ እዅርሻንድ ኪርም ለውሻሽ ኣቕ እዅርሸው ላው እጅር ዊኑ፤ ጝትም መቅደሲል ጥወቍ ፈቊስቅ ምፅዋት ጨውጠ ማጥን እቅ መውርጝ ነስጛ ግሪ ጨቨቅ፦ «ቀስረይ» የነይ መቅደሲዝ ሚረየንትል እቝርጛ ዊን። 3ጘጝም ቢጥሮስስመ ይዃንስስ መቅደሲዝጐ ጥውጥጘ ጕጛንድ ቓል ጛጊስ ምፅዋት ጨዉ። 4ቢጥሮስም ይዃንስ ጅቅ ኣቕ፣ ጝት ትክ የው ቓል በር፦ «እስቲ ይናጐ ቓላ!» ዩ። 5ጘጝም ላው ሚንትርነ ነይጥቍ የው ማርቕፅ ጛት ጛት ቓልጠ ኪርሙ። 6ቢጥሮስም፦ «ዊርቀዝመ ቍርሸዝ እጀርም፤ ይፃቀውድ ግን ነቅጭር፤ ኣደረ እየሱስ ክርስቶስት ሽዝ ጕር ክልኲዝ ዋጥርጥር» ዩ። 7ዊስም ጘጝ እጅሪዙ ለወ ናንድ ፃይ ጒሱ፤ ኣይንድም ጝልኲዝመ ጝቍርጭምጭምቲዝ ፀናቑ። 8ፍር የውም ችብሩ፤ በውዝም ተግረነው ኪርሙ፤ እድጐስመ እንጐስም በጕራ፣ እደረትም ሚዝየንዛ ጛጅቅ መቅደሲል ጥዉ። 9ኽዝቭድም እጝቅቅ ጘጝ ተግራ እደረትም ሚዝየንዛ ዋጥርጥራንድ ቓል፣ 10እንዝ ሚቅ፦ «ቀስረይ» የነይ መቅደሲዝ ሚረየንትንል ኣቕ ምፅዋት ጨዋ ዊነው እጅርድ ኣቐት ኣርቑ፤ ጝጭስ ኣቐው ዊገይዝቍዝም ጭቕጘ ጊርምሹ።
ቢጥሮስ መቅደስ ጝኒል ኣቕ ክንሰጘ
11ቓደው ጨወረ እጅርድም ቢጥሮስስመ ይዃንስስታል ልቅጥ የው ፅባ ኽዝቭድቅ ጊርምሽ ጛይ ዊንጘው «ሰለሙንት ዋጥርጥረነ» ይሽተው ስፍረይዝጐ ውጥያ ተሩ። 12ቢጥሮስም እኒንት ቓላንድ እንት የው ክንሱ፦ «እፈ እስራየልት ኽዝቭ ክታትርነ! ውር ቃጥ የጝ እንዝ ጊርምሽርነውድ? ቈሽስ ውረይ ይናቕምት ኻይልዝመ ይን ሰራሽነው ቀሰው ሰቪዝ እን እጅርድ ቓዝነጘ ፃቭርን ይናት ትክ ይርን ቓልድርነውድ? 13ይናኣቅል ኣቭርኻም፣ ይሳቅ፣ ያይቈቭታ ኣምላክ ጝዅር እየሱስት ኪብርዙ፤ ክትን ግን ክርጠ ማጥን ክርጘል ዲቍስርን ይውርኑ፤ ቢላጠውስ እኳን እክስጠ በናን ክትን፦ ‹በናይነቅም› ይርኑ።#ዘፀ. 3፡15። 14ቅዱሲዝመ ፃድቂዝ ኻድይርን ኒቭስ ቍወተድየንት እክስጠ ማጥን ጨውርኑ።#ማቲ. 27፡15-23፤ ማር. 15፡6-14፤ ሉቃ. 23፡13-23፤ ይዃ. 19፡12-15። 15ርዅየ ችጝሸነድየንት ቍውርኑ፤ እደረ ግን ጝት ክርጘይስ ጕሱ፤ ይንም እን ዊገይዝ ሚዝረጫን የጝ። 16እኒን ክትን ቓልድርነው ኣርቕርነው እጅርድም ቓደውድ እየሱስት ሽዝ ችጝሸው እምንትዝ የጝ፤ እየሱስት ሽዝ ኣምናንስቅም ክትን እጝቅቅ ቓልድርናንትጘ ምሉ ትኽነ ችጝኩ።
17«ነንም ይፅን ክታችወ! ክትን እየሱስትል ችጝዝርነውድቅ ክታኻልቅጢዝጘ ኣርቒጝቀ ፀቭርነጘ ኣርቐኵን። 18እደረ ግን እንዝ ሚቅ፦ ‹ክርስቶስ ሚከረ ለምርጡ› የው ነቭያታኒዙ ምቸይዝ ዊግተጘ ፋፅሙ። 19ነስየ ክታኽጥያትድ ዲምስስሽጠ ማጥን ንስኻ ጥውርን እደረ ትጐ ዋጥርጥን። 20ቈሽም እደረቲስ ዲብሽተነው ግርየ ክታጐ ተርጡ፤ እደረም በውርስ ክታጭስ ማርፀው መሲኽድየንት፣ የነትም እየሱስት ክታጐ እፃጡ። 21ጘጝም ሲመይ ዊነውድ እደረ በውርስ ቅዱሳን ነቭያታኒዙ ምቸይዝ ዊግተጘ እጝቅትቅ ኣይር ፃቭጢስቅ የጝ። 22ሙሴም፦ ‹እደረ ኣምላክ ይት ጕሳንትጘ ክታፅኒዝ ማኽሊስ ነቭይ ጕስጡ፤ ጘጝ ድቈውድየንትቅ ወጭጥን።#ዘዳ. 18፡15፤18። 23እድየን ነቭይድ ድቈው ዊገድ ወሻው እጅርድቅ፣ ኽዝቪስ ቲት ድዝነ› የውኩ።#ዘዳ. 18፡19። 24ሊጘትም ሳሙየልቲስ ኪርም ዊነቍ ነቭያታንድቅ እን ዚምኒዝ ማጥን ዊግትጝኵ። 25ክትን ነቭያታነ ዅል የጝ፤ እኒዝጘም እድረ ኣቭርኻምስ፦ ‹ኣልሚዝ ኽዝቭድቅ ክዚረይዝ በርክሽጡ› የው ይናኣቅሊጅቅ ጥወው ቃል ኪዳኒዝ ዅል የጝ።#ዘፍ. 22፡18። 26እንዝ ማጥንም እደረ ክታት ክታጭቕቲስቅ ዊሳ በርክጠ በን ጝዅርት ክታጭስ በርሱ።»
Kasalukuyang Napili:
ኻወርየታኒዙ ሰቭ 3: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in