ኻወርየታኒዙ ሰቭ 14
14
ፈወነ 14
ባውሎስስመ በርናቫስስ እቈኒወንስ ክንስጘጘ
1ባውሎስስመ በርናቫስስም ክንድጘጘ እቈኒወንስ ኣይዅዳኒዝ ምኵራቪል ጥውጝ ቐናዝጝ ክንስጛንስቅ፣ ንቕፀቍ ኣይዅዳንዝመ ግሪካንዝ ኣምን። 2ኣምኒየቍ ኣይዅዳንድ ግን ኣኽዛቫንድዛት ምመናኒል ቂስቅስጝ ሽክሽጥጘ ፃቭ። 3ባውሎስስመ በርናቫስስም ኣደረትቍዝ ዲፍርጝ ዊግትጛ እክሰው ግርየ ጝግል ጐይ፤ ኣደረም ጝታናንጣኒዝ ታምርዙ ምልክትዝመ ዲንቅሰው ዊገዝ ፃቫ፣ ጛይ ዊግትጘው ፃገይዙ ቃልድየንት ደደደሳ ዊኑ። 4ኻትመይዙ ኽዝቭድም ቲተቲት ግቨርድ ኣይዅዳኒጅቅ ግቨርድ ቈሽ ኻወርየታኒጅቅ ኣቑ። 5እንዝ ግረ ኣይዅዳኒዘመ ኣኽዛቫኒዝ ጝታኻልቅጢጅቅ ኣቕጝ ኻወርየታንድዛት ጋልጥምጥጘ፣ ቕርጝዝም ድድብጥጘ በን። 6ጛይ ግን እኒንት ኣርቕጘጘ፦ «ደርቭየን፣ ልስጥራን» ይሽተቍ ሊቃወንየት ኻትምጢዝመ ጝታጅልወይዝቍ ኻግራኒዝጐ ሰይ። 7ጛይ ኻግራኒልም ወንጌል ሲቭኩ።
ባውሎስስመ በርናቫስስ ልስጥራን ደርቭየንታግል ክንስጘጘ
8ልስጥራንስም ጝልኵድ ሲለው ላው እጅር ዊኑ፤ እን እጅርድ እዅርሻንድ ኪርም ለውሻሽ ኣቓንስቅ ጝልኲዝ ፃጝም ኣርቓው ዊኑ። 9ጘጝም ባውሎስ ዊግታንድ ወሻ ዊኑ፤ ባውሎስም ጝት ትክ የው ቓላንድ፣ ቓደነል ችጝዘው እምንት ፃየው ኣቐጘ ኣስክሱ። 10ኣይንድም ጝድመድ ኣጕስ ሸው፦ «ቀጥ ይር ክልኲዝ ችብጭ» ዩ፤ ጘጝም በርደግ የው ጕ ጝልኲዝ ተግራ ዋጥርጥረነው ኪርሙ።
11ኽዝቭድም ባውሎስ ፃቨውድ ቓላንድ ጝድመድ ኣጕስ ሸው ሊቃወንየት ቋቋይዝ፦ «ኣምላካንድ እቅ ተክጝ ይናጐ ጊምጝኵ» ያ ዊግቱ። 12በርናቫስት፦ «ዲየ» ባውሎስት ቈሽ ዋነ ዊግተተድ ጘጝ ዊናንስቅ፦ «ኸርምየን» ይጝ ሽ ፊስ። 13ኻትመይዝ ደዪል ፅበው ዲየት መቅደሲዙ ካኽንድም ቻቕን ቢል፣ ኣቨቨዝ ተስንቍ ኣክሊላንም ፃይ ኻትመይዝ ሚረይል ተር ኸዝቪጅቅ ኣቕ ባውሎስስመ በርናቫስስ ምስዋይት ኣልስጠ በኑ። 14ኻወርየታን በርናቫስስመ ባውሎስስ ግን እኒንት ወሽጛንድ ጝታኣልቨድ ቀድጝ ኽዝቪዝ ማኽሊዝጐ ውጢጛ ፊር፤ ጝታድመድም ኣጕስ ሽጝ እንት ይ፦ 15«እፈ እቅ ክታትርነ! ውር ማጥን የጝ እንት ሽርነውድ? እረ ይንም ክታጘ እቅ የጛ! እንል ተርነውድም ክትን እኒን ጊነቱ ዊገይስ እክልድርን ሲመይዝመ ዝቨዝ፣ ባኽርዝመ ጝዝ ኣቒል ፅበቍድቅ ፋጥረው ዘላልም ፅበው እደረ ትጐ ዋጥርትርነ ማጥን ወንጌል ሲቭክነ የጝ።#ዘፀ. 20፡11፤ መዝ. 146፡6። 16እደረ ዲቈቍ ዚምናኒዝ ጛት ሸጘ ፊርጥጘ ማጥን ኣኽዛቫንድዛት በር በሩ። 17ኣቕሽም ሲመይስ ስወ ማለነውዝ፣ ኣዝምረ ፍረነ ወቅትዝመ ዀነው ዚየነውድቅ ነየነውዝ ይናእዘንድ ዲስ ሻ ቀሰው ኣምላክ ኣቐጘ ጝቕምስ ሚዝርሰው ቀሰው ሰቭ ፃቨነውድ በሪየውም» ይ። 18ኻወርየታንድም እንቝጠ ዊገ ዊግትጝ ኽዝቭድ ጛጭስ ምስዋይት ሰዋቓይጘጘ ግድዝ ማሊስ።
19ኣይዅዳንድ ግን ኣንፀውክየስመ እቈኒወንስ ጝታጐ ተርጝ ኽዝቭድ ኻጝስ፤ ባውሎስትም ቕርጘዝ ድድብጝ በርጝ ክረው ተኩዝ ኻትመይስ ቢዘ ጒዝጝ ፊስ። 20ባውሎስ ግን ጝክንደጥድ ተርጝ ጝት ኪብጝ ፅብጛ ሊቭ ዊነው ስፍረይስ ጕ ኻትመይል ጥዉ፤ ጛምርሲዝም በርናቫስ ጅቅ ኣቕ ደርቭየን ትጐ ፊሩ።
ባውሎስስመ በርናቫስስ ኣንፀውክየ ትጐ ዋጥርጘጘ
21ባውሎስስመ በርናቫስስም ደርቭየንስ ወንጌል ሲቭክጝ ንቕፀቍ እቅ ኣምንስጝ ምመናን ፃቭጘት ግረ ልስጥራንስመ እቈኒወንታዝ ዲቍጝ ኣንፀውክየ ትጐ ፊር። 22እንዛይ ኻግራኒዝቅም ምመናንድዛት ጝታእምንቲዝ ፀናጥጘ ማጥን ማኽርጛ፦ «ኣይዝዀጥን፤ ጣጝክርጥን፤ እደረት ምጝግስቲል ጥውነ ማጥን ኽየው ሚከረ ለምርነ ጥውሸኵ» ይ። 23ጛይ ኻግራኒል ፅበቍ ምመናኒልቅ ምከን ቃወጥ ይም፤ ጛትም ፃምጝ ፃልይጝ በርጝ ጝታኣመንጘው ኣደረስ ኽድር ይው።
24እንዝ ግረ ብስድየቱ ዲቍጝ ብንፍልየ ትጐ ፊር። 25በርገይንስም ኣደረት ቃልድ ክንስጝ በርጝ ኣጣልየ ትጐ ጊም። 26ኣጣልየስም ጕጝ ሰውርየትወ ኣንፀውክየ ትጐ ሚርክቭዝ ፊር፤ ኣንፀውክየ፣ ነኳን ኣሽ ሰራሽጘው ሰቪዝ ማጥን እንዝ ሚቅ ኣደረት ፃገዝ ኽድር ይውሽትጘይ ኻትመየን ጚ። 27ጝግል ችጘት ግረም ምመናንድቅ ሊንስ ኣኽቭጝ እደረ ጛጅቅ ኣቕ ሰራሸው ሰቪዝመ ኣኽዛቫንም ጝት ኣምንጥጘ ማጥን ኣወሽ እምንትዙ ሚረድ ብዘጘ ድቍ። 28ጝግልም ምመናኒጅቅ እክሰው ግርየ ጐይ።
Kasalukuyang Napili:
ኻወርየታኒዙ ሰቭ 14: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in