मरकुस 15

राजपाल पिलातुसना मुने येसु

(मत्ति २७:१,२,११-१४; लूका २३:१-५; युह १८:२८-३८)

1पोळद पसियाना पहारात मुक्याल याजक लोकुरक अनि यहुदि अदिकारि लोकुरक अनि मूसाना नियमतुन करिहवालोरासंग यहुदि महा सभा सान्डे सल्ला किस येसुन दोहच ओसुन पिलातुसना कयदे सोपेकितुर। 2पिलातुस येसुन पुच्चेमातुर, “बाताल निमा यहुदिलोरा राजाल आन्दि?” येसु पिलातुसतुन उत्तर हितुर,

“ओद निमाय इन्दिला आतोन।”

3मुक्याल याजक लोकुरक येसुना पोरो दुसरो पकाय पोल्लोंगता दोष लावे किन्दुरक। 4पिलातुस येसुन असा पुच्चेमातुर, “बाताल निमा बाराय उत्तर हेवि? हुळा येरक निकुन बचोक पोल्लोता दोष हियाला आतोरक।” 5येसु असा वने बाराय उत्तर हेवोर इन्जोर पिलातुसतुन पकाय आश्चरय आतुर।

पिलातुस येसुन हव्काना साटि दन्ड हिन्तोर

(मत्ति २७:१५-२६; लूका २३:१३-२५; युह १८:३९—१९:१६)

6ओद हनुमता दियाते लोकुरक विनन्ति किया बोरायि वरोर कयदितुन तासियाना पिलातुसना रिवाज मता। 7बरब्बास पोरोयतोर वरोर मानेय मतोरक। ओर रोमि शासनता विरुद आता वाहचनातिगा पकाय लोकुरकुन हव्कस मतोरक, ओरक कयदि लोकुरकनिगा वरोर मतोर। 8अनि पकाय भीळ हन्ज दरवरसांग निमा हनुमता दिया वरोर कयदिन सोळे किन्तोन अदाम लेहका वरोर कयदिन सोळेकिम इन्जोर पिलातुसिन विनन्ति कियाला लागतुरक। 9मुक्याल याजक लोकुरक येसुन दोखाते पयस मतोर इन्जोर पिलातुस पुन्ज मतोर। इन्जोर पिलातुस ओरकुन उत्तर हितुर, 10“नना मिया साटि यहुदियातोर राजान सोळे कियाका इन्जोर बाताल मिया इच्चा मन्ता?” इन्जोर पुच्चेमातुर। 11मति येसुना बदला बरब्बासतुन सोळे केविर इन्जोर मुक्याल याजक लोकुरक सबोय लोकुरकुन दमके किसोर मतोरक। 12इदाम केन्जुन पिलातुस ओरकुन असा पुच्चेमातुर, “मति निमाट यहुदिलोरा राजा इन्तोरिट ओर मानेयतुन नना बाताल कियाका?” 13ओरक असा जोरदे केयतुरक, “ओन कुरुस पोरो अन्जहिच हव्किट।” 14पिलातुस ओरकुन इतुर, “येर बाताल गलति कितोर?” मति ओरक असा जोरदे केयन्दुरक, “ओन कुरुस पोरो अन्जहिच हव्किट।” 15असके पिलातुस भीळतुन गिरदा कियान साटि बरब्बासतुन तासितुर अनि येसुन सोटाते हाहस कुरुस पोरो अन्जहिच हव्किर इन्जोर ओन लोकुरकनिगा सोपेकिसितुर।

सयनिक लोकुरक येसुन अपमान किन्तोरक

(मत्ति २७:२७-३१; युह १९:२,३)

16रोमि सयनिक लोकुरक येसुन राजवाडाता डुवारतिगा ओतुरक अनि सबोय सयनिक लोकुरकुन केयतुरक। 17असके ओरक येसुन रेंगाल रंगता कुरता करिहतुरक अनि काटाता मुकुट ओना तलापोरो इरतुरक। 18“हे यहुदिलोरा राजा नमस्कार” इदाम इन्ज ओरक ओन नमस्कार कियाला लागतुरक। 19ओरक येसुना तलातुन सोटाते हिन्दुरक, ओना पोरो उक्सतुरक अनि मिन्डांग टेकेकिस नमस्कार किसोर मन्दुरक। 20ओरकुन आपुना बुतो किस तरास वात असके ओनापोरोडाल रेंगाल रंगता कुरता रेहच ओनांग सन्दरांग पोन्डिहतुर। अनि ओन कुरुस पोरो अन्जिहला साटि बाहरो ओतुरक।

येसुन कुरुस पोरो अन्जहाना

(मत्ति २७:३२-४४; लूका २३:२६-४३; युह १९:१७-२७)

21सिकन्दर अनि रुपुसनोर बाबो शमोन कुरेनि नाटेनोर मतोर। ओर नाटेनिगाडाल वास मतोर। ओर येसुना हेरेटाल हन्दुर असके सयनिक लोकुरक शिमोनिन पयस येसुना कुरुस पयिला जबरदस्ति कितुरक#रोमि १६:१३। 22ओरक येसुन गुलगुता पोरोयता जागादिगा ततुरक। (गुलगुताना अर्थ जोपळिता जागा इन्जोर मन्ता।) 23अगा सयनिक लोकुरक येसुन लोहवान अंगुरता जोमा हिया लागतुरक#१५:२३ नोमुर कमि कियान साटि लोहवान अंगुरता जोमा उन्दि दवायि लेहका उपयोग किन्तोरक। मति येसु अद उन्डोर आतुर। 24असके सयनिक लोकुरक येसुन कुरुस पोरो अन्जिहतुर अनि ओना सन्दरानुंग अलग भाग किस बोन बोद भाग पुटार इन्जोर ओरक अदेना पोरो चिटिंग वाटतुरक#भज २२:१८। 25ओरक येसुन कुरुस पोरो अन्जिहतुरक असके सकारता नोव नेकस मता। 26“यहुदिलोरा राजा” इदाम उन्दि दोषपत्र कोटता पाटि ओनागा लावेकिसितुरक। 27ओरक येसुनासंग रन्ड डाकुलोरकुन वरोर ओना तिन्दान कयबासा अनि दुसरोन डावो कयबासा कुरुस पोरो अन्जिहतुरक। 28(इद रितिते, “दुष्ट लोकुरकनिगा ओना गिन्ति आत#यश ५३:१२” इन्जोर येसुना बारेता पवित्र पुस्तकता वाचा पुरा आत।) 29अनि हरिताल हनवालोरक तला होलियस-होलियस “वा, वा, मन्दिरतुन अरिहवाल अनि मून्ड दियाने पुरा बनेह केवाले, 30कुरुस पोरोडाल रयस आपुनतुन पिसहा” इदाम ओना निन्दा कियाला लागतुरक। 31इदामे मुक्याल याजक लोकुरक अनि नियमतुन करिहवालोरक अनि यहुदि मुक्यालोकुरक आपसते येसुना बारेते मजाक कितुरक: “येर दुसरो लोकुरकुन पिसिहतुर मति आपुनतुन पिसिह परोर। 32माक हुळस विस्वास कियाकोम इन्जोर इस्रायेलतोर राजा मसि इदेक कुरुस पोरोडाल रयस वायिर।” अनि ओनासंग कुरुस पोरो अन्जिहच मतोरक इवुर डाकुलोरक वने येसुन ओना निन्दा किन्दुरक।

येसुना हायाना

(मत्ति २७:४५-५६; लूका २३:४४-४९; युह १९:२८-३०)

33अनि दुपाडा बारा नेक्सुन ते मून्ड नेक्नाहका देशतिगा सबोय आन्दार आस मता। 34अचोय बेरा येसु पकाय जोरदे किलतुर, “एली, एली, लमा शबक्तनि?” इदेना अर्थ, “हे नावोर परमेस्वर, हे नावोर परमेस्वर, निमा नाकुन बाक्या सोळेकिति?” इदाम मन्ता#भज २२:१। 35ओना हेरे नितस मतोरक ओर लोकुरकनिकेडाल हुचुलोरक इद केन्जुन, “हुळाट ओर एलियान केयान्तोर” इन्जोर वेहतुरक। 36इन्जोर ओरागाडाल वरोर मानेय वितसोर हन्ज उन्दि स्पंज हवियता अंगुरता जोमातिगा नाहतुर अनि वदुरता उन्दि लाटितिगा इरस: “पोसाट! एलिया ओन अडिय रेहिला वान्तोर या वायोर इद माक हुळकाट” इन्जोर वेहचुन ओर येसुन उन्दिला हितुर। 37असके येसु पकाय किलसोरिन जिवा तासितुर। 38अनि येरुसलेम मन्दिरता पळदा पोरोडाल अडियवनाह हरस रन्ड तुकळांग आतुंग#निर २६:३१-३३। 39ओना मुने नितस मतोर वरोर रोमि सयनिक लोकुरा अदिकारि#१५:३९ सुबेदार येसुन जोरदे केयस जिवा तासियाना हुळसुन, “खरोय येर मानेय परमेस्वरनोर मरि मतोर” इन्जोर इतुर। 40हुचुक आसक वने लकडाल हुळन्दुंग। अवेहनिगाडाल मरियम मगदलनि, हुडलोर याकुबना अनि योसेसना अवहारि मरियम अनि सलोमि मतांग। 41येसु गलीलतिगा मतोर असके ओना सेवा किस अव ओना परके आन्दुंग। अनि ओनासंग येरुसलेमतिगा वास मतांग दुसरो पकाय आसक वने मतांग#लूका ८:२,३।

येसुना मिसाना

(मत्ति २७:५७-६१; लूका २३:५०-५६; युह १९:३८-४२)

42ओदबेरा पोळद मुलस मता अनि इद यहुदिलोकुरा रिति रिवाज अनुसार तयारिता दिया मन्जे पवित्र दियाता मुनेटा दिया मता। 43अनि परमेस्वरना राज वायाना हर हुळस मतोर ओर अरिमतियातिगा मन्वाल यूसुफ पोरोयतोर वरोर मतोर। ओर यहुदिलोकुरा हजोर सभातोर सदस्य मतोर। ओर हिमत किस पिलातुसना हेरे हतुर अनि येसुना मुरदातुन तल्कतुर। 44ओर सान्डेय हातुर इन्जोर केन्जुन पिलातुस आश्चरय किस ओर सुबेदारतुन केयस बाताल येसु हातोर इदाम पुच्चेमातुर। 45पिलातुस सुबेदार निकेडाल हाल जानेमातुर असके येसुना मुरदातुन युसुपतुन हितुर। 46असके यूसुफ उन्दि लाटिवाले चादर अस ततुर। अनि येसुना मुरदातुन ओर रेहच ओद चादर हुरहितुर अनि उन्दि आदितिगा कातस मतोर बिजगुडितिगा इरतुर अनि बिजगुडिता दरवाजतिगा उन्दि कल दुरस मुचतुर। 47ओन बगा इरतोर इन्जोर मगदलनि पोरोयता नाटेना मरियम अनि योसेसना अवहारि मरियम हुळिला आस मतांग।

Kasalukuyang Napili:

मरकुस 15: fmu

Haylayt

Ibahagi

Kopyahin