युहनाल 5

अळतिस वरसाताल बिमारि मानेयतुन येसु सुदरे किन्तोर

1असके पजा यहुदिलोरा उन्दि हनुम कियान साटि येसु येरुसलेमतिगा हतुर। 2अनि येरुसलेमतिगा बेळा पोरोयता टाडराता हेरे उन्दि बोडि मता अदेन इब्रानि बोलिते बेतहसदा इन्तोर। अदेन सयुंग मन्डाक मतांग। 3अगा पकाय बिमारि, अन्दडाह, लंगडाह अनि वतिता मेन्दुलतोर मानेयक (एरता होलेमायाना आशाते) हर हुळसोर मतोरक। 4(बाक्याकि ठहरे किता ओद ओद बेरा परमेस्वरनोर स्वरगदूत बोडितिगा रेयस एरतुन होलेकिन्दुर अनि एर होलेमातपा बोर मुने रेयन्दुर ओना बोदायि बिमारि मनि ओद सुदरेमान्द) 5अनि अगा वरोर मानेय मतोर ओर अळतिस वरसाताल उन्दि परवाते हुन्ज मतोर। 6असके येसु ओन हुळतुर अनि ओर पकाय दियांगताल इद दसाते अरतोर इन्जोर पुतुर, अनि “सुदरेमायाना निया इच्चा मन्ता बहे?” इन्जोर ओन पुच्चेमातुर। 7अनि ओर इतुर, “हे गुरुजि, नावा ते सुदरेमायाना इच्चा मन्ता मति बसकेय एरतुन होलेकिन्तोर असके नाकुन बोडितिगा ओयान साटि नावा हेरे बोरे मानेय हिलेर। अनि नावा अवानाता मुने दुसरो मानेय नावा मुनेय रयान्तोर।” 8येसु ओन इतुर, “निता! अनि निया बोतरि ताहच वलियला लागा।” 9असके ओर मानेय सान्डे सुदरे मातुर अनि आपुना बोतरि ताहच वलियला लागतुर।

10ओर सुदरेमातुर ओद यहुदि लोकुरा पवित्र दियातिगा मता इन्जोर “नेन्ड पवित्र दिया आन्दु, निकुन आपुना बोतरि तहाना मावा यहुदि नियमता विरुद मन्ता” इदाम यहुदि अदिकारि लोकुरक सुदरे मातुर ओन इतुरक#नहे १३:१९; यिर १७:२१ । 11अनि “नाकुन सुदरे कितोर ओरे नाकुन इतुर, ‘आपुना बोतरि ताहच वलिया’ ” इन्जोर ओर बिमारि मानेय अदिकारिलोकुरकुन उत्तर हितुर। 12अदिकारि लोकुरक ओन पुच्चेमातुर “ ‘बोतरि ताहच वलिया’ इन्जोर निकुन इतोर बोर मानेय आन्दुर?” 13मति ओन बोर सुदरेकितुर इन्जोर ओन पुनोर आन्दुर बाक्याकि अगा पकाय लोकुरा भीळ आसोर मता इन्जोर येसु अगडाल अलग हन्ज मतोर। 14पजा येसु ओर सुदरेमातोर मानेयतुन मन्दिरतिगा मिलेमातुर अनि “हुळा निमा सुदरेमातोन, इदेनताल वने हजोर सन्कट वायमाकि इन्जोर असा बोदायि पाप केमा” इदाम येसु ओन इतुर। 15अनि ओर सुदरे मातोर मानेय हन्जुन यहुदि अदिकारिलोकुरकुन नाकुन सुदरे कितोर ओर येसु आन्दुर इदाम वेहतुर। 16येसु यहुदि लोकुरा पवित्र दियाता नियमतुन विरोद इद बुतो कितुर इन्जोर यहुदि अदिकारि लोकुरक येसुन तकलिप हियाला लागतुरक। 17असके येसु ओरकुन इतुर, “नावोर बाबो दरोज बुतो किन्तोर इन्जोर नना वने दरोज बुतो किन्तोना”#५:१७ नावोर बाबो पवित्र दिया वने बुतो किन्तोर इन्जोर नना वने पवित्र दिया बुतो किन्तोना। 18अदाम ओर केवल पवित्र दियाता नियमतुन मानेमायोर इन्जोर आयो मति परमेस्वरिन आपुनोर बाबो इन्ज आपुनतुन वने परमेस्वर लेहका बनेकितुर इन्जोर यहुदि अदिकारि लोकुरक असा वने ओन हव्काना साटि पकाय कोसिस कियाला लागतुरक।

परमेस्वरनोर मरिना अदिकार

19इन्जोर येसु ओरकुन इतुर, “खरोय खरोय नना मिकुन इन्तोना, केवल बाबो कियानपा हुळान्तोना अव पोल्लोंग तासि परमेस्वरनोर मरिन आपुनास बाराय कियापरोन; बोद बोद बुतोंग ओर किन्तोर ओदे बुतोंग नना परमेस्वरनोर मरि वने अदेय रितिते किन्तोना। 20बाक्याकि बाबो मरिनिगा मया इरान्तोर अनि बोद बोद बुतोंग ओर आपुने किन्तोर ओद सबोय नना परमेस्वरनोर मरिन वने तोहान्तोर अनि निमाट आश्चरय कियाकिट ओर इदेनताल वने हजोर हजोर बुतो कियाना नाकुन तोहानुर। 21बदाम बाबो हातोर लोकुरकुन जितो किन्तोर अदामे मरि वने बोनागा इच्चा किन्तोना ओन जितो किन्तोना। 22अनि बाबो बोनाय न्याय केवोर मति न्याय कियाना सबोय अदिकार नना परमेस्वरनोर मरिना कयते सोपेहकितोर। 23बाक्याकि सबोय लोकुरक बदाम बाबोन मान किन्तोर अदामे नना परमेस्वरनोर मरिन वने मान केविर। नना परमेस्वरनोर मरिन बोर मान केवोर ओर नाकुन लोहतोर ओर बाबोन वने मान केवोर। 24बोरायि नावा पोल्लो केन्जुन नाकुन लोहवालिन विस्वास किन्तोर ओना अनन्त जिवन मन्ता अनि ओना पोरो हायानाता दन्ड आयो मति ओर हायनाताल पिचिहच अनन्त जिवन पुटहितोर इन्जोर नना मिकुन खरोय खरोय वेहान्तोना।”

25अनि येसु ओरकुन असा इतुर, “मिकुन खरोय खरोय इन्तोना, हातोर लोकुरक#५:२५ हातोर लोकुरक मन्जे आत्मिक रितिता अनि खरोय हातोर लोकुरक इदाम रन्ड प्रकारता अर्थ मन्ता। नना परमेस्वरनोर मरिना पोल्लोंग केन्जुन बोरक मानेमान्तोरक ओरक जिवेमायनुरक ओद बेरा वायिला आता; अनि ओद बेरा इदेक वाता#५:२५ मिकुन खरोय खरोय इन्तोना, ओद बेरा वायिला आता अगा खरोय परमेस्वरनासंग संबन्द हिले इदाम लोकुरक नना परमेस्वरनोर मरिना पोल्लो केन्जुन अनि बोरक ओद पोल्लोता विस्वास किन्तोर ओरक परमेस्वरनासंग अनन्त जिवन जिवेमायनुरक अनि ओद बेरा इदेक वने मन्ता। । 26बाक्याकि जिवन हेवाल बाबो आन्दुर अनि ओर नना मानेयतोर मरि नाकुन वने जिवन हियाना अदिकार हितोर। 27अनि नना मानेयतोर मरि आन्दान इन्जोर न्यायकियान अदिकार वने नाकुन हितोर। 28निमाट इगा आश्चरय केमाट बाक्याकि बचोक लोकुरक बिजगुडितिगा मन्तोरक अचोक लोकुरक नावा पोल्लो केन्जुन बाहरो पसियानुरक ओद बेरा वायिला आता। 29सोबाय बुतोंग कितोरक अनन्त जिवन जिवे मायान साटि हातोरिगाडाल असा जिवेमायनुरक अनि खराब बुतोंग कितोरक लोकुरक दन्ड पुटान साटि हातोरिगाडाल असा जिवेमायनुरक#दानि १२:२।”

येसुना बारेते गवाहि

30अनि येसु असा इतुर, “नना आपुनास बाराय कियाला परोन; बदाम केन्जान्तोना अदामे न्याय किन्तोना। अनि नावा न्याय खरोय मन्ता बाक्याकि नना आपुना इच्चाते आयो मति नाकुन लोहवालना इच्चाते किन्तोना। 31नना आपुने नावा बारेते गवाहि हियाकान ते, लोकुरक नावा गवाहितुन स्विकार केवोर आयनुरक। 32नावा बारेते गवाहि हिन्तोर ओर दुसरो वरोर मन्तोर; ओर नावा बारेते हिन्तोर ओद गवाहि खरोय मन्ता इन्जोर नना पुन्तोना। 33निमाट युहन्नाना हेरे लोकुरकुन पुच्चेमायिला लोहतिट अनि ओर नावा बारेते खरोय गवाहि हितुर। 34मति आपुना बारेते मानेयनिकेडाल गवाहिता नाकुन जरुरि हिले ते वने नना मिकुन पिसाना पुटान साटि इव पोल्लोंग इन्तोना। 35युहन्नाना पोल्लो पयटेमाता अनि मान्जता वेळिचि लेहका मता अनि हुचुक बेरावनाह ओना वेळिचितिगा गिरदा आयाना इच्चा मिक कितुरक। 36मति नावा गवाहि युहन्नाना गवाहिताल वने हजोर मन्ता बाक्याकि बाबाल नाकुन पुरा कियान साटि बोद बुतोंग सोपेकिस ओर नाकुन लोहतोर ओदे बुतोंग नना किन्तोना इन्जोर नावा गवाहि आन्दु। 37अनि नाकुन लोहतोर बाबो वने नावा गवाहि हितुर। मति निमाट बसकेय ओना पोल्लो केन्जविट अनि ओना रुप हुळविट#मत्ति ३:१७; मर १:११; लूका ३:२२। 38निमाट ओना पोल्लो आपुना मन्दे इरविट इन्जोर ओर लोहतोर नावागा निमाट विस्वास केविट। 39निमाट पवित्र पुस्तकतिगा पळकान्तोरिट बाक्याकि अगा मिकुन अनन्त जिवन पुटान्ता इन्जोर निमाट समजेमान्तोरिट अनि ओदेय पवित्र पुस्तक नावा गवाहि हिन्ता। 40ते वने निमाट अनन्त जिवन पुटहान साटि नावा हेरे वायाना इच्चा केविट। 41नना मानेयनिकेडाल आदर पुटाना इच्चा केवोन, 42मति निमाट खरोय परमेस्वरतुन मया केविट इन्जोर नना पुन्तोना। 43नना आपुनोर बाबोना अदिकारते वातोना ते निमाट स्विकार केविट; मति बोरायि आपुना पोरोयते वायनुर ते निमाट ओन स्विकार कियाकिट। 44निमाट वरोर दुसरोनिकेडाल आदरता पुटहाना इच्चा किन्तोरिट मति वरोरे परमेस्वरनिकेडाल मन्ता ओद आदरतुन पुटान साटि निमाट बाताले मेहनत केविट ते निमाट बोद रितिते नाकुन विस्वास कियाकिट? 45नना बाबोना मुने मियागा दोष लावेकियाका इदाम समजेमायमाट। मियागा दोष लावे केवाल निमाट विस्वास इरतोरिट ओद मूसाना नियम मन्ता। 46बाक्याकि निमाट मूसाना नियमतिगा विस्वास किस मनेरिट ते नावा वने विस्वास किस मनेरिट बाक्याकि ओर नावा बारेते कोटतोर। 47मति निमाट ओना कोटता पोल्लोतिगा विस्वास केविट ते नावा पोल्लोतिगा बसकेय विस्वास केवि आयकिट।”

Kasalukuyang Napili:

युहनाल 5: fmu

Haylayt

Ibahagi

Kopyahin