युहनाल 20

येसुना असा जिवेमायाना

(मत्ति २८:१-८; मर १६:१-८; लूका २४:१-१२)

1अनि हपताता पहले दिया मन्जे इतवार दिया मगदलनि नाटेना मरियम जुन्जुरकायि पान्जाता बिजगुडितिगा वातु अनि मुनेटा कलदुन गुचता हुळतु। 2असके अद वितितु अनि शमोन पतरस अनि येसुन मया किन्दुर ओर दुसरो चेलाना हेरे हन्जुन, “ओरक प्रबुना मुरदातुन बिजगुडिताल पसिस ओतोर अनि ओना मुरदातुन बगा इरतोरक इन्जोर माक पुनोम” इदाम ओरकुन वेहतु। 3असके पतरस अनि ओर दुसरो चेलाल अगडाल पसियसुन बिजगुडितिके हतुरक। 4ओर इवुरास संगेन संगेन वितिन्दुर, मति दुसरो चेलाल पतरसना मुने विळस बिच गुडितिगा मुने अवतुर। 5अनि वकसुन पान्जा लोपा हुळतुर असके सन्दरांग अरस मतांग हुळतुर मति ओर लोपा हनोर। 6असके शमोन पतरस ओना परके परके अवतुर अनि पान्जा लोपा हतुर अनि सन्दरांग अरतांग हुळतुर। 7अनि येसुना तलातिगा दोहता मता ओद डुपटातुन अदु सन्दरांगताल अलग आस दुसरो उन्दि जागातिगा हुरिहच इरस मता हुळतुर। 8असके बिजगुडितिगा मुने अवस मतोर ओर दुसरो चेलाल वने पान्जा लोपा हन्जुन खरोय येसु हासुन असा जिवेमातोर इन्जोर हुळसुन विस्वास कितुर। 9(अनि ओन हातोरिगाडाल असा जिवे मायिला पहाजे इन्जोर पवित्र पुस्तकतिगा कोटता मता परमेस्वरना ओद पोल्लो ओरकुन इदेकवनाह पुनोर आस मतोरक।) 10असके ओर चेलालोरक आपुना लोन मल्स हतुरक।

मगदलनिता मरियमतुन येसु दिसान्तोर

(मत्ति २८:९-१०; मर १६:९-११)

11मति मरियम किलसोर बिजगुडिता हेरेय बाहरो निच मता। अनि किलसोर किलसोर बिजगुडितिके वकसुन हुळतु, 12असके बगा येसुना मुरदातुन इरस मतोरक अगा पान्डरि अनि मान्जतांग सन्दरांग करतोरक इवुर स्वरगदूतक, वरोर तला बासा अनि दुसरो काल्क बासा उदितोरक हुळतु। 13अनि ओरक अदेन इतुरक, “हे बायि निमा बाक्या किलिला आतोन?” ओद ओरकुन इतु “ओरक नावोर प्रबुन ताहचुन ओतोरक अनि ओन बगा इरतोरक” इन्जोर नना पुनोन। 14अनि इदाम इन्जुन अद परके मलतु असके येसु नितितुर हुळतु, मति येर येसु आन्दुर इन्जोर पुनो। 15अनि येसु अदेन इतुर, “हे बायि निमा बाक्या किलिलातोन? अनि बोन पळकिलातोन?” अनि अदु बगिचाता बुतो केवाल समजेमास ओन इतु, “हे दादा, निमा ओन ताहच ओस मन्दाकि ते ओन बगा इरतोन इन्जोर नाकुन वेहा अनि नना ओन ओयका।” 16अनि येसु अदेन इतुर, “मरियम!” अनि अद परके मल्स ओन इब्रनि बोलिते इतु, “रबुनि (मन्जे गुरु)।” 17अनि येसु अदेन इतुर, “नाकुन पयस इरमा बाक्याकि नना इदेकवनाह पोरो बाबोना हेरे हनोने मति निमा नावोर तमोहना हेरे हन्जुन ‘नना आपुनोर बाबो अनि मिवोर बाबो अनि आपुनोर परमेस्वर अनि मिवोर परमेस्वरना हेरे पोरो दान्तोना इन्जोर ओरकुन वेहा।’ ” 18अनि मगदलनि नाटेना मरियम हन्जुन, “नना प्रबुन हुळतान अनि ओर नावाताल इद पोल्लो वळकतुर” इन्जोर चेला लोकुरकुन वेहतु।

येसु चेला लोकुरकुन दिसान्तोर

(मत्ति २८:१६-२०; मर १६:१४-१८; लूका २४:३६-४९)

19अनि अदेदिया ओद हपताता पहले दिया मता। नुलपे बेरा बगा चेलालोरक मतोरक अगा यहुदि अदिकारि लोकुरा वरेते कवाळ बन्द किस मतोरक असके येसु अगा वातुर अनि ओरा नडुम नितस ओरकुन, “मिकुन शान्ति पुटि” इन्जोर इतुर। 20अनि इदाम इन्जुन आपुना कय अनि आपुना पसलिता भाग तोहतुर असके चेला लोकुरक प्रबुन हुळस गिरदा आतुरक। 21अनि येसु असा ओरकुन इतुर, “मिकुन शान्ति पुटि इन्जोर बाबो नाकुन लोहतोर अदामे नना वने मिकुन लोहान्तोना।” 22अनि इदाम इन्जुन येसु ओरा पोरो ऊहकतुर अनि ओरकुन इतुर, “पवित्र आत्मा येताट। 23अनि बोरा पापतुन निमाट मापि कियाकिट ओरा पाप मापि आता; अनि बोना पाप निमाट मापि केविट ओरा पाप अदामे मन्दार#मत्ति १६:१९; १८:१८।”

येसु थोमान दिसान्तोर

24अनि येसु वातुर असके बारा चेलानिगाडाल वरोर मन्जे दिदुमुस इन्तोर ओर थोमास ओरासंग हिलेर आस मतोर। 25“माक प्रबुन हुळतोम” इन्जोर दुसरो चेलालोरक ओन इन्दिला लागतुरक असके ओरक ओन इतुरक, “नना ओना कयदिगा खिराता बुका हुळस अनि कयदा बुकातिगा आपुना वळन्ज आहच अनि ओना पसलितिगा आपुना कय आहचुन हुळानावनाह नना इद पोल्लो विस्वास केवोन।”

26अनि आट दियाना पजा ओनोर चेलालोरक असा लोन लोपा मतोरक अनि थोमा वने ओरासंग मतोर अनि कवाळ बन्द किस मता असके येसु वासुन ओरा नडुम निचुन, “मिकुन शान्ति पुटि” इन्जोर इतुर। 27असके ओर थोमान इतुर, “आपुना वळन्ज इगा तचुन नावा कयकुन हुळा अनि आपुना कय तचुन नावा पसलिता भागतुन आहचा अनि अविस्वासि आयो मति विस्वासि आम।” 28अनि इद केन्जुन थोमा उत्तर हितुर, “हे नावोर प्रबु अनि हे नावोर परमेस्वर!” 29अनि येसु ओन इतोर “निमा नाकुन हुळतोन इन्जोर विस्वास कितोन मति नाकुन हुळवाय विस्वास कितोरक ओरक आशिरवादते मन्तोरक।”

इद पुस्तकता उद्देश्य

30अनि येसु असा वने पकाय चमत्कार चेलालोकुरा मुने तोहतुर अव इद पुस्तकतिगा कोटता हिले। 31मति येसुये परमेस्वरनोर मरि मसिहा आन्दुर इन्जोर निमाट विस्वास किम्ट अनि विस्वास किस ओना पोरोयते अनन्त जिवन पुटहाट इन्जोर साटि इद कोटता मन्ता।

Kasalukuyang Napili:

युहनाल 20: fmu

Haylayt

Ibahagi

Kopyahin