Luka 20
20
Hakuma Yesu mà, nike ada magəna?
(Matta 21:23-27; Markus 11:27-33)
1Bigeɗe Yesu niya cugɨlhətan away a ɗaha hay a adaw s'Askwaf de, ghaya nenilhətan atə Labara Sələmna ga, məlmal hay ɗa slumə ɗaha hay atə Askwaf atə malum hay me gurɗay, ŋa məlmal hay hu ɗa laka ala a ma ene de. 2Ɗa dzakəna, wa: «Dzaməna ɗece, ihay gə na kə giya saŋa mà, kə giya i hakuma gəna? Təku, wiya vəriyak hakuma sahan?» 3Yesu zləmkənhətənaŋa, wa: «Ənne kini əŋ mbucekunamiya me ɓile, zlimkɨnhuwaŋa: 4Zhaŋ mà, wiya sləniya a bunə ɗaha hay? Askwaf təku, ɗa səlammərzheŋ he?» 5Ɗa takənmandar‑a a dzaɗay a duvak tan de, wa: «Abə mene, ənna: “Askwaf sləniya,” ǎ dzaməna, wa: “Amnaya kwa ɗəfəkpənŋa ba ayina?” 6Abə mene, ənna: “Ɗa səlammərzheŋ,” ɗaha hay ba cecena à ɗá hətsmənaŋade kuwan, aɗaba ɗa ɗəfəkpənŋa gəni Zhaŋ ɗu mbəɗɗitənande me s'Askwaf a ɗaha hay.» 7Mezlene ɗa zləmkənhənaŋa, wa: «Ma səna ba.» 8Yesu, wa: «Abə kugwan ga, ənne kini əŋ dzakuna bə ɗu gə vərku hakuma gə s'ihay sahan.»
Araja i ɗa sləra gə zlasaw hay
(Matta 21:33-46; Markus 12:1-12)
9Adede ahan ga, Yesu takənmandar‑a a dzaɗitəna araja gə na saŋa a ɗaha hay, wa: «Ɗu s'iŋgeɗe cubide inabuhi hay a kuvak ene de, ɗəfəktənde a alay de a ɗaha hay gəni ɗá ge sləra ede, à ɗá huliya. Wuran ba huɗay ene ala a shula, ǎ mbasaya duna. 10Sərte ɗugə s'inabuhi naya ga, slənika ɗu sləra ene s'iŋgeɗe ala a ma ɗa gə de ɗəfəktənde kuvak a alay de ane a vərɗin dzaa s'inabuhi ene. Amá ɗa sahan ɗa slakəlna i taɗay, ɗa nəŋkəla, huwak al alay ene ɗara. 11Ɗu kuvak ane slənika ɗu sləra ene s'iŋgeɗe adəɓa, wuran kini ɗa slakəlna i taɗay, ɗa gəkəlariya, ta ɗa nəŋkəla, huwak al alay ene ɗara. 12Slənika zlama adəɓa ɗu s'iŋgeɗe ala apə məŋgan, wuran ga, ɗa nzanzəslkakude, ta ɗa ɓərkede ala a geshe. 13Ɗu kuvak s'inabuhi ane, wa: “Əŋ ge kəma səgan? Əŋ slinka kine s'awiya hwa saŋa, wuran ga, bi à ɗá ɗəf mbəray apəna.” 14Amá ɗa sləra ane ba ɗa hadzəkpan aray ga, ɗa dzaka a duvak tan de, wa: “Tá ɗu gə ǎ pe warata ene ane, viɗinmənka, ta warata ene sahan ǎ giya ande ayiməna.” 15Ɗa ɓərkede ada kuvak‑a ala a geshe, ɗa vəɗika.
«I mà, ɗu kuvak ǎ naya gəɗitəna ama a ɗa sahan? 16Ǎ naya a kəɗɗiltəna ɗa sləra sahan, ǎ ɗəftənde kuvak s'inabuhi sahan a alay de a ɗa s'iŋgeɗe.» Ɗahay ane ba ɗa sənay a me sahan ga, wa: «Aŋa gɨkiya ba aride!»
17Yesu tsatsəktan ba ndivva, ta dzəktəna, wa: «Me gə niya i hətsɗay, wa: “Ba kuwan gə ɗa ɗisl s'adaw ɗa nəŋkəla saŋa, ba s'ahan gaka kuwan təlkame saŋa mà#Awar 118:22,” gus dza s'ama?
18Ɗu gə abə taŋaka apə kuwan sahan‑a ga, ǎ kakaɗa. Ɗu gə abə kuwan sahan nəŋkənaŋade ɗəma ga, ǎ muniyakude ba munɗay.»
19Malum hay me gurɗay atə məlmal hay ɗa slumə ɗaha hay atə Askwaf ɗa gwasək bər Yesu aba a ahan de sahan, aɗaba ɗa sənkede gəni dzaka araja sahan ala apə tan‑a, amá zləŋwaɗ vəɗəktəna ande a ɗaha hay.
Me hətsɗin hadama a bay Ruma
(Matta 22:15-22; Markus 12:13-17)
20Mezlene ɗa takənmandar‑a a ɗəgəm Yesu. Ɗa slənəkpan ɗa s'iŋgeɗe, ɗa sahan ɗa gəkəlka ŋa tan ba ka ɗa jire. Ɗa gwasək bərɗika apə me‑a, ta ɗa məkina a guverner gə hakuma a alay de ayina saŋa a nda sheriya ene. 21Ɗa mbutsəkənamiya, wa: «Malum, ma səna gəni igə kə dzawa atə igə kə cugɨla saŋa ba ndəɗɗa. Kə gəgəra bə ɗaha, kə cugɨlhətan zaɗay apə ciba s'Askwaf‑a a ɗaha hay i ciba ene. 22Dzaməna ɗece, ciba niya təku ayiməna a hətsɗin hadama a Kaysara bay Ruma, niba he?» 23Yesu sənkede a ɗemɗema tsəre tan sahan, dzəktəna, wa: 24«Mbezlɨnlehwa ɗece shiŋgu sahan ɓile. Fataŋw atə sləmay gə na apəna saŋa mà, i wiya?» Ɗa zləmkənhənaŋa, wa: «I Kaysara bay Ruma.» 25Yesu, wa: «Kugwan ga, hajɨnna a Kaysara igə zlaya ene a Kaysara, a Askwaf kini igə zlaya ene a Askwaf.» 26Ɗa dzəgwika bə bərɗika apə me‑a gə wuran dzawa apə miya a ɗaha hay‑a saŋa. Bira zləmɗinhətənaŋa ene sahan vərəktən ba s'ajipu, ɗa pakənande aba me tan.
Mbutsəɗay ala apə slabaɗayede ɗaha hay ada mika ka
(Matta 22:23-33; Markus 12:18-27)
27Saduki hay s'iŋgeɗe ɗa kəzəkpan a Yesu. Ba Saduki hay sahan tsaw wa slabaɗayede ɗaha hay ada a mika ka niba saŋa. Ɗa mbutsəkənamiya, wa: 28«Malum, Musa hətskənpəman, wa: “Abə humas mətskənaŋa a hərmana ka wuhkəlka bə kine ga, si dagwa məman humawede hər sahan a ɗəfɗinka shef a dagwa məman gə mətsaka saŋa#Me Gurɗay 25:5-6.” 29Iya, wayə məme s'iŋgeɗe ɗa zak tə ciɓa apə məme tan‑a. Məlmal tan təvika hərmana, mətskənaŋa wuhkəlka bə kine. 30Ɗu kutəɗay ene humakede hər sahan, 31ɗu gə ala apə məŋgan kini ba kugunhan, ha ciɓa hətəna ɗa kəɗkənaŋa niba ɗu gə wuhkəlka kine. 32Adede ayitəna ga, hər sahan kini mətsaka. 33I mà, hər sahan ǎ za ande a wiya ayitənde bək slabaɗayede ɗaha hay ada mika ka? Aɗaba ciɓa hətəna ɗa gəkəlka hər tan.»
34Yesu zləmkənhətənaŋa, wa: «A zamane saŋa de ga, mizhe hay atə hər hay ɗa tuve zhek. 35Amá ɗa gə ɗa slaka a nzə zaɗay a zamane de gə ǎ nay ala apə miya atə a slabaɗayede ada dagava ɗa gə ka wutə a mika de saŋa ga, à ɗá təva bə cine zhek. 36Wutan à ɗá mats bə cine, aɗaba à ɗá giya ba ka malika hay. Ɗa gaka wayə s'Askwaf, aɗaba wuran slabiltənede ada dagava ɗa gə ka wutə a mika de. 37Musa ga, zak dzaɗiya ba parakka a ma gə de dzak ala apə adəga tsəktsəkəna ka saŋa, gəni ɗa gə ɗa kəɗaka saŋa à ɗá slabayede ada mika ka. Aɗaba hak Ɗuduwuna al “Askwaf s'Abraham, Askwaf s'Izak atə Askwaf Zhakup#Huwaɗayede 3:6, 15-16.” 38Askwaf ga, wuran Askwaf mətska hay ba, amá i ɗa gə i shifa. Aɗaba wutan ba cecena saŋa wutə abi shifa a ma ene de.»
39Ɗa s'iŋgeɗe a malum hay me gurɗay de, ɗa zləmkənhənaŋa, wa: «Malum, aŋa gə kə dzika ba kalkala ene.» 40Aɗaba zləŋwaɗ vəɗəktəna a mbutsəɗinamiya me hay s'iŋgeɗe.
Wutə Kristu atə Davit
(Matta 22:41-46; Markus 12:35-37)
41Yesu dzəktəna, wa: «Nay kəma ni, ɗa dzawa wa Kristu shef Davit saŋa? 42Aɗaba ba Davit i ŋasaray ene kini dzaka a wakita s'Awar hay de, wa:
“Ɗuduwuna dzakəna a Ɗuduwuna hwa, wa:
‘Zakade a alay ɗəfka hwa de,
43ha abə əŋ gəkəltəna ɗa dawa aka ma həts səlay aka#Awar 110:1.’”
44Abə Davit ɗəma hawa i Ɗuduwuna ene mà, Kristu gɨkiya kəma shef ene adəɓa?»
Ɗifɨn sləmay apə ŋa kwan‑a a ma malum hay me gurɗay de
(Matta 23:1-36; Markus 12:38-40; Luka 11:37-54)
45Yesu ane dzatəna a ɗa kutə wuran apə miya a ɗa gə ka ɗa tsukw me ene ba cecena saŋa, wa: 46«Ɗifɨn sləmay apə ŋa kwan‑a ba kərətta a ma malum hay me gurɗay de gə ŋgəmtan həsɗay i səɗava dəbələmməna, ɗa gus ɗa gɨtən sa apə aray ɗaha hay‑a ba cecena saŋa. Ɗa gus ba mazaɗay gə apə miya saŋa a adaw guɓaɗay hay de, a ma wumbri de kini ɗa gus ba mazaɗay gə i daradza saŋa a zaɗide. 47Ɗa pe wudəge hay hər hay apə adaw‑a. Ɗa kət maduwa hay tan duna, gəni ɗaha hay ɗá tsatəna. Aɗaba sahan, sheriya duwuna ǎ njɨtan.»
Kasalukuyang Napili:
Luka 20: mlr
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active), Wycliffe Bible Translators, Inc. All rights reserved.
