Máfìù 12
12
O wɛ̃́ĩ́‐lɔ̀ɔ kɛ fĩ́ĩ́‐dɔ‐lùòa mɔ́ɔ̀ wɔ̃̀ mɔ̀
(Máà 2.23-28; Lúù 6.1-5)
1Lúó e kília káa, Zízɛ̀ e kɛ diepìà nyɛ́nɛ̀ĩ̀ kɔ́ɛ́í lɛ́ ɓu sùu dò taà e kɛá yia mɔ̀ fĩ́ĩ́‐dɔ‐lùò ká. Lɔ̀ɔ e kɛ là tòà‐píé‐mìà kɛpìà. O gbɛ̃̀ wáà ɓú e kília dò kã̀ wáà ɓèlè. 2Kɛɛ lɛ̀ Fálásíì‐mìà o o gɛ̃̀ɛ, wa gèe Zízɛ̀ lɛ̀ɛ kélɛ̀, “Lɛ̀ gɛ̃̀, ɓà tòà‐píé‐mìà o wɔ̃́ lɛ́ ye wá mia mɔ̀ ó kɛ fĩ́ĩ́‐dɔ‐lùò káa kɛpìà.”
3Zízɛ̀ a gèe o lɛ̀ɛ, “Kàá wɔ̃́ lɛ́ Dèɓé a kɛ, lɛ̀ lɛ́ lɔ̀ɔ e kɛ wà là mia nì o kɛpìàa wɔ̃̀ gèe do Wálà kiia yí? 4E wɛ̀lɛ̀, e ló Wálà‐kɛ̀ì, áà belè lɛ́ à nɔɔ̀ e kɛá Wálà lɛ̀ɛ ɓèlè. Lɛ̀ɛ́ gbaa kɛ wà là mia nì o mɔ̀ ó à ɓèlè, kɛɛ sálà‐ɓò‐Wálà‐mɔ̀‐mìà lɛ́ nɔ́ ò à ɓèlèa. 5Ɛ́ɛ̃́ zeĩ́, kàá wɔ̃́ lɛ́ à bɛ̃̀ɛ̃ɛ̃̀ lɛ Móózè là Lɔ́ɔ̀ɔ yí, lɛ́ à gbɛ̃̀ɛ̃̀ lɛ sálà‐ɓò‐Wálà‐mɔ̀‐mìà mɔ̀ɔ wɔ̃̀ gèe do? Fĩ́ĩ́‐dɔ‐lùò séĩ́‐séĩ́ káa, óò fĩ́ĩ́‐dɔ‐lùò mɔ́ɔ̀ lɔ́ɔ̀ɔ sìè sálà‐ɓò‐Wálà‐lɛ̀ɛ‐kàa wì. Tó ó kɛ bɛ̃̀ɛ̃ kília, mɛ̀ĩ́‐sà káà wá o wĩĩ́ à mɔ́ɔ̀ wɔ̃̀ mɔ̀. 6Kà tó ḿ gèe ka lɛ̀ɛ, pɛ lɛ́ lɛ kpànazɛ̀, é dieá sálà‐ɓò‐Wálà‐lɛ̀ɛ‐kà làa lɛ zèe. 7Wálà kiia láà gèe kélɛ̀, ‘M̀ḿ naa sálà lɛ́ ò ɓo pɛ ɓéèe káa ká. Kɛɛ pɛ́ m̀ nàáa, lɛ́ e mi yéĩ̀ kṹũ̀ káa.’ È kɛ̀á káà wɔ̃́ e kéa yí kpó‐kpó maa, kàá gɔ̃̀ mɛ̀ĩ́‐sà káà mia lɛ́ wɔ̃́ tóò wá o mɔ̀ɔ wĩĩ́. 8Ƃii Mi Gbe là yíkɛ̀ gáàa lɛ fĩ́ĩ́‐dɔ‐lùòa là.”
Gɔ̃ kɔ̀ zùaàa zɛ̀
(Máà 3.1-6; Lúù 6.6-11)
9Zízɛ̀ e gó gbaa yí, e ló Zúù‐mìà zì Wálà‐kàa doó‐mì wì. 10Gɔ̃ doó lɛ́ à kɔ̀ doó zùaà e kɛ à káa, e kɛ yí. Mia lɛ́ o kɛ yía, o dò e Zízɛ̀ wɛ̃́ĩ́‐lɔ̀ɔ kɛ kélɛ̀, “Káà yí dɔ lɛ sɛ̀ kɛ ó mi la fĩ́ĩ́‐dɔ‐lùò ká?” O wɔ̃́ e kéa gèe kíli, ɓii wa naa kɛ ó gèe kélɛ̀ Zízɛ̀ aà wɔ̃́ yɔɔ kɛ.
11Zízɛ̀ a gèe o lɛ̀ɛ, “Yé ɓáá aà kɛ ka dò kɛ̀lɛ̀, lɛ́ aà dà gùlù yí fĩ́ĩ́‐dɔ‐lùò káa, káà lo à kɛɛ̀ kpɛ? Kàá ló à kṹũ̀, kɛ ká ɓo gùlù e kília yí? 12Zi sùu kpɛɛ̀ lɛ́ mɔṹ mi‐wɔ̃̀ lɛ à ká kpànazɛ̀, é dieá ɓáá‐wɔ̃̀ là ké. À mɔ́ɔ̀ wɔ̃̀ mɔ̀ɔ, lɛ mi mɔ̀ kɛ í wɔ̃́ yiè kɛ fĩ́ĩ́‐dɔ‐lùò ká.” 13Lɛ̀ e kɛ kília, a gèe gɔ̃́ɛɛ lɛ̀ɛ, “Ì i kɔ̀ɔ fóló.”
Gɔ̃́ e kília e à fóló. Lɛ́ à kɔ̀ɔ e kɛ e yiè ká gbaa lɛ̀ zí à yé e tóa lɛ à káa lɛ́ ɓea. 14Kɛɛ Fálásíì vɔ̀ o ɓɔ pɛlɛí, o ló, o o wũ dũ Zízɛ̀ mɔ́ɔ̀ wɔ̃̀ mɔ̀. O kɛ o yɛ́lɛ́ táápìà zí ò lo à zɛɛ̀áa wɛ̃́ĩ̀.
Wálà là yɛɓo‐kɛ‐mì lɛ́ e à sía
15Lɛ̀ Zízɛ̀ e à wɔ̃̀ maa, e gó gbaa lɛ̀ e kília mɔ̀. Mia búnùzɛ̀ o tó à píé. E mia kɔ̃́ṹ‐kɔ̃̀ũ̀ séĩ́ la, 16ɛ̃́ɛ̃́ a gèe o lɛ̀ɛ yékɛ̀ ó à dɔ̀ɔ̀ dɔ mi nɔ́ɔ fé lɛ̀ɛ. 17E à kɛ kíli, kɛɛ wɔ̃́ lɛ́ dɔ̀‐Wálà‐lé‐là‐mì Ààzáyà a gèea é kɛ wánà zɛ̀. Wɔ̃́ a gèea lɛ́ e kélɛ̀,
18“M̀ yɛɓo‐kɛ‐mì lɛ́ ma Wálà maà à sía, gɛ̃̀ e ké.
À ye lɛ́ à lɔ̀ kpɔ́ɔ̀ lɛ m mɔ̀, lɛ́ m zò dàà lɛ à píéa.
Ḿm̀ lo m zì Gɛ̀ɛ̀ káà à là.
Ɛ́ɛ̃́ lɛ́ɛ̀ lo m zì mɛ̀ĩ́‐sà dɔ̀‐mia‐mɔ̀ wɔ̃̀ gèeè sɛ́lɛ́ gbɛɛ̀ gbɛɛ yí‐mìà lɛ̀ɛ.
19Kɛɛ lɛ̀ɛ́ ló tèé dàà, ɛ̃́ɛ̃́ kɛ bɛ̃̀ɛ̃ é gbɛ́ɛ́.
Mia òó ló à wéè maà zi ɓɛ̀lɛ̀ĩ̀‐fĩ̀ã̀ píé.
20Lɛ̀ɛ́ ló píní ɓɛ́ɛ̀ yɛ́ɛ̀ɛ zɛ̀ ɓoò e kíe lé nɔ́ ɓɔ̀ɔ.
Ɛ́ɛ̃́ lɛ̀ɛ́ ló nábò yé è kɛ̀ bù‐bù lea númíì nɔ́ ɓɔ̀ɔ.
Lɛ́ɛ̀ lo lóò e zò kũ̀ tã́ã̀ zɛ̀ ká líé é tóá kíli wɔ̃́ kpeĩ kɛɛ̀ kɔ̀ é die.
21Ɛ́ɛ̃́ sɛ́lɛ́ gbɛɛ̀ gbɛɛ yí‐mìà séĩ́ zò lɛ́ɛ̀ lo kɛɛ̀ à mɔ̀.”
Zízɛ̀ wà Bìɔ́sébà
(Máà 3.20-30; Lúù 11.14-23)
22Lɛ̀ e kɛ kília, mia dò o nu gɔ̃ dò ká Zízɛ̀ píé. Gɔ̃́ e kília nyìɛ káà e kɛá, ɛ̃́ɛ̃́ à lé lɛ̀ɛ́ wéé, ɓii pɛ yɔɔ e kɛ à píéa mɔ́ɔ̀ wɔ̃̀ mɔ̀. Zízɛ̀ e gɔ̃́ e kília la. Bɛ̀i e kɛ gbaa à mɔ̀ é lɛ̀ gɛ̃̀, ɛ̃́ɛ̃́ é wéé. 23Mia séĩ́‐séĩ́ lé e pa, wáà gèè kélɛ̀, “É, gɔ̃́ e kéa lɛ́ɛ̀ bɛ̀i kɛɛ̀ Dèɓé Gbe ká?”
24Lɛ̀ Fálásíì‐mìà o wɔ̃́ e kéa maa, wa gèe, “Bìɔ́sébà lɛ́ e pɛ yɔɔ vɔ̀ zì dɔ‐mì káa, è kɛ̀á lɛ̀ɛ́ gbaa yíkɛ̀ gáàa nɔ à lɛ̀ɛ, lɛ̀ɛ́ gɔ̃̀ pɛ yɔɔ vɔ̀ ɓoò mia píé.”
25Kɛɛ Zízɛ̀ e o zì yɛ́lɛ́‐tàà‐yí‐wɔ̃̀ dɔ, áà gèè o lɛ̀ɛ, “Sɛ́lɛ́ nɔ́ɔ fé lɛ́ è e dìè yí gìnì, tó wáà gèlè gɔ̃̀ o kíe káa, à yí lɛ́ɛ̀ lo sìè pɛ́lɛ̀. Ɛ́ɛ̃́ pɛ́lɛ yí‐mìà, e bɛ̀i, ká doó wì‐mìà lɛ́ o kíe yí gìniì lɛ, tó wáà gèlè gɔ̃̀ o kíe nì káa, òó ló dɔ gɛ̃̀ɛ̃̀ kɛ ó ɓo. 26É kɛ̀á Sétɔ̃̀ lɛ́ɛ̀ Sétɔ̃̀ ɓo mia píéa, kɛɛ Sétɔ̃̀ là mia nì yí gìniì lɛ, tó wáà gèlè gɔ̃̀ o kíe nì ká. Yé waà kɛ kília, zi sùu kpɛɛ̀ lɛ́ à zì tò‐mia‐là è bɛ̀i à mɔ̀ é kɛá ɓe fɛ̃̀ɛ̃̀? 27Káà à gèe kélɛ̀ ḿm̀ pɛ yɔɔ ɓo mia píé, ɓii Bìɔ́sébà e yíkɛ̀ gáàa nɔ m lɛ̀ɛ mɔ́ɔ̀ wɔ̃̀ mɔ̀. É kɛ̀á lɛ kília, ka bɛ̃̀ɛ̃ ka mìà nì óò ɓo mia píé kpɛ? O lɛ́ nɔ́ ò lo mɛ́ĩ́ káà ka wĩĩ́a. 28Kɛɛ é kɛ̀á lɛ Wálà zì Gɛ̀ɛ̀ ká lɛ́ m̀ pɛ yɔɔ ɓoá mia píéa, kɛɛ Wálà zì tò‐mia‐là aà nu ka là.
29“Zi sùu kpɛɛ̀ lɛ́ mi è bɛ̀i à mɔ̀ é wàà gɔ̃ yí gágà zɛ̀ píé kɛ́ì é là pɔɔ̀ sí, yé lɛ̀ɛ́ gɔ̃ yí gágà zɛ̀ e kília yèlè nɛ́ɛ ká? Lɛ à mɔ̀ á yèlè nɛ́ bèĩzɛ̀. Yé aà kɛ gbaa kília, lɛ́ɛ̀ bɛ̀i à mɔ̀ é à píé kɛ́ì pɔɔ̀ sí gbaa.
30“Mi lɛ́ ye wá m̀ mi káa, lɛ gèlè‐gɔ̃̀‐m‐ká mì ká. Ɛ́ɛ̃́ mi lɛ́ lɛ̀ɛ́ gbũ m mɔ̀ pɛ pà‐kíe‐mɔ̀ pìàa, lɛ pɛ kã̀‐e‐kíe‐mɔ̀ mì ká. 31Wɔ̃́ e kéa mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, kɛ‐wɔ̃̀ yɔɔ nɔ́ɔ fé lɛ́ mia ò kɛ̀ɛ, ɛ̃́ɛ̃́ wɔ̃́ yɔɔ nɔ́ɔ fé lɛ́ ò gèea, lɛ́ɛ̀ bɛ̀i à mɔ̀ é ɓo mia wũ mɔ̀. Kɛɛ mi lɛ́ è wɔ̃́ yɔɔ gèe Gɛ̀ɛ̀ Púlúa gbĩ mɔ̀ɔ, à wɔ̃̀ wá ɓòà‐wũ‐mɔ̀ wɔ̃̀ ká. 32Mi nɔ́ɔ fé lɛ́ è mɛ́ĩ́ yɔɔ ɓo Mi Gbe gbĩ mɔ̀ɔ, à wɔ̃̀ lɛ́ɛ̀ lo ɓoò à wũ mɔ̀. Kɛɛ mi nɔ́ɔ fé lɛ́ è wɔ̃́ yɔɔ gèe Gɛ̀ɛ̀ Púlú gbĩ mɔ̀ɔ, à wɔ̃̀ wá ɓòà‐wũ‐mɔ̀ wɔ̃̀ ká dɛɛ ká, ɛ̃́ɛ̃́ tòá kíli ká.
Yílí wà e ɓɛɛ
(Lúù 6.43-45)
33“Ƃá nàá pɛ ɓɛɛ yiè káa, lɛ à mɔ̀ pɛ yìlì yiè é kɛ i kɛ̀lɛ̀. Yílí yɔɔ é kɛ̀á i kɛ̀lɛ̀ɛ, lɛ́ɛ̀ lo ɓaà e ɓɛɛ yɔɔ ká i lɛ̀ɛ, ɓii óò yílí dɔ e ɓɛɛ mɔ̀. 34Mɛ̀nɛ là nɔ́ɔ̀ ka ké ɓɛ. Zi sùu kpɛɛ̀ lɛ́ kà bɛ̀i à mɔ̀ ká wɔ̃́ yiè gèe à ká, yé ka sɔ̃̀ɔ̃ lɛ yɔɔ ká? Ƃii pɛ lɛ́ à mi zò píé paà lɛɛ, lɛ́ mi ɓà wè ɓoa. 35Mi sɔ̃̀ɔ̃ yiè zɛ̀ lɛ́ɛ̀ nu pɛ yiè lɛ́ aà o kpɔ́lɔ̀ bɛ̀ia ká wáà‐là. Kɛɛ mi sɔ̃̀ɔ̃ yɔɔ zɛ̀ lɛ́ɛ̀ nu pɛ yɔɔ lɛ́ aà o kpɔ́lɔ̀ bɛ̀ia ká wáà‐là.
36“Kà tó ḿ gèe ka lɛ̀ɛ. Lúó lɛ́ ò lo mɛ̀ĩ́‐sà dɔɔ̀ à ká mia mɔ̀ɔ, mia óò lo wéé wíá‐wìà lɛ́ waà yàá mɔ́ à gèeè káa, wɔ̃́ gèeè áà gbɛ̃̀ à mɔ̀ doó doó. 37Ƃii óò lo i lé‐wè síì, wáà mɛ̀ĩ́‐sà dɔ̀á i mɔ̀. I lé‐wè lɛ́ è lo wɔ̃́ ɓoò i wũ mɔ̀, ɛ̃́ɛ̃́ lɛ́ è lo wɔ̃́ káà i wĩĩ́a.”
O lé‐pa‐wɔ̃̀ naa ó gɛ̃̀
(Máà 8.11-12; Lúù 11.29-32)
38Lɛ̀ e kɛ kília, Wálà kii‐dɔ‐mìà dò wà Fálásíì‐mìà dò wa gèe Zízɛ̀ lɛ̀ɛ, “Tísɛ̀, kóò nàà kó i gɛ̃̀, ɓáà lé‐pa‐wɔ̃̀ kɛ̀.”
39Kɛɛ Zízɛ̀ e à là nìɛ̀ weeá kélɛ̀, “Míá o ɓe yà kɔa ɓoa yía, o sɔ̃̀ɔ̃ wá sɛ̀, ɛ̃́ɛ̃́ óò o ko gbɛ̃̀ Wálà mɔ̀. O nyìɛ lɛ lé‐pa‐wɔ̃̀ kɛɛ̀ mɔ̀. Kɛɛ lé‐pa‐wɔ̃̀ gbɛɛ lɛ̀ɛ́ ló kɛɛ̀ ɓe o lɛ̀ɛ, é kã́ dɔ̀‐Wálà‐lé‐là‐mì Zónà zìa mɔ̀ɔ ká. 40Zi nɔ́ doó lɛ́ Zónà e lɛ̀‐kpɛ̀iì yààka wà bĩ́míà yààka kɛá kpã̀ã́ gbùòa géa, zi nɔ́ doóa Mi Gbe lɛ́ɛ̀ lo lɛ̀‐kpɛ̀iì yààka wà bĩ́míà yààka kɛɛ̀á sɛ́lɛ́ gé. 41Lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, mia lɛ́ ò go Nínívɛ̀ɛ, óò lo dɔɔ̀ o gã̀ mɔ̀, tó wáà mɛ̀ĩ́‐sà kàà ka wĩĩ́. Ƃii lɛ̀ lɛ́ Zónà e Wálà lé‐wè gèe o lɛ̀ɛ, o o sɔ̃̀ɔ̃ yɔɔ mɛ́ vɔ̀ɔ. À mɛ̀nɛ̀ kè, pɛ dò lɛ́ lɛ dóo kpànazɛ̀, é dieá Zónà làa lɛ zèe. 42Lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, sɛ́lɛ́ líé‐sí‐lèè lɛ́ e gó mɔ́ sɛ́lɛ́ lɛ́ e sɛ́lɛ́ e kéa mɔ̀ bèía yía, lɛ́ɛ̀ lo dɔɔ̀ e gã̀ mɔ̀, tó áà mɛ̀ĩ́‐sà kàà ka wĩĩ́. Ƃii à góò e kɛá sɛ́lɛ́ yí gbèkèni, kɛ é e tóó dɔ Sɔ́lómɔ̀ zì gíkã́‐wèa mɔ̀. À mɛ̀nɛ̀ kè, pɛ dò lɛ́ lɛ dóo kpànazɛ̀ é dieá Sɔ́lómɔ̀ làa, lɛ zèe.
Pɛ yɔɔ e yɛ́ e zí
(Lúù 11.24-26)
43“Yé pɛ yɔɔ aà gó mi píéa, lɛ́ɛ̀ lo dìèá sí sɛ́lɛ́ lɛ́ yíí wá à yía là, áà lɛ̀ nàà é e fĩ́ĩ́ dɔ yí. Kɛɛ yé làá dò gɛ̃̀ɛ, 44láà gèe, ‘Ḿm̀ lo lóò m mɛ̀ĩ́ m̀ ká lɛ́ m gó à wìa wì.’ Yé aà kɛ kília, lɛ́ɛ̀ yɛ e zí, tó e ló ká lɛ́ e kɛ à wìa gɛ̃̀ɛ̃̀ e wì fèle zɛ̀ ká, ɛ̃́ɛ̃́ e wì gòloò zɛ̀ wà e wì pɛ̀ kɛɛ̀ɛ zɛ̀ ká. 45Tó zeĩ́, e ɓɔ pɛlɛí, e ló, tó e nu zeĩ́ pɛ yɔɔ vɔ̀ sálápèèlɛ, lɛ́ o yɔɔ ó dieá à làa ká. Tó o nu ó kɛ à lɛ̀ mɔ̀. Yé aà kɛ kília, zi lɛ́ gɔ̃́ e kília lɛ à ká gbaa lɛ dóo yɔɔ, é dieá zí e kɛá bèĩzɛ̀ɛ là. Zí e kéa lɛ́ wɔ̃́ è lo kɛɛ̀á mia lɛ́ o ɓe yà kɔa ɓoa yí, lɛ́ o sɔ̃̀ɔ̃ wá sɛ̀ɛ káa.”
Zízɛ̀ lòóò wà à lèe‐gé gɔ̃à zɛ̀
(Máà 3.31-35; Lúù 8.19-21)
46Zízɛ̀ e kɛ tĩã́ wéépìà míáa lɛ̀ɛ lɛ̀ lɛ́ à lòóò wà à lèe‐gé gɔ̃à zɛ̀ nì o nua ká. O dɔ pɛ́lɛ̀ zèí, wáà gèè óò nàà ó wéé Zízɛ̀ píé. 47Mi dò e kɛ yí, áà gèè Zízɛ̀ lɛ̀ɛ, “Lɛ̀ gɛ̃̀, i lòóò wà i lèe‐gé nì o dɔ̀á pɛ́lɛ̀ zèí, wáà gèè óò nàà ó wéé i píé.”
48Zízɛ̀ a là nìɛ̀ weeá kélɛ̀, “Dé e m lòóò ká? Dé e m lèe‐gé vɔ̀ ká?” 49Lɛ̀ e kɛ kília, e e kɔ̀ sí, a zɔ̃̀ɔ̃̀ là tòà‐píé‐mìà ká, áà gèè, “Yéa, m lòóò wà m lèe‐gé nì gɛ̃̀ o ké. 50Ƃii mi lɛ́ è wɔ̃́ lɛ́ m Dàa lɛ́ e lɛ̀ía à nàà á kɛɛ kɛ̀ɛ, lɛ́ e m lèe‐gé gɔ̃ zɛ̀, wà m lèe‐gé lee zɛ̀, ɛ̃́ɛ̃́ m lòóò káa.”
Kasalukuyang Napili:
Máfìù 12: MNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Mann New Testament © Bible Society in Liberia, 1978.
