Marcos 11
11
Jesus Jerusalen llaktama yaykuskamanta
(Mt. 21.1-11; Lc. 19.28-40; Jn. 12.12-19)
1Jerusalen llaktama mayayaraskapi Betfage Betania llaktakuna mayapi paktanakurka. Olivos urku siki pampayaskapi kanakurka. Chaypi Jesus pay yachachiskata katikamakunamanta ishkayta mantankapa rahuskapi rimarka:
2—Kankuna kuskapuralla ichilla llaktama richi. Chayma paktasa shu burru wataskata tupankichi. Paypa hawapi chayra mana pi tiyariskachu karka. Paskasa pushamunkichi. 3Maykanpas kankunata: —Imapata paskankichi— nipi kutipankichi:
—Amuka payta minishtinmi, washa kutichinkami.—
4Paykuna risa shu burruta tupanakurka ñampipi shuk wasi punku mayapi watara kaskata. Tupasa paskanakurka. 5Paskaranakupi chaypi kaska runakuna tapunakurka:
—Imapata burruta paskankichi— nisa.
6Jesus yachachiskata katikamakuna Jesus rimaskashina kutipanakurka. Chayta uyasa:
—Apaychilla— nisa rimanakurka.
7Chasna rimanakupi burruta Jesuspama pushanakurka. Chay burru hawapi paykunapa hawa churariskata mantapi Jesus sikarka chay hawapi tiyarisa rinkapa. 8Pay pasana ñampipi hatun apuraykulla rurana kaskata rurasa achka runakuna paykunapa hawa churariskata surkusa mantanakurka. Maykan runakunaka pankakunata karumanta apamusa ñampipi mantanakurka. 9Jesuspa ñupapi rira runakuna washalla katirakunapas kushilla kaparinakurka:
—¡Ali shamuska! ¡Dios kanta yanapachu kan Diosparanti ñukanchipama shamuskarayku! 10¡Diosta yuya tukuyta binsi kanki! ¡Apu wañu Davidshina apu kasa ñukanchita lugaryachinkapa paktamuranki! ¡Dios kanta yanapachu! ¡Hakuychi kushiyachishunchi hawapachapi kawsa Diosta!— nisa kaparinakurka.
Wayu illa igu yurata Jesus piñasa rimaskamanta
(Mt. 21.18-19)
11Jesus Jerusalenma yaykusa Diosta mañana wasima rirka. Tukuy chaypi pasaskata rikuraskawasha, ña chishiyapi, pay yachachiskata katikamakunaynti Betania llaktama rinakurka. 12Kayanti punchapi Betaniamanta llukshisa Jesus yarkarka. 13Karupi shu igu kaspi yurata rikurka, achka pankayu kaskata. Chayma rirka —wayuyuchari kanka— nisa. Alita rikupika pankalla tiyarka. Mana wayu aparina uraschu karka. 14Chasna kapi Jesus yurata nirka:
—Mana pi kanmanta wayuta mikuchu.—
Pay yachachiskata katikamakuna chay rimaskata uyanakurka.
Diosta mañana wasimanta Jesus rantichikamakunata hichuskamanta
(Mt. 21.12-17; Lc. 19.45-48; Jn. 2.13-22)
15Jerusalen llaktama paktasa Jesus kuti Diosta mañana wasima rirka. Chay wasipa punta hatun pampa#11.15 Chay punta pampa mana Israel runakuna paktana kaska Diosta mañankapa. wasikunawa muyukta kaska chupipi achka rantichikama runakuna, rantikamakunapas kanakurka. Paykunata rikusa chaymanta kallpachinkapa kallarirka. Runakuna paykuna apamuska kullkikunata Diosta kuyanarayku ali kullkiwa#11.15 Rikuy Éxodo 30.13 kampyana kanakurka Israel apukuna rimaskashina. Chayrayku kullkita kampyakuna achka chaypi tiyarka, yalikta kobrasa kullkiyanakurka. Jesus chayta rikusa paykunapa mesakunata tankasa urmachirka. Mana imayu runakuna Diosrayku rupachina wiwa urpikunata rantichikamakunapas yalikta kobrakuna achka tiyarka. Paykunapa urpi hawlakuna shayachiska mesakunata tankasa urmachirka. 16Diosta mañana wasipa wasikunawa muyukta kaska pampakunapi wasikuna ukupipas Jesus mana sakirkachu ni pi imatapas apasa purinkapa. 17Paykunata hichuskapi rimarka:
—Dios ñupa uras killkachiska killkapi kasna nin:
Ñuka wasi ñukata mañana wasi kanka tukuy llaktamanta runakunarayku nisa.
Ranti, kankuna chayta shuwa wasita rarkankichi— nisa Jesus rimarka.
18Chayta uyasa pakrikunapa apukuna, Dios ñupa uras killkachiska killkata kutillata killkakamakunapas —imana rasata payta wañuchirinka— nisa paykunapura kwintarinakurka. Ranti Jesusta manchanakurka, tukuy runakuna pay yachachiskata kushiyaskawa uyanakuskarayku. 19Tutayaraskapi Jesus pay yachachiskata katikamakunaynti Jerusalen llaktamanta kuti llukshinakurka, karan chishi raskashina.
Igu kaspi yura chakiriskamanta
(Mt. 21.20-22)
20Kayanti punchapi tutamanta Jesus pay yachachiskata katikamakunaynti kuti Jerusalenma rina ñampita rinakurka. Chasna riraskapi paykuna Jesus mana wayuyu igu kaspi yura piñaskata rikunakurka, ankukunaynti chakiriska kaskata. 21Pedro yuyarisa nirka:
—Yachachikama, rikuy, kan piñasa rimaska kaspi yura chakiriskami.—
22Jesus paykunata nirka:
—Dioswa sinchikuychi. 23Alita uyawaychi. Maykan runapas kay urkuta kasna riman: —Urku anchuri, hatu kuchama shitari— nisa, paypa shunkupi chasna yuyarisa sinchikupi, pay yuyariskashinallami tukunka. 24Chasna kapi kankunata rimani: Tukuy kankuna Diosmanta mañaskata —ña chaskirkanchi— nisa yuyasaka chaskinkichimi. 25Kankuna Diosta mañanayasaka maykankunawa piñariska kasa ñupakta paykunawa alichisa aylluyaychi. Kankunata tukuy mana ali ruraskakunamanta paykunata kishpichichi. Chasna rapi hawapachapi kawsa kankunapa Yayapas kankunata huchamanta pichasa kishpichinkami. 26Ranti kankuna shukunawa mana alichisa aylluyapika hawapachapi kawsa kankunapa Yayapas kankunata mana huchakunamanta pichasa mana kishpichinkachu.—
—Ima ushaywa kan raskata ranki— nisa Jesusta tapunakuskamanta
(Mt. 21.23-27; Lc. 20.1-8)
27Jesus pay yachachiskata katikamakunaynti kuti Jerusalen llaktamallata paktanakurka. Chaypi Jesus Diosta mañana wasipi puriraskallapi pakrikunapa apukuna paypama mayayamunakurka. Dios ñupa uras killkachiska killkata kutillata killkakamakunapas mayayamunakurka, ñukanchi Israel runakunapa kamachi rukukunapas. Jesus chay wasimanta rantichikamakunata hichuskata yuyarisa chay apukuna paypama mayayamusa tapunakurka:
28—Ima ushaywata kan raskata ranki. Pita kanta chayta rankapa mantarka.—
29Paykuna mana ali yuyaywa tapuskata Jesus payllata shunkupi yacharka. Ima ushaywa Juan bawtisaskata paykuna mana rimanata munaskata yachasa paykunata kutipasa nirka:
—Ñukapas kankunata tapuskankichi. Kankuna kutipawapi ñukapas ima ushaywa chayta raskata kankunata kwintashami. 30Rimawaychi: Pita Juanta mantarka bawtisankapa. Hawapachamantachu mantay tukurka. Runakunachu payta mantanakurka. Kutipawaychi.—
31Chasna tapupi paykunapura rimarinakunkapa kallarinakurka:
—Ñukanchi —hawapachamanta mantay tukurka— nisa rimapi, ñukanchita rimanka: —Imaraykuta paywa mana sinchikurkankichi.— 32Nima rimanata mana ushanchichu —runakunalla payta mantanakurka— nisa. —Imanachari rimashu— nisa paykunapura rimarinakurka.
Tukuy runakuna Juan Dios rimaskata kwinta kaskata yuyarinakurka. Chayrayku apukuna manchanakurka rimanata: —Juan mana Dios partimanta kan— nisa. —Ñukanchi chasna rimapi runakuna ñukanchita wañuchinakunma— nisa rimanakurka.
33Chasna yuyarisa Jesusta rimanakurka:
—Mana yachanchichu pi Juanta mantarka.—
Jesus rimarka:
—Kankuna mana rimanata munapi ñukapas ima ushaywa ñuka raskata ruraskani mana rimaskankichichu.—
Kasalukuyang Napili:
Marcos 11: BKN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2020, Wycliffe Bible Translators, Inc.
