VPHAUNGC VYAUNGC 6
6
Miqsaz Layx Bac lvmz
1Kvtanc jauz mungkawx baung ruip saz nuex miq paungyaung wvnc tueq, yalxjuik sahez htenc muinz jawx tueq,#Yob 1:6; 2:1 2raungx sahez#6:2 raungx sahez; rvmuq ngoz ruiux tishox htenc sahez; rvmuq ngoz ruiux Tishox sahez. wvyvmc kuex miq yalxjuik saz rulx shvmhvlc kuex khiz vtueq, miqmac rueq vroc kuex lvmz wuez tueq. 3Yehowa rueq, “Miq kuex vthueyc phvnx rvtueq, mkaq muinz rullungx tvraungx httaz tvkoc ngaz rueq kuq mauk. Majuiuc maq phaungc vtueq miq rullungx kuex wawc shashiz rac wawc roknueyc dvyx mruez kueq,” ngoz tueq jungx tueq. 4Ghaq vyuq kvtanc jauz nuiyc kvruex yimaq miq yalxjuik sahez nuiyc raungx sahez rueq vlvp wvyungc wvloayc miq htenc httax wvnc tueq. Kvruex jix kuex shauk vgvnz wvyungc wvloayc yaungx vtueq, tsuingshiq kuex mvnnuex pat maq phuex khvmc hvlc shvrvyx bix nuiyc muingjungc httaz hvlc miqsaz htenc rvtueq.#Wkh 13:33
5Ghaq htauk wawc miqsaz htenc kuex mtanc lac layx bac vtueq, vkhing ruip rawx nuex tsuingshiq rueq tvmaung yaq lvmz mtanc lac honc bac yaq nguinx kuex Yehowa rueq khiz vtueq,#Mat 24:37; Luk 17:26; 1Pet 3:20 6vpiq rueq tsuingshiq tvdung sung vtueq ghaq htauk nuex tvhttaz tueq kuex kvmac vpiq thuinbac tueq. 7Vpiq kuex pinhtumc rvwvlc thamx yec juing yaungc ningkhvnc nuex vpiq rueq, “Ngaz rueq vtvdung sung miqsaz htenc, ngvmx saz nyvmx saz htenc, wushawx htenc kuex mungkawx vwawc tvsawc gay shaungx, yvmx khoc lac ngoz ruiux lec tsuingshiq tvdungc sungc ningkhvnc nuex ngaz kuex thuinbac vtaungx,” ngoz tueq jungx tueq. 8Yuq muinz Yehowa rueq Noa kuex raungc raq tueq.
Noa lvmz
9-10Vruex kuex Noa mvnphvnc rvtueq. Piq sahez kuex Shem, Ham, Japhet ngoz tueq wathuimx httax yaq. Noa piq pat nuex mvrax vguez miq hvlx kuex piq dvyx rvtueq. Piq kuex Tishox rulc rvnvp hvt httaz jix waz rvtueq,#2Pet 2:5 11yuq muinz vganc miqsaz htenc kuex Tishox khaungkac nuex honc vbac nuiyc yauk laungc yalawx yauk shuimc maq baung ruip saz nuex nyvmc wvnc tueq. 12Tishox rueq mungkawx kuex lawc koq tueq honc vbac khiz tueq, yvmx khoc lac ngoz ruiux lec miqsaz lotlaz kuex honc vbac ningkhvnc nuex rvtueq.
13Tishox rueq Noa muex ngoc, “Ngaz rueq miqsaz lotlaz kuex tvhtumx gay tvkoc htvp htaz lot tauk shex. Ngaz rueq tsuingshiq lotlaz tvbac gay shaungx, yvmx khoc lac ngoz ruiux lec tsuingshiq rueq yauk laungc yalawx yauk shuimc mungkawx nuex mvrc yaq ningkhvnc nuex tsuingshiq kuex tvsawc ruiyc tvbac gay shaungx. 14Mtvkoc vhvlx phvnx pulx maq lix vshiz tvhungx guirx shuiuz; khok htenc tvhungx vtueq vtsec kox nuiyc vmungx kox kuex shuirx maq tsac shuiuz. 15Kvruex kuex vloayc meter 133, vyungc meter 22, vjoz meter 13 tvhungx shuiuz. 16Lix kuex vshuip rvruiux, lix tuk tvroz nuiyc vshuip kuex sentimeter 44 tvhvl taq shuiuz. Htvp thuimx guirx tvhungx vtueq vsamx nuex kaluix vshiz tvpuc shuiuz. 17Thuiuzthuic tvraungx httax yaq phvnx lotlaz kuex tvbac gay tvkoc ghaq kuex yuix maq tvluimz gay shaungx. Ghaq nuex httax yaq phvnx lotlaz tvthueyc gay shaungx, 18yuq muinz ngaz kuex mnoz rulc bomkhvrc taq shaungx. Mtaungx nyuiuz, msahez nuiyc mnvmx nyuiuz hez htenc kuex svngpholix nuex tvduiz shuiuz. 19-20Thuiuzthuic tvraungx lvp wvnc tvkoc ngvmx saz nuiyc wushawx phvnx ruip saz wawc vkuiux vlaz tvguip shishiz kuex mnoz rulc lix kvyuq tv-nyuip shuiuz. 21Nuimhez nuiyc ngvmx saz htenc kvruex laung phuiuz vsvy phvnx ruip saz lvmz taq shuiuz,” ngoz tueq jungx tueq. 22Noa rueq muinz Tishox rueq nvr tueq rulc rv-ngvlc lotlaz tvhungx htaungx tueq.#Heb 11:7
Kasalukuyang Napili:
VPHAUNGC VYAUNGC 6: HNOT01
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Hawa Naga Bible © Bible Society of Myanmar, 2014.