SAN MARCOS 15
15
Jesús kélya'aso nápakto' Pilato
(Mt 27.1-2,11-14; Lc 23.1-5; Jn 18.28-38)
1Axto'ok agko' axta apchaknákxo apkelámha apmonye'e nak appasmo apkelmaxnéseso Dios énxet'ák apagkok yetlo m'a apkelámha apmonye'e nak apchakneykekxexa énxet'ák judíos, tén han ma'a apkelxekmóso nak apnámokkok ektémakxa segánamakxa, axta anhan ma'a apyókxoho énxet'ák ekyawakxa kéláyo nak. Kélyentegkek axta Jesús yetlo kélnaktetcheso apmék aphakxa Pilato. 2Aptahak axta Pilato apkelmaxneyeyncha'a s'e:
—¿Xépya judíos Wese' apwányam apagkok?
—Cháxa aptahakxa nak appeywa sexéna exchep —axta aptahak appeywa apchátegmowágko Jesús.
3Xámok axta aksok apkelxeyenma apkelámha apmonye'e nak appasmo apkelmaxnéseso Dios énxet'ák apagkok, axta apkelxénak ma'a aptémakxa axta cha'a Jesús. 4Apkelmaxneyáha axta makham Pilato Jesús. Aptahak axta s'e:
—¿Yagyátegmowágkok? Yeyxho hana. Xámok amya'a ektahakxa apxénamap xép.
5Axta eyke yátegmowágkok Jesús, apkenatchesek axta anhan Pilato apwet'a aptahakxa.
Jesús apxénamap yakwayam emátog
(Mt 27.15-31; Lc 23.13-25; Jn 18.38—19.16)
6Enyekxohok axta cha'a Pilato xama énxet apmomap ekhem kéltéma axta Pascua, cham'a ektahakxa enxoho apkelyéseykha énxet'ák. 7Apheyk axta xama énxet apmomap apwesey axta Barrabás yetlo apkelxegexma'a énxet'ák ektaha axta apchakhé pók neyseksa ellámáxche. 8Apkelwokmek axta énxet'ák ma'a yetlókók axta apkeltémo etnehek Pilato m'a aptémakxa axta cha'a. 9Aptahak axta apchátegmowágko Pilato s'e:
—¿Kélmenyeya kéxegke ayenyekxak ko'o judíos Wese' apwányam apagkok?
10Hakte apyekpelchágwokmek axta Pilato apmésa Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok eñama apnathé. 11Wánxa agkok, apkeltamhok axta eyke énegkesexma énxet ma'a apkelámha apmonye'e nak appasmo apkelmaxnéseso Dios énxet'ák apagkok, yakwayam enxoho yának kólyenyekxak ma'a Barrabás. 12Aptahak axta apkelmaxneyeyncha'a Pilato s'e:
—¿Yaksak kélámenyého atnésesek ko'o m'a kéltéma nak kéxegke judíos Wese' apwányam apagkok?
13Aptahak axta apkelyennaktésawo apkelátegmoweyak se'e:
—¡Epetches aksok ektegyéso!
14Aptahak axta apkeláneya Pilato s'e:
—¿Yaksak aksok ekmaso apkeláneya s'e énxet nak?
Wánxa agkok, apyánchesakmók axta apteme apkelyennaktésamo apkelpeywa s'e:
—¡Epetches aksok ektegyéso!
15Keñe axta apyenyékxo aksa Pilato Barrabás, hakte apmenyék axta katakmelhok apha nepyeseksa énxet; apkeltamhok axta kólyentemekxak Jesús yakwayam kólyepetchesek aksok ektegyéso natámen apkeltémo kólakheykha.
16Apyentegkek axta sẽlpextétamo Jesús apya'aseykxo m'a kóneg wese' Roma apchásenneykha apkeláneykha yókxexma apxagkok, apkelwóneyha axta apnámokkok xa sẽlpextétamo nak yakwayam yaknekxohok apyókxoho.
17Keñe axta aptaxneyáseykxo Jesús apchaklamap apyexwasé apagko', apketchesesek axta nahan apkátek ma'a am'ák apkeláneso axta apteté apkátek. 18Aptahak axta apkelyennaktésawo apkelpeywa s'e:
—¡Memassegwomek judíos Wese' apwányam apagkok!
19Yámet ekyakwaté axta cha'a aptekpagkásak apkátek, apkexpakha'ak axta anhan cha'a apyamánog, apkeltekxeyágkek axta anhan aptapnák xóp apkelpeykáso. 20Kéllekesek axta apchaklamap apyexwasé apagko' Jesús natámen ekteme apkesmésamap xa ektaha nak, keñe axta kélántaxneyásekxo makham apkelnakta, kélyentegkek axta anhan kélya'asa m'a yakwánxa axta kólyepetchesek aksok ektegyéso.
Jesús kélyepetcheso aksok ektegyéso
(Mt 27.32-44; Lc 23.26-43; Jn 19.17-27)
21Apkeltahanya'awók axta xama énxet apkeñama axta Cirene, apwesey axta Simón, Alejandro axta apyap ma'a tén han ma'a Rufo.#Ro 16.13. Yókxexma nepyáwa tegma apwányam axta apkenyekta'. Kéltamhok axta epatmok Jesús aksok ektegyéso apagkok.
22Kélya'ásek axta Jesús yókxexma ekwesey axta Gólgota (nentéma nak negko'o nempeywa: “Yókxexma ekyetnamakxa Kélpátek Axchapok”); 23kélmések axta vino yetlo kélenchahé pánakte ekwesey axta mirra, axta eyke énak Jesús. 24Keñe axta kélyepetchesa aksok ektegyéso. Aptawásegkek axta xama aksok sẽlpextétamo yakwayam emlasakpohok Jesús apkelnakta,#Sal 22.18. yakwayam enxoho ey'asagkohok ma'a ekpehewayam enxoho yakwayam esakxa'.
25Las nueve axto'ok axta m'a kélchexna axta néten aksok ektegyéso Jesús. 26Kélchexneyk axta anhan néten kéltáxéso ekxeyenma ektaha eksexnenagko s'e: “Judíos Wese' apwányam apagkok.” 27Kélyepetchásók axta xamo' Jesús apkánet énxet elmasagcha'a apkeltémakxa, xama axta kélchexnak ekpayhókxa nak apkelya'asamakxa, keñe axta pók kélchexna ekpayhókxa axta nepsagkalwa Jesús.#Is 53.12. 28Cháxa ektahakxa axta ektaha m'a ektémakxa axta eknaktáxésamaxche s'e: máxa énxet ekmaso aptémakxa axta kéltemésesók.
29Apwanyeyha axta cha'a énxet'ák ektaha axta apkelyeykhágwayam apyexnakxa, apkelyeykáseyha axta apkatkók.#Sal 22.7; 109.25. Aptahak axta anhan apcháneya s'e:
—¡Apmokók axta exchep etegkesek tegma appagkanamap keñe apmokók epenchásekxak makham ekweykmoho antanxo ekhem!#Mr 14.58; Jn 2.19. 30¡Ewagkasakpoho' apagko' teyp, etyep xa néten aksok ektegyéso nak!
31Hawók axta anhan aptamhágkaxa apkesmésa m'a apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelxekmóso nak apnámokkok ektémakxa segánamakxa. Aptahak axta apkelpakmeta s'e:
—Apkelwagkasegkek axta teyp apnámokkok, mopwanchek eyke apmoko ewagkasakpoho' apagko' teyp. 32¡Egmenyék negko'o agwetak etyapok néten aksok ektegyéso Mesías, Israel Wese' apwányam apagkok, yakwayam enxoho magya'áseme'!
Wokmók axta anhan apwanyeykha Jesús ma'a apkánet énxet kélyepetchesamo axta xamo' aksok ektegyéso.
Jesús apketsapma
(Mt 27.45-56; Lc 23.44-49; Jn 19.28-30)
33Xama axta ekwokmo yetseksókhem, sawhekxók axta ekyaktesóxma xa yókxexma nak ekweykmoho las tres taxnam. 34Chakhawók axta anhan las tres taxnam ma'a aptaha axta apyennaktésa appeywa Jesús se'e: “Eloi, Eloi, ¿lema sabactani?” (nentéma nak negko'o nempeywa: “Dios ahagkok, Dios ahagkok, ¿yaksak ektaha seyenyawa nak xép?”)#Sal 22.1.
35Nápakha énxet'ák axta apkelleg'ak xa, cham'a apchakneyncha'a axta m'a. Aptahak axta apkelpakmeta s'e:
—Kóleyxho hana, Elías, Dios appeywa aplegaso apwóneyha.
36Ñohok axta anhan apkenyaha xama xa énxet'ák nak, vino yetlo kélenchahe aksok égmenek ekmáske axta apketchásak apyásesa m'a aksok ekhó sogweygke kélleklo apwáxok la'a, keñe axta apteta naw'a yamámok, apya'ásesek axta apátog Jesús yakwayam enxoho ének. Aptahak#Sal 69.21. axta s'e:
—Kólleyx hana sekxo', ewak sat kexaha Elías yakwayam etekkeseta'.
37Xama ekpayheykha apátog ekyennakte agko' axta aptahak Jesús, keñe axta apketsapa. 38Apyepteykpek axta anhan nepyeseksa apáwa#Ex 26.31-33; 2 Cr 3.14. kélchexanma axta kañe' tegma appagkanamap, apwaktamok axta kóneg apyeptamap. 39Xama axta apwet'a apketsapa Jesús ma'a apkemha apmonye sẽlpextétamo apkeñama Roma apkenmeyncha'a axta apyexnakxa Jesús, aptahak axta appakmeta s'e:
—Nakso' nak axta eykel'a Dios Apketche xa énxet nak.
40Makhawók axta anhan chaknáha kelán'ák elenmexawo; María Magdalena axta anhan elxegexma'a xa kelán'ák nak, María, Santiago egken axta anhan ma'a aptaha axta apsexyo, José axta anhan egken ma'a, tén han ma'a Salomé. 41Cháxa kelán'ák ekyetlo axta Jesús xa, pasmomchek axta anhan cha'a aphamakxa axta m'a Galilea.#Lc 8.2-3. Xámok axta anhan elwokmo kelán'ák ektaha axta elyetlo Jesús apmeyákxo m'a tegma apwányam Jerusalén.
Jesús kélatawanya
(Mt 27.57-61; Lc 23.50-56; Jn 19.38-42)
42Xama axta ekyaktesa, ekhem apkeláneykekxexa axta aptahakxa énxet'ák, amonye ekwayam ma'a ekhem sábado, apkellókasamakxa axta apkelyampé énxet'ák judíos, 43apmahágkek axta José aphakxa Pilato yetlo megyeye, yakwayam enxoho elmaxnak Jesús aphápak, cham'a José aptaha axta apchókxa m'a Arimatea. Enxet'ák ekyawe kéláyo axta apkelxegexma'a xa, apkelháxanmeyk axta kawak ma'a aptémakxa nak Wese' apwányam Dios. 44Pelakkasek axta apleg'a amya'a Pilato apketsapa heykxa Jesús, apwóneyha axta apkemha apmonye sẽlpextétamo, yakwayam enxoho elmaxneyha wegkak kexaha apketsapma. 45Xama axta appenchesa apkeltennaso apkemha apmonye sẽlpextétamo Pilato, keñe axta Pilato apmésa Jesús aphápak ma'a José. 46Keñe axta aptegya'a José apáwa apkexyawáyo, aplekkek axta Jesús aphápak, keñe axta appexteta m'a apáwa nak. Appekkenwokmek axta m'a takhaxpop kélmeta axta meteymog, meteymog axta anhan aptahak apchapeykxo átog ma'a takhaxpop nak. 47Keláneyha axta kélpekkenwánxa Jesús aphápak María Magdalena, axta anhan ma'a María ektaha axta José egken.
Kasalukuyang Napili:
SAN MARCOS 15: LEGN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Lengua Sur (Enxet) New Testament © United Bible Societies, 1992.
