SAN MARCOS 14

Ekhémo mók apkelpakmeyesma énxet'ák yakwayam yának emakpok Jesús.

(Mt 26.1-5; Lc 22.1-2; Jn 11.45-53)

1Anet ekhem axta kéméxchek yakwayam kalanaxchek ekhem melwagkayam axta énxet'ák judíos kéltéma axta Pascua,#Ex 12.1-27; Dt 16.1-8. aptámákpexa axta pan meyke kempáseyak. Aptegyágkek axta yakwánxa etnehek yának emakpok Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a énxet'ák apkelxekmóso axta apnámokkok ektémakxa segánamakxa, eñama m'a aptamhéyak apancha'awo nak, yakwayam enxoho nahan yának emátog. 2Aptahak axta apkelpakmeta nápakha s'e:

—Manlanyek sat eyke nepyeseksa énxet apxámokma ekhem mólwagkayam nak, yakwayam enxoho ménnegkesexma énxet'ák.

Xama kelán'a expakháseso sokmátsa apkátek Jesús

(Mt 26.6-13; Jn 12.1-8)

3Apmeyákxeyk axta Jesús tegma apwányam Betania, Simón apxagkok axta aphákxa', cham'a apkeltamhomakpo axta negmasé ektepelchamáxche egyempehek áto'; neyseksa apha nekha mésa axta wokmok xama kelán'a, sókok axta sokmátsa elánamáxche axta axagkok meteymog ekwesey nak alabastro, lanawók axta nahan sokmátsa elánamáxkoho égmenek ma'a pánakte exnók ekwesey nak nardo, ektaha axta ekmomnáwa agko'. Páxkatchek axta sokmátsa axagkok, kexpakhásesek axta anhan apkátek Jesús#Lc 7.37-38. ma'a sokmátsa nak. 4Apkellókek axta nápakha énxet apheyncha'a axta m'a. Aptahak axta apkelpakmeta s'e:

—¿Yaksak ektaha ektawásencha'a nak sokmátsa agkok? 5Tásók xeyk keynyekxak trescientos selyakye ekmomnáwa yakwayam kapasmok énxet meyke aksok apagkok nak.

Kélyamatcháseyha axta xa kelán'a nak.

6Aptahak axta Jesús se'e:

—Kólho aksa, ¿yaksak ektaha kélya'asa nak exma? Tásek xa setnésesakxa nak. 7Exnakha sat cha'a kélnepyeseksa kéxegke énxet'ák meyke nak aksok apagkok,#Dt 15.11. kélwanchek kólpasmok kéxegke énxet meyke aksok apagkok kélmokókxa enxoho; wánxa agkok maxek sat eyke cha'a ko'o kélnepyeseksa kéxegke. 8Kelanak eyewagkexa kalának xa kelán'a nak: penchásók expakha'a sokmátsa sekyókxa amonye selatawanya. 9Ekyókxoho yókxexma kéltennágkaxa enxoho cha'a amya'a segwagkasamo nak teyp, kaxénaxchek sat nahan cha'a setnésesamakxa xa kelán'a nak, sat ektahakxa agkok megkólwagkayam xa ektaha nak. Nakso' xa sektahakxa nak sekpeywa seláneya kéxegke.

Judas appelakkaseso apkeltémo emakpok Jesús

(Mt 26.14-16; Lc 22.3-6)

10Apteyánegwokmok axta apkelámha apmonye'e nak appasmo apkelmaxnéseso Dios énxet'ák apagkok xama Jesús apkeltámeséyak apwesey axta Judas Iscariote, apkeñama axta nepyeseksa m'a doce nak, yakwayam enxoho yának emakpok Jesús. 11Xama axta apkelleg'a énxet'ák xa, kelpayhekxeyk axta apwáxók, apxénchek axta nahan peya egkések selyakye Judas aptaha axta apchénamo aptegyeykha yakwánxa etnehek yának emakpok Jesús.

Nempasmo ektakmela

(Mt 26.17-29; Lc 22.7-23; Jn 13.21-30; 1 Co 11.23-26)

12Wokmek axta eyeynókxa ekxega ekhem aptámákpexa axta pan meyke kempáseyak, aptekyómakxa axta cha'a nekkések apketkók kélpagkancheso nak ekhem Pascua. Aptahak axta Jesús apkeltámeséyak apkelmaxneyeyncha'a s'e:

—¿Háxko apkeltamhókxa anlánegwók nentéyak ekhem Pascua mólwagkayam nak?

13Keñe axta apkeláphasa Jesús apkánet apkeltámeséyak. Aptahak axta apkeláneya s'e:

—Kólmeyekxa nepyeseksa tegma apwányam. Sat kólwetagwók xama énxet apseykekxa yátegwáxwa yetlo yegmen ma'a. Kólyetlakxa sat nahan 14aptaxnegwánxa enxoho tegma, kólteme sat kólának ektaha apxagkok se'e: ‘Aptahak xeyk sẽlxekmóso negko'o apcháphasa appeywa s'e: ¿Háxko ekpayho tegma apwáxok yakwánxa ataswók sekto yetlo seltámeséyak ekhem mólwagkayam nak Pascua?’ 15Exekmósek sat kéxegke tegma netno' ekyawakxa apwáxok ma'a, penchásexchek nahan kélláneykekxa ekhéyak aksok ma'a. Kóllánegwom nento yakwayam antók taxnam ma'a.

16Apkelxegkek axta apkeltámeséyak apkelmeyákxo m'a nepyeseksa tegma apwányam. Apwetágwokmek axta anhan ma'a aptahakxa axta apkeláneya Jesús. Apkelánegwokmek axta aptéyak ekhem Pascua melwagkayam axta m'a.

17Xama axta ekyaktesa, apwokmek axta Jesús yetlo doce apkeltámeséyak ma'a. 18Neyseksa apheykha nekha mésa aptókagko aptéyak axta aptahak apkeláneya Jesús apkeltámeséyak se'e:

—Kélxama sat kéxegke helpelakkasesek kólának amaxchek keso sektoko nak xamo' sekto.#Sal 41.9. Nakso' xa sektahakxa nak seláneya kéxegke.

19Kellapwámegkók agko' axta apkeltámeséyak apkelleg'a xa, xama xama axta apmákpok aptaha apkelmaxneyeyncha'a s'e:

—¿Ko'oya sat?

20Aptahak axta apchátegmowágko Jesús se'e:

—Kélxama sat xa doce nak, sat xa sekpasma nak sektamhágko pan aksok kañe' sokpayhe. 21Katnehek sat aptaha nak Apketche énxet ma'a ektémakxa nak ekxeyenma eknaktáxésamaxche weykcha'áhak yakweykenxa katnehek; wánxa agkok, sagko' agko' sat eyke katnehek kéllegasáseykegkoho m'a énxet appelakkaseso nak apkeltémo emakpok aptaha nak Apketche énxet. Tásek axta eykhe metyemek xa énxet nak.

22Neyseksa aptéyak axta apmak Jesús pan, apmések axta ekxeyenma apwáxok Dios, keñe axta apyepta nepyeseksa, apkelmeyásegkek axta apkeltámeséyak. Aptahak axta apkeláneya s'e:

—Kólma, kóltaw, keso sekyókxoho ko'o s'e.

23Keñe axta apma anhan egheykok, apmések axta ekxeyenma apwáxok Dios, apkelmeyásegkek axta apkeltámeséyak, apyókxoho axta anhan apyenágkok. 24Aptahak axta apkeláneya s'e:

—Keso éma#Ex 24.8; Zac 9.11. ahagkok ko'o s'e ektaha nak ekteméseso ekmámnaksoho m'a ekhémo mók nelpakhetchásamáxkoho nak Dios,#Jer 31.31-34. cháxa éma ekyegkenáxko nak yakwayam kapasmok apyókxoho énxet xa. 25Eltennásek eyke ko'o kéxegke peya meynekxók cha'a vino elánamáxche nak anmen yámet ekyexna, ekwokmoho sekyenákxo vino axnagkok ma'a aptémakxa nak Wese' apwányam Dios.

Jesús apxeyenma Pedro peya etnehek hó magya'áseyak

(Mt 26.30-35; Lc 22.31-34; Jn 13.36-38)

26Apkelmeyákxeyk axta egkexe Olivos natámen apkelmeneykmaso negmeneykmaso eñama nak Salmos. 27Aptahak axta apkeláneya Jesús apkeltámeséyak se'e:

—Kélyókxoho sat kamaskok selakawo kéxegke, hakte temegkek eknaktáxésamaxche s'e: ‘Wakhek sat ko'o apkeláneykha nekkések, keñe sat yexpaknek ma'a nekkések.’#Zac 13.7. 28Ekxátekhágwokmek sat agkok ko'o, sekweykekxa emonye sat atnehek ko'o m'a Galilea, keñe sat kólwakxak kéxegke axayo'.’#Mt 28.16.

29Aptahak axta apchátegmowágko Pedro s'e:

—Kamaskok sat eykhe etnehek apcháyo selxegexma'a, megkamassehek eyke ko'o seyáyo exchep.

30Aptahak axta apchátegmowágko Jesús se'e:

—Antanxo sat katnehek xép mexeyenma sekwesey keso axta'a nak, amonye ekteme ánet elpáwa tat'a. Nakso' xa sektahakxa nak sekpeywa seyáneya exchep.

31Wánxa agkok, aptahak axta apyennaktésekmoho appeywa Pedro s'e:

—Watsapok sat eykhe xamo' xép, megkamassehek eyke sekxeyenma apwesey exchep.

Hawók axta anhan aptahakxa apkelpakmeyesma apyókxoho apkeltámeséyak.

Jesús apteme nempeywa nelmaxnagko yókxexma Getsemaní

(Mt 26.36-46; Lc 22.39-46)

32Apkelmeyákxeyk axta yókxexma ekwesey axta Getsemaní. Aptahak axta apkeláneya Jesús apkeltámeséyak se'e:

—Kólhakha sekxo' se'e. Amhagkok sekxo' ko'o mók nekha atnegwók nempeywa nelmaxnagko.

33Apyentegkek axta Pedro, Santiago, tén han ma'a Juan. Awanhek axta elapwayam Jesús, teyekmek axta anhan apwáxok. 34Aptahak axta apkeláneya s'e:

—Eyeykhágwokmók ko'o selapwayam máxa entahak sétsapa enxoho. Kólhakha s'e. Nágkólnakten aksa, helwahánho sat matyenma.

35Yetlókók axta apxega Jesús apmahágko yámmakhawo, apháxegwokmek axta ekwokmoho aptekxeya ekpayhakxa nápát xóp. Apkelmaxnakkek axta Dios yakwayam enxoho megkaweyk xa ekmáske nak, cham'a apkepmenyého enxoho Dios. 36Aptahak axta apkelmaxnagko Jesús se'e: “Táta, apwanchek xép elának ekyókxoho aksok: ná egyána aksa añegkohok ko'o yakwánxa nak hetnehek, ekyetchesamaxkoho nak xama egheykok negya aksok ekmáskel'a; momenyék ko'o kalanaxchek ma'a sekmamenyého ahagko' nak, wánxa m'a apmopmenyého nak xép.”

37Keñe axta apmeyákxo makham aphágkaxa apkeltámeséyak. Apwetágwakteyk axta apnaktena. Aptahak axta Jesús apcháneya Pedro s'e:

—Simón, ¿aptencheya? ¿Mopwancheya apkelenmáxekpoho exchep teyn eyakhe ekweykmoho xama hora? 38Kólleyxmakha, nágkólnakten, kólteme nempeywa nelmaxnagko yakwayam enxoho megkahapwék kéxegke ekyekkónma, atsék eykhe kólmawho kóllának kéxegke m'a ekpayhawo nak anlana', kélyelkáxko eyke.

39Aptakháwok axta makham Jesús, apheyások axta makham apteme nempeywa nelmaxnagko m'a aptahakxa axta. 40Xama axta apmeyanto makham aphágkaxa apkeltámeséyak, apwetágwakteyk axta makham apnaktena, hakte mopwancha'ak axta menaktena. Axta elya'ásegkok yakwánxa etnehek yátegmowágkok. 41Antanxo axta entahak apweykekxa aphágkaxa apkeltámeséyak. Aptahak axta apkeláneya s'e:

—Kélnaktenche neykel'a makham kéxegke kéllókasa kélyampé. Nágkólnakténekxa kaxwo', wokmek kaxwo' yakwánxa kólmések aptaha nak Apketche énxet ma'a énxet'ák melya'asáxma nak. 42Nók, kólchaknekxa néten; keto' apwa'akxa m'a ektaha axta apkeltémo amaxchek ko'o.

Jesús apmomap

(Mt 26.47-56; Lc 22.47-53; Jn 18.2-11)

43Neyseksa apkeltenneykha Jesús axta apwokmok Judas, aptaha axta apkeñama nepyeseksa m'a doce Jesús apkeltámeséyak nak. Apxámok axta énxet apkelxegexma'a apwokmo m'a, yetlo apkelmeykha sókwenakte, yámet axta anhan apkelmeykha. Enxet'ák apkelámha apmonye'e appasmo apkelmaxnéseso Dios énxet'ák apagkok axta apkeláphaso, tén han ma'a apkelxekmóso nak apnámokkok ektémakxa segánamakxa, tén han ma'a apkelámha apmonye'e nak énxet'ák judíos kélakneykekxexa. 44Nano' axta apkeltennasa Judas énxet'ák yakwánxa etnehek, yakwayam enxoho elya'asagkohok apkelxegexma'a aptémakxa Jesús. Aptahak axta apkeláneya s'e: “Enxet sekpetsesakxa enxoho ko'o, cha'a Jesús ma'a; kólma sat, kóltakmelchesho sat kélyentameykekxa.” 45Apyo'ókmek axta Judas apkenmágkaxa Jesús, keñe axta aptaha apcháneya s'e:

—¡Sẽlxekmóso!

Keñe axta appetsesa. 46Yetlókók axta anhan kélpathetma Jesús, apmákpek axta anhan.

47Aplekkek axta sókwenakte apagkok xama énxet apkenmeyncha'a axta anhan ma'a, apyaktenchesek axta anhan apeykok ma'a apkemha apmonye appasmo nak apkelmaxnéseso Dios énxet'ák apagkok apkeláneykha. 48Aptahak axta Jesús apkelmaxneyeyncha'a énxet'ák se'e:

—¿Yaksak ektaha kélsókmoho nak kéxegke sókwenakte tén han yámet selya'awa yakwayam helmok, máxa énxet ekmaso aptémakxa eltemesásak? 49Yókxoho ekhem axta ko'o selxekmóso énxet kañe' tegma appagkanamap#Lc 19.47; 21.37. kélnepyeseksa kéxegke, axta anhan helmák kéxegke. Temék eyke yakwayam enxoho katnehek ma'a ektémakxa axta eknaktáxésamaxche weykcha'áhak.

50Apyenyókek axta aksa apxakko' Jesús apkeltámeséyak apkenyahágko. 51Wánxa agkok, xama wokma'ák axta eyke apyetláwak, apchaklákpo apáwa. Apmákpek axta xa wokma'ák nak, 52aplekkek axta aksa apchaklamap apkenyaha meyke apáwa.

Jesús kélyentama aphágkaxa énxet'ák ekyawe kéláyo nak

(Mt 26.57-68; Lc 22.54-55,63-71; Jn 18.12-14,19-24)

53Kélyentamákxeyk axta Jesús aphakxa apkemha apmonye nak appasmo apkelmaxnéseso Dios énxet'ák apagkok, apchaknákxeyk axta anhan apyókxoho énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a apkelámha apmonye'e nak apchakneykekxexa judíos, tén han ma'a apkelxekmóso nak apnámokkok ektémakxa segánamakxa. 54Axta etétegkohok Pedro apyetlawa kélya'asakxa Jesús, axta apwokmohok ma'a apyawakxa axta apwáxok tegma, apkemha apmonye appasmo apkelmaxnéseso Dios énxet'ák apagkok apxagkok axta m'a. Aphakmek axta xamo' sẽlpextétamo aptakmelcheso axta tegma appagkanamap apkextegwokmo táxa.

55Aptegyágkek axta amya'a yakwayam yának emátog Jesús ma'a énxet'ák apkelámha apmonye'e nak appasmo apkelmaxnéseso Dios énxet'ák apagkok, tén han ma'a apyókxoho énxet'ák ekyawe nak kéláyo. Axta eyke ét'ak yakwánxa etnésesek. 56Apxámok axta eykhe énxet apkelwayam apteme cha'a apkelmopwána amya'a apkelxéna Jesús, axta eyke kaxnawok cha'a mók aksok apkelxeyenma. 57Nápakha énxet axta apchaknákxak néten, aptamhágko apkelmopwána amya'a apxéna Jesús. Aptahak axta apkelpakmeta s'e:

58—Nenlegayak axta negko'o aptéma appeywa s'e: ‘Ategkesek sat ko'o s'e tegma appagkanamap nak, ektaha axta énxet apkelané, keñe sat antanxo ekhem axátekhásekxak makham pók megkatnaha nak énxet apkelané.’#Jn 2.19.

59Axta eyke makham kaxnawok mók apkelpakmeyesma apxéna xa.

60Keñe axta apkempákxo néten apkemha apmonye axta appasmo apkelmaxnéseso Dios énxet'ák apagkok nápakta'awo' énxet'ák. Aptahak axta apkelmaxneyeyncha'a Jesús se'e:

—¿Yagyátegmowágkok xép ektahakxa nak apxénamap ekmaso?

61Apwanmakkek axta aksa Jesús, axta yátegmowágkok. Aptahak axta makham apkelmaxneyeyncha'a apkemha apmonye appasmo apkelmaxnéseso Dios énxet'ák apagkok se'e:

—¿Xépya nakso' Mesías, aptaha nak Dios aptakmalma Apketche?

62Aptahak axta Jesús se'e:

—Nakso', ko'o neykhe. Kólwetak sat kéxegke aptaha nak Apketche énxet exek ekpayhókxa apkelya'asamakxa m'a Dios ekha nak apyennakte, kólwetak sat nahan éxyok neyseksa yaphopé m'a néten.#Dn 7.13.

63Apkelyepteyk axta aptaxno énxet aptaha axta apkemha apmonye appasmo apkelmaxnéseso Dios énxet'ák apagkok magkenatcheso megkalcha apwáxok. Aptahak axta s'e:

—Megkapayhawok kaxwo' antegyekxohok énxet ektaha apweteykegkoho aptémakxa. 64Kélleg'ak kéxegke ektahakxa nak appeywa enmexeyncha'a Dios. ¿Háxko ektahakxa elchetamso kélwáxok kéxegke?

Apyókxoho énxet axta hawók mók apkelpakmeyesma apxéna aptaha apsexnánémap tén han ekpayhawo emátog.#Lv 24.16.

65Yetlókók axta apkexpakhe apyamánog nápakha énxet'ák, tén han apchaklásesa nápát, aptekpagáha axta anhan. Aptahak axta apcháneya s'e:

—¡Ey'asagkoho hana xa ektaha nak ektekpaga!

Keñe axta aptekpagkasa nápát ma'a sẽlpextétamo aptakmelcheso axta tegma appagkanamap.

Pedro apteme hó magya'áseyak Jesús

(Mt 26.69-75; Lc 22.56-62; Jn 18.15-18,25-29)

66Apheyk axta kóneg tegma Pedro. Wokmek axta xama kelán'a ektaha axta apkemha apmonye appasmo apkelmaxnéseso Dios énxet'ák apagkok apkeláneykha; 67Xama axta ekwet'a Pedro apha apkexta táxa, kelanawók axta, entahak axta eyáneya s'e:

—Etnohok axta cha'a apxegexma exchep Jesús apkeñama nak Nazaret.

68Axta eyke exénak Pedro. Aptahak axta s'e:

—May'ásegkok ko'o m'a, may'ásegkok nahan xa ektahakxa nak ekpeywa.

Keñe axta apmeyákxo Pedro átog aptepa yókxexma. Yetlókók axta ekpáwá xama tat'a. 69Wetákxeyk axta makham Pedro m'a kelán'a nak. Entahak axta eláneya énxet'ák se'e:

—Cháxa apxegexmal'a xa.

70Axta eyke exénak makham Pedro. Yáma wegkawók axta, keñe axta appakhetchesa Pedro m'a énxet'ák apheyncha'a axta m'a. Aptahak axta apcháneya s'e:

—Nakso' aptaha exchep apxegexma m'a énxet nak. Galilea anhan apkeñamak xép.

71Apyennaktésakmók axta appeywa Pedro, apxéna eñásesagkohok Dios metnaha enxoho ekmámnaksoho appeywa. Aptahak axta s'e:

—¡May'ásegkok ko'o m'a énxet kélxéna nak kéxegke!

72Yetlókók axta anhan ekteme ánet ekpáweykekxa tat'a, keñe axta ekxénwákxoho apwáxok Pedro aptémakxa axta apkenagkama Jesús se'e: ‘Amonye ekteme ánet ekpáwá tat'a sat katnehek antanxo mexeyenma exchep sekwesey.’ Keñe axta apwana.

Kasalukuyang Napili:

SAN MARCOS 14: LEGN

Haylayt

Ibahagi

Kopyahin