SAN LUCAS 1
1
Amya'a eyeynókxa
1Apxámok axta eykhe énxet apmáheyo enaktáxesagkok weykcha'áhak ektémakxa axta negyeseksa negko'o, 2ekhawo m'a ektémakxa axta senlegaso negko'o énxet'ák, ektaha axta apkelweteykegkoho sekxo' eyeynamókxa, cham'a ektaha axta kélásennagko eñeksek Dios appeywa. 3Xép, Teófilo,#Hch 1.1. aptaha nak seyásekhayo, ektakmelchesamók axta ko'o sektegyeykencha'a amya'a ekyókxoho eyeynamókxa ektéma xa. Xénchek axta ko'o ewáxok ektakmela agko' atakmelcheseshok sektáxéseso exchep xa, cham'a ektémakxa axta cha'a nentámen axta, 4yakwayam enxoho ey'ásegwomhok ektakmela m'a amya'a ektémakxa axta kélxekmóso exchep.
Xama Dios apchásenneykha apxeyenma Juan el Bautista aptéyam
5Aphegkek axta xama énxet aptaha axta appasmo apkelmaxnéseso Dios énxet'ák apagkok apwesey axta Zacarías, aptaha axta apkeñama nepyeseksa Abías apkelxegexma'a,#1 Cr 24.10. Isabel axta ekwesey aptáwa, Aaron aptáwen neptámen axta m'a, cham'a aptémakxa axta makham Herodes wese' m'a yókxexma Judea. 6Elpéwomo axta nápakto' Dios xa ánet nak, kelyaheykekxók axta ekyókxoho m'a apkeltémókxa nak antehek Dios, tén han ma'a Wese' egegkok segánamakxa apagkok nak, méko axta kawának kasexnenak xama enxoho. 7Méko axta apketchek Zacarías, hakte katétche axta Isabel, hawók axta anhan mók ekteme elwanyamo' xa ánet nak.
8Xama ekhem axta entahak ekpehewákxo apkeltamheykha nápakto' Dios apkelánamákpoho énxet'ák appasmo axta apkelmaxnéseso Dios énxet'ák apagkok, ektaha axta Zacarías apkelxegexma'a, 9ekhawo m'a aptamheykegkaxa axta cha'a énxet'ák ektaha axta appasmo apkelmaxnéseso Dios énxet'ák apagkok. Xama aksok axta aptawásegkok yakwayam ey'asagkohok ekpehewayam yakwayam etxek ma'a kañe' Wese' egegkok tegma appagkanamap apagkok ektahakxa axta ekpagkanamaxchexa agko', yakwayam ewatnek aksok ánek ekmátsa ekpakneyam, Zacarías axta pehewokmok yakwayam etxek ma'a. 10Apyókxoho énxet axta aptamhágkok nempeywa nelmaxnagko yókxexma, neyseksa apwatno Zacarías aksok ánek ekmátsa ekpakneyam. 11Xama Dios apchásenneykha axta apxekmowásekpohok Zacarías, apkenegwa'ak axta ekpayhókxa nak nelya'asamakxa nekha ekwatnamáxchexa aksok ánek ekmátsa ekpakneyam. 12Xama axta apwet'a Zacarías ma'a Dios apchásenneykha nak, apyegwakkek axta, apchekak axta nahan. 13Wánxa agkok, aptahak axta apcháneya Dios apchásenneykha s'e:
—Zacarías, náheyé' aksa. Apleg'awók Dios apkelmaxnagko exchep, kategkesek sat étche apkenna' aptáwa exchep, etnéses sat apwesey Juan. 14Awanhok agko' sat katnehek xép ekpayheykekxa apwáxok, apxámokxoho énxet sat nahan kalpayhekxak apwáxók apteyekmo enxoho m'a, 15hakte ekha kéláyo sat kóltehek nápakto' Dios ma'a apketche peya nak etyamok. Ménhek sat vino tén han ma'a anmen agko' nak,#Nm 6.3. elánhok sat nahan apwáxok Espíritu Santo amonye aptéyam ma'a. 16Exámásekxak sat énxet'ák Israel aptemesáseykekxa melya'áseyam Dios Wese' apagkok. 17Wese' egegkok apmonye sat exog xa Juan, exhok sat ma'a Elías aptaha axta Dios appeywa aplegaso, cham'a ektémakxa axta apmopwána tén han ekha apyennakte, yakwayam enxoho yásekhasásekxohok apketchek ma'a énxet'ák,#Mal 4.5-6. yakwayam enxoho kaltámeyagkok apkelyaheykekxoho m'a énxet'ák meyke apkelyaheykekxoho nak. Sat etnésesek apkeláneseykekxa apkeltémakxa énxet'ák yakwayam emok takha' Wese' egegkok xa ektaha nak.
18Aptahak axta Zacarías apkelmaxneyeyncha'a Dios apchásenneykha s'e:
—¿Háxko katnehek atnésesek ko'o ekmámnaksoho xa? hakte ekwanakmek ko'o, wanakmek nahan ma'a etáwa'.
19Aptahak axta apchátegmowágko Dios apchásenneykha s'e:
—Ko'o Gabriel.#Dn 8.16; 9.21. Ektamheykha cha'a ko'o nápakto' Dios, exchek seyáphaso apkeltamho apakhetchesek xép ma'a, tén han altennaksek se'e amya'a ektakmela nak. 20Meyke appeywa sat eyke etnehek kaxwo' xép, hakte apya'ásekmek xa sektahakxa nak seyáneya, mopwanchek sat epakmétek ekwokmoho ektaha xa sektahakxa nak seyáneya exchep.
21Wegkak axta apkelhaxanma énxet'ák apheykha yókxexma etyapok Zacarías, yaksak kexaha ektaha ekwegkawo nak apha kañe' tegma appagkanamap, axta cha'a aptahak apkelmaxneyeyncha'a pók. 22Xama axta aptepa Zacarías, mopwanchek axta apkelpakhetchesa énxet'ák, keñe axta apyekpelcha énxet'ák apwet'a Zacarías xama aksok kélxekmósamo m'a kañe' tegma appagkanamap ekpagkanamaxchexa nak, apkelpenteyháha axta aksa apkelpakhetchesa apnámokkok, wenaktémok axta ekteme meyke appeywa.
23Xama axta appenchesa aptamheykha Zacarías kañe' tegma appagkanamap, keñe axta apmeyákxo apxagkok. 24Lóso' axta entemék Isabel natámen xa, axta katyapmók axagkok ekweykmoho cinco pelten, 25“Wese' egegkok setnéseso s'e” —axta entemék cha'a elchetamso awáxok, “yakwayam enxoho kamaskok sewanyeyncha'a énxet'ák”.
Xama Dios apchásenneykha apxeyenma Jesús yakwayam etyamok.
26Seis pelten axta weykmok ekteme lóso' Isabel, keñe axta apchápháseykxo makham Dios apchásenneykha apwesey Gabriel ma'a tegma apwányam Nazaret, yókxexma Galilea, 27axta apcháphásak ma'a ekhakxa axta xama kelán'a étkok meyke kélteméseseykmohóxma, ekwesey axta María, cham'a ekpagkanma axta ekmáheyo katnehek atáwa xama énxet apwesey axta José, aptaha axta David aptáwen neptámen.#Mt 1.18. 28Aptaxnegwokmek axta Dios apchásenneykha m'a ekhakxa axta María. Aptahak axta appeykesa s'e:
—Ekpeykesek xeye' ektaha nak ekleklamo apwáxok Dios, Dios Wese' egegkok aptahak apxegexma exche'.
29Xegawók axta agkenyek María ekleg'a ektahakxa appeywa Dios apchásenneykha. Kelchetamchek axta awáxok eltamho kay'asagkohok ma'a ektahakxa axta kélpeykeso.
30Aptahak axta apcháneya Dios apchásenneykha s'e:
—María, náheyé' aksa, leklamók apwáxok Dios ektémakxa exche'. 31Lóso' sat kaxwo' katnehek xe', kategkesek sat étche apkenna', katnéses sat apwesey Jesús.#Mt 1.21. 32Etnehek sat énxet meyke ekhémo m'a, eltamhakpok sat Dios meyke ekhémo Apketche, Dios Wese' egegkok sat etnésesek Wese' apwányam ma'a, ekhawo m'a aptemésesamakxa axta David aptaha axta apyap nano', 33yakwayam enxoho megkatnegwomek néxa apteme Wese' apwányam nepyeseksa énxet'ák Israel. Megkamassegwomek sat apteme Wese' apwányam.#2 S 7.12,13,16; Is 9.7.
34Entahak axta María elmaxneyeyncha'a Dios apchásenneykha s'e:
—¿Háxko katnehek hetnehek ko'o xa ektaha nak, mapatheteykegkok ko'o makham xama énxet enxoho?
35Aptahak axta apchátegmowágko Dios apchásenneykha s'e: Eweywenták sat Espíritu Santo takháxet xeye', káhapwatak sat Dios meyke ekhémo apmopwána, máxa yaphopé sat katnehek. Ekeso eñamakxa peya nak eltamhakpok Appagkanamap, tén han Dios Apketche m'a sakcha'a peya nak etyamok. 36Kótak sat nahan étche apkenna' m'a Isabel ektaha nak mók agko' xeye', ekwanyamo' eykhe entahak; seis pelten kaxwo' entahak ekteme lóso' ma'a ekxénamaxkoho axta cha'a megkamowána kótak étche. 37Méko xama aksok megkamopwána elának Dios.#Gn 18.14; Jer 32.16,27.
38Entahak axta María eyátegmowágko s'e:
—Ko'o sekteme Wese' egegkok apkeláneykha, hetnésesek sat ma'a aptahakxa nak xép seyáneya.
Aptakháwok axta makham Dios apchásenneykha natámen ekteme ekpeywa María xa.
María ekteme meyk'a Isabel
39Keñe axta ekpekheyásawo ekxega María ekmahágko m'a nátegma ekxámakxa axta egkexe elyawe, yókxexma Judea. 40Taxnegwokmek axta Zacarías apxagkok María, keñe axta ekpeykesa Isabel. 41Xama axta ekleg'a Isabel ektahakxa ekpeykeso María, keñe axta apkeltakhaheyncha'a sakcha'a m'a awáxok, aplanawók axta nahan awáxok Espíritu Santo. 42Entahak axta ekyennaktésawo ekpeywa Isabel se'e:
—Tásók agko' aptemésesakxa exche' Dios neyseksa ekyókxoho kelán'ák nak, tásók agko' nahan aptemésesakxa Dios ma'a étche. 43¿Yaksak kexaha ektaha ektakmela nak ko'o setnahakxa, cháxa ekxegakmo nak Wese' egegkok egken setnaha meyk'a? 44Xama exchek sekleg'a sepeykesa, keñe apkeltakhaheyncha'a ewáxok sakcha'a, payhekxeyk xeyk apwáxok. 45¡Eleñémo agko' megkay'áseykmo exche' ekmáheyo katnehek ma'a apkeltennasama axta katnehek Wese' egegkok!
46Entahak axta María s'e:
“Ektemésesek ko'o apcheymákpoho Dios
ekweykmoho kañók agko' ewáxok#1 S 2.1-10; Sal 113.5-9.
47Payhekxeyk ewáxok
eñama m'a Dios aptaha nak Semasma.#Is 61.10.
48Hakte melwáteseykmok seláneykha Dios,
sektaha nak apkeláneykha megkeymáxkoho.
Sakhem eyeynawo selteme seleñémo
apyókxoho énxet'ák, ekweykmoho néxa,
49hakte tásók agko' ko'o
setnésesakxa Dios ekha nak apyennakte,
¡Ekpagkanamaxche agko' apwesey!
50Yemlekxohok cha'a Dios ma'a énxet'ák
ektaha nak apcháyo.
51Ekyókxoho apmopwána axta
apmáha aptamheyncha'a
apkexpánchesa m'a énxet'ák
eleymáxkoho nak apwáxók
yetlo m'a ektémakxa axta
ekxéneykha apwáxók yakweykenxa etnahagkok.
52Apkelántekkesek axta
apheykegkaxa néten apkeltaháno m'a
kelwese'e apkelwányam nak,
keñe axta aptemesáseykxo néten
ma'a énxet'ák meyke
apkeleymákpoho nak
53Apyeykháseykmok axta apméso
aksok eltakmela m'a
énxet'ák elnapma meyk,
keñe apkeláphasa yetlo
meyke aksok apagkok ma'a
kelwese'e nak.
54Appasmeyk axta énxet'ák Israel,
cham'a aptaha axta apkeláneykha,
axta anhan kalwagkágweykmok
aptéma cha'a apkelemleykekxoho.
55Cháxa aptémakxa axta
apkenagkama Dios ẽlyepmeyk nano' negko'o xa
cham'a Abraham,#Gn 17.7.
tén han ma'a yakwayam nak
etnahagkok aptawan'ák neptámen,
megkatnegwayam enéxa.”
56Apkántanxo pelten axta heykmok xamo' María m'a Isabel keñe axta ektakháwo makham axagkok.
Juan Bautista aptéyam
57Xama axta ekwokmo ekhem yakweykenxa katnehek nakláwa Isabel, tegkesek axta étche apkenna'. 58Apya'aweykxek axta ekhóxo tén han ma'a námokkok ancha'awo' nak, yakwayam kalpayhekxohok apwáxók xamo', cham'a apkelya'ásegwokmo axta ektakmela aptemésesakxa Dios ma'a Isabel. 59Kélyentamákxeyk axta sakcha'a yakwayam kólyenyekhásesek apyempehek kólkahaksek, cham'a ekwokmo axta ocho ekhem aptéyam.#Lv 12.3. Zacarías axta eykhe kélmokók kóltemésesek apwesey, cham'a ektémakxa nak apwesey apyap, 60wánxa agkok, entahak axta eyátegmowágko egken se'e:
—Nágkólteméses xa. Kólteméses apwesey Juan.
61Aptahak axta apchátegmowágko énxet'ák se'e:
—Méko xama ekteme námokkok apwesey xa ektéma nak.
62Kélmék axta aksa kéltemesásak kélmaxneyeyncha'a apyap ma'a sakcha'a, yakwayam enxoho kólya'asagkohok yakwánxa etnésesek apwesey apketche. 63Yántéseksek étkok axta apkeltamhok kóltegyesha m'a apyap, cham'a kéltáxésamo axta cha'a. Aptahak axta aptáxéso s'e: ‘Juan apwesey xa’. Pelakkasek axta nahan apwet'a apxámokxoho énxet. 64Yetlókók axta anhan ektépeykekxa appeywa Zacarías, apkeltemésesek axta apcheymákpoho Dios. 65Apkelyegwakkek axta apyókxoho aphóxo, ekyókxoho yókxexma Judea ekxámakxa xóp elekháhéyak axta kéltennáha m'a ektahakxa axta. 66Kelchetagkasek axta apwáxók apxámokxoho énxet ektaha axta apkellegé. Aptahak axta apkelpakmeta s'e: “¿Yaksak sat kexaha etnehek ma'a sakcha'a nak?” Hakte nakso' axta ekwetáxko appasmo Wese' egegkok ma'a sakcha'a nak.
Zacarías apmeneykmaso
67Aplanawók axta apwáxok Espíritu Santo Zacarías aptaha axta sakcha'a apyap, aptahak axta apxéna amya'a eñama Dios se'e:
68“¡kóltemésesek sat apcheymákpoho
Wese' egegkok, Israel Dios apagkok!
Hakte apwayak axta yakwayam
elwagkasek teyp énxet'ák apagkok!
69Egaphásesek axta negko'o
segwagkaso teyp ekha apyennakte,
David aptáwen neptámen,
cham'a aptaha axta apkeláneykha.
70Cháxa apxeyenma axta Dios xa,
eñama apkelxeyenma m'a énxet'ák
apkellegaso axta appeywa,
ektaha axta apkelpagkanamap,
71apxeyenma axta peya hẽlwagkasek teyp
nepyeseksa nelenmexma,
tén han hẽlwagkasek teyp
nepyeseksa m'a énxet'ák sẽltaknagko nak,
72tén han apxeyenma
elemlekxohok ma'a ẽlyepmeyk nano',
tén han apxeyenma
megkalwagkámhek ma'a
ekhémo mók nelpakhetchásamáxkoho nak Dios,
ektaha nak ekpagkanamaxche.
73Keso aptemésesama axta
ekmámnaksoho agko' appeywa Dios
apmésama Abraham negko'o egyap nano' se'e:
74cham'a apxéna axta hẽlmeyók
nepyeseksa nelenmexma nak,
yakwayam antehek negyetleykha
yetlo meyke negaye xama enxoho,
75keñe nahan antehek negyepetcheyo
yetlo ekpéwomo nentémakxa
tén han nempagkanchásamáxche
yókxoho ekhem neyseksók negha.
76Xép hatte, eltamhakpok sat xép
aplegaso appeywa m'a Dios meyke ekhémo nak,
hakte exog sat apmonye Wese' egegkok
yakwayam elanekxések ámay#Mal 3.1. apagkok,
77yakwayam elya'asásegwók énxet'ák apagkok
peya meyakmagkásekxék Dios
apkeltémakxa melya'asáxma,
tén han peya egkések apkelwayam teyp.
78Hakte Dios egagkok negko'o
ensantegkásak elseyexma
ektémol'a kaxwé ekteyapma ekhem,
eñama m'a ekyawe segemleykekxoho nak,
79yakwayam enxoho kalsásesexma
m'a énxet'ák apheykha nak ekyaktésakxaxma,#Is 9.2.
yakwayam hennaklakxak ma'a ámay
ekyetnamakxa nak meyke ektahakxa egwáxok.”
80Apwánenyek axta m'a sakcha'a nak, yennakweykmek axta apteme mey'áseyam Dios, apheykmek axta yókxexma meykexa énxet ekwokmoho ekhem yakwánxa exekmósakpohok énxet'ák Israel.
Kasalukuyang Napili:
SAN LUCAS 1: LEGN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Lengua Sur (Enxet) New Testament © United Bible Societies, 1992.
