GENESIS 16:1-16

Si Sarai na asawa ni Abram ay hindi nagkaanak sa kanya; at siya'y may isang alilang babae na taga-Ehipto, na ang pangalan ay Hagar. Sinabi ni Sarai kay Abram, “Ako'y hinadlangan ng PANGINOON na magkaanak. Sumiping ka sa aking alilang babae; marahil ay magkakaanak ako sa pamamagitan niya.” At pinakinggan ni Abram ang sinabi ni Sarai. Kaya't pagkaraan ng sampung taong paninirahan ni Abram sa lupain ng Canaan, kinuha ni Sarai na asawa ni Abram si Hagar na taga-Ehipto, na kanyang alila, at ibinigay kay Abram na kanyang asawa upang maging asawa niya. Siya'y sumiping kay Hagar at naglihi; at nang makita ni Hagar na siya'y naglihi, tiningnan niya na may paghamak ang kanyang panginoong babae. At sinabi ni Sarai kay Abram, “Mapasaiyo nawa ang kasamaang ginawa sa akin, ibinigay ko ang aking alila sa iyong kandungan; at nang kanyang makita na siya'y naglihi ay hinamak ako sa kanyang paningin. Ang PANGINOON ang humatol sa akin at sa iyo.” Subalit sinabi ni Abram kay Sarai, “Ang iyong alila ay nasa iyong kapangyarihan. Gawin mo sa kanya ang mabuti sa iyong paningin.” Pinagmalupitan siya ni Sarai at si Hagar ay tumakas. Natagpuan siya ng anghel ng PANGINOON sa tabi ng isang bukal sa ilang, sa bukal na nasa daang patungo sa Shur. At sinabi niya, “Hagar, alila ni Sarai, saan ka nanggaling at saan ka pupunta?” At kanyang sinabi, “Ako'y tumatakas kay Sarai na aking panginoon.” Sinabi sa kanya ng anghel ng PANGINOON, “Magbalik ka sa iyong panginoon, at pasakop ka sa kanyang mga kamay.” Sinabi din sa kanya ng anghel ng PANGINOON, “Pararamihin kong lubos ang iyong binhi, at sila'y hindi mabibilang dahil sa karamihan.” At sinabi sa kanya ng anghel ng PANGINOON, “Ngayon, ikaw ay nagdadalang-tao at manganganak ng isang lalaki. Ang itatawag mo sa kanyang pangalan ay Ismael, sapagkat pinakinggan ng PANGINOON ang iyong dalamhati.” Siya'y magiging isang taong gaya ng mailap na asno, ang kanyang kamay laban sa lahat, at ang kamay ng lahat ay laban sa kanya; at habang nabubuhay ay kalaban ng lahat niyang mga kapatid. Kaya't kanyang pinangalanan ang PANGINOON na nagsalita sa kanya, “Ikaw ay Diyos na nakakakita;” sapagkat sinabi niya, “Talaga bang nakita ko ang Diyos at nanatiling buháy pagkatapos na makita siya?” Kaya't pinangalanan ang balong iyon na Balon ng Nabubuhay na Nakakakita sa Akin; ito'y nasa pagitan ng Kadesh at Bered. At nanganak si Hagar ng isang lalaki kay Abram at ang itinawag ni Abram sa kanyang anak na ipinanganak ni Hagar ay Ismael. Si Abram ay walumpu't anim na taon nang ipanganak ni Hagar si Ismael sa kanya.