San Mateo 2
2
Ʉ̃sʉʉ mʉikã'ko cana ma'jñoko pa'iche che'chena Jesure ñañu chini saisi'ere kʉamʉ
1Herodes chʉ̃'ʉrʉmʉna Judea cheja cajoopona Belén vʉ'ejoopona jñaasiva'ʉasomʉ Jesús. Reparʉmʉ vañʉʉji ʉ̃sʉʉ mʉikã'kore pa'iʉna ʉmʉpãi repakã'ko pa'ina ma'jñoko pa'iche che'chenajejʉ ña masi, Jerusalén vʉ'ejoopona so'opi raniasome. 2Rani tĩ'a repacheja pa'inare ija'che sẽniasaasome repana:
—Chĩiva'ʉ, chura jñaasiva'ʉ judíopãi chʉ̃'ʉjava'ʉ, ¿jeechejare pa'ikʉ? Repaʉ'te jñaasi'ere kʉakʉ ʉ̃sʉʉ mʉikã'kore pa'iʉna vañʉʉ'te ñasinajejʉ repava'ʉni ro're pʉʉ ñu'ijʉ pojoñu chini ku'eme chʉkʉna —chiniasome repana.
3Herodes repacheja chʉ̃'ʉkʉ repana i'kasi'ere chekʉnapi kʉarena asa, rʉa cuasaasomʉ. Jerusalén vʉ'ejoopo cana ũcuaja'che ũcuanʉko asa, rʉa cuasaasome. 4Ũcuarʉmʉ Herodes jã'aja'ñe asa, cuasakʉ judío phairipãi chʉ̃'ʉnana'me judíopãi che'chonare repaʉ pa'ivʉ'ena rani chi'ia'jʉ chini chʉ̃'ʉasomʉ. Rani chi'irena repanare,
—Pãi ũcuanʉkore chʉ̃'ʉa'kʉ chini Dios Raojaʉ, ¿jeechejana repaʉ'te chĩire jñaajanaa'ñe? —chiiʉ sẽniasaasomʉ repaʉ. 5Chikʉna i'kaasome repana repaʉ'te.
—Judea cheja cajoopona Belén vʉ'ejoopona jñaajaʉasomʉ repaʉ. Aperʉmʉ Dios chʉ'o kʉasi'kʉ repaʉ'te jñaajachejare kʉakʉ tocha jo'kasi'e ija'che kʉamʉ:
6Mʉsanʉkona Judea cheja cajoopo Belén vʉ'ejoopo cana,
“Ʉjajoopo, pa'ipãi pa'ijoopo pa'imanaa'me mai”, chiimanejʉ̃'ʉ.
Mʉsanʉkona pa'ijoopo cajacojñojaʉ Israelpãi ũcuanʉkore chʉ̃'ʉja'mʉ.
Ũcuaʉji chʉ'ʉ neenare Israelpãi mʉsanʉkonare kuirakʉ re'oja'che chʉ̃'ʉkʉ pa'ija'mʉ,
chiimʉ —chiniasome repana.
7Chitena asa Herodes, vañʉʉ pa'isirʉmʉre masira chini ma'jñoko pa'iche che'chenare rope'e soni rao,
—Repaʉ vañʉʉ, ¿jeejarʉmʉna pakʉ? —chikʉna repaʉ'te kʉaasome repana. 8Kʉarena asa repanare ija'che i'kakʉ Belén vʉ'ejoopona saoasomʉ repaʉ:— Belén vʉ'ejoopona sani repaʉ chĩiva'ʉ pa'iche peore sẽniasajaijʉ̃'ʉ. Repava'ʉre ku'e jñaani ra kʉajʉ̃'ʉ chʉ'ʉre. Chʉ'ʉ ũcuaja'che repava'ʉre sani ro're ñu'iʉ pojora chiimʉ —chiiʉ joreasomʉ repaʉ.
9Pãi chʉ̃'ʉkʉji jã'aja'ñe i'kakʉ chʉ̃'ʉʉna asa saniasome repana. Saijʉna repana ʉ̃sʉʉ mʉikã'ko ñasi'kʉ vañʉʉ jo'e pa'iʉ repana saima'a sẽ'sevʉji charo saniasomʉ. Saiʉ chĩiva'ʉ ũhivʉ'e sẽ'sevʉna canʉkaasomʉ repaʉ. 10Vañʉʉ canʉkache ña rʉa pojoasome repana. 11Jã'aja'ñe canʉkaʉna ña ũcuavʉ'ena kaka chĩiva'ʉna'me pʉka'ko María'te ñaasome repana. Repava'ʉre ña ro're ñu'ijʉ pojoasome repana repaʉ'te. Pojocuha repana rasi'e cãjovʉã vata pachokurina'me sũkima'ñana'me chekʉñʉãquee ma'ña ĩsiasome repana repava'ʉre chĩiva'ʉre. 12Repava'ʉre ñacuha pa'ijʉ repana ʉokãitona Dios i'kasi'e ija'che chiiche'te asaasome repana, “Herodes pa'icheja saima'ñe tĩima'api co'ijʉ̃'ʉ mʉsanʉkona”, chiiche'te. Asa repacheja saima'ñe tĩima'api repana pa'ichejana co'isõasome repana.
Egipto chejana kati saisi'ere kʉamʉ
13Ma'jñoko pa'iche che'chena sanisõsirʉmʉna Dios neekʉ ángel Josere repaʉ ʉokãisirʉmʉna rani ija'che i'kaasomʉ:
—Vʉni mʉ'ʉ jojava'ʉna'me pʉka'kore Egipto chejana pesa sajʉ̃'ʉ. Herodes mʉ'ʉ jojava'ʉre vanisõñe'te chʉ̃'ʉra chini ku'eja'mʉ. Jã'ajekʉna sani chʉ'ʉ mʉ'ʉre, “Co'ijʉ̃'ʉ”, chiirʉmʉjatʉ'ka pa'ijʉ̃'ʉ repacheja —chiniasomʉ ángel repaʉ'te.
14Jã'aja'ñe i'kaʉna asa José vʉni ũcuañamipi repaʉ jojava'ʉna'me pʉka'kore sakʉ Egipto chejana sanisõasomʉ. 15Sani Herodes jũnisõsirʉmʉjatʉ'ka repacheja paniasome repana. Jã'aja'ñe cho'orena Dios chʉ'o aperʉmʉ kʉasi'kʉ tocha jo'kasi'epi ija'che kʉacheji ũcuarepa ti'jñecuhasi'kʉa'mʉ, “Chʉ'ʉ chĩire Egipto cheja pa'ikʉni raaʉ chini soimʉ chʉ'ʉ”, chiicheji.
Chĩiva'nani vanisõa'jʉ chini Herodes chʉ̃'ʉsi'ere kʉamʉ
16Ũcuarʉmʉ Herodes ma'jñoko pa'iche che'chena repaʉ'te jorejʉ tĩima'api co'isõsi'ere asa rʉa pe'rukʉ, repana ñasi'e kʉasi'ere jo'e cuasa, “Chura repaʉ chĩi ka'chaʉ̃sʉrʉmʉ panicuhamʉ ie”, chini cuasa Belén vʉ'ejoopona'me ũcuajoopo kueñe pa'ichejña cava'nare chĩiva'nare ʉmʉchĩiva'narechi'a te'eka'chapaʉ̃sʉrʉmʉ pa'iva'nana'me na'a cho'je pa'iva'nare ũcuanʉkore vanisõñe chʉ̃'ʉasomʉ. 17Repaʉji jã'aja'ñe cho'oʉna aperʉmʉ Dios chʉ'o kʉasi'kʉ Jeremías ija'che chiiche tocha jo'kasi'epi ũcuarepa ti'jñecuhaasomʉ:
18Ramá cheja pa'ina ota oiche rʉa asoasomʉ.
Raquelpi, repao mamachĩipi chuenisõrena oio paniasomo repa.
Repaoji cuhaa'ko chini pãi, “Oimanejʉ̃'ʉ”, chinite'easome repao'te.
Jã'ata'ni ũcua cuhama'ñe oniasomo repao mamachĩipi chuenisõrena,
chiicheji.
19Na'a pa'isirʉmʉ Herodes jũnisõsirʉmʉna Josere Egipto cheja pa'ikʉni repaʉ ʉokãisirʉmʉna Dios neekʉ ángel rani ija'che i'kaasomʉ repaʉ'te:
20—Vʉni mʉ'ʉ jojava'ʉna'me pʉka'kore sakʉ Israel chejana jo'e co'ijʉ̃'ʉ. Mʉ'ʉ jojava'ʉre vanisõñu chiisina jũnisõcuhasinaa'me —chiniasomʉ ángel repaʉ'te.
21Ũcuarʉmʉ José jã'aja'ñe i'kaʉna asa vʉni chĩiva'ʉna'me pʉka'kore Israel chejana saasomʉ. 22Jã'ata'ni José Herodes mamakʉji Arquelaopi Judea cheja canani chʉ̃'ʉa'kʉ chini jo'kacojñosi'ere asa Judea cheja saivajʉchʉasomʉ. Ũcuaja'che repaʉ ʉokãisirʉmʉ asa masisi'e Diopi, “Judea cheja saimanejʉ̃'ʉ”, chiisi'ejekʉna Galilea chejana saniasomʉ repaʉ. 23Repacheja sani tĩ'a Nazaret vʉ'ejoopo'te paniasomʉ repaʉ. Jã'aja'ñe cho'orena aperʉmʉ Dios chʉ'o kʉasina kʉajʉ tocha jo'kasi'epi ija'che chiicheji ũcuarepa ti'jñecuhaasomʉ, “Dios Raosi'kʉre, ‘Nazaret vʉ'ejoopo cakʉa'mʉ ikʉ’, chiijanaa'me pãi”, chiicheji.
Kasalukuyang Napili:
San Mateo 2: coe
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2009, Wycliffe Bible Translators, Inc. All rights reserved.
