Fingec fingec 8
8
Doku tunggbaung kpac anec
1Anu Anutungo Noa nga yang sasawa amma ramaburumaka sasawa yegoc wageu kecgec yeneac negensiec. Negensima deu firang bangecfu kpeu doku kpedzima maec. 2#Fing 7:11-12Mau dokukiwa keme kemeaac nagu heigec amma wi sawau dokuac nagu heigec nga sawau kia tegerec. 3Anu uameme 150 wisickeu bangec witiau doku yadiec imoc tondzera yombong kpedzima maec. 4Kpedzima makefu wagengo afo sewenggac uameme 17 ammanu Ararat tikiu heiserima tarec. 5Anu doku kpedzima kemekecmanu afo 10 anec. Anu afo 10 imocac uameme 1 imohai tiki buma buma fingeckenec.
Neng sueyuruec
6Anu uememe 40ac wisic wisickeau Noango wageac firangnaguya warac meecmoc imoc mesiec. 7Mesima koec koec neng mong sueu sawau kpututucke kemma monggoc dzigeneec, ifi kengha amma kecmanu bangecfu doku gbanggedarec. 8Anu kecma bangecfu doku kpedzima kemeec me kpac, imocac hania negenudeac ine hapo neng mong sueu kenec. 9Anu hapo ye yerecgema henu dokungo bangec sokodarecac tatac hofocma monggoc dzigenema Noaaru kenu yeng maria sinema hapo mema wage manau fau yegoc tarec. 10Taru uameme seweng monggoc tomai kecma hapo imocngoc wageunac monggoc sueu kenec. 11Kemma kecma marai dzigeneec. Anu ngeni negenggec! Ye dzigenema oliwamaria gboria mong enarau kisamma haec. Ifi anu Noango yofi negenec doku kpedzima mau bangec fingecdacdac fede. 12Anu ye uameme seweng monggoc tomai kecma hapo monggoc sueu kenec. Anu hapo imoc ye kemma monggoc mi dzigeneec.
Bangec gbanggeec
13Anu Noaac kifaya 601, kifa imocac afo mocguac uameme 1 imohai doku bangec witiau feec imoc gbanggeec. Gbanggeu ye wage bubuya meickema yofi henec bangecngo hanahema gbanggeec. 14Anu afo yohockanggac uameme 27 imohai bangecngo gbanggedacma feec. 15Anu Anutungo Noa yofi dema edeec, 16“Ge nga enengmedacerangifocga ngeni wageunac kemegec. 17#Fing 1:22, 28Amma gegoc yang hania hania sebifusinginagoc kecdae imoc neng nga ramaburumaka nga wiac sasawa kekecnginagoc bangecgoc wegenac kengha amma kecandae yeni wangecyununa kemedacgec. Anu yeni bangecfu fingecsahe amma seregurutoa amma kengha angkecma kpetecngina monggoc yadibeso.”
18Ifi deu Noa nga enengmedacerangifora yeni wageunac kemegec. 19Amma yang nga wiac maringo meme kecandae nga neng amma wiac kekecnginagoc bangecgoc wegenac kengha amma kecandae yeni sasawa arengnginasoc wageunac madacgec.
Noango Anutuac hosuc ohoec
20 #
Fing 12:7-8
Anu Noango Kebuac arata mema yang nga neng kongahamocgu mocgu ifi meyunudacma aratau faiyunuma Anutuacsesegerec ohoec. 21Anu Kebungo hosuc homung songeagoc imocnegemma negen negengau yofi negenec, “Bangecngicngac yenisebigboringinaunacngoc ubaherenginau negen negengnginangomangana negensima kecgecde. Ni yeneac amma bangec monggocmi soweckebade. Anu wiac kekecnginagoc sasawa yunuba homegec ifi isoc monggoc mi ambade. 22Anu bangecfu naso feengkefudesoc heihomecma fora mebesonga imoc nomangnaso nga naso gerea, kianaso nga wenacnaso, hadzing nga tofocnac imoc torokpeutorokpe feengkecbeso.”
Kasalukuyang Napili:
Fingec fingec 8: Ded
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active), Wycliffe Bible Translators, Inc. All rights reserved.