Luka 20
20
Mphambvu za Utongi wa Yezu
(Mt. 21:23-27, Mk. 11:27-33)
1Ntsiku inango, Yezu akhali mu Nyumba ya Mulungu mbakhapfundzisa mbumba, na kumwaza Mphangwa Zadidi. Na tenepo, afika penepo akulu aanyantsembe, na anyakudziwisa a Mwambo na mathubu, 2mbam'bvundza tenepa: “Kodi Iwe uli kucita pinthu penepi na mphambvu za utongi wa ani? Mbani akupasa mphambvu za utongi unowu?”
3Yezu atawira tenepa: “Ine ndisafunambo kukubvundzani. Ndipangeni: 4‘Batixmu ya Juwau ikhali ya kudzulu peno ya anthu?’ ”
5Iwo akhaketesana okha-okha mbakhalonga tenepa: “Tingalonga kuti ndi ya kudzulu, Iye anadza kabvundza kuti: ‘Mphapo thangwi yanji imwe mwakhonda kuntawira Juwau?’ 6Mbwenye tingalonga kuti: Ndi ya anthu, mbumba yonsene iyi inatimenya na myala. Thangwi iwo asatawira kuti Juwau akhali mporofetadi.”
7Na thangwi eneyo, iwo atawira tenepa: “Ife nkhabe kupidziwa kuti ikhali ya ani.”
8Na tenepo, Yezu aapanga kuti: “Ine nkhabe kukupanganimbo na pang'ono pene, kuti ndi mphambvu za utongi wa ani zinacita na Ine pinthu penepi.”
Nsanje wa Anyakulima
(Mt. 21:33-46, Mk. 12:1-12)
9Buluka penepo, Yezu alonga kuna mbumba nsanje uyu: “Mamuna m'bodzi acheka miti ya mauva m'munda mwace, mbaurikisa na anthu anango anyakulima, pidamala iye acita ulendo mbakhala ntsiku zizinji. 10Pidakwana iwo n'dzidzi wa kubulusa mauva, iye atuma nyabasa wace m'bodzi kuna anyakulima, toera ampase phindi ya misapu ya mauva. Mbwenye anyakulima am'menya, mbam'bweza cimanja-manja. 11Mwanacinthu munda atuma nyabasa unango. Mbwenye iwo am'menya pontho, mban'nyadzisa, mbam'bweza cimanja-manja. 12Na tenepo, iye atuma pontho unango wacitatu. Mbwenye anyakulima am'phekesambo, mban'thamangisa.
13“Penepo mwanacinthu munda alonga kuti: ‘Ndinacitanji? Ndinatuma mwana wanga wa pa ntima, panango iwo angamuona, anamulemedza.’
14“Mbwenye anyakulima mudaona iwo mwana, abverana okha-okha kuti: ‘Uyu ndiye mwanaciro unthaka. Tendeni timuphe, unthaka ukhale wathu.’ 15Na tenepo, iwo amponya kunja kwa munda wa mauva, mbamupha.
“Mphapo ndi ninji pinafuna kuacita mwanacinthu munda? 16Iye anabwera, mbapha anyakulima ale, mbakwata munda wa mauva mbaupasa anango.”
Na tenepo, mbumba mudabva iyo penepi yalonga kuti: “Penepi mbapileke kucitika.”
17 # 20:17 Mas. 118:22.Mbwenye Yezu aalang'anisa mwadidi mwene, mbaabvundza kuti: “Mphapo pisalongeranji pidalembwa m'Bukhu ya Mulungu kuti?
“ ‘Mwala udakhondiwa na anyakumanga nyumba,
ndiwo udadza kakhala mwala wakufunika kakamwe?’
18Onsene anagwa padzulu pa mwala uyu ananyedzeka, mbwenye ule anagwerwa na iwo, anapeyeka kudza pfumbi.”
19Anyakudziwisa a Mwambo na akulu aanyantsembe, akhapidziwa kuti nsanje unowu ukhalongera iwo. Penepo pene, iwo akhasaka kuti anam'manga tani, mbwenye akhagopa mbumba.
Kulipwa kwa Misonkho
(Mt. 22:15-22, Mk. 12:13-17)
20Na tenepo, atoma kunzonda. Atuma amuna kuna Yezu, mbakhala ninga anthu akulungama, kuti amuone ngakhala anadodomeka pa malongero ace, toera iwo akwanise kuona thangwi ya kumpereka m'manja mwa utongi wa ku Roma.
21Amuna enewa am'bvundza tenepa: “Mpfundzisi, ife tisadziwa kuti pire pinalonga imwe na pinapfundzisa imwe, ndimo mwene. Pontho tisadziwa kuti imwe nkhabe kutonga mbamulang'ana makhaliro a munthu. Mbwenye musapfundzisa njira ya Mulungu mwa ndimo mwene. 22Mphapo tipangeni: Pisatawirirwa kulipa nsonkho kuna Mambo Sezari, peno nkhabe?”
23Mbwenye Yezu, na kudziwa ucenjeri wawo, alonga tenepa: 24“Ndipangiseni kobiri ibodzi ya parata.#20:24 Na malongero a cigerego ndi: dhenaryo. Ndi kobiri ya parata ikhatambira nyabasa pa ntsiku ibodzi. Kodi nkhope na dzina iyi iri pa kobiri nja ani?” Iwo antawira kuti: “Mphya Sezari.”
25Penepo Yezu aapanga tenepa: “Pya Sezari, pasani Sezari, pya Mulungu, pasani Mulungu.”
26Iwo acimwana kuona mafala a kum'phata na iwo pamaso pa anthu. Na tenepo, amatama, mbadzumatirwa na matawiriro adacita Yezu.
Pya Thangwi ya Kulamuka pa Kufa
(Mt. 22:23-33, Mk. 12:18-27)
27Asadhusi anango, ale analonga kuti anthu nkhabe kulamuka pa kufa, afendedzera Yezu, mbampanga kuti: 28“Mpfundzisi, Mozesi asiya amala kutilembera mwambo wa kuti, mamuna angafa, mbasiya nkazi mbadzati kubala na iye, m'bale wace wa mamuna asatongwa kuti apite kumusa na manferwa wa nkazi, toera ansiyire dzindza. 29Mphapo akhalipo amuna anomwe muubale mwawo. Wakutoma, apita kumusa, mbafa mbakhonda kunsiya na ana. 30Waciwiri, 31na wacitatu, na anango, apitambo na iye kumusa. Onsene pa unomwe wawo afa mbakhonda kubala na iye ana. 32Pa kumalisira nkazi afambo. 33Mphapo, pa ntsiku ya kulamuka kwa anyakufa, nkazi unowu anadza kakhala wa ani? Thangwi pa unomwe wawo apita na iye kumusa.”
34Yezu atawira tenepa: “Pantsi pano, ndipo panacita amuna mabanja, akazi mbaperekwa m'mabanja. 35Mbwenye anthu ale adakwanira kuti apite ku dziko ya kudzulu mbalamuka pa kufa, nkhabe kudza kacitabve banja, peno kuperekwa m'mabanja. 36Thangwi anadza kakhala ninga maanju, pontho hanadza kafabve tayu. Anakhala ana a Mulungu, thangwi ndi anthu a kulamuka pa kufa. 37#20:37 Ex. 3:6.Pontho, pya kuti anyakufa analamuka, Mozesi apipangisa kale padalonga Mulungu pa thundudzi, mbacemera Mbuya kuti ndi ‘Mulungu wa Abharaamu, Mulungu wa Izaki, pontho ndi Mulungu wa Djakobo.’ 38Penepi pisapangisa kuti Mulungu ndi Mulungu wa am'maso, si Mulungu wa anyakufa tayu. Thangwi kuna Iye onsene ali m'maso.”
39Anango anyakudziwisa a mwambo alonga tenepa: “Mwatawira mwadidi, Mpfundzisi!” 40Penepo, nkhabe munthu unango akhali na cipapu ca kum'bvundzisa.
Kirixtu ndi Mbuya wa Dhavidhi
(Mt. 22:41-46, Mk. 12:35-37)
41Na tenepo, Yezu aabvundza kuti: “Pisalongerwanji kuti Kirixtu ndi Mwana wa Dhavidhi?”
42“#20:42,43 Mas. 110:1.Thangwi iye ene Dhavidhi alonga m'bukhu ya Masalimu kuti:
“ ‘Mbuya alonga
kuna Mbuya wanga kuti:
Khala ku nkono wanga wa madyo,
43mpaka pana ikha ine
anyamalwa ako,
ninga cinthu cakupwandira
manyalo ako.’
44Na tenepo, ngakhala Dhavidhi asancemera ‘Mbuya,’ anakhala tani pontho mwana wace?”
45Yezu mukhabveserwa Iye na mbumba yonsene, apanga anyakupfundza ace kuti: 46“Citani mphole na anyakudziwisa a Mwambo. Iwo asafuna kufamba na nguwo zakulapha, asafuna pikulu kakamwe kumwanyikwa na anthu m'mphambano, asafuna kusankhula mipando yakutoma mu nyumba za kuphemberera, pontho na kusankhula mbuto za kulemebza m'maphwandu. 47Asatapata nyumba za akazi adaferwa na amuna awo, mbaadhobha na kucita miphembero yakukhonda kugwandira. Anthu enewa, anati athabuswe pikulu kakamwe.”
Kasalukuyang Napili:
Luka 20: sehNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2014, Wycliffe Bible Translators, Inc. All rights reserved.
